Nun leh Rawngbâwlna Inzirna Lehkhabu Atâna Thu Lâk Chhuahnate
MAY 4-10
PATHIAN THU AṬANGA RO HLUTE | GENESIS 36-37
“Josefa Chuan Itsîk A Hlawh”
(Genesis 37:3, 4) Tin, Israela chuan Josefa chu a tar lam fa a nih avângin, a fate zawng zawng ai chuan a hmangaih zâwk a; tichuan, kawrfual ze hrang hranga zia a siamsak a. 4 Tin, an pa chuan ani chu a ute zawng zawng aiin a hmangaih zâwk tih a ute chuan an lo hre ta a; tichuan, ani chu an haw ta hle a, ṭawng kam ṭha rêng rêng a chungah an rawlh thei ta lo va.
w14-E 8/1 12-13
“Khawngaih Takin Ka Mumang Hi Lo Ngaithla Teh U”
Bible chuan: “An pa chuan ani chu a ute zawng zawng aiin a hmangaih zâwk tih a ute chuan an lo hre ta a; tichuan, ani chu an haw ta hle a, ṭawng kam ṭha rêng rêng a chungah an rawlh thei ta lo va,” tiin a sawi. (Genesis 37:4) An îtsîk chu hriatthiamawm tak ni mah se, Josefa unaute’n chu huatna rilru an pai reng chu a finthlâk loh hle. (Thufingte 14:30; 27:4) Tu emawin i dawn châk tak ngaihsakna, a nih loh leh chawimawina a dawn hunah îtsîkna i nei ngai em? Josefa unaute chu hre reng ang che. An îtsîkna avângin a hnua nasa taka an inchhîrna tûr thilsual lian tak an ti a. An thiltawn chuan Kristiante chu “lâwmte chu lâwmpui” a finthlâkzia min hriatnawntîr a ni.—Rom 12:15.
Josefa chuan a unaute’n an hua tih a hre ngei ang. Chutiang a nih avângin, a bul hnaia a unaute an awm laiin a kawrfual mawi tak chu ha lovin a awm em? Hâk loh chu a duh mai thei. Mahse, Jakoba chuan chu kawrfual chu a duhsakna leh a hmangaihna chhinchhiahna atâna a pêk a ni tih hre reng ang che. Josefa chuan a pain a rinchhan anga nun a duh avângin, rinawm takin chu kawrfual chu a ha a ni. A entawn tûr siam chu kan tân zir tûr ṭha tak a ni a. Kan Pa vâna mi chuan mi duhsak bîk nei lo mah se, a châng chuan a chhiahhlawh rinawmte chu thlang chhuakin a duhsakzia a lantîr ṭhîn a ni. Chu bâkah, anni chu he nungchang bawlhhlawhna khawvêl lakah hian a hranga awm tûrin a phût bawk. Josefa kawrfual mawi tak angin, Kristian dikte chu an nungchang avângin an chehhvêla mite lakah an danglam hle a. Chutiang nungchang chuan mite chu îtsîkna leh huatna a neitîr chângte a awm a ni. (1 Petera 4:4) A nih leh, Kristian chuan Pathian chhiahhlawh nia a nihna dik tak chu a thup bo tûr a ni em? Ni lo ve—Josefa pawh a kawrfual ha lo va a awm loh ang bawkin.—Luka 11:33.
(Genesis 37:5-9) Tin, Josefa chuan mumang a nei a, a ute hnênah chuan a hrilh a; tichuan, ani chu an haw lehzual ta a. 6 Tin, ani chuan an hnênah, “Khawngaih takin ka mumang hi lo ngaithla teh u: 7 ngai teh u, lovah hian buhphalte kan lo têl a; tin, ngai teh u, ka buhphal chu a lo tho va, a ding ta luah a; tin, ngai teh u, in buhphalte chuan an rawn hual vêl a, ka buhphal chu chibai an bûk hlawm a,” a ti a. 8 Tin, a ute chuan a hnênah, “Nang tehchai hian kan chungah ro i rêl tehlul ang maw? Nang tehchai hian kan chungah thu i nei tehlul ang maw?” an ti a. Tichuan, a mumang avâng leh a thusawi avâng chuan amah chu an haw lehzual sauh va. 9 Tin, mumang dang a nei leh a, a ute chu a hrilh leh a, “Ngai teh u, mumang ka nei leh ta a; ngai teh u, nî te, thla te, arsi sâwm leh pakhatte khian chibai mi lo bûk zuk nia maw le,” a ti a.
(Genesis 37:11) Tin, a uten ani chu an îtsîk a; a pa erawh chuan a thusawi chu a rilruin a vawng reng a.
w14-E 8/1 13 ¶2-4
“Khawngaih Takin Ka Mumang Hi Lo Ngaithla Teh U”
Chu mumang chu Pathian Jehova hnên aṭanga lo kal a ni a. Chu chuan nakin lawka thil lo thleng tûr a hrilh lâwk a, Pathianin Josefa chu mi dangte hnênah a mumanga a hmuhte hrilh tûrin a duh a ni. A hnua zâwlnei zawng zawngte’n Pathian hnam thlan luhlul tak hnêna A thuchah leh a rorêlna thu an hrilh angin, Josefa pawhin chutianga a tih ve a ngai a ni.
Josefa chuan a unaute hnênah: “Khawngaih takin ka mumang hi lo ngaithla teh u,” tiin fing takin a sawi a. A unaute chuan mumang awmzia chu an hre thiam a, an duh lo hle a ni. “Nang tehchai hian kan chungah ro i rêl tehlul ang maw? Nang tehchai hian kan chungah thu i nei tehlul ang maw?” tia an sawi bâkah, “A mumang avâng leh a thusawi avâng chuan amah chu an haw lehzual sauh va,” tiin kan chhiar a ni. Josefa’n a mumang pahnihna chu a pa leh a unaute hnêna a hrilh chuan, an chhâng lêt ṭha lo lehzual a. Heti hian kan chhiar a ni: “A pa chuan a zilh a, a hnênah, ‘mumang i neih hi eng mumang nge maw ni? Kei leh i nu leh i ute hian lei siin chibai kan rawn bûk tehlul dâwn che maw?’” tiin. Mahse, Jakoba chuan chûng thute chu a rilruah a vawng reng a ni. Jehova’n naupang chu a bia a ni thei ang em?—Genesis 37:6, 8, 10, 11.
Josefa chu mite ngaihthlâk duh loh leh tihduhdahna hial thlentu hrilh lâwkna thuchah sawi tûra hman Jehova chhiahhlawh hmasa ber a ni lo va, hnuhnûng ber lah a ni hek lo. Isua chu chutiang thuchah kengtute zînga ropui ber a ni a, a hnungzuitute hnênah: “Annin kei mi tihduhdah tawh chuan nangni pawh an tiduhdah ang che u,” tiin a hrilh a ni. (Joh. 15:20) Kristian a pui a pangte chuan tleirâwl Josefa rinna leh huaisenna aṭangin thil tam tak an zir thei a ni.
(Genesis 37:23, 24) Tin, heti hi a ni a, Josefa chuan a ute hnên a va thlen chuan, Josefa chu a kawrfual, a kawrfual ze hrang hranga zia a hâk chu an lo hlihsak a; 24 tin, an hruai a, khuarkhurumah chuan an thlâk ta a; khuarkhurum chu a ruak, tui awm tawh lo a ni a.
