Genesis

24 Abrahama chu a upain a tar tawh hle a, Jehova’n engkimah mal a sâwm a ni. 2 Ani chuan a thil neih zawng zawngte enkawltu a chhiahhlawhte zînga upa ber hnênah: “Khawngaihin i kut kha ka malpui hnuaiah hian han rawlh teh. 3 Ka fapa hi kan chhehvêl Kanaan-ho fanute nupuia neihtîr lo tûrin, lei leh vân Pathian Jehova hming chhâlin chhia ka chhamtîr dâwn che a. 4 Ka pianna rama ka chhûngte hnênah kalin, ka fapa Isaaka tân nupui i zawng zâwk tûr a ni,” a ti a.

5 Mahse, a chhiahhlawh chuan a hnênah: “Ka hmeichhe zawn hmuh chuan he ramah hian min rawn zui duh lo ta se, engtin nge ni ang? I fapa hi i pianna ramah chuan ka hruai kîr leh dâwn em ni ang?” a ti a. 6 Abrahama chuan a hnênah: “Chu hmunah chuan ka fapa hi hruai hauh suh ang che. 7 Ka pa in leh ka chhûngte chênna ram aṭanga min hruai chhuaktu leh, ‘I thlahte hnênah he ram hi ka pe ang,’ tia min tiamtu vân Pathian Jehova chuan i hmaah a vântirhkoh a tîr ang a, ka fapa nupui tûr chu i va zawng hmu ngei ngei ang. 8 I hmeichhe va zawn hmuhin a zui duh lo che a nih erawh chuan he chhechham lakah hian i fihlîm ang. Mahse, chu hmunah chuan ka fapa hi i hruai tûr a ni lo,” a ti a. 9 Tichuan, chhiahhlawh chuan a pu Abrahama malpui hnuaia a kut rawlhin chhia a chham ta a.

10 Abrahama chhiahhlawh chuan a pu sanghâwngsei sâwm a la a, a pu thil ṭha tinrêng kengin Mesopotamia rama Nahor khaw lam panin a chhuak a. 11 Khaw pâwna tuichhunchhuah bulah chuan a sanghâwngseite chu a bawhtîr a, chu chu tlai lam, hmeichhehovin tui an chawi hun lai vêl a ni. 12 Tin, ani chuan: “Jehova, ka pu Abrahama Pathian, khawngaihin vawiinah hian min hlawhtlintîr la, ka pu Abrahama chungah i hmangaihna rinawm lantîr ang che. 13 Tûnah hian, khuaa hmeichhiate’n tui an chawina tuichhunchhuah bulah ka ding a. 14 Hetiang hi ni sela, nula tu pawh hnêna, ‘Tui ka in theih nân khawngaihin i tuibêl kha tihniam rawh,’ ka tih a, ‘In ta che, i sanghâwngseite in tûr pawh ka chawi ang e,’ titu chu i chhiahhlawh Isaaka tâna i thlan ni rawh se; chutiang chuan ka pu chungah i hmangaihna rinawm i lantîr tih min hriattîr ang che,” a ti a.

15 A ṭawngṭai zawh hmain Rebeki chu a dâra tuibêl pûin a lo kal a, ani chu Abrahama unaupa Nahora leh a nupui Milkai fapa Bethuela fanu a ni. 16 Rebeki chu hmêlṭha tak leh mipa tu mahin an la mutpui loh a ni a. Ani chu tuichhunchhuahah chuan a chhuk a, a tuibêl tikhatin a rawn chho leh a. 17 Chu veleh, Abrahama chhiahhlawh chuan a va pan a, a hnênah: “Khawngaihin i tuibêla tui kha ka in thei ang em?” a ti a. 18 Ani chuan: “Ka pu in rawh,” tia sawiin tuibêl chu rang takin a la thla a, a in atân a pe a. 19 Chutianga a intîr zawh chuan: “I sanghâwngseite tân pawh an in kham thlengin ka chawi ang e,” a ti a. 20 A tuibêl chu ran tui pêkna kuangah chuan bun ruak nghâlin, sanghâwngsei zawng zawng in kham thlengin tui chu a chawi zêl a. 21 Chutianga a tih chhûng zawng chuan Abrahama chhiahhlawh chuan ngawi reng leh mak ti takin a lo en reng a, Jehova’n a zin chhan a tihhlawhtlinna a nih leh nih loh a ngaihtuah a ni.

