1 Jo-Korintho

6 Be nitie ng’ato kuomu ma nigi ywaruok moro e kinde gi nyawadgi to ohedhore dhi mondo oyalgi e nyim joma ok kare, to ok e nyim joma ler? 2 Koso ok ung’eyo ni joma ler biro ng’ado ne piny bura? To ka un e ma onego ung’ad ne piny bura, donge un gi nyalo moromo mar yalo buche e wi weche ma tindotindo, koso? 3 Donge ung’eyo ni wanayal malaike e bura? Kare ang’o ma dimonwa timo kamano e wi weche mag ngima ma sani? 4 Omiyo, ka un gi weche mag ngima ma sani monego yal e bura, be joma kanyakla ok kwan ka gimoro e ma uketo kaka jong’ad-bura? 5 Awacho mae mondo akuod wiu. Be dibed ni onge kata ng’ato achiel mariek e kindu ma nyalo yalo bura e kind owetene? 6 Kar mano, owadwa donjo ne owadwa e od ng’ado bura, kendo mana e nyim joma ok oyie!

7 Kuom adier, bura oseloyou sama udonjo ne joweteu. Marang’o ok uwe mondo otimnu marach? Marang’o ok uwe mondo omau amaya? 8 Kar mano, utimo maricho kendo utiyo gi wuond e mayo joweteu, to ni mano utimo ne owete!

9 Koso ok ung’eyo ni joma ok kare ok noyud pok e Pinyruodh Nyasaye? Kik wuondu. Joterruok, kata joma lamo sanamu, kata jochode, kata chwo ma ndhaga,* kata chwo ma terore gi chwo wetegi, 10 kata jokuoge, kata joma igi lach, kata jomer, kata joyenyo, kata jomecho, ok noyud pok e Pinyruodh Nyasaye. 11 To mano e kaka moko kuomu ne chal. To koro oselwoku maler; kendo osepwodhu mi ubedo maler; bende, osekwanu kaka joma kare e nying Ruoth Yesu Kristo kendo gi roho maler mar Nyasachwa.

12 Oyiena timo gik moko duto, to ok ni gik moko duto konyo. Oyiena timo gik moko duto, to ok abi weyo gimoro amora oketa e bwo tekone. 13 Chiemo en mar ich, kendo ich en mar chiemo, to Nyasaye biro miyo giduto gibed kayiem nono. Ringruok ok en mar terruok, to en mar tiyo ne Ruodhwa, kendo Ruodhwa konyo ringruok. 14 To Nyasaye nochiero Ruodhwa, to wan bende obiro chierowa waa e tho kokalo kuom tekone.

15 Ok ung’eyo ni ringreu gin fuonni mag Kristo? Ka en kamano, be onego akaw fuonni mag Kristo kendo riwogi gi ringre dhako ma ndhaga?* Mano kik timre ngang’! 16 Koso ok ung’eyo ni ng’at ma riwore gi dhako ma ndhaga,* obedo ringruok achiel kode? Nimar Nyasaye wacho ni, “ji ariyogo nobed ringruok achiel.” 17 To ng’ato ang’ata ma riwore gi Ruodhwa, obedo e paro achiel kode. 18 Ringuru ua e terruok. Richo moro amora ma ng’ato timo, richono ni oko mar ringrene, to ng’ato ang’ata ma nigi tim mar terruok, otimo richo ne ringrene owuon. 19 Koso ok ung’eyo ni ringreu en hekalu mar roho maler manie iu ma Nyasaye nomiyou? Bende, ok un magu uwegi 20 nimar nong’iewu gi nengo. Kuom mano, miuru Nyasaye duong’ e ringreu.