Genesis

37 Jakoba chu ram dang mi anga a pa awm ṭhinna Kanaan ramah chuan a awm chhunzawm zêl a.

2 Hei hi Jakoba chanchin a ni.

Josefa chu kum 17 mi a nih laiin, a pa nupui Bilhaii leh Zilpaii fapate nên berâm an vêng a. Ani chuan a unaute thil ṭha lo tihte chu a pa hnênah a hrilh a. 3 Israela chuan Josefa chu a tar lam fa a nih avângin, a fapa dang zawng zawngte aiin a hmangaih zâwk a; tichuan, kawrfual mawi tak a siamsak a. 4 A ute chuan a pain anmahni aiin a hmangaih zâwk tih an hriat chuan ani chu an haw ta hle a, ṭawngkam ṭha pawhin an be thei ta lo va.

5 A hnuah, Josefa’n mumang a nei a, a ute a hrilh chuan an haw lehzual a. 6 An hnênah: “Khawngaihin ka mumang hi lo ngaithla teh u. 7 Lovah buhphal kan lo têl a. Chutih lai chuan, ka buhphal chu a lo ding a, in buhphalte chuan din hualin chibai an lo bûk a,” tia a han sawi chuan, 8 a ute chuan: “Nang ve mai hian lala insiamin kan chungah thu i nei ang maw!” an ti a. A mumang leh a thusawite avâng chuan an haw lehzual sauh a ni.

9 Chumi hnu chuan, mumang nei lehin a ute chu: “Mumang ka nei leh a. Tûn ṭumah chuan nî leh thla leh arsi 11-te’n chibai min lo bûk asin,” tiin a hrilh a. 10 A ute bâkah, a pa pawh a hrilh a. A pa chuan ani chu hauvin: “Eng ang mumang nge maw i neih hi le? Kei leh i nu leh i unaute hian bawkkhupin chibai kan bûk ang che maw?” a ti a. 11 A ute chuan ani chu an thîk ta hle a, a pa erawh chuan a thusawite chu a chhinchhiah tlat thung a.

12 A ute chuan an pa berâmte chu Sekem khaw bulah an tlattîr a. 13 A hnuah, Israela’n Josefa hnênah: “I ute’n Sekem khaw bulah berâm an vêng a, an hnênah han kal ta che,” a ti a. Josefa chuan: “Aw le, ka pa!” a ti a. 14 A pa chuan: “Han kal la, i ute leh berâmte ṭhat leh ṭhat loh han en la, chanchin min rawn hrilh leh ang che,” a ti a. Tichuan, an awmna Hebron phaizâwl aṭang chuan Sekem khaw lamah chuan a kal ta a. 15 A hnuah, phûla a kal lai chu pa pakhatin a lo hmu a: “Eng nge i zawn?” a ti a. 16 Josefa chuan: “Ka ute ka zawng a, khawngaihin berâm an vênna hmun min hrilh thei ang em?” a ti a. 17 Ani chuan: “An berâm vênna hmun an sawn a, Dothan-a kal an tum thu an sawi ka hria asin,” a ti a. Tichuan, Josefa chu a ute awmna lamah chuan a kal a, Dothan-ah chuan a han hmu ta a.

18 A ute’n Josefa lo kal chu hla tak aṭanga an hmuh chuan, amah an tihhlum dân tûr an sawiho va. 19 Anni chuan: “En teh u! Mumang neia pawh a lo kal saw! 20 Hawh u, that ila, tuichhunchhuahah i thlâk ang u, ramsain a seh kan ti mai dâwn alâwm. Tichuan, a mumangte chu engtin nge a awm tâk zêl tih kan hria ang chu,” an ti a. 21 Chu veleh, Reubena chuan Josefa chhan tumin: “Thah êm chu i that lo vang u,” a ti a. 22 Reubena chuan sawi chhunzawmin: “Thisen chu i chhuah lo vang u. Amah tina lovin thlalêra tuichhunchhuahah hian i thlâk zâwk ang u,” a ti a. Chutianga a tih chhan chu, a unaute hnên aṭanga Josefa chhan chhuah a, a pa hnêna hruai kîr leh a duh vâng a ni.

23 Josefa chu a ute hnên a thlen veleh, anni chuan a kawrfual mawi chu lo hlihthlâksak nghâlin, 24 an hruai a, tuichhunchhuahah an thlâk a. Chutih lai chu tuichhunchhuaha tui a awm loh lai a ni.

25 Tichuan, thil eiin an ṭhu a. An han hawi chhuah chuan, Gilead aṭanga lo kal Aigupta rama chhuk thla tûr Ismael sumdâwngho an hmu a. An sanghâwngseite chuan labdanum thing hnai te, balsam te, thing hnai rimtui chîte a phur a. 26 Juda chuan a unaute hnênah: “Kan nau hi thatin, kan thiltih chu zêp ta ila eng nge hlâwkna awm ang? 27 Kan nau, kan thisen zawmpui ngei a nih avângin, kutthlâk lovin Ismael-ho hnênah sâwn i hralh zâwk ang u,” a ti a. Juda sawi anga tih chu an remti ta a. 28 An bul hnaia Ismael sumdâwngho* an lo thlen chuan, Josefa chu tuichhunchhuah aṭanga khai chhuakin, an hnênah chuan tangkaraw tlang 20-in an hralh a. Anni chuan Josefa chu Aigupta ramah an hruai ta a.

29 A hnuah, tuichhunchhuahah chuan Reubena a va kal a, Josefa a awm tawh lo tih a hmuh chuan a kawr a pawt thlêr a. 30 A naute hnênah a kîr leh a, mangang takin: “Kan nau a awm tawh lo! Eng nge ka tih tâk ang?” a ti a.

31 Tichuan, kêl pa talhin, a thisenah chuan Josefa kawrfual chu an hnim a. 32 Chumi hnu chuan, kawrfual mawi chu an pa hnêna thawnin: “Hei hi kan chhar a. I fapa kawrfual a nih leh nih loh lo endik ta che,” an ti a. 33 Jakoba’n a lo endik chuan: “Ka fapa kawrfual ngei a ni e! Ram sakawlhin a seh hlum a nih ngei dâwn hi! Josefa chu pawh sawmin a awm a ni ngei ang!” a ti a. 34 A kawrfual pawt thlêra saiip puan vengin, a fapa chu ni tam tak a sûn a. 35 A fapate leh a fanu zawng zawngte’n hnem an tum a; mahse: “Ka fapa sûn chungin Thlânah* ka liam dâwn a nih hi!” tia sawiin, hnem a duh lo va. Tichuan, Josefa chu a ṭah chhunzawm zêl a.

36 Ismael sumdâwngho* chuan Josefa chu Aigupta rama Pharaoa ina thuneitu leh vêngtu hotu Potiphara hnênah an hralh a.