Exodus

22 “Miin bâwng pa emaw, berâm emaw ruin talh emaw, zuar emaw ta se, bâwng pa aiah bâwng pa panga leh berâm aiah berâm pali a chawi tûr a ni.

2 (“Rûkru chu mi in chhûnga rûk a ru lai man a nih a, kut an thlâka a thih chuan, a thisen mawh chu tu mahin an phur lo vang. 3 Mahse, chu chu khaw ên laia thleng a nih chuan, kutthlâktu chuan a thisen mawh a phur ang.)

“Rûkru chuan a thil rûk man zât chu a rûl leh tûr a ni a. Rulh lehna tûr a neih loh chuan a thil rûk man aiah sala hralh tûr a ni. 4 A thil rûk chu bâwng pa emaw, sabengtung emaw, berâm emaw a niha a kuta a la nunga an hmuh chuan, a lêt hnihin a rûl leh tûr a ni.

5 “Tu pawhin a ran rualte lovah tlattîrin, a ran rualte chuan mi lova thlaite leh grêp rahte an ei a nih chuan, a huana thlai ṭha berin emaw, a grêp huana rah ṭha berin emaw a rûl leh tûr a ni.

6 “Miin lova mei a chhêm a, mei chuan hnimbukte a kan kai a, mi lova buhphal emaw, buh la seng loh emaw, lo pum emaw a kan ral chuan, mei chhêmtu chuan meiin a kan ral zawng zawngte chu a rûl leh tûr a ni.

7 “Miin a ṭhian hnênah a pawisa emaw, a bungrua emaw kawltîrin, chu chu mi dangin lo rûksak ta se, a rutu chu man a nih chuan a lêt hnih chawitîr tûr a ni. 8 Mahse, a rutu chu man chhuah a nih loh chuan, a kawltu chu a rutu a nih leh nih loh fiah a nih theih nân Pathian dik hmaa hruai tûr a ni. 9 Bâwng pa emaw, sabengtung emaw, berâm emaw, thawmhnaw emaw, a nih loh leh thil bo eng pawh chungchânga, ‘Hei hi ka ta a ni!’ tia inchuh an awm chuan, a neitu nia inchhâlte chuan an thubuai chu Pathian dik hmaah an thlen ang a. Pathianin thil tisualtu nia a puana chuan a neitu chu a lêt hnihin a rûl leh tûr a ni.

10 “Miin a ṭhian hnênah sabengtung emaw, bâwng pa emaw, berâm emaw, a nih loh leh ran eng pawh kawltîrin, ran chu tu ma hmuh loh laiin a thi emaw, hliam na tak a tuar emaw, rûk bo emaw a nih chuan, 11 ran kawltu chuan ran chunga thil thleng chu ama tih a nih lohzia lantîr nân Jehova hmingin chhia a chham tûr a ni a, chu chu ran neitu chuan a pawmsak tûr a ni. A kawltu chuan eng mah a chawi a ngai lo vang. 12 Mahse, ran chu a ngaihthah avânga rûk bo a nih chuan, a neitu chu a rûl leh tûr a ni. 13 Chutih rualin, ramsa seh hlum a nih chuan, a finfiahna atân a hâwn tûr a ni a. Chutiang dinhmunah chuan a rulh kher a ngai lo vang.

14 “Tu pawhin mi ran hawh ta sela, a neitu awm loh laiin ran chu hliam na tak a tuar emaw, a thi emaw a nih chuan, a hawhtu chuan a rûl leh tûr a ni a. 15 A neitu awm laia thleng a nih erawh chuan a rulh a ngai lo vang. Man chawia hawh a nih chuan, a hawh man chu a rulhna man a ni nghâl ang.

16 “Miin pasal hual la nei lo nula thianghlim thlêma a mutpui chuan, mo man pein nupuiah a nei tûr a ni a. 17 A hmeichhe pain neihtîr a remtih loh pawhin mo man chu a pe tho tûr a ni.

18 “Hmeichhe dawithiamte chu in tihlum tûr a ni.

19 “Tu pawh ran pâwl apiang chu tihhlum ngei ngei tûr a ni.

20 “Tu pawh Jehova ni lo pathian dangte hnêna inthawina hlân apiang chu tihhlum tûr a ni.

21 “Nangni ngei pawh Aigupta rama ram dang mi anga in lo awm tawh avângin, in zînga ram dang mite chu ṭha lo takin in cheibâwl emaw, in hnuaichhiah emaw tûr a ni lo.

22 “Hmeithaite leh pa nei lote* chu in tirethei tûr a ni lo. 23 In tihretheih avânga ṭanpui dîla min auh vaih chuan ka lo chhâng ngei ngei ang a, 24 ka thinur chu lo ling phutin ngûnhnâmin ka tihlum che u ang a, in nupui fanaute chu hmeithai leh pa nei lovah ka siam ang.

25 “In unau mi retheite hnêna pawisa in pûktîr hunah, sum pûktîrtute angin a pung awmin in pûktîr tûr a ni lo.

26 “In sum pûktute thawmhnaw chu dahkham atâna in lâk chuan ni tlâk hmain in pe kîr leh tûr a ni. 27 Chu chu a taksa khuh nâna a thawmhnaw neih chhun a nih avângin, in pêk lêt loh chuan eng nge a sin tâk ang? In pêk lêt loh avânga ṭanpui dîla min auh vaih chuan ka lo chhâng ngei ngei ang, khawngaihna ngah tak ka ni si a.

28 “Pathian leh in zînga hotute* chu ânchhia in lawh tûr a ni lo.*

29 “In thlai thar chhuah tam tak leh, uain leh hriak in sâwr chhuah tam tak zîng aṭanga ṭhenkhat chu ka hnênah phal takin in hlân tûr a ni a. Mipa fa piang hmasa berte pawh min pe bawk tûr a ni. 30 Chutiang bawkin, in bâwng leh berâmte chu ni sarih chhûng a pui bulah in awmtîr ang a, a ni riatnaah chuan ka hnênah in hlân tûr a ni.

31 “Ka tân hnam thianghlim in ni tûr a ni. Eng sa pawh ni se, ramsain a seh hlum rêng rêng in ei tûr a ni lo va, ui in pe tûr a ni.