(Genesis 37:28) Tin, Midian-ho sumdâwngte an lo kal a; tichuan, Josefa chu khuarkhurum ata chu an kai chhuak a, Ismael-hote hnênah chuan, Josefa chu tangka sawmhnihin an hralh ta a. Tin, Josefa chu Aigupta ramah an hruai ta a.
Thlarau Lam Lunghlute Laih Chhuahna
(Genesis 36:1) Tin, hêng hi Esauva thlahte chu an ni (Esauva chu Edoma a ni).
it-1-E 678
Edoma
(Eʹdom) [Sen], Edom mite (Eʹdom·ites).
Edoma chu Jakoba phirpui Esauva hming dang a ni a. (Gen. 36:1) Chu hming a put chhan chu englo sen chhum kawi nêna a fa tîr nihna a hralh vâng a ni. (Gen. 25:30-34) Chumi nêna inmil takin, Esauva a pian khân, a sena sen tur a ni a (Gen. 25:25), a hnua amah leh a thlahte rochun rama hmun ṭhenkhat pawh chutiang rawng tho a ni.
(Genesis 37:29-32) Tin, Reubena chu khuarkhurumah a lo kal leh a; tin, ngai teh, Josefa chu khuarkhurumah chuan a lo awm ta lo va; tichuan, a silhfênte a pawt thlêr ta a. 30 Tin, a naute hnênah a kal leh a, “Taitea kha a awm ta lo, kei hi khawiah nge ka kal tâk ang le aw?” a ti a. 31 Tin, Josefa kawrfual chu an la a, kêlpa an talh a, a thi-ah chuan kawrfual chu an hnim a; 32 tin, kawrfual ze hrang hranga zia chu an thawn a, an pa hnênah chuan an rawn la a; tin, “Hei hi kan hmu ngawt a, i fapaa kawrfual a ni nge ni lo en teh,” an ti a.
it-1-E 561-562
Enkawlna
Berâm vêngtu, a nih loh leh ran vêngtuin ran rual vêng tûra a insawi chuan, chûng rante chu enkawl tûrin dân angin a pawm tihna a ni a. Ani chuan ran neitupa hnênah chûng rante chu châwm an niin, rûk bo an ni lo vang, a nih loh leh chawi a ngaih chuan a chawi ang tih a tiam a ni. Mahse, sakawlhte beihna ang chi, mihringte thunun theih loh dinhmunahte chuan vêng tûra a mawhphurhna ata dânin a zalêntîr avângin, a mawhphurhna chu a hlen famkim ngei ngei ang tihna a ni lo. Mahse, chutiang dinhmuna a mawhphurhna ata fihlîm tûr chuan, sakawlh ei bâng ran ruh ang chite chu ran neitupa hnênah a hmuh tûr a ni. Ran neuitupa chuan chu finfiahna chu a endik ang a, a ran enkawltu chuan sualna a nei lo tih thu tlûkna a siam tûr a ni.
He thu bul hi chhûngkaw inlaichînnaah pawh tiamin, ngaihngam taka thil kawltîrna ang chi rêng rêngah pawh hman theih a ni a, entîr nân, fa u ber chu a naute enkawl tûra ngaih a ni. Chuvângin, Genesis 37:18-30-a chhinchhiah angin, Reubena chu fa u ber a ni a, a unau dangte’n Josefa tihlum tûra an sawiho laia Josefa nunna hum a duh pawh kha kan hre thiam thei a ni. “Reubena vêk chuan: ‘A pa hnêna a hruai lehna tûrin, an kut ata chu a chhanchhuah theih nân an hnênah chuan, a thah êm chu i that suh ang u, . . . Thisen chu chhuah suh u, . . . kut zawng a chungah thlâk suh u,’” tiin a sawi a. Reubena’n Josefa a awm lo tih a hriat chuan a hlauthâwng lehzual a ni, “a silhfênte a pawt thlêr ta a,” tichuan: “Taitea kha a awm ta lo, kei hi khawiah nge ka kal tâk ang le aw?” tiin a au chhuak hial a ni. Josefa a awm tawh loh avângin mawhphurnna a chungah a tla dâwn tih a hria a. Chu mawhphurna chu a chunga a tlâk loh nân, a unaute chuan Josefa chu sakawlhin a seh tia sawiin, fing thiam takin finfiahna an siam chawp a. Tichuan, Josefa kawrfual chu kêl thisenah an hnim a. Chu chu finfiahna atân an pa leh thlahtute rorêltu Jakoba hnênah an pe a, ani chuan Reubena unaute pêk, chu thisen kai Josefa kawrfual a han hmuh chuan Josefa chu tihhlum nia a ngaih avângin, Reubena chu a mawhphurhna lakah thiam a chantîr ta a ni.—Gen. 37:31-33.
Bible Chhiar
(Genesis 36:1-19) Tin, hêng hi Esauva thlahte chu an ni (Esauva chu Edoma a ni). 2 Esauva chuan a nupuite chu Kanaan rama nula zînga mi a ni, a neih ni; Hit mi Elona fanu Adai leh, Hiv mi Zibeona tunu, Anaa fanu Oholibami te chu an ni; 3 Ismaela fanu, Nebaiotha farnu Basemathi nên chuan. 4 Tin, Adai chuan Esauva chu Eliphaza a hrinsak a; Basemathi chuan Reuela a hring a; 5 Oholibami chuan Jeusa leh Jalama leh Kora a hring a: chûng chu Esauva fapa, Kanaan rama a neihte an ni. 6 Tin, Esauva chuan a nupuite leh, a fapate leh, a fanute leh a ina mi zawng zawng leh a rante leh a sa zawng zawng leh, a sum zawng zawng, Kanaan rama a hmuhte chu a chhawm a, a nau Jakoba hnên ata chu ram dangah a kal ta daih a. 7 An thil neihte chu a nasa lutuk a, an awm dûn thei lo a ni; an rante avângin an mikhualna ram chuan an daih ta si lo va. 8 Tichuan, Esauva chu Seir tlângah chuan a awm ta a: Esauva chu Edoma a ni a. 9 Tin, hêng hi Seir tlânga Edom-ho thlahtu Esauva thlahte chu an ni: 10 hêng hi Esauva fapateho hming chu a ni: Eliphaza, Esauva nupui Adai fapa leh Reuela, Esauva nupui Basemathi fa hi. 11 Tin, Eliphaza fapate chu Temana te, Omara te, Zephova te, Gatama te, Kenaza te an ni. 12 Tin, Timnaii chu Esauva fapa Eliphaza hmei a ni a: ani chuan Eliphaza chu Amaleka a hrinsak a: chûng chu Esauva nupui Adai fapate chu an ni. 13 Tin, hêng hi Reuela fapate chu an ni; Nahatha leh Zera te, Sama leh Miza te hi: chûng chu Esauva nupui Basemathi fapate chu an ni. 14 Tin, hêng hi Zibeona tunu Ana fanu Esauva nupui Oholibami fapate chu an ni: ani chuan Esauva chu Jeusa leh Jalama leh Kora chu a hrinsak a. 15 Hêng hi Esauva fapate zînga a hotute chu an ni: Esauva fa tîr Eliphaza fapate chu; hotu Temana te, hotu Omara te, hotu Zephova te, hotu Kenaza te, 16 hotu Kora te, hotu Gatama te, hotu Amaleka te hi: chûng chu Edom rama Eliphaza laka chhuak hotute chu an ni; chûng chu Adai fapate chu an ni. 17 Tin, hêng hi Esauva fapa Reuela thlahte chu an ni; hotu Nahatha te, hotu Zera te, hotu Sama te, hotu Miza te hi: chûng chu Edom rama Reuela laka chhuak hotute chu an ni; chûng chu Esauva nupui Basemathi fapate chu an ni. 18 Tin, hêng hi Esauva nupui Oholibami fapate chu an ni, hotu Jeusa te, hotu Jalama te, hotu Kora te hi: chûng hotute chu Ana fanu Esauva nupui Oholibami hrinte chu an ni. 19 Chûng chu Esauva fapate chu an ni, chûng chu an zînga hotute chu an ni: Esauva chu Edoma a ni.