22 Sanghâwngseite’n tui an in zawh chuan, Abrahama chhiahhlawh chuan Rebeki chu rangkachak hnâr beh sekel* chanvea rit leh rangkachak bân bun sekel sâwma rit a pe a. 23 A hnênah: “Khawngaihin tu fanu nge i nih min han hrilh teh? I pa inah kan tân riahna tûr a awm ang em?” a ti a. 24 Rebeki chuan: “Nahora leh Milkai te fapa Bethuela fanu ka ni e. 25 Buhpâwl leh ran chaw pawh kan ngah a, riahna tûr hmun pawh kan nei e,” a ti a. 26 Tichuan, Abrahama chhiahhlawh chu Jehova hmaah ṭhingṭhia kûnin: 27 “Ka pu chunga a hmangaihna rinawm lantîr rengtu leh a laka a thutiamte hlen reng ṭhîntu ka pu Abrahama Pathian Jehova chu fakin awm rawh se. Jehova chuan ka pu chhûngte inah min hruai thleng ta,” a ti a.

28 Tichuan, Rebeki chu a nu leh mi dangte hnêna chûng thilte hrilh tûr chuan a tlân a. 29 Rebeki chuan u Labana a nei a. Labana chu Abrahama chhiahhlawh hmu tûrin tuichhunchhuah lamah chuan a tlân phei ta a. 30 A nau Rebeki hnâr beh leh bân bunte a hmuh bâkah, chu pa thusawi Rebeki’n a sawi chhâwnte a hriat chuan, tuichhunchhuah bula sanghâwngseite nêna la ding reng Abrahama chhiahhlawh hmu tûrin Labana chu a kal chhuak ta a ni. 31 Labana’n a hmuh veleh: “Nang, Jehova malsâwmna dawngtu, engvângin nge khatah khân i din reng? Lo kal rawh, thlenna tûr leh sanghâwngseite awmna tûr pawh ka peih tawh e,” a ti a. 32 Abrahama chhiahhlawh chuan a inah a zui ta a, ani* chuan sanghâwngseite thil phurh chu hlân thlâksakin, buhpâwl leh ran chawte a pe a, Abrahama chhiahhlawh leh a mite ke silna tûr tui a pe bawk a. 33 A hmaa ei tûr an chhawp chuan: “Ka sawi tûr ka sawi hma loh chuan ka ei lo vang,” a ti a. Labana chuan: “Sawi ta che,” a ti a.

34 Ani chuan: “Abrahama chhiahhlawh ka ni a. 35 Jehova’n ka pu chu nasa takin mal a sâwm a, berâm leh bâwng te, tangkarua leh rangkachak te, chhiahhlawh mipa leh hmeichhia te, sanghâwngsei leh sabengtungte pein a tihausa hle a. 36 Chu bâkah, ka pu chu a nupui Sari’n a tar hnuah fapa a hrinsak a, ka pu chuan a fapa chu a thil neih zawng zawng a pe ang. 37 Ka pu chuan ka hnênah: ‘Ka fapa hi ka chênna rama Kanaan-ho fanute nupuia neihtîr lo tûrin chhia chham rawh. 38 Ka pa in leh ka chhûngte hnêna kalin, ka fapa tân nupui i zawng zâwk tûr a ni,’ a ti a. 39 Mahse, ka pu hnênah: ‘Ka hmeichhe zawn hmuh chuan min zui duh lo ta se, engtin nge ni ang?’ ka ti a. 40 Ani chuan: ‘A rawng ka bâwl ṭhin Jehova chuan i hnênah a vântirhkoh a rawn tîr ang a, i zinnaah chuan a hlawhtlintîr ngei ngei ang che; chuvângin, ka fapa nupui tûr chu ka chhûngte leh ka ina mi ngei i zawng tûr a ni. 41 Ka chhûngte hnêna i kal a, ka fapa nupui tûr an pêk duh loh che erawh chuan, i chhechham aṭangin i fihlîm ang,’ min ti a.

42 “Vawiina tuichhunchhuah bul ka thlen khân: ‘Jehova, ka pu Abrahama Pathian, ka zinnaah hian min hlawhtlintîr dâwn chuan, 43 tûnah hian tuichhunchhuah bulah ka ding a. Hetiang hi ni sela, tui chawi tûra lo kal nula hnênah, “Khawngaihin i tuibêla tui kha min intîr rawh,” ka tih a, 44 “In ta che, i sanghâwngseite in tûr pawh ka chawi ang e,” titu ngei chu ka pu tâna Jehova mi thlan ni rawh se,’ tiin ka ṭawngṭai a.

45 “Chutianga ka rilrua ka sawi zawh hma chuan, Rebeki hi a dâra tuibêl pûin a lo kal a, tuichhunchhuaha zuk chhukin tui a chawi a. Tichuan, a hnênah: ‘Khawngaihin tui in tûr min pe thei ang em?’ ka ti a. 46 A dâr aṭanga tuibêl chu la thla vatin: ‘In ta che, i sanghâwngseite pawh hi tui ka chawisak ang e,’ a ti a. Tichuan, ka in a, sanghâwngseite in tûr pawh a chawisak bawk a. 47 Chumi hnua, ‘Tu fanu nge i nih?’ tia ka zawh chuan, ‘Nahora leh Milkai te fapa Bethuela fanu ka ni e,’ tiin min chhâng a. Tichuan, hnâr beh behtîrin, bân bunte ka buntîr a. 48 Jehova hmaah ṭhingṭhia kûnin, ka pu fapa tâna a unaupa fanu nêna intawng tûra kawng dika min hruaitu ka pu Abrahama Pathian Jehova chu ka fak a. 49 Ka pu chunga hmangaihna rinawm lantîr a, a tâna mi rin tlâk in nihzia in lantîr dâwn chuan tûnah hian min hrilh rawh u; in lantîr dâwn loh pawhin min hrilh rawh u, hmun dangah ka zawng leh mai ang,” a ti a.

50 Labana leh Bethuela chuan: “Hei hi Jehova ruahmanna a nih avângin thu tâwp siamtu tûr kan ni lo ve. 51 Hei, Rebeki a awm alâwm. Jehova sawi ang chuan, i pu fapa nupui atân chuan hruai ta che,” an ti a. 52 Abrahama chhiahhlawhin an thusawi a hriat chuan Jehova hmaah a bawkkhup nghâl a. 53 Rebeki chu tangkarua leh rangkachaka siam tlereuhte leh thawmhnawte a pe a, a nu leh a u pawh thil hlute a pe bawk a. 54 Chumi hnu chuan, a mite nên eia inin chutah chuan an riak a.

A tûk zînga a thawh chuan: “Ka pu hnênah min hawtîr rawh u,” a ti a. 55 A u leh a nu chuan: “Rebeki hi kan bulah ni sâwm tal awm rih sela, i hruai dâwn nia,” an ti a. 56 Mahse, ani chuan: “Jehova’n ka zinna min hlawhtlintîr tâk avângin min tikhawtlai lo hrâm ula. Ka pu hnêna ka haw theihna tûrin min kaltîr rawh u,” a ti a. 57 Anni chuan: “Rebeki ko ila, a ngaih dân i zâwt ang u,” an ti a. 58 Rebeki chu kovin: “Ani hi i zui nghâl duh ang em?” an ti a. Rebeki chuan: “Aw, duh e,” tiin a chhâng a.

59 An farnu Rebeki chu amah enkawltu leh Abrahama chhiahhlawh leh a mite nên an kaltîr ta a. 60 Rebeki hnênah chuan: “Kan farnu Rebek, sâng tam tak thlahtu lo ni la, i thlahte chuan anmahni hawtute khawpui chu la rawh se,” tiin mal an sâwm a. 61 Tichuan, Rebeki leh a chhiahhlawh hmeichhiate chu an tho va, sanghâwngsei chunga chuangin Abrahama chhiahhlawh chu an zui a. Ani chu Rebeki hruaiin a kal ta a.

62 Isaaka chu Negeb rama chêng a nih avângin, Beer-lahai-roi lam aṭangin a lo kîr a. 63 Khaw thim dâwn hnaihah ngun taka thil ngaihtuah tûra kal chhuak a ni. Chutih lai chuan, a lam pana sanghâwngsei lo kal a hmu a. 64 Rebeki a hawi chhuaha Isaaka a hmuh chuan, sanghâwngsei chung aṭangin rang takin a chhuk a. 65 Abrahama chhiahhlawh chu: “Kan lam pana lo kal saw tu nge?” tiin a zâwt a. Ani chuan: “Ka pu a nih saw,” a ti a. Tichuan, puanin a lû a khuh a. 66 Chhiahhlawh chuan Isaaka hnênah a thiltih zawng zawng a hrilh a. 67 Chumi hnu chuan, Isaaka’n Rebeki chu a nu Sari puan inah a hruai lût a. Ani chu nupuia neiin a hmangaih hle a; tichuan, a nu thih hnuah Isaaka chuan thlamuanna a nei leh ta a ni.