Leviticus

26 “‘In tân hlutna nei lo pathiante in siam tûr a ni lo va, milem ker emaw, lungphun emaw in siam tûr a ni hek lo. Chibai bûk atân in ramah chuan lunga siam milimte in dah tûr a ni lo, kei hi in Pathian Jehova ka ni si a. 2 Ka sabbath-te in serh tûr a ni a, ka hmun thianghlim in zah tûr a ni. Kei hi Jehova ka ni.

3 “‘Ka dânte leh ka thupêkte zâwma in nunpui reng chuan, 4 a hun takah ruah ka sûrtîr ang a, ram chuan rah a chhuah ang a, theite pawh nasa takin a rah ang. 5 In grêp in lawh hun thlenga seng tûr khawpa tam buh in nei ang a, leileh hun thlenga lawh tûr khawpa tam grêp in nei bawk ang. Tlai takin in chhang in ei ang a, in ramah chuan râlmuang takin in awm ang. 6 In ramah chuan remna ka awmtîr ang a, tihlautu che u awm lovin in mu ang. In ram aṭang chuan ramsa kawlhte ka hnawt bo vang a, hmêlma tu mahin an rawn bei lo vang che u. 7 In hmêlmate chu in ûm ang a, in hmaah ngûnhnâma tihhlumin an awm ang. 8 Mi pangain mi 100 in ûm ang a, mi 100-in mi 10,000 in ûm ang. In hmêlmate chu in hmaah ngûnhnâma tihhlumin an awm ang.

9 “‘Ka duhsakna in dawng ang a, chi tam tak thlahtîr che uin nasa takin ka tipung ang che u. Tin, in hnêna ka thuthlung pawh ka vawng reng bawk ang. 10 Kum hmasaa in thil thar chhuahte in ei lai mêkin, in thar chhuah thar lâmte dahna tûrin a hluite chu in thiar chhuah a ngai ang. 11 In zîngah ka biak bûk ka dah ang a, ka thlahthlam lo vang che u. 12 In zîngah ka awm ang a, in Pathian ka ni ang. Nangni pawh ka mite in ni ang. 13 Kei hi in Pathian Jehova, an bâwih in nih tawh lohna tûra Aigupta ram aṭanga hruai chhuaktu che u ka ni. In nghâwngkawl bahte ka tihtliahsak che u a, ding charin ka kaltîr tâk che u hi.

14 “‘Amaherawhchu, ka thu in âwih loh emaw, chûng thupêk zawng zawngte chu in zawm duh loh emaw, 15 ka dânte in hnâwl emaw, ka rorêl dân tûr kaihhruainate in pawm loh avânga ka thupêk zawng zawngte in zawm loh emaw, ka thuthlung in bawhchhia emaw a nih chuan, 16 in chungah hêng thilte hi ka thlentîr ang: manganna te, ngawr natna* te, khawsiktein ka hrem ang che u. Chu chuan in mit a tifiah lovin a tichau vang che u. Chî in tuhte chu in hmêlmate’n an ei dâwn avângin eng mah lo mai a ni ang. 17 Ka hnâwl ang che u a, in hmêlmate’n an hneh ang che u. Nangmahni hawtute chuan an awpbet ang che u a, ûm lohvin in tlânchhia ang.

18 “‘Chuti chung pawha min ngaithla duh lo a nih chuan, in sualna lêt sariha nain ka hrem ang che u. 19 In luhlul chapona chu ka tichhia ang a, in vânte chu thîr ang* leh in leite chu dârsen angin* ka siam ang. 20 In ramin eng mah a thar chhuah dâwn loh avâng leh, in thei kûngte pawhin rah a chhuah dâwn loh avângin in thawkrim thlâwn mai a ni ang.

21 “‘Min kalh zâwnga in awm a, min la ngaithla duh lo cheu a nih chuan, in sualna ang zêlin a lêt sariha nain ka hrem ang che u. 22 In zîngah ramsa kawlhte ka tîr ang a, in fate leh in ran vulhte an seh hlumsak che u anga in tlêm phah ang, in kawngte chu zawhtu awm lovin a awm ang.

23 “‘Chûng thil zawng zawng thlen hnu pawha siam ṭhat ka tumna che u in pawm duh lohva, min kalh zâwnga in awm luih tlat chuan, 24 kei pawh nangmahni kalh zâwngin ka awm ang a, in sualnate avângin keimah ngeiin a lêt sariha nain ka hrem ang che u. 25 Ka thuthlung in bawhchhiat avângin in chungah phuba lâkna ngûnhnâm ka rawn tîr ang a, in khawpuiahte himna zawngin kal khâwm mah ula, in zîngah hri ka lêntîr anga hmêlma kutah pêkin in awm ang. 26 In ei tûr lâkna ka tihchhiat hunah chuan hmeichhe sâwm tân pawh thuk pakhata ur tham lek chhang a awm ang a, in ei tûrte chu bûksak in ni ang a, tlêm tê chauh pêk in ni ang. Chu chu in ei ang a; mahse, in puar lo vang.