MAY 11-17
PATHIAN THU AṬANGA RO HLUTE | GENESIS 38-39
“Jehova Chuan Josefa A Kalsan Ngai Lo”
(Genesis 39:1) Tin, Josefa chu Aigupta ramah an hruai chhuk a; tin, Pharaoa hnuaia hotu pakhat, vêngtu pâwl hotu, Aigupta mi, Potiphara chuan chuta rawn hruai chhuktu Ismael-hote kut ata chu a lei ta a.
w14-E 11/1 12 ¶4-5
“Engtin Nge He Sual Lian Tak Hi Ka Tih Theih Ang?”
“Josefa chu Aigupta ramah an hruai chhuk a; tin, Pharaoa hnuaia hotu pakhat, vêngtu pâwl hotu, Aigupta mi, Potiphara chuan chuta rawn hruai chhuktu Ismael-hote kut ata chu a lei ta a.” (Genesis 39:1) He Bible châng hian tleirâwl Josefa chu a ṭum hnihna atâna hralh a nih laia tihtlâwma a awm dân chu mitthla thei tûrin min ṭanpui a. Ani chu bungrua ang lek a ni! Josefa’n a pu thar, Aigupta ram hotu pakhat hnung a zui lai chu kan mitthla thei ngei ang, an pahnih chuan dâwr hmunte leh mi tam tak veivahna kawng chu kal tlangin Josefa awmna tûr in thar lam panin an kal a.
Chu in chu Josefa lo awm tawh ṭhinna in lakah chuan a va danglam tak êm! Ani chu berâm rual vêng paha hmun hrang hranga insawn ṭhîn puan ina chêng chhûngkuaa seilian a ni a. He hmunah hi chuan, Potiphara te ang, Aigupta rama mi hausa tak takte chu ṭha taka rawng hnawih in ropui takah an chêng a ni. Thil hlui chanchin zir mite’n hmân lai Aigupta mite chuan kulh bang ṭha tak nêna hung a, thingkûng daihlim ṭha tak te, phairuang te, tui lili te, leh tuia ṭo ṭhîn hnim hring duptea khat in ropuite chu a ngaina tih an sawi. Pangpâr huan mawi tak chhûnga sak, in ṭhenkhatahte chuan thlifîm dawnna bathlâr te, thli luh nâna siam tukverh sâng tak te, leh chaw eina tûr leh chhiahhlawhte awmna tûr pawh tiamin, pindan tam tak a awm a ni.
(Genesis 39:12-14) Tichuan, ani chuan, “Mi mutpui rawh,” tiin a silhfênah a lo man a; tin, ani chuan a silhfên chu a kutah chuan a tlânsan a, a chhuak ta daih a. 13 Tin, heti hi a ni a, a silhfên chu a kuta hnutchhiahin a tlân chhuak ta tih a hriat veleh, 14 a in awmte chu a ko va, an hnênah, “En teh u, min timualpho tûrin Hebrai mi pakhat kan hnêna a hruai luh tâk hi! Mi mutpui tumin ka hnênah hian a lo lût a; tichuan, aw ring takin ka au ta a.
(Genesis 39:20) Tichuan, Josefa pu chuan ani chu a hruai a, tân in, lal mi tâng phuara an awmnaah chuan a khung ta a; tichuan, chuta tân inah chuan a awm ta a.
w14-E 11/1 14-15
“Engtin Nge He Sual Lian Tak Hi Ka Tih Theih Ang?”
Chûng hun laia Aigupta rama tân in awm dân chu kan hre lo va. Thil hlui chanchin zir mite chuan chûng hmun chhe tawhte—tân in thim tak leh bang nei kulh lian tak ang—chu an lai chhuak a. A hnuah, Josefa’n chu hmun sawi nân “rip” tih awmze nei thu mal a hmang a, chu chuan êng awm lohna leh dam khaw chhuah nân beisei tûr a awm lo tih a kâwk a ni. (Genesis 40:15) Sâm bu-ah, Josefa chuan hremna dang pawh a tuar tih kan hria a ni: “A kete chu kawlin a tinâ a; thîr khaidiat bunin a awm ta a.” (Sâm 105:17, 18) Aigupta mite chuan, a châng chuan, an mi mante chu an kutte hnungkhirhin an phuar ṭhîn a, a dangte chu an nghâwngah thîr khaidiatte an awrhtîr ṭhîn a ni. Josefa chuan hremna tuar tûr khawpin engmah tisual lo mah se, dik lo taka cheibâwl niin hrehawm a va tuar nasa tak êm!
Chu bâkah, a hrehawm tawrh chu hun rei lote chhûng mai a ni lo. Bible chuan Josefa chu “chuta tân inah chuan a awm ta a,” tiin a sawi. Chu hmun hrehawm takah chuan kum engemaw zât hun a hmang a ni! Ani chuan chumi hmun ata a chhuah dâwn leh dâwn loh a hre lo. Chûng hrehawm a tawrh nîte chu chawlhkâr tam tak leh thla tam tak chhûng ni mah se, engtin nge beiseina nei tlat leh beidawng lova a awm tlat theih?
Bible chuan he chhânna thlamuanthlâk tak hi min pe a ni: “LALPA chu Josefa hnênah a awm zêl a, a chungah ngil a nei a,” tih hi. (Genesis 39:21) Jehova hmangaihna rinawm chu a chhiahhlawhte chunga thleng lo tûrin tân in bang te, kawl te, leh tân in thim takte pawhin a dang thei lo. (Rom 8:38, 39) Josefa’n a rilru hahnate chu a pa vâna mi hnênah ṭawngṭaia a thlen hnua, “thlamuanna zawng zawng Pathian” chauhvin a pêk theih thlamuanna a dawn dânte chu kan mitthla thei ngei ang. (2 Korinth 1:3, 4; Philippi 4:6, 7) Jehova’n Josefa tân eng dang nge a la tihsak? Ani chuan “tân in vêngtu pawh a khawngaihtîr” reng tih kan chhiar a ni.
(Genesis 39:21-23) Nimahsela, LALPA chu Josefa hnênah a awm zêl a, a chungah ngil a nei a, tân in vêngtu pawh a khawngaihtîr a. 22 Tichuan, tân in vêngtu chuan tân ina tângho awm zawng zawng chu Josefa kutah a kawltîr ta vek a; tichuan, chuta an tih apiang chu Josefa chu a titu a ni zêl ṭhîn a. 23 LALPA chu Josefa hnênah a awm a, a thiltih apiang chu LALPA chuan a hlawhtlintîr ṭhin avângin tân in vêngtu chuan a kuta thil awm rêng rêng chu a en duh ta lo va.
w14-E 11/1 15 ¶2
“Engtin Nge He Sual Lian Tak Hi Ka Tih Theih Ang?”
