Tlangvâl Muhîl

AW! AW! Hetah enge lo ni? Leia mu tlangval hi a na nasa viau em ni? En teh! In atanga lo chhuak mi pakhat saw Paula a ni. Timothea pawh i hmu em? Tlangval chu tukverh atangin a tla em ni?

Ni e, chu chu a lo ni ta. Hetah Troas khuaah hian Paulan zirtirte hnenah thu a sawi a. A tukah lawnga a kal chhuah dawn vangin rei tak a hmu leh dawn lo tih a hria a. Chuvangin zanlai thlengin thu a sawi a.

He tlangval Eutuka hi tukverhah a thu a, a muhil a. Chhawng thumna tukverh atangin a hnuai leiah a tla a. Chuvangin mite hi hlauthawng hmel an putna chhan i hre thei. Miten tlangval chu an han chawi kan chuan, an hlauh ang ngeiin, a thi tawh a.

Paulan tlangval chu a thi tih a hriatin a chungah a bawh a, a pawm a. ‘Hlauthawng suh u. A dam e!’ a ti ta a. A dam ngei a! Thilmak a ni! Paulan a tinung leh a ni! Mipuite chu an hlim ta em em a.

ln chhawngah an chho leh vek a, chaw an ei a. Khawvar thlengin Paulan thu a sawi a. Mahse Eutuka chu a muhil leh tawh lovang tih i hre chiang thei! Tin Paula, Timothea leh an hnena kalte chu lawngah an lut a. Khawiahnge an kal i hria em?

Paula chuan thuhrila a zin vawi thumna a zo chiah a ni a, a haw mek a ni. He a zinnaah hian Paula chu Ephesi khawpui ringawtah kum thum a cham a. Chuvangin a zin vawi hnihna aiin a thang rei zawk.

Troas a chhuahsan hnuah, Mileti-ah rei lote lawng a chawl a. Ephesi chu mel tlem te chauhva hla a nih vangin, Paulan an hnena a thusawi hnuhnung ber a sawi theih nan kohhrana upate a ko va. A hnuah, lawng kal chhuah hun a thlen a, Paula kal an hmuh chuan an ngui ta hie a.

A tawpah, lawng chu Kaisaria-ah a thleng a. Heta zirtir Philipa ina Paula a awm laiin, zawlnei Agaban Paula a vaukhan a. Jerusalem a thlen hunah Paula chu tantir a ni ang a ti a. Tichuan a tih ang ngeiin chu chu a thleng a. Tichuan Kaisaria-a tan ina kum hnih a tan hnuah, Rom-mite awptu Kaisara hmaa a thu sawi turin Paula chu Rom-ah tirh a ni a. Rom-a a zin kawngah enge lo thleng i en ang u.