Exodus

36 “Bezalela chuan Oholiaba leh Jehova’n thu a pêk anga rawngbâwlna thianghlima hna tinrêng thawh dân tûr hre tûra Jehova’n finna leh hriatthiamna a pêk, mi themthiam zawng zawngte chu a thawhpui ang,” a ti a.

2 Tichuan, Mosia chuan Bezalela te, Oholiaba te leh, chu hna thawk tûra an thinlunga inpêk duhna nei zawng zawng, Jehova’n an thinlunga finna a dah mi themthiam zawng zawngte chu a ko khâwm a. 3 Anni chuan rawngbâwlna thianghlim nêna inkûngkaih thilte siam nân, Israel mite thawhlâwm thawh zawng zawng chu Mosia hnên aṭangin an la a. Mahse, Israel mipuite chuan Mosia hnênah tûk tin mahni duhthuin thilpêkte an la pe chhunzawm zêl a.

4 Hna thianghlim an ṭan hnuah chuan, mi themthiamte chu an lo kal belh zêl a. 5 Anni chuan Mosia hnênah: “Jehova’n thawk tûra min tih hna thawh nâna mamawh aia tam mipuite hian an rawn la khâwm a ni,” an ti a. 6 Tin, Mosia chuan awmhmun khuarna pum puiah, “Thawhlâwm thianghlim rawn thawh belh tawh suh u,” tiin a puantîr a. Chumi hnu chuan, mipuite’n eng mah an thawh belh thei ta lo va. 7 Thawhlâwmte chu hna zawng zawng thawh nâna mamawh aia tam a ni.

8 Tichuan, mi themthiam zawng zawngte chuan la zai sîn te, la pâwl te, la sen duk te, la sen lârtein biak bûk puanzâr tûr sâwm an siam a, ani* chuan cherub lemte zepin chûngte chu a lo cheimawi a. 9 Biak bûk puanzâr tinte chu tawng 28-a sei, tawng 4-a hlai a ni a. Puanzâr zawng zawngte chu a intiat vek a ni. 10 Tichuan, puanzâr sâwmte chu panga ve vein a ṭhui zawm a. 11 Chumi hnuah, chûng puanzâr ṭhui zawm pahnih tlâng ve veah chuan la pâwlin a inzawmna tûr bengte a siam a. 12 Chûng a bengte chu a inzawmna tûr puan tlângahte chuan a inzâwnin 50 ve ve a siam a. 13 Rangkachakin a bah zawmna tûr 50 siamin, puanzârte chu a bah zawm a; tichuan, biak bûk chu a lo pum ta a.

14 Kêl hmulin biak bûk khuhna tûr puanzâr 11 a siam bawk a. 15 Chûng puanzârte chu inchen vekin tawng 30-a sei leh tawng 4-a hlaiin a siam a ni. 16 Puanzâr pangate chu a ṭhui zawm a, chutiang bawkin puanzâr parukte chu a ṭhui zawm bawk a. 17 Chûng puanzâr pahnih ṭhui zawm tlâng ve veah chuan, a inzawmna tûr beng 50 ve ve a siam a. 18 Puanzâr pakhat a lo nih theih nân, dâr senin a bah zawmna tûr 50 a siam a ni.

19 Rawng sena luan berâm pa vunin biak bûk khuhna tûr a siam a, chumi thuahna tûr chu seal* vunin a siam bawk a.

20 Biak bûk bangrel tungchhote chu acacia thingin* a siam a. 21 Chûng bangrel tinte chu tawng sâwma sâng leh tawng khat leh a chanvea hlai a ni. 22 Bangrel tinte chu thing pahnih inkawp zêl a ni a, chutiang chuan biak bûka bangrel tungchho zawng zawngte chu a siam a ni. 23 Tichuan, chhim lamah bangrel tungchho 20 chhim lam hawiin a siam a. 24 Chûngte atân chuan tangkaruaa siam nghahchhan 40 a siam a, a rel pakhata thing pahnih inkawp atân nghahchhan pakhat ve ve a siam a; chutiang chuan, bangrel tungchho tinin nghahchhan pahnih zêl a nei a ni. 25 Biak bûk hmâr lam atân bangrel tungchho 20 a siam a, 26 pakhat tân nghahchhan pahnih zêl a siam a, chutiang chuan bangrel tungchho zawng zawng tân tangkaruain nghahchhan 40 a siam a ni.

27 Biak bûk thlang lam atân bangrel tungchho paruk a siam a. 28 Biak bûk thlang lam kil ve veah pawh a sîra ban atân bangrel tungchho pahnih a siam bawk a. 29 Chûng bante chu a mawng aṭanga a chhîp, a beng hmasa ber awmna thlengin a thuah a, chutiang chuan a sîra ban pahnihte chu a siam a ni. 30 Chuvângin, bangrel tungchho pariat leh tangkaruaa siam nghahchhan 16 a awm a, bangrel tungchho pakhat hnuaiah nghahchhan pahnih zêl a awm a ni.

31 Biak bûk chhim lama bangrel tungchhote man khâwmtu tûr acacia thingin thing tlâwn panga a siam a, 32 hmâr lam leh khawthlang lama bangrel tungchhote man khâwmtu tûr panga ve ve a siam bawk a. 33 Chumi man khâwmtu atâna a laia rawlh tûr chu a tluanin thing tlâwn pakhatin a siam a ni. 34 Bangrel tungchhote chu rangkachakin a luan a, chutah chuan a man khâwmtu thing tlâwn rawlh luhna tûr rangkachakin a bengte a siam a, thing tlâwnte chu rangkachakin a luan bawk a.

35 La pâwl te, la sen duk te, la sen lâr te, la zai sîntein puanzâr a siam a, chutah chuan cherub lemte zepin a cheimawi bawk a. 36 A zârna tûr ban pali acacia thinga siamin, rangkachakin a luan a, rangkachakin a bahna tûr a siam a, tangkaruain a nghahchhan tûr a siam bawk a ni. 37 Biak bûk luhnaa puanzâr chu la pâwl te, la sen duk te, la sen lâr te, la zai sîntein a tah kawp a, 38 a zârna tûr ban panga leh a bahna tûr a siam bawk a. Ban pangate chhîp leh a inzawmna lai chu rangkachakin a luan a, a nghahchhan pangate erawh chu dâr sen a ni thung.