Bible chuan he chhânna thlamuanthlâk tak hi min pe a ni: “LALPA chu Josefa hnênah a awm zêl a, a chungah ngil a nei a,” tih hi. (Genesis 39:21) Jehova hmangaihna rinawm chu a chhiahhlawhte chunga thleng lo tûrin tân in bang te, kawl te, leh tân in thim takte pawhin a dang thei lo. (Rom 8:38, 39) Josefa’n a rilru hahnate chu a pa vâna mi hnênah ṭawngṭaia a thlen hnua, “thlamuanna zawng zawng Pathian” chauhvin a pêk theih thlamuanna a dawn dânte chu kan mitthla thei ngei ang. (2 Korinth 1:3, 4; Philippi 4:6, 7) Jehova’n Josefa tân eng dang nge a la tihsak? Ani chuan “tân in vêngtu pawh a khawngaihtîr” reng tih kan chhiar a ni.
Thlarau Lam Lunghlute Laih Chhuahna
(Genesis 38:9, 10) Tin, Onana chuan chi thlah tûr chu ama thlah a ni dâwn lo tih a hria a; tichuan heti hi a ni a, a u nupui a pâwl apiangin, a u tân chi a thlahsak lohna tûrin leiah chuan a titla ṭhîn a. 10 Tin, a thiltih dân chu LALPA mithmuhah chuan sual tak a ni a; tichuan, ani pawh chu a tihlum ta a.
it-2-E 555
Onana
(Oʹnan) [a awmze bul tak chu “inthlah theihna; chakna nasa tak”].
Juda fapa a ni a, Kanaan mi Sua fanu laka a fa pahnihna a ni . (Gen. 38:2-4; 1 Chro. 2:3) Jehova’n Onana u Era chu a thil sual tih avânga fa nei lo va a tihhlum hnuah, Juda chuan Onana chu Era nupui, Tamari chu pasalte unau tih tûr anga nupuia nei tûrin a hrilh a. Fapa a nei a nih chuan, ani chu Onana thlah hmasa ber ni lovin, Era thlah a ni zâwk ang a, fa tîr rochan tûr chu a chang dâwn a ni; mahse, chi thlah a nei lo a nih chuan Onana’n chûng rochante chu a chang ang. Onana’n Tamari a pâwl chuan, chi a thlahsak lohna tûrin “leiah chuan a titla ṭhîn a.” Bible-in “a u nupui a pâwl apiangin” a chi chu leiah chuan a titla ṭhîn tia a sawi avângin, hei hi Onana’n mahni châkna a hrithla tihna a ni lo. Hei hi “chi thlah danna,” chi khat a ni a, Onana’n Tamari chu chi a thlah duh lo tihna a ni. Onana chu a châkna a hrîkthlâk vâng ni lovin, a pa thu a âwih lohna te, a duhâmna te, leh inneihna chungchânga Pathian ruahmanna a zawm lohnate avângin, fa nei lovin Jehova’n a tihlum a ni.—Gen. 38:6-10; 46:12; Num. 26:19.
(Genesis 38:15-18) Tin, Juda chuan ani chu a hmuh chuan nawhchizuarah a ruat a; a hmai a inkhuh tlat si a. 16 Tichuan, kawng sîra hmeichhe lam chu a va pan, “Hawh, khawngaih takin i mu dûn ang,” a ti a: a mo kha a ni tih a hre si lo va. Tin, ani chuan, “Mi mutpui chuan eng nge mi pêk ang?” a ti a. 17 Tin, ani chuan, “Ran rual zînga mi kêlno ka thawn ang che,” a ti a. Tin, ani chuan, “Chu chu i rawn thawn hmaa lo hrên tûr eng emaw tal mi pe ang em?” a ti a. 18 Tin, ani chuan, “Hrên tûr eng nge ka pêk ang che?” a ti a. Tin, ani chuan, “I hming nemna leh i hrui, i tiang ken nên khân,” a ti a. Tichuan, a pe a, a mutpui ta a, tin, a lakah chuan fa a pai ta a.
w04-E 1/15 30 ¶4-5
Chhiartute Zawhna
Juda chuan a tiam anga Tamari chu a fapa Sela a neihtîr loh avângin dik lo takin thil a ti a. Chu bâkah, ani chuan biak ina nawhchizuar nia a ngaih hmeichhe pakhat pawh a mutpui bawk. Chu chu Pathian thiltum nêna inkalh a ni, mi pa chu dân anga a neih a nupui nên chauh nupa nun hmang tûra tih a nih avângin. (Genesis 2:24) Mahse, a tak takah chuan, Juda chu nawhchizuar mutpui a ni lo. Chu aiin, tum loh taka a fapa Sela chanvo chu lain, pasalte unau tih tûr anga tiin, fa a nei a ni.
Tamari pawh, a thiltih avângin nungchang bawlhhlawh takin a awm tihna a ni lo va. A fapa phîrte chu sâwn anga ngaih an ni hek lo. Bethlehem khaw mi Boaza chuan Moab mi Ruthi chu pasalte unau tih tûr anga nupuia a neih khân, Bethlehem khuaa upate chuan Boaza hnênah: “LALPAN he nula laka thlah a la siamsak tûr che avâng hian i chhûngkua chu Tamarin Juda a hrinsak Pereza chhûngkua ang lo ni rawh se,” tia sawiin, Tamari fapa Pereza chungah thu ṭha an sawi a ni. (Rut. 4:12) Chu bâkah, Pereza chu Isua Krista thlahtute zînga chhiar tel a ni bawk.—Matthaia 1:1-3; Luka 3:23-33.
Bible Chhiar
(Genesis 38:1-19) Chumi lai chuan heti hi a ni a, Juda chu a unaute hnên ata a chhuk a, Adullam mi pakhat a hming Hira chu a zuk bêl ta a. 2 Tin, Juda chuan chutah chuan Kanaan mi pakhat a hming Sua fanu a hmu a; tin, ani chu a nei a, a pâwl ta a. 3 Tichuan, a rai a, fapa a hring a; tin, Judan a hmingah chuan Era a sa a. 4 Tin, a rai leh a, fapa a hring leh a; tin, a nuin a hmingah chuan Onana a sa a. 5 Tin, fapa a hring leh pek a, a hmingah chuan Sela a sa a: chu mi chu a hrin lai chuan Juda chu Kezib khuaah a awm a. 6 Tin, Juda chuan a fa tîr Era chu nupui a neihsak a, a hming chu Tamari a ni a. 7 Tin, Juda fa tîr Era chu LALPA mithmuhin mi sual a ni a; tichuan, LALPAN ani chu a tihlum ta a. 8 Tin, Juda chuan Onana hnênah, “I u nupui chu pâwl la, pasalte unau tih tûr chu tihsak la, i u tân chuan chi thlahsak rawh,” a ti a. 9 Tin, Onana chuan chi thlah tûr chu ama thlah a ni dâwn lo tih a hria a; tichuan, heti hi a ni a, a u nupui a pâwl apiangin, a u tân chi a thlahsak lohna tûrin leiah chuan a titla ṭhîn a. 10 Tin, a thiltih dân chu LALPA mithmuhah chuan sual tak a ni a: tichuan, ani pawh chu a tihlum ta a. 11 Tin, Juda chuan a monu Tamari hnênah chuan, “Ka fapa Sela hi a puitlin hma loh chuan i pa in lamah pasal nei lovin lo awm rih ang che,” a ti a. “Chutilochuan ani pawh hi a ute angin a thi dah ang e,” a ti a ni. Tichuan, Tamari chu a pa in lamah chuan a va awm ta a. 12 Tin, a nakinah chuan Sua fanu Juda nupui chu a thi a; tin, Juda chuan a ngaih a lo reh a, Timna khuaah a berâm hmul mêttute hnên lamah chuan amah leh a ṭhian Adullam mi Hira chu an chho ta a. 13 Tin, miin Tamari chu, “I pu chu a berâm hmul mêt tûrin Timna khuaah a chho dâwn,” tiin an hrilh a. 14 Tichuan, ani chuan a pasal sûnna silhfênte chu a hlîp a, inkhuhna puanin a inkhuh a, a intuam tlat a, Timna khaw kawnga Enaim kulh kawngkâah chuan a lo ṭhu a; Sela chu a puitling tawh si a, a pa chuan a nupuiah a neihsak lo zo a ni tih a hria a ni. 15 Tin, Juda chuan ani chu a hmuh chuan nawhchizuarah a ruat a; a hmai a inkhuh tlat si a. 16 Tichuan, kawng sîra hmeichhe lam chu a va pan, “Hawh, khawngaih takin i mu dûn ang,” a ti a: a mo kha a ni tih a hre si lo va. Tin, ani chuan, “Mi mutpui chuan eng nge mi pêk ang?” a ti a. 17 Tin, ani chuan, “Ran rual zînga mi kêlno ka thawn ang che,” a ti a. Tin, ani chuan, “Chu chu i rawn thawn hmaa lo hrên tûr eng emaw tal mi pe ang em?” a ti a. 18 Tin, ani chuan, “Hrên tûr eng nge ka pêk ang che?” a ti a. Tin, ani chuan, “I hming nemna leh i hrui, i tiang ken nên khân,” a ti a. Tichuan a pe a, a muptui ta a, tin, a lakah chuan fa a pai ta a. 19 Tin, a tho va, a inkhuhna puan chu a hlîp a, a hmeithaina silhfênte chu a inbel leh ta a.
