Eyemena Mukokeshi Mutambe Bunene wa diulu ne buloba

1. Nntatu kayi ivua mikuate Yobo?

YOBO, muntu wa ditabuja, wakafuisha bana bende bonso ne bena mudimu ba bungi, kujimijaye bubanji, ne yeye muine kupetaye disama dibi menemene; lumu luende kunyangukalu kabidi bikole. “Balunda” bende bakamuamba malu akamutekesha mu mikolo, tòo ne mukajende kumuambila ne: “diula Nzambi, ufue.” (Yobo 2:9; 15:4, 5; 19:1-3) Ntatu yonso eyi ivua pamuapa mitekeshe ditabuja divua nadi Yobo kudi Nzambi mulelela, bimufikishe ku diela meji ne: Nzambi kena mua kukuba bantu badi bamunange ne bamuenzela mudimu to.

2-3. Padi ntatu itukuata, tudi mua kutuadija kuela meji kayi? Mukanda wa Yobo udi utulongesha tshinyi?

² Tudi mu “bikondo bia malu makole bidi bikole mua kupita nabi.” (2 Tim. 3:1) Ke bualu kayi anu bu Yobo, kudi misangu itudi mua kutuilangana ne ntatu mikole. Padi ntatu itukuata milondangane, bidi mua kutubungamija bikole menemene, tupanga mua kuyitantamena, tuamba ne: kuetu kuajiki. Ntatu ya mushindu eu idi mua kutufikisha ku diela meji ne: Yehowa ki mmutunange kabidi, ne ki mmusue kutuambuluisha to.

³ Bikalabi ne: bikadi bikufikile bua kuela meji mushindu au, kuteketshi mu mikolo to. Yobo wakapeta dilongesha dia ne: Yehowa katu ulekela badi bamulamate to. Tueyemenayi petu Yehowa, batuishibue ne: neatuambuluishe. Tumonayi mpindieu mudi mukanda wa Yobo utulongesha ne: tudi mua kutungunuka ne kueyemena Yehowa bualu udi Mukokeshi Mutambe Bunene wa diulu ne buloba. Udi utulongesha kabidi ne: Yehowa udi ne bukole bua kuenza bua ne: tshionso tshidiye wamba tshienzeke, ne udi utupesha bionso bidi bikengela bua tuikale nende mu malanda mimpe.

SATANA WAKABUELA MUNKATSHI MUABU

4. Nnganyi wakabuela pende mu tshisangilu tshivua tshienzeke mu diulu tshidibu bakuile mu mukanda wa Yobo?

⁴ Dimue dituku, ‘bana ba balume ba Nzambi mulelela’ bakadisangisha mu diulu kumpala kua Yehowa. Bible udi wamba ne: “Satana pende wakabuela munkatshi muabu.” (Yobo 1:6) Eu ke musangu wa kumpala udi Bible utela dîna “Satana.” Badi bamubikila nanku bualu udi uluisha Yehowa. Tshikondo atshi, katshivua kabidi muana wa Nzambi uvua ne lulamatu kudiye to. Ukavua mulue muena lukuna wa Nzambi, wa banjelu ne bantu ba lulamatu. Tshivua Nzambi muambe mu Genese 3:15 tshidi tshileja ne: Satana ki ngua mu dîku dia bifukibua biende bia mu nyuma bidi bienza “mukaji” uvua ne bua kulela “muana” to.

5. Tshivua Satana muambe ne mushindu uvua Yehowa mumuandamune bidi bitulongesha tshinyi?

⁵ Yehowa wakafundisha malu avuabu bambe mu tshisangilu tshivua tshienzeke mu diulu atshi mu Bible. Tshivua Satana muambe tshidi tshileja mudiye muntu mubi udi mukine batendeledi ba Yehowa. (Yobo 1:9; fuanyikija ne Buakabuluibua 12:10.) Mushindu uvua Yehowa muandamune Satana udi utulongesha ne: Yehowa utu wenza mudimu ne bukole buende budi kabuyi ne mikalu bua kuenza anu malu makane. Udi utulongesha kabidi ne: Wa Bukole Buonso utu welela bantu mikalu.

