Exodus

35 A hnuah, Mosia chuan Israel mipuiho zawng zawng chu a ko khâwm a, an hnênah: “Hêngte hi Jehova’n ti tûra thu min pêk chu a ni: 2 Ni ruk chhûng hna in thawk thei ang a, a ni sarihna erawh chu in tân ni thianghlim, sabbath chawlh hmakna nî, Jehova chawimawina nî a ni ang. Chumi nîa hna thawk apiang chu tihhlum tûr a ni. 3 Sabbath nîah chuan in chênna hmun rêng rêngah mei in chhêm tûr a ni lo,” a ti a.

4 Mosia vêk chuan Israel mipui pung khâwmho hnênah chuan: “Hei hi Jehova thupêk a ni, 5 ‘Jehova tân thawhlâwm rawn thawh khâwm rawh u. In zînga pêk duhna thinlung nei apiangte chuan Jehova tân rangkachak te, tangkarua te, dâr sen te, 6 la pâwl te, la sen duk te, la sen lâr te, la zai sîn te, kêl hmul te, 7 rawng sena luan berâm pa vun te, seal* vun te, acacia thing* te, 8 khâwnvâra chhit atân hriak te, thih atân leh rimtui atân balsam hriak te, 9 ephod* chei nân leh âwmbela hman tûr onyx lunghlu leh lunghlu dangte rawn thawh rawh se.

10 “‘In zînga mi themthiam zawng zawng lo kal sela, Jehova’n siam tûra a tih zawng zawng hi siam rawh se. 11 Chûngte chu, biak bûk te, a puan in leh a khuhna te, a bah zawmna leh bangrel tungchho te, a man khâwmtu te, a ban te, a nghahchhan te; 12 Thuhriattîrna bâwm leh a zâwn fung te, a khuhna leh a daidangtu puanzâr te; 13 dawhkân leh a zâwn fung te, a bungbêl zawng zawng leh chhangdah te; 14 khâwnvâr dahna leh a hmanrua te, chuta dah tûr khâwnvâr leh a chhit tûr hriak te; 15 rimtui hâlna maichâm leh a zâwn fung te, thih atân bîka hman tûr hriak leh rimtui hâl tûr te, biak bûk luhnaa zâr tûr puanzâr te; 16 hâlral thilhlanna maichâm leh dâr lên te, a zâwn fung leh a bungbêl zawng zawng te, chawhtawlh lian tak leh a hûnna te; 17 kawtlaia zâr tûr puanzâr te, a ban leh a nghahchhan te, kawtlai luhnaa zâr tûr puanzâr te; 18 biak bûk kilh behna te, kawtlai hungna kilhna leh a pawh marna hrui te; 19 hmun thianghlima rawngbâwl nâna hâk tûr mawi taka tah kawrfual te, puithiam Arona tân thawmhnaw thianghlim te, puithiam anga rawng an bâwl theih nân a fapate tâna thawmhnawte a ni,’ tiin,” a ti a.

20 Tichuan, Israel pung khâwmho zawng zawngte chu Mosia hma aṭang chuan an kal chhuak a. 21 Tu pawh pêk duhna thinlung neite leh an thlarauvin a chêttîr apiangte chu lo kalin, inbiakna puan in atân te, chu hmuna rawngbâwlna zawng zawng atân te, thawmhnaw thianghlim atântea hman tûr Jehova tâna thawhlâwmte chu an lo keng a. 22 A hmei a pain pêk duhna thinlung neite chu an lo kal zêl a, pin mawi te, bengbeh te, zungbun te, tlereuh dang te, rangkachaka siam incheina chi hrang hrangte an rawn keng a, an rangkachak thilhlan* zawng zawngte chu Jehova hmaah an rawn dah a. 23 La pâwl te, la sen duk te, la sen lâr te, la zai sîn te, kêl hmul te, rawng sena luan berâm pa vun te, seal vunte pawh a nei apiangin an rawn keng a. 24 Tangkarua leh dâr sen thawh duh apiangte pawhin Jehova tân an rawn thawh a, a ṭûlna apianga hman tûrin acacia thing nei apiangte’n an rawn keng bawk a.

25 Hmeichhe themthiam zawng zawngte chuan la pâwl te, la sen duk te, la sen lâr te, la zai sînte chu an kai a. Chûng an kaih sate chu an rawn keng a. 26 Hmeichhe themthiam, an thinlunga duhna nei zawng zawngte pawhin kêl hmul an kai a.

27 Israel mite zînga hruaitute chuan ephod chei nân leh âwmbela hman tûr onyx lungte leh lunghlu dangte bâkah, 28 balsam leh hriak chhit atân te, thih atân te, rimtui hâl tûr atântea hman tûr an rawn keng a. 29 Jehova’n Mosia kaltlanga ti tûra thu a pêkte thawh a nih theih nân, a hmei a pain an thinlunga duhna nei zawng zawngte chuan thilpêkte an rawn keng a. Israel mite chuan mahni duhthu ngeiin Jehova hnênah an rawn pe a ni.

30 Tichuan, Mosia’n Israel mite hnênah: “Ngai teh u, Jehova chuan Juda hnama mi Hura tupa, Uria fapa Bezalela chu a thlang tawh e. 31 Ani chu finna te, hriatthiamna te, hriatna te, kawng tinrênga themthiamnate nei tûrin Pathian chuan a thlarauvin a tikhat tawh a. 32 Tichuan, nalh taka thil duan thiamna te, rangkachak, tangkarua leh, dâr sen hmanga thil siam thiamna te, 33 lung chher leh rem thiamna te, thing hmanga thil chi hrang hrang mawi taka siam thiamnate a pe a. 34 Pathianin Bezalela leh Dan hnama mi Ahisamaka fapa, Oholiaba te chu mi dangte zirtîr thiamna a pe bawk a. 35 Pathian vêk chuan thil chi hrang hrang siam thiamna leh ṭhui mawi thiamna bâkah, la pâwl te, la sen duk te, la sen lâr te, la zai sîntea thil tah thiamna a pe bawk a, anni chuan hna tinrêngte chu thawkin a siam dân chi tinrêngte chu an duang ang.