Exodus

21 “Hêngte hi an hnêna i hrilh tûr rorêl dân tûr kaihhruainate chu a ni:

2 “Hebrai mi sala in lei chuan, kum ruk chhûng sal angin in rawng a bâwl tûr a ni a, a kum sarihnaah chuan tlanna man eng mah phût lovin in chhuah zalên tûr a ni. 3 Amah chauhva lei a nih chuan, amah chauhvin a chhuak tûr a ni a. A nupui nêna lei an nih erawh chuan, a nupui nên an chhuak tûr a ni. 4 A puin nupui a neihsak a, a nupui chuan fate a hrinsak a nih chuan amah chauhvin a chhuak tûr a ni a, a nupui leh a fate chu a pu tate an ni ang. 5 Mahse, sal chuan, ‘Ka pu te, ka nupui te, ka fate ka hmangaih êm avângin chhuah zalen ka duh lo,’ a tih tlat chuan, 6 a pu chuan Pathian dik hmaah a hruai tûr a ni. Chumi hnu chuan, kawngkâah emaw, kawngka biangah emaw hruaiin a beng chu a verhsak ang a; tichuan, a dam chhûngin a sal a ni tawh ang.

7 “Miin a fanu sala a hralh chuan, chhuah zalen a nih theih dân chu mipa salte nên a inang lo vang. 8 A pu chuan a duh leh loh va, hmeia a ruat loh bawk a, mi dang hnêna hralh chhâwn leh a duh chuan, a lei chhan anga a tih loh avângin ram dang mi hnêna hralh theihna a nei lo vang. 9 A fapa nupui atâna a lei a nih chuan fanu angin a en tûr a ni. 10 A fapa chuan* nupui dang a neih leh pawhin, a nupui hmasa zâwk chu ei tûrte leh thawmhnaw hâk tûrte a pêk chhunzawm a ngaih bâkah, pasal a nih anga a tih tûr dangte pawh a tichhunzawm zêl tûr a ni. 11 Chûng thil pathumte chu a tihsak loh chuan tlanna man eng mah phût lovin a chhuah zalên tûr a ni.

12 “Tu pawhin mi dang kut thlâka a tihhlum chuan, ani pawh tihhlum ve tûr a ni. 13 Mahse, tum rêng vâng ni lova tual a thah a, chu thil thleng chu kei Pathian dik hian ka lo dan loh bawk chuan, a tlânchhiat theihna tûr hmun ka ruatsak ang. 14 Tu pawhin a mihringpui chungah nasa taka a thinura tum rêng vânga tual a thah chuan, ka maichâmah inhumhimna a zawn pawhin ani chu in tihlum tûr a ni. 15 Tu pawh a nu emaw, a pa emaw kutthlâktu chu tihhlum tûr a ni.

16 “Tu pawhin a mihringpui ru bova a zuar emaw, a hrêng reng emaw a nih chuan, ani chu tihhlum tûr a ni.

17 “Tu pawh a nu emaw, a pa emaw ânchhe lawhtu apiang chu tihhlum tûr a ni.

18 “Mi pahnih inhnial buaiin, pakhat zâwk chuan lungin chhu emaw, hnek emaw ta se, a tuartu chu a thi lo a nih pawhin khum beta a awm chuan hetiang hian in ti tûr a ni: 19 A tho thei emaw, tiang hawla pâwn a chhuak thei emaw a nih chuan, kutthlâktu chu hrem lohva chhuah tûr a ni a. Mahse, a dam fel hma chu hna a thawh theih loh chhûnga a hlawh tûr ang zawng zawng zângnadawmna atân a pe tûr a ni.

20 “Tu pawhin a sal mipa emaw, hmeichhia emaw tianga a vuaka a thih chuan, phuba in lâksak tûr a ni. 21 Mahse, sal chu ni khat emaw, ni hnih emaw a la dam chuan, a pu pawisaa lei a nih avângin phuba in lâksak tûr a ni lo.

22 “Mi pahnih insualin hmeichhe nau pai tina palh ta se, thihna* êm thleng lo mah se, thla kim lova nau a hrin phah chuan chu hmeichhe pasal phût ang zât chu rorêltute thu tlûknain a tinatu chuan a pe tûr a ni. 23 Mahse, nu emaw, a nau pai emaw chungah thihna a thleng a nih chuan nunna aiah nunna, 24 mit aiah mit, hâ aiah hâ, kut aiah kut, kê aiah kê, 25 tihkan aiah tihkan, hliam aiah hliam, vuak aiah vuak in tawrhtîr tûr a ni.

26 “Miin a sal mipa emaw, hmeichhia emaw mit a vuaksak a, a mit a tihdelsak chuan, a mit a tihdelsak aiah a chhuah zalên tûr a ni a. 27 A sal mipa emaw, hmeichhia emaw hâ a vuak balsak chuan, a hâ a vuak balsak aiah a chhuah zalên tûr a ni.

28 “Bâwng pain mi a sîk hlum chuan bâwng pa chu lunga den hlum tûr a ni a, a sa in ei tûr a ni lo; a neitu erawh chu hrem lohvin in chhuah tûr a ni. 29 Mahse, bâwng pain mi sîk a chîn a, a neitu chuan hriattîr a ni tawh chung pawha a khung duh lohva mi a sîk hlum chuan, bâwng pa chu den hlum tûr a ni a, a neitu pawh tihhlum bawk tûr a ni. 30 Mahse, a neitu chu a nunna tlan nân thil dang an phût a nih chuan, an phût ang zawng zawng chu a pe tûr a ni. 31 Bâwngin mi fapa emaw, fanu emaw a sîk hlum chuan, he kaihhruaina ang tho hian a neitu chungah ro in rêl tûr a ni. 32 Mahse, bâwng pain mi sal a si hlum a nih chuan, a neitu chuan sal neitu hnênah sekel* 30 a pe tûr a ni a, bâwng pa chu den hlum tûr a ni.

33 “Miin khur chhîn a hawn emaw, khur thar a laih emawin a chhin leh lohva bâwng pa emaw, sabengtung emaw a tlâk hlum chuan, 34 khur neitu chuan zângnadawmna a pe tûr a ni a. Ran neitu hnênah a man zât a chawi ang a, ran thi chu a ta a lo ni ang. 35 Tu emaw bâwngin mi bâwng a sîk hlum chuan, a si hlumtu chu hralhin a man an insem tûr a ni a; bâwng thi pawh chu an insem bawk tûr a ni. 36 Mahse, bâwng pa chu mi sîk chîng a ni tih hre reng chunga a neituin a khung duh loh chuan, bâwng pa aiah bâwng pa vêk a pe tûr a ni a; tichuan, ran thi chu a ta a lo ni ang.