27 “‘Chuti chung pawha in ngaihthlâk duh loh va, min kalh zâwnga in awm luih tlat chuan, 28 nangmahni kalh zâwngin ka awm nasa lehzual ang a, in sualnate avângin keimah ngeiin a lêt sariha nain ka hrem ang che u. 29 Tichuan, in fanute leh in fapate sa in ei ang. 30 In hmun sângte leh in rimtui hâlna maichâmte chu ka tichhia ang a, nunna nei lo in milim tenawm takte chungah chuan in ruangte chu ka dah khâwm thûr ang; tichuan, ten takin ka hawisan ang che u. 31 In khawpuiahte chuan ngûnhnâm ka lêntîr ang a, in hmun thianghlimte chu ka tiram ang a, in inthawina rimtuite pawh ka pawm lo vang. 32 Keimah ngeiin ram chu ka tiram ang a, chuta chêng in hmêlmate chuan mak tiin an en reng ang. 33 Hnam dangte zîngah ka tidarh che u ang a, ngûnhnâmin ka ûm zui ang che u. In ram chu tihramin a awm ang a, in khawpuite chu tihchhiat a ni ang.

34 “‘In hmêlmate rama in awm lai, in ram tihrama a awm chhûng chuan a hmaa kum sabbath-te in hman loh ai zawng in ram chu a châwl ang. Chutih hunah chuan a hmaa kum sabbath-te a hman loh ai zawng ram chu a châwl ang. 35 In rama in chên laia kum sabbath-te pawha ram chu a chawlh loh avângin tihrama a awm chhûng zawng chuan ram chu a châwl ang.

36 “‘Dam khawchhuak, an hmêlmate rama awmte pawh an thinlung chu beidawnnain ka tikhat ang. Hnahthel thlîin a chhêm rîk mai mai pawhin anni chu a tlânchhiattîr ang a, ngûnhnâm laka tlânchhia angin an tlânchhia ang a, tu ma ûm lohvin an tlu ang. 37 Umtu nei lo mah se, ngûnhnâm laka tlânchhia ang maiin an inbawh thlu rem rum ang a, in hmêlmate pawh in bei lêt thei lo vang. 38 Hnam dangte zîngah in boral ang a, in hmêlmate ram chuan a ei zo vang che u. 39 A boral ve lote pawh in thil sual tih avângin in hmêlmate ramah chuan ṭawih ral tûra hnutchhiah in ni ang. Ni e, anni chu an pate thil sual tih avângin an ṭawih ral ngei ang. 40 Tichuan, anmahni thil sual tih bâkah an pate thil sual tih leh rinawm lohnate chu an puang ang a, min kalh zâwnga awmin an rinawm lo a ni tih an pawm ang. 41 Chuvângin, kei pawhin an hmêlmate ramah hruaiin anmahni kalh zâwngin thil ka ti a ni.

“‘Tichuan, an thinlung serhtan loh* chu tihtlâwma awmin an sual man chu an tlâk thei mahna. 42 Kei chuan Jakoba hnêna ka thuthlung te, Isaaka hnêna ka thuthlung te, Abrahama hnêna ka thuthlungte kha ka hre reng ang a, ram pawh chu ka hre reng bawk ang. 43 An awm loh chhûngin ram chuan sabbath a hmang ang a, an tel lova tihramin a awm ang. Ka rorêl dân tûr kaihhruainate an hnâwl avâng leh ka dânte an huat avângin an sual man chu an tlâk ang. 44 Chuti chung pawhin, an hmêlmate rama an awm chhûng zawng chuan ka hnâwl pumhlûm ngai lo vang a, anmahni tiboral vek tûr khawpin ka haw ngai hek lo vang. Chu chu an laka ka thuthlung bawhchhiatna a ni dâwn si a, kei hi an Pathian Jehova ka ni. 45 An Pathian ka nihzia finfiah tûra hnam dangte hmuh laia Aigupta ram aṭanga ka hruai chhuah, an thlahtute hnêna ka thuthlung chu an ṭhatna tûrin ka hre reng ang, Kei hi Jehova ka ni,’ tiin sawi ang che,” a ti a.

46 Chûng thupêk te, rorêl dân tûr kaihhruaina te, dânte chu Jehova’n amah leh Israel mite inkâra hman atân Mosia kaltlangin Sinai Tlângah a pe a ni.