Zahawm Tak, Pângngai Tak, leh Pathian Pawmzâwng Kristian Mitthi Vuina
HAWINA lam apiangah mi an ṭap chuah chuah a. A sûntute chu sûnna kawr dum dang lam bîk tak ha-in, nasa taka ṭapin leiah an let tawp tawp mai bawk a. A lâma te lah chu rimawi ri dum dum milin an insâwi a. Mahse, mi dangte chu thilte eiin, an nui dur dur a, kût hmang ang maiin an awm a ni. Mi ṭhenkhat chu duh tâwka in tûr zu a awm avângin, tual laiah an let phung mai bawk. Eng thil nge thleng ta? Khawvêl hmun ṭhenkhatah chuan, chûng chu mitthi thlah tûra mi za têl an punkhâwmna mitthi vuina hmuna thilthleng a ni.
Jehova Thuhretu tam tak chu chhûngkhat leh ṭhenawmte’n mitthi an hlauh va, nasa taka puithuna âtthlâk an serhna hmunah an chêng a. Mi maktaduai têlte chuan tuemaw a thih hian ani chu mi nung damte ṭanpui emaw, tina emaw thei thlahtute thlarauvah a lo chang ta ṭhîn niin an ngai a ni. He rin dân hi mitthi vui dân tam takah a inphan tel tlat a. Mitthi ṭah chu thil pângngai tak a ni ngei mai. Isua leh a zirtîrte pawhin an hmangaih takte sûn châng an nei a ni. (Joh. 11:33-35, 38; Tirh. 8:2; 9:39) Mahse, an hun laia an chîn ṭhin, nasa taka sûnzia lantîrna ang chu an ti ve ngai lo. (Lk. 23:27, 28; 1 Thes. 4:13) Engvângin nge? A chhan pakhat chu mitthite dinhmun dik tak an hriat vâng a ni.
Bible chuan: “Mi nungdamte chuan an la thi dâwn tih an hre si a, mitthi erawh chuan engmah an hre lo . . . An hmangaihna te, an huatna te, an îtsîkna te a boral daih tawh a ni . . . Thlân i kalna tûrah chuan thiltih tûr emaw, remruat tûr emaw, hriatna emaw, finna emaw a awm si lo va,” tiin chiang takin a sawi. (Thur. 9:5, 6, 10) Thlarauva thâwk khum hêng Bible chângte hian mi a thih hian, engmah a hriat tawh lohzia a tilang chiang hle. A ngaihtuah thei lo va, hriatna a nei lo va, biak theih a ni lo va; tin, engmah a hre thiam thei hek lo. He Bible thutak pawimawh hriatthiamna hian eng angin nge Kristiante mitthi invui dân chu a nghawng ang?
“Thil Bawlhhlawh Rêng Rêng . . . Dek Suh U”
An hnam dân emaw, chîn ṭhan dân emaw chu engpawh ni se, Jehova Thuhretute chuan mitthite’n thil an hre theiin, mi nung damte an thunun thei tih ngaih dân nêna inkûngkaihna nei thil chîn engpawh chu an pumpelh a. Hêng chîn dân chi hrang hrang mitthi vui liam hnua ei leh ina hlimhlawp bâwlna te, thih champhaphâk lawmna te, mitthi tâna inthâwina hlan te, lungphun ruai ṭheh te, leh kawppui sûntute tih ngei ngei tûra ngaih thil eng engemaw tih te hi thil bawlhhlawh leh Pathian tilâwm lo tak a ni; chûng chu Bible thu nêna inmil lo leh ramhuai zirtîrna—thlarau thi thei lo rinna—nêna a inzawm tlat avângin. ‘Lalpa dawhkâna mi leh ramhuai dawhkâna mi an ei kawp theih loh avângin,’ Kristiante chu hêng thiltihah te hian an tel ve lo. (1 Kor. 10:21) Anni chuan: “Ahrangin awm rawh u, thil bawlhhlawh rêng rêng pawh dek suh u,” tih thupêk chu an zâwm a ni. (2 Kor. 6:17) Mahse, chu chu thil awlsam tak a ni ṭhîn lo.
Africa leh hmun dangahte chuan, thil chîn ṭhenkhat tih a nih loh chuan, thlahtute thlarau chu an thinur ang tih ngaih dân an nei a. Chutianga tih loh chu a khawtlânga ânchhia emaw, vânduaina emaw thlen thei tûr dân bawhchhiatna nasa tak anga ngaih a ni. Pathian Jehova chhiahhlawh tam takte chu Bible nêna inkalh mitthi vuina thiltiha an tel loh avângin, sawisêl leh hmuhsit an nih bâkah, an vêng chhûnga mite emaw, chhûngkhatte emaw tuithlârin an awm a ni. Ṭhenkhat chu khawtlâng hma khaw ngai lo leh mitthi zah lo nia puh an ni. A châng chuan, ring lo mite chuan Kristian mitthi vuina chu an chuh lui tlat ṭhîn. Chuvângin, Pathian tilâwm lo mitthi vui dân hman tum tlatte nêna inchaltauhna chu engtin nge kan pumpelh theih ang? Chu aia pawimawh zâwk, Pathian Jehova nêna kan inlaichînna tichhe thei thil chîn leh thiltih bawlhhlawhte aṭanga inlahrang tûrin eng nge kan tih theih?
I Thu Tlûkna Chu Chiang Takin Târ Lang Rawh
Khawvêl hmun ṭhenkhatah chuan, hnam puipate leh chhûngkaw zînga mi ni lo chhûngkhatte chu mitthi vui chungchânga thu tlûkna siamnaah an tel ṭhîn a. Chuvângin Kristian rinawm chuan mitthi vuina chu Bible thu bulte nêna inmilin, Jehova Thuhretute’n an huaihawtin, hun an hmang dâwn a ni tih chiang takin a târ lang tûr a ni. (2 Kor. 6:14-16) Kristian mitthi vuinaa thilthleng chuan unaute chhia leh ṭha hriatna chu a tibuai emaw, mitthi chungchânga kan rinna leh zirtîrna hretu mi dangte a titlu emaw tûr a ni lo.
Kristian kohhran aiawhtu chu mitthi vui tûra tih a nih chuan, upate chuan ruahmanna zawng zawng chu Bible kaihhruaina nêna a inrem theih nân, rawtna ṭangkai tak leh kan unau lusûnte chu mitthi vuina atâna hman tûr Bible thu bulte hre thiam tûrin an ṭanpui thei a ni. Thuhretu ni lo mi ṭhenkhatin thil chîn bawlhhlawhte telh an duh chuan, kan din ