Thliarkâra Lawng Chhiatna

EN TEH U! Lawngin buaina a tawk a. A keh sawm ta! Tuia zuang thla ta mite i hmu em? Thenkhatin vaukam an thleng tawh a. Saw saw Paula em ni? A chungah enge thleng i hmu chhuak ang u.

Paula chu Kaisaria-ah kum hnih chhung tan inah a tang tih hrereng la. Tichuan amah leh mi tang dangte chu lawngah an chuantir a, Rom-a kal turin an chhuak ta a. Kret thliarkar kianga an kal pelh laiin, thlipui rapthlak deuhvin a nuai a. Thliin a chhem na khawpa, miten lawng an khalh thei ta lo va. Chhunah ni, zanah arsite an hmu thei tawh lo va. A tawpah, ni tam tak hnuah lawnga mite chuan him beiseina reng an nei tawh lo va.

Tin Paula a dinga: ‘Pakhat mahin nun in hloh lo vang; lawng chauh hloh a ni ang. Nizanah kan hnenah Pathian vantirhkoh a lo kal a, “Hlau suh, Paula! Rom-mi awptu Kaisara hmaah i ding tur a ni. Tin Pathianin i hnena lawnga kalte zawng zawng a chhanhim ang,“ a ti si a,’ a ti a.

Thlipui tleh tirh atanga ni 14-na zanlai velah, lawngpute chuan tui a thuk ta lo deuh tih an hria a! Thimah lungpui sut an hlauh vangin thirchakai an thlak a. A tukah li tengzawl an hnu a. Vaukam thlenga lawng kaltir an tum a.

Vaukam an hnaih laiin, lawng chuan tiau pawng a su a, a tang ta a. Tin tuifawnin a su sawk sawk a, lawng chu a keh sawm ta a. Vengtu sipai hotu chuan: ‘Tui hleuh thiam zawng zawng tuipuiah zuang thla hmasa ula, vaukamah hleuh kai rawh u,’ a ti a. Chutiang chuan an ti a. Chutikawng chuan, vantirhkohvin a tiam ang ngeiin lawnga awm mi 276-te chu him takin vaukam an thleng ta a.

Thliarkar chu Malta tih a ni a. Mite chuan ngil an nei em em a, lawnga mite chu an enkawl a. Khua a lo that zawk deuhvah, Paula chu lawng danga dah a Rom-a kalpui a ni ta a.