YEHOWA UTU WELELANGANA MIKALU

6. Mmunyi muvua Yehowa muleje ne: uvua ne Bukokeshi buonso mu tshisangilu tshivua tshienzeke mu diulu? (Yobo 1:7, 8)

⁶ Bala Yobo 1:7, 8. Yehowa ke uvua ne bukokeshi buonso mu tshisangilu atshi. Uvua mumanye bimpe ne: Satana uvua musue kuluisha Yobo. Ke bualu kayi pakatuadijaye kuakula, wakanji kumuebeja ne: “Udi mutangile muena mudimu wanyi Yobo anyi?” Tumonayi muvua Yehowa muenze mudimu ne bukole buende bua kuambuluisha Yobo.

7. Bilondeshile Yobo 1:10, 11, ntshinyi tshivua Satana muambe bua tshidi tshisaka bantu bua kuenzela Yehowa mudimu?

⁷ Bala Yobo 1:10, 11. Yehowa udi Mukalenge wa bukole buonso mu diulu ne pa buloba. Utu wenza mudimu ne bukole buende mu mushindu udiye umona ne: mmuakane. (Yel. 32:17; Dan. 4:35) Nansha nanku, Satana wakaleja ne: Yehowa uvua muenze mudimu bibi ne bukole buende. Mu bulelela, uvua usua kuamba ne: Nzambi utu ukosa bantu mishiku, ubapesha bintu bua bamuenzele mudimu. Uvua usua kuamba kabidi ne: bantu badi pabu bamuenzela mudimu anu bua bintu bidiye ubapesha abi. Tshiakenza Yehowa ntshinyi?

8-9. Mmikalu kayi ivua Yehowa muelele Satana? Bua tshinyi? (Yobo 1:12) (Tangila kabidi tshimfuanyi.)

⁸ Bala Yobo 1:12. Yehowa wakapesha Satana mpunga bua kujadika bivuaye wamba abi, kadi wakamuelela mikalu. Wakambila Satana bua Yobo ne: “Kumulengi tshianza tshiebe to!” Banjelu bonso bavua bumvue tshivuaye mumuambile atshi. Satana kavua ne bukole bua kushipa mukenji uvuabu bamuelele au to, nansha lelu eu kena anu nabu to. Nunku Yehowa wakenza mudimu ne bukole buende bua kukuba Yobo, kulejaye mudiye Nzambi wa malu makane udi munange bantu.

⁹ Satana wakatua mênu mu mutshi, bualu Yobo wakashala anu mulamate Tatu wende wa mu diulu. (Yobo 1:22) Kadi Satana uvua musue anu kutungunuka ne kuteta Yobo.

10. Bua tshinyi Yehowa wakanyishila Satana bua atete kabidi Yobo? (Yobo 2:2-6)

¹⁰ Bala Yobo 2:2-6. Satana wakenzela kabidi Yobo bualu bubi menemene bua amufikishe ku dilekela Yehowa. Satana uvua wela meji ne: Yobo yeye anu mumone lufu ne mêsu, udi ulekela Nzambi. Bua kuleja muvua Satana muena dishima, Yehowa wakamuanyishila bua kutua Yobo disama dibi menemene. Kadi wakamuelela kabidi mikalu, kumuambilaye ne: bua “muoyo wende kuwangatshi to.” Satana kavua ne bukole bua kusambuka mikalu ivua Nzambi mumuelele to. Nunku abi biakaleja kabidi ne: Yehowa udi Nzambi Wa Bukole Buonso.

YEHOWA WAKAJIKIJA MAKENGA A YOBO

11. Mmunyi muvua Yehowa mufute Yobo pakajikijaye makenga ende? (Yobo 42:10-13)

¹¹ Bala Yobo 42:10-13. Bu muvua Yobo muleje ne: neashale anu ne lulamatu, Yehowa kakanyishila kabidi Satana bua kumuteta to. Wakajikija makenga a Yobo. Satana kavua ne bukole bua kupangisha Yehowa bua kukuba Yobo ne kumubenesha to.