MAY 18-24
PATHIAN THU AṬANGA RO HLUTE | GENESIS 40-41
“Jehova Chuan Josefa A Chhan Chhuak”
(Genesis 41:9-13) Chumi lai chuan uain pe hotu ber chuan Pharaoa hnênah, “Vawiinah hian ka tihsual ka hre chhuak ta. 10 Pharaoa a chhiahhlawhte chungah a thinur a; tichuan, vêngtu pâwl hotu inah chuan kei leh chhang siam hotu ber chu min tântîr a: 11 tin, kei leh ani chuan zan khatah mumang kan nei a, mumang awmze hrang ve ve a ni kan neih ni. 12 Tin, chutah chuan kan hnênah vêngtu pâwl hotu chhiahhlawh, Hebrai mi, tlangvâl pakhat a awm a; tin, ani chu kan hrilh a, ani chuan kan mumangte chu min hrilhfiah ta a; kan mumang angzia zêlin a ni min hrilhfiah ve ve ni. 13 Tin, heti hi a ni a, min hrilhfiah ang takin a lo awm ta ngei a ni; kei chu ka hnathawh hi mi thawhtîr leh a, chhang siamtu chu khaihlum a ni ta a,” a ti a.
w15-E 2/1 14 ¶4-5
“Mumang Hrilhfiahnate Chu Pathian Ta A Ni Lo Vem Ni?”
Uain petu chuan Josefa chu a theihnghilh tawh pawh a ni thei; mahse, Jehova chuan a theihnghilh ngai lo vang. Zan khat chu, Pharaoa hnênah a theihnghilh theih loh mumang pahnih a neihtîr a. Mumang hmasa zâwkah chuan, lalin Nile Lui aṭanga bâwngpui nalh tak tak, thau tak tak pasarih lo chhuak leh a hnua bâwngpui pawr tak tak, chêr tak tak pasarih lo chhuak chu a hmu a ni. Tichuan, bâwng chêr tak takte chuan bâwng thau tak takte chu an ei zo ta mai a. A hnuah, Pharaoa chuan a mumangah buh kûng khatah hian vui sarih lian tak tak, ṭha tak tak a hmu a. Mahse, chumi hnuah chuan vui sarih sîn tê tê, thli chhêm ro rim remte an lo chhuak leh a, vui ṭha tak takte chu an lem zo ta mai a ni. Tichuan, Pharaoa chu zîngah a han ṭhangharh a, a rilru a buai hle a, a mumang hrilhfiahtîr tûrin a rama mi fingte leh mitlâk dawithiam zawng zawng chu a ko ta a. Mahse, hrilhfiah thei tu mah an awm lo. (Genesis 41:1-8) Mumang awmzia chu an hre lo hulhual nge ni a, mumang chungchângah ngaih dân hrang hrang an nei zâwk tih erawh kan hre lo. Engpawh chu nise, Pharaoa chu a beidawng hle a; chu a mumang khirh tak hrilhfiah theitu tûr zawn hmuh chu a tum lehzual a ni.
A tâwpah, uain petu chuan Josefa chu a hre chhuak ta! A hriat chhuah veleh, Pharaoa hnênah chuan kum hnih kaltaa a mumang leh chhang siamtu mumang dik taka hrilhfiah thei tlângvâl danglam tak tân inah a awm thu a hrilh ta a. Chu veleh, Pharaoa chuan Josefa chu tân in ata a hnêna rawn hruai tûrin thu a pe nghâl a ni.—Genesis 41:9-13.
(Genesis 41:16) Tin, Josefa chuan Pharaoa chu a chhâng a, “Chu chu keimah awm a ni lo ve, Pathianin Pharaoa chu thlamuanthlâk takin a chhâng zâwk ang,” a ti a.
(Genesis 41:29-32) Ngai teh, Aigupta ram chhûng zawng zawngah hian hausak tawntaw kum, kum sarih a lo thleng dâwn; 30 chumi hnuah chuan ṭâm kum, kum sarih a lo awm leh ang; tichuan, hausakna zawng zawng kha Aigupta ramah hian theihnghilh vek a ni tawh ang; ṭâm chuan ram hi a ei chhe zo vang. 31 Hausakna kha, a zuitu ṭâm avâng chuan, he ramah hian an hre tawh lo vang; a nasa hle dâwn si a. 32 Tin, mumang Pharaoa vawi hnih a neih nawntîrna chu hemi avâng hian a ni, thil tih tûr chu Pathianin a tihngheh a, Pathian vêkin a thlentîr lawk dâwn avângin.
w15-E 2/1 14-15
“Mumang Hrilhfiahnate Chu Pathian Ta A Ni Lo Vem Ni?”
Jehova chuan mi inngaitlâwmte leh mi rinawmte chu a hmangaih avângin, Josefa hnêna mi fingte leh puithiamte hriat loh chhânna a pe pawh chu a mak lo ve. Josefa chuan Pharaoa mumang pahnih chu awmze thuhmun a ni tih a hrilh a. Mumang chu mang nawntîrin, Jehova chuan thilthleng tûr chu ‘tinghehtin’ a thlen famkimtîr ang tih a tichiang a. Bâwng thau ṭha tak tak leh buh vui ṭha tak takte chuan Aigupta rama hausak tawntaw kum, kum sarih lo awm tûr chu a entîr a, bâwng chêr tak takte leh buh vui sîn tê tê chuan buh ṭhat kum zawha awm tûr ṭâm kum, kum sarih a entîr a ni. Chu ṭâmna chuan ram hausaknate chu a ei zo vek ang.—Genesis 41:25-32.
