Exodus
20 Tichuan, Pathianin hêng thute hi a sawi a:
2 “Kei hi in Pathian Jehova, in sal tânna Aigupta ram aṭanga hruai chhuaktu che u ka ni. 3 Keimah lo chu Pathian dang rêng rêng in be tûr a ni lo.
4 “Vâna thil awm emaw, leia thil awm emaw, tuia thil awm emaw ang chi rêng rêng, a lem emaw, a anpui emaw pawh in tân in siam tûr a ni lo. 5 An hmaah in kûn tûr a ni lo va, kei in Pathian Jehova hi, keimah chauh min be tûra mite phûttu Pathian ka ni a. Pate thil sual tih avânga fate hrem ṭhîn, min hawtute chu chhuan thumna leh chhuan lina thlenga hrem ṭhîn ka ni. 6 Min hmangaihtu leh ka thupêk zâwmtute chungah erawh chuan, chhuan sâng tam tak thlengin hmangaihna rinawm ka lantîr ṭhîn.
7 “In Pathian Jehova hming chu zah lo takin in hmang tûr a ni lo, Jehova chuan zah lo taka a hming hmangtute chu hrem lohvin a chhuah dâwn si lo va.
8 “Sabbath nî hi a thianghlim a ni tih hre reng rawh u. 9 Ni ruk chhûngin in hna zawng zawng in thawk tûr a ni a, 10 a ni sarihna erawh chu in Pathian Jehova tâna sabbath ni thianghlim a ni ang. Chumi nî chuan eng hna mah in thawk tûr a ni lo va, in fapa te, in fanu te, in bâwihnu te, in bâwihpa te, in ran vulh te, in chênpui ram dang mite pawhin eng hna mah an thawk tûr a ni lo. 11 Ni ruk chhûng Jehova’n lei te, vân te, tuifinriat te leh, a chhûnga thil awm zawng zawngte a siam a, a ni sarih nîah chuan a châwl ta a. Chuvângin, Jehova’n Sabbath nî chu malsâwmin a tithianghlim a ni.
12 “I nu leh i pa chawimawi rawh; chutichuan, i Pathian Jehova’n ram a pêkah che hian rei tak i dam thei ang.
13 “Tual i that tûr a ni lo.
14 “I uirê tûr a ni lo.
15 “Rûk i ru tûr a ni lo.
16 “Thuhretua i ṭan hunah thu dik lo i sawi tûr a ni lo.
17 “Mi in i awt tûr a ni lo va. Mi nupui emaw, a bâwihnu emaw, a bâwihpa emaw, a bâwng emaw, a sabengtung emaw, a thil neih dang rêng rêng emaw pawh i awt tûr a ni lo,” tiin.
18 Mipuite chuan khawpui ri leh kâwlphe te, berâm pa ki ham ri te, tlânga meikhute chu an hmu a, an thil hmuh avâng chuan hlauva khûrin hla takah an ding a. 19 Tichuan, Mosia hnênah: “Pathianin kan hnênah thu sawi tawh suh se, hlauh avângin kan thi mai ang. Nangman thu sawi la, kan lo ngaithla zâwk ang e,” an ti a. 20 Mosia chuan mipuite hnênah: “Hlau suh u, amah in ṭih chhunzawm zêl a, thil sual in tih lohna tûrin, Pathian dik chu nangmahni fiah tûrin a lo kal a ni,” a ti a. 21 Mipuite hla taka an la din reng lai chuan, Mosia chuan Pathian dik awmna chhûm dum chhah tak chu a pan hnai a.
22 Jehova chuan Mosia hnênah: “Israel mite hnênah heti hian i sawi tûr a ni, ‘Vân aṭangin ka bia che u tih nangmahni ngeiin in hria e. 23 Keimah chauh lo chu, tangkarua leh rangkachaka pathian dangte siamin in be tûr a ni lo. 24 Min biakna atâna hmun ka thlan apiangah* ka tân hlumin maichâm in siam tûr a ni a. Chutah chuan, hâlral thilhlan te, remna thilhlan te, berâm te, rante in hlân tûr a ni. Tichuan, in hnênah ka lo kal ang a, mal ka sâwm ang che u. 25 Maichâm chu lunga in siam chuan, in lung hman chu thîrkhenin in chher tûr a ni lo. Chutianga in chher chuan, in maichâm siam chu ka pawm lo vang. 26 Tin, in zahmawh a lan lohna tûrin, ka maichamah chuan lâwn suh ang che u.’