12. Fila tshilejilu tshia malu mimpe avua bantu bapete bua muvuabu beyemene Yehowa.

¹² Bantu ba bungi mbadimuenene mudi Yehowa muenze mudimu ne bukole buende bua kubambuluisha mu matuku a ku nshikidilu aa. Tshilejilu mu 1945, basalayi ba mu Allemagne bakenzeja Bantemu ba Yehowa 230 bua kuenza luendu lule ku makasa, bumbuka nabu mu buloko ne meji a ne: bafuile mu luendu alu. Kadi Ntemu nansha umue kakafua to. Bana betu abu bakafunda bua diteta dikole divua dibakuate adi, baleja ne: Yehowa wakabapandisha anu muvuaye mupandishe bena Yuda basatu mu tshikutu tshia kapia kakole, bapatukamu kabayi nansha banunka muishi to. Pavua Yehowa mubapandishe pabu, ditabuja diabu diakakola kupita ne kumpala. Bakamona kabidi ne: Yehowa uvua mubasungile anu muvuaye musungile Danyele mu buina bua ntambue. Kubangila anu dîba adi, bakadisuika bua kuenzela Yehowa mudimu bua kashidi. Buabu bobu, kutungunuka ne kumuenzelawu nanku ke difutu ditambe buimpe divuabu bapete.​—Fuanyikija ne Danyele 3:27; 6:22.

13. Ndishindika kayi diudi ne bua kuikala nadi paudi utuilangana ne ntatu? (Tangila kabidi bimfuanyi.)

¹³ Kudi misangu itudi mua kutuilangana petu ne ntatu mikole. (1 Pet. 5:8-10) Padiyi itukuata, pamuapa tudi mua kudiumvua bazengele, tuela meji ne: kayakujika to. Kadi bualu bua Yobo budi mua kutuambuluisha. Mbimpe tuikale bashindike ne: Yehowa udi ne bukole bua kujikija ntatu yetu lelu eu anyi mu bulongolodi bupiabupia. Ukadi musungule dîba diabutulaye ndongoluelu mubi wa malu eu; pakumbanadi, kakusakidila munite nansha umue to.

YEHOWA MMUNANGE BATENDELEDI BENDE BA LULAMATU

14-15. Yehowa utu musue kuenzela batendeledi bende ba lulamatu tshinyi? Bua tshinyi? (Yobo 14:15) (Tangila kabidi tshimfuanyi.)

¹⁴ Bala Yobo 14:15. Tatu wetu wa mu diulu utu ulamata bantu badi bamulamate ne mmubanange bikole. Bobu bafue, neababishe ku lufu, ne bantu bonso nebumvue disanka dia bungi bua bualu abu.​—Yesh. 65:17.

¹⁵ Nansha mutshivua Yobo anu ne muoyo mu buloba bua Satana ebu, Bible udi utuambila ne: Yehowa wakamuondapa, kumupeshaye bintu bia bungi bipite bivuaye nabi kumpala. Bionso bivuaye mumuenzelabi bivua kadiosha ka malu amuenzelaye matuku atshilualua. Yehowa wakaleja muvuaye musue bua batendeledi bende ba lulamatu bikale ne disanka. Mu bulelela, Yehowa neapeshe bantu bonso badi ne lulamatu kudiye mpunga wa kupeta muoyo mupuangane mu mparadizu pa buloba apa. (Buak. 21:3, 4) Bu mudiye Mukokeshi Mutambe Bunene wa diulu ne buloba, mmusue kuenza nanku. Kumanya bualu ebu kudi kutuambuluisha bua kunanukila mu ntatu.

16. Mbualu kayi bukuabu budi butusaka bua kueyemena Yehowa?

¹⁶ Yobo wakalua anu kufua, nansha muvua Yehowa muanji kulepesha matuku ende a muoyo. Kadi bu mudi Yehowa muikale Wa Bukole Buonso, udi ne bukole bua kumubisha ku lufu. (Dut. 32:39) Nunku kakuena muntu udi mua kumupangisha bua kubisha bantu badiye munange ku lufu to. Neababishe ku lufu mu tshikondo tshikadiye mulongolole.​—Lomo 8:38, 39.

EYEMENA YEHOWA NE MUOYO MUJIMA

17. Ntshinyi tshidi tshitujadikila ne: Satana kena mua kubutula batendeledi ba Yehowa?

¹⁷ Bualu bua Yobo budi butulongesha malu a bungi adi atuambuluisha bua kueyemena Yehowa ne muoyo mujima. Tudi ne dianyisha dia bungi kudi Yehowa bua mudiye kayi muanyishile Satana bua kubutula bantu bende. Udi Nzambi Mutambe Bunene bualu lelu bantu batue ku miliyo 9 badi bamuenzela mudimu ne lulamatu. Mbulamatadi ya bungi ya bukole ne bamfumu ba bitendelelu mbenze muabu muonso, misangu ne misangu bua kupangisha bantu ba Yehowa bua kumutendelela ne kuyisha lumu luimpe. Kadi ki mbakumbane to, bualu Yehowa uvua wambuluisha bantu bende abu. (Yesh. 54:17) Kakuena tshidi mua kutupangisha bua kuambila bantu mudi Yehowa muikale Nzambi mulelela, ne mudi Satana muikale muena dishima ne mushipianganyi to. Nansha tuetu bafue, Yehowa neatubishe ku lufu tuetu bashale ne lulamatu kudiye.​—Hosh. 13:14.

18. Bua tshinyi tudi ne bua kuikala ne dikima, katuyi ne buôwa bua malu enzeka kumpala eku?

¹⁸ Kuelangana meji a bualu bua Yobo kudi kutushindikila ne: Yehowa neatuambuluishe bua kupeta dikima, katuyi ne buôwa bua malu enzeka kumpala eku to. Mu dikenga dinene, Satana ne biluilu biende nebele meji ne: badi mua kutshimuna bantu ba Nzambi bipepele. Kadi anu bu muvuabi bua Yobo, Yehowa neikale ne malu onso mu bianza, kakuanyishila Satana bua kukebela bantu bende ntatu yashala kashidi to. Yehowa ukadi pa kujikija makenga adi Satana mukebele bantu. Yezu neele Satana ne bademon bende mu dijimba dile bua bidimu 1000. (Luka 8:31; Buak. 20:1-3) Ndekelu wa bionso, nebamubutule yeye ne bena diende bua kashidi. (Buak. 20:10) Neazaze mutu wa Satana anu mukavua Yehowa mulaye. Nebamubutule musangu umue bua kashidi.​—Gen. 3:15; Lomo 16:20.

19. Yehowa neafute bantu bonso badi bamueyemena ne muoyo mujima mushindu kayi? (Tangila kabidi tshimfuanyi.)

¹⁹ Batendeledi balelela ba Yehowa mbindile ne muoyo kuulu kuulu bua kupeta muoyo mupuangane ne disanka dilelela mu bulongolodi bupiabupia. Netuikale ne nsombelu mulenga wa dikema! Yehowa mmutulaye, wamba ne: “Tangilayi! Ndi ngenda mvuija bintu bionso bipiabipia.” (Buak. 21:5) Bidi biumvuija tshinyi? Bidi biumvuija ne: tshikondo atshi, Satana ne bademon bende kabakuikalaku kabidi bua kukebela bantu ntatu ne kubafikisha ku dienza malu mabi to. Netupete disulakana dia dikema! Tunyinganyinga tudi tutupangisha bua kulala butuku lelu katuakuikala kabidi natu to. Bantu bapanduka ku Armagedone nebamone bishima bia bungi. Bantu bonso badi basama nebondopibue. Ndekelu wa bionso, nebatuadije kubisha bantu ku lufu. Netuikale ne nsombelu uvua Tatu wetu wa mu diulu musue bua tuikale nende.

20. Udi mudisuike bua kuenza tshinyi?

²⁰ Pamuapa netutuilangane ne ntatu ya bungi mu matuku a ku nshikidilu aa, nanku tuikalayi ne dikima ne tudisuikayi bua kueyemena Yehowa ne muoyo mujima ne bua kumutumikila. Tulejayi mutudi banange Tatu wetu wa mu diulu ne mudi Satana muena dishima. Tuikalayi bashindike ne: tuetu bashale ne lulamatu kudi Yehowa, neatufute malu a bungi mimpe kumpala eku bualu udi ne dijinga dikole dia kufuta bantu badi bamuenzela mudimu ne lulamatu, kakuyi tshidi mua kumupangisha bua kubafuta to.