(Genesis 41:38-40) Tin, Pharaoa chuan a chhiahhlawhte hnênah, “Hetiang, Pathian thlarau awmna mi hi kan hmu zo dâwn em ni?” a ti a. 39 Tin, Pharaoa vêk chuan Josefa hnênah, “Pathianin chûng zawng zawng chu a hriattîr che avângin, nang anga bengvâr leh fing rêng reng hi an awm lo ve. 40 Nang hi ka chhûngte chungah hotuah i awm ang a, ka khua leh tui zawng zawng hi i thu ang zêlin an awm ang; lalṭhutphaha ṭhut thu-ah chauh hian i aiin ka lal ang,” a ti a.
w15-E 2/1 15 ¶3
“Mumang Hrilhfiahnate Chu Pathian Ta A Ni Lo Vem Ni?”
Pharaoa chuan a thusawi ang ngeiin a ti a. Josefa chu puan zai sîna siam silhfênte hâktîr a ni ta thuai a. Pharaoa chuan ani chu rangkachak ṭhi te, hming nemna zungbun te, lal tawlailîr te a pêk bâkah, ram pumpui fan theihna leh a remruat anga thil ti tûra thuneihnate a pe bawk a ni. (Genesis 41:42-44) Ni khat thil thu-ah, Josefa chu tân in aṭangin lal inah a awm ta a. Mi tâng hnuaihnung tak angin zîng a tho va, Pharaoa dawt chiaha rorêltu angin zân a hmang dâwn ta a ni. Josefa’n Pathian Jehova chunga rinna a nghat chu a va tifuh tak êm! Jehova chuan a chhiahhlawh rinawmin kum tam tak chhûng a tawrh rorêl dik lohnate chu a hmu vek a. Ani chuan chûng thil zawng zawng chu a hun takah leh kawng dik takin a chingfel a ni. Jehova chuan Josefa tawrh thil dik lote siam ṭhat mai bâkah, Israel hnam pumpui hma lam hun tûr pawh vênhim a tum tlat a ni. He thuziak inzawma a dawta thuziakah chutianga a nih dân chu kan hmu ang.
Thlarau Lam Lunghlute Laih Chhuahna
(Genesis 41:14) Chutichuan, Pharaoa chuan Josefa chu a kohtîr ta nghâl a; tichuan, hmanhmawh takin rip ata chu an hruai chhuak ta a: tin, ani chu a inmêt fai a, a silhfên chu a thlâk a, Pharaoa hnênah a va lût a.
w15-E 11/1 9 ¶1-3
I Lo Hre Tawh Em?
Engvângin nge Josefa chu Pharaoa a hmuh hmaa a inmeh fai?
Genesis bu-a târ lan angin, Pharaoa chuan amah tibuaitu a mumangte hrilhfiah tûrin tân ina awm Hebrai tlangvâl Josefa chu rawn hruai vat tûrin thu a pe a. Chutih hun lai chuan, Josefa chu tân inah kum tam tak a lo awm tawh a. Pharaoa thupêk chu hmanhmawhthlâk tak ni mah se, Josefa chu a inmêt fai hmasa phawt a ni. (Genesis 39:20-23; 41:1, 14) Genesis ziaktuin pawimawh vak lo anga lang he thu chipchiar tak a târ lanna hian Aigupta mite hnam dân chu a hre chiang hle tih a târ lang a ni.
Khabe hmul zuah hi Hebrai mite pawh tiamin, hmân lai hnam tam takte tih dân a ni a. Chumi nêna inkalhin, McClintock and Strong’s Cyclopedia of Biblical, Theological, and Ecclesiastical Literature chuan: “Hmân lai Aigupta mite chu khaw chhak lam mite zînga khabe hmul zuah duh lo awmchhun an ni,” tiin a sawi a ni.
Meh fai ngai chu khabel hmul chauh a ni em? Biblical Archaeology Review tih magazine chuan Aigupta mite hnam dân ṭhenkhatin mi chu Pharaoa hmaa a inlan dâwnin temple-a a kal dâwna a inbuatsaih anga inbuatsaih tûrin a phût tih a sawi. Chutiang a nih chuan, Josefa chuan a sam leh a taksaa hmulte chu a meh fai vek a ngai ngei ang.
(Genesis 41:33) Chutichuan tûnah hian Pharaoa chuan mi pakhat bengvâr tak fing tak mai zawng chhuak sela, Aigupta ram chungah hian hotuah awmtîr rawh se.
Pathian Rawngbâwltute Angin Nun Dan Mawi I Lantîr Ang U
14 Bible hun laia Pathian ṭih mi nu leh pate chuan an fate chu in chhûng khur aṭangin nun dân mawi an zirtîr ṭhîn a. Genesis 22:7-a Abrahama leh a fapa Isaaka te nun dân mawi lantîra ṭha taka an inkoh dân hi han ngaihtuah teh. Josefa chungchângah pawh a nu leh pa hnên aṭanga zirtîrna a dawn ṭhatzia a lang bawk. Lung in a tânnaah pawh a tânpuite chungah nun dân mawi lantîrin a hawihhâwm a ni. (Gen. 40:8, 14) Pharaoa hnêna a ṭawngkam hmante hian thuneitute biak dân tûr a hria tih a târ lang a ni.—Gen. 41:16, 33, 34.
Bible Chhiar
(Genesis 40:1-23) Tin, chûng thil hnuah chuan heti hi a ni a, Aigupta lal uain petu leh a chhang siamtu te chuan an pu Aigupta lal chu an tivui a. 2 Tichuan, Pharaoa chu a chhiahhlawh hotu pahnih chungah, a uain pe hotu ber chungah leh a chhang siam hotu ber chungah chuan a thinur ta a. 3 Tichuan, vêngtu pâwl hotu inah, tân in, Josefa phuara a awmnaah chuan a tântîr ta a. 4 Tin, vêngtu pâwl hotu chuan Josefa chu anmahni a enkawltîr a; tichuan, ani chuan an rawng a bâwl ta a: tin, ni eng zât emaw lai an tâng rih a. 5 Tin, tân ina phuara awm, Aigupta lal uain petu leh chhang siamtu chuan an pahnihin zan khatah mumang awmze hrang ve ve an nei a. 6 Tin, a tûk zîngah chuan Josefa chu an hnênah a va lût a, anni chu a va hmu a, tin, ngai teh, an lo lungngai hle a. 7 Tichuan, ani chuan, “Engtizia nge vawiin chu lungngai hmêl in va pu ve?” tiin Pharaoa chhiahhlawh hotu, a pu ina tâng vete chu a zâwt a. 8 Tin, anni chuan a hnênah “Mumang kan nei a, min hrilhfiah thei tu mah an awm si lo a ni,” an ti a. Tin, Josefa chuan an hnênah “Mumang hrilhfiahnate chu Pathian ta a ni lo vem ni? Khawngaih takin mi han hrilh teh u,” a ti a. 9 Tichuan, uain pe hotu ber chuan a mumang chu Josefa a hrilh a, a hnênah, “Ka mumangah chuan ngai teh, ka hmaah hian grêp hrui a lo awm a; 10 grêp hruiah chuan pêng pathum a awm bawk a: tin, chawr chhuak angin a lo awm a, a pârte a lo chhuak a; a pâr bâwrte chuan grêp hminte a rawn chhuah ta a: 11 tin, Pharaoa no chu ka kutah hian a lo awm a; tichuan grêp rahte chu ka lo va, Pharaoa novah chuan ka sâwr a, no chu Pharaoa kutah ka lo pe a,” a ti a. 12 Tin, Josefa chuan a hnênah, “Hei hi a hrilhfiahna a ni: pêng pathum chu ni thum a ni; 13 tûn achin ni thumah Pharaoan i lû a chawi kâng ang a, i hnathawh chu a thawhtîr leh ang che; tichuan, a uain petu i nih laia i pêk dân pângngai ang khân Pharaoa no chu a kutah i pe leh dâwn a nih chu. 14 Amaherawhchu, i chan ṭhat leh hunah chuan mi han hre reng la, khawngaih takin ka chungah khawngaihna rawn lantîr ang che; Pharaoa hnênah ka chanchin han sawi la, he in ata hi mi hruai chhuak ang che. 15 Hebrai-ho ram ata miin a rûka mi rûk bo ka ni a: he ramah pawh hian rip chhûnga mi khûngna khawp eng mah ka tisual hek lo,” a ti a. 16 Chhang siamtu chuan hrilhfiahna chu a ṭha tih a hriatin Josefa hnênah chuan, “Kei pawh mumang ka nei a, ngai teh, chhang vâr fawng pathumin ka lo chhîpchhuan a: 17 tin, fawng chungnung berah chuan Pharaoa chaw, chhang siamtu siam, chi tinrêng hi a lo awm a; tin, chûng chu savaten ka fawng chhîpchhuan ata chu an lo ei noh noh va,” a ti a. 18 Tin, Josefa chuan a chhâng a, “Hei hi a hrilhfiahna a ni: fawng pathum chu ni thum a ni; 19 tûn achin ni thumah chuan Pharaoan i taksa ata i lû a chawi kâng ang a, thing lêrah a khai ang che; tichuan, savaten i sa chu an ei noh noh dâwn a nih chu,” a ti a. 20 Tin, heti hi a ni a, a ni thum nî, Pharaoa pian champhaphâk niah chuan, ani chuan a chhiahhlawh zawng zawngte tân ruai a ṭheh a: tin, a chhiahhlawhte zînga mi uain pe hotu ber lû leh chhang siam hotu ber lû chu a chawi kâng ta a. 21 Josefan anmahni a hrilhfiah ang takin, uain pe hotu ber chu uain petuah a ṭantîr leh a; tichuan, no chu Pharaoa kutah chuan a pe ta a: 22 chhang siam hotu ber erawh chu a khai hlum ta a. 23 Nimahsela, uain pe hotu ber chuan Josefa chu a hre reng ta awzâwng lo va, a theihnghilh ta mai a.
MAY 25-31
PATHIAN THU AṬANGA RO HLUTE | GENESIS 42-43
“Josefa Chuan Insûmtheihna Nasa Tak A Lantîr”
(Genesis 42:5-7) Tichuan, Israela fapate chu mi kalho zîngah chuan buh lei tûrin an kal ve a: Kanaan ramah pawh ṭâm a tla ve si a. 6 Tin, Josefa chu Aigupta ram chungah chuan hotu a ni a; amah chu chumi rama mi zawng zawng hnênah a hralhtu a ni; tichuan, Josefa uteho chu an lo kal a, lei siin amah chibai an bûk hlawm a. 7 Tin, Josefa chuan a uteho chu a lo hmu a, anni chu a lo la hre hlawm a; nimahsela, an lakah chuan chi dang angin a insiam a, ram takin a bia a; tin, an hnênah, “Khawi aṭanga lo kal nge in nih?” a ti a. Tin, anni chuan, “Buh lei tûrin Kanaan ram aṭanga lo kal kan ni,” an ti a.
w15-E 5/1 13 ¶5
“Pathian Aiawh Em Ka Nih?”
Josefa chungchâng hi eng nge ni ve? Ani chuan a unaute chu a hre nghâl a! Chu bâkah, a hmaa an kûn a hmuh chuan, a naupan lai a hre chhuak a ni. Bible chuan heti hian min hrilh a ‘Josefa chuan mumanga a hmuhte kha a lo hre chhuak ta a,’ chu mumang chu Jehova’n naupang a nih laia a mantîr a ni a, a unaute chu a hmaah an la kûn dâwn tih hriattîrtu mumang a ni a, tûnah chutiang chiah chuan a thleng ta! (Genesis 37:2, 5-9; 42:7, 9) Josefa’n eng nge a tih tâk ang? Anni chu a kuah ang em? Nge ni a, an chungah phuba a la zâwk dâwn?
w15-E 5/1 14 ¶1
“Pathian Aiawh Em Ka Nih?”
Chutiang dinhmun danglam takah chuan i awm ve a rinawm loh. Mahse, chhûngkaw buaina leh inṭhennate chu tûn lai khawvêlah a hluar hle a. Chutiang harsatnate kan hmachhawn hunah, ṭha famkim lo kan thinlungin min chêttîr anga thil tih chu kan duh mai thei. Mahse, Josefa entawn a, Pathianin kan harsatnate chingfel tûra min duh dân hriat tum chu a finthlâk zâwk a ni. (Thufingte 14:12) Chhûngkuaa remna neih chu thil pawimawh tak a nih rualin, Jehova leh a Fapa nêna remna neih chu a pawimawh lehzual tih hre reng ang che.—Matthaia 10:37.
(Genesis 42:14-17) Tin, Josefa chuan an hnênah, “‘Enthlatute in ni,’ ka tih che u kha, in nih ngei hi! 15 Heti hian fiahin in awm ang: in tlum ber chu heta a lo kal loh chuan Pharaoa nunna chhâlin heta ta hi in chhuak lo vang ka ti che u a ni. 16 Nangmahniah thutak a awm nge awm lo in thu fiah nân in zînga pakhat tîr ula, in nau chu rawn hruai rawh se, nangni erawh chu phuarin in lo awm rih ang; chutilochuan Pharaoa nunna chhâlin, ‘enthlatute in ni ngei mai,’ ka ti dâwn che u a ni,” a ti a. 17 Tin, an za chuan ni thum a tântîr hlawm a.
w15-E 5/1 14 ¶2
“Pathian Aiawh Em Ka Nih?”
Josefa chuan a unaute thinlung chu a inthlâk danglam tawh leh tawh loh hriat nân vawi engemaw zât a fiah a. Ani chuan ṭawng letlingtu hmangin anni chu ram dang aṭanga lo kal enthlatute an ni tia puhin, ram takin a be ṭan a ni. Anni chuan enthlatute an nih lohzia lantîr nân a hriat châk tak, an naupang ber chu inah a la awm tih pawh tiamin, an chhûngkaw chanchin chu an hrilh a. Josefa chuan a rilrua awm chu a insûm hrâm hrâm a ni. A nau chu a la dam tak tak em? Tûnah chuan, Josefa’n tih dân tûr a hre ta. Ani chuan: “Heti hian fiahin in awm ang,” tia sawiin, an hnênah an naupang ber rawn hruai tûrin a hrilh a. A hnuah, an zînga pakhat hrên an phal chuan, an naupang ber rawn hruai tûra kaltîr chu a remti ta a ni.—Genesis 42:9-20.
(Genesis 42:21, 22) Tin, anni chuan, “Kan nau chunga kan thiltih kha kan thiam lo tak tak a nih hi, khawngaih tûra min ngen ṭâwk ṭâwk laia a thinlung manganzia hmu reng chunga kan ngaihthlâksak duh loh kha; chuvângin, he manganna hian min tlâkbuak a nih hi,” an inti a. 22 Tin, Reubena chuan, “‘Naupang chungah thil tisual suh u,’ tiin in hnênah ka sawi lo vem ni? In ngaithla duh lo a nih kha; chuvângin ngai teh u, a thisen phuba chu an la a nih hi,” tiin anni chu a chhâng a.
it-2-E 108 ¶4
Josefa
Chutiang thilthlengte an hmuhin, Josefa unaute chuan ani chu kum kaltaa sala an hralh avânga an chunga Pathian hremna chu an hre ṭan ta a. An unaupa tih an la hriat loh hmaah chuan an thiltih sual chu an sawi a. Inchhîrna an nei tawh tih an thusawite aṭanga a hriat chuan, Josefa chu a lungchhiat êm avângin, an hma ata kal chhuakin a ṭap ta a. A lo luh leh chuan, an ruala an naupang ber an rawn hruai leh hma loh Simeona chu a hrêng rih a ni.—Gen. 42:21-24 .
Thlarau Lam Lunghlute Laih Chhuahna
(Genesis 42:22) Tin, Reubena chuan, “‘Naupang chungah thil tisual suh u,’ tiin in hnênah ka sawi lo vem ni? In ngaithla duh lo a nih kha; chuvângin ngai teh u, a thisen phuba chu an la a nih hi,” tiin anni chu a chhâng a.
(Genesis 42:37) Tin, Reubena chuan a pa hnênah, “I hnêna ka rawn hruai leh loh chuan ka fapate pahnih hi that mai ang che; ani chu ka kutah mi kawltîr la i hnênah ka rawn hruai leh mai ang,” tiin a sawi a.
it-2-E 795
Reubena
Reubena’n Josefa chu tihlum lo va, khuarkhuruma thlâk zâwk tûra a unau pakuate rilru hmin tûra a thlêm khân, a mize mawi takte chu a lo lang a, Ani chuan Josefa chu a rûk têa khuarkhurum ata chhan chhuaka thawn haw a tum a ni. (Gen. 37:18-30) Kum 20 aia tam a liam hnuah, a unaute’n dik lo taka Josefa an cheibâwl avânga Aigupta rama enthlatute nia puh an nih thu an sawi khân, Reubena chuan Josefa an phiar rûknaah a tel ve loh thu a hriatnawntîr a. (Gen. 42:9-14, 21, 22) Chu bâkah, a ṭum hnihna atâna Aigupta rama an kal dâwna Jakoba’n a ute ruala Benjamina kaltîr a phal lo khân: “I hnêna ka rawn hruai leh loh chuan ka fapate pahnih hi that mai ang che,” tia Benjamina aia a fate chân ngamtu pawh Reubena bawk a ni.—Gen. 42:37.
(Genesis 43:32) Tichuan, ama tan a hrangin, anniho tân a hrangin, Aigupta mi a eipuiteho tân a hrangin an siam ta a: (Aigupta-hovin Hebrai-ho chu an eipui thei si lo; chutiang tih chu Aigupta-ho tân chuan a thiang lo a ni.)
Genesis Bu Aṭanga Thu Pawimawh Hrilhfiahna—II
43:32—Engvângin nge Aigupta-ho tân Hebrai-ho ruala chaw ei chu a thian loh? A chhan ni thei deuh ber chu sakhaw inhuatna emaw, hnam chapona emaw vâng a ni thei ang. Aigupta-ho chuan berâm vêngtute pawh an ten bawk. (Genesis 46:34) Engvângin nge? Berâm vêngtute chu Aigupta hnam zînga hnam hnuaihnung tak an nih vâng mai a ni thei a. A nih loh leh thlai chînna tûr ram zau tâwk a awm loh avângin chûng ran tlatna hmun zawngtute chu Aigupta-ho chuan an duh lo a ni thei bawk ang.
Bible Chhiar
(Genesis 42:1-20) Tin, Jakoba chuan Aigupta ramah buh a awm tih a lo hre ta a; tichuan, Jakoba chuan a fapate hnênah, “Engati nge in inen mai mai ni?” a ti a. 2 Tin, amah vêk chuanin, “Ngai teh u, Aigupta ramah buh a awm tih ka lo hre ta: thi lova kan nun chhuah theihna tûrin chutah chuan zuk kal ula, chuta ta chu kan tân zuk lei rawh u khai,” a ti a. 3 Tichuan, Josefa uteho sâwm chu Aigupta ram ata buh lei tûrin an zuk kal ta a. 4 Josefa nau Benjamina erawh chu a ute hnênah chuan Jakoban a kaltîr ve lo va; “Tawhsual a zuk tâwk hlauh dah ang e,” a ti a ni. 5 Tichuan, Israela fapate chu mi kalho zîngah chuan buh lei tûrin an kal ve a: Kanaan ramah pawh ṭâm a tla ve si a. 6 Tin, Josefa chu Aigupta ram chungah chuan hotu a ni a; amah chu chumi rama mi zawng zawng hnênah a hralhtu a ni: tichuan, Josefa uteho chu an lo kal a, lei siin amah chibai an bûk hlawm a. 7 Tin, Josefa chuan a uteho chu a lo hmu a, anni chu a lo la hre hlawm a, nimahsela an lakah chuan chi dang angin a insiam a, ram takin a bia a; tin, an hnênah, “Khawi aṭanga lo kal nge in nih?” a ti a. Tin, anni chuan, “Buh lei tûrin Kanaan ram aṭanga lo kal kan ni,” an ti a. 8 Tin, Josefa chuan a uteho chu a lo la hria a, anni erawh chuan ani chu an hre si lo. 9 Tin, Josefa chuan anmahni chungchâng thu mumanga a hmuhte kha a lo hre chhuak a, an hnênah, “Enthlatute in nih hi; ram ruahzia en tûrin in lo kal a nih hi le,” a ti a. 10 Tin, anni chuan a hnênah, “Ka pu, ni suh e, i chhiahhlawhte hi buh lei tûra lo kal kan ni asin. 11 Mi pakhat fa vek kan ni; mi dik tak kan ni a, i chhiahhlawhte hi enthlatute kan ni awzâwng lo ve,” an ti a. 12 Tin, ani chuan an hnênah, “Ka âwih lo, ram ruahzia en tûra lo kal in nih hi maw,” a ti a. 13 Tin, anni chuan, “Keini i chhiahhlawhte hi unau sâwm leh pahnih, Kanaan rama awm mi pakhat fa kan ni; tin, ngai teh, kan tlum ber chu tûnah chuan kan pa hnênah a awm a, pakhat chu a awm ta lo a ni,” an ti a. 14 Tin, Josefa chuan an hnênah, “‘Enthlatute in ni,’ ka tih che u kha, in nih ngei hi: 15 heti hian fiahin in awm ang: in tlum ber chu heta a lo kal loh chuan Pharaoa nunna chhâlin heta ta hi in chhuak lo vang ka ti che u a ni. 16 Nangmahniah thutak a awm nge awm lo in thu fiah nân in zînga pakhat tîr ula, in nau chu rawn hruai rawh se, nangni erawh chu phuarin in lo awm rih ang; chutilochuan Pharaoa nunna chhâlin, ‘enthlatute in ni ngei mai,’ ka ti dâwn che u a ni,” a ti a. 17 Tin, an za chuan ni thum a tânhîr hlawm a. 18 Tin, a ni thum ni-ah chuan Josefa chuan an hnênah, “Heti hian ti ula in nung ang, Pathian ka ṭih si a; 19 mi dik tak in nih chuan in unau zîngah hian pakhat phuarin awm rawh se; nangni erawh chu kal ta ula, in chhûngteho ṭâm tân chuan buh phur rawh u: 20 tin, in tlum ber chu ka hnênah rawn hruai ang che u: chutichuan in thu chu a fiah ang a, in thi dâwn lo nia,” a ti a. Tichuan, chutiang chuan an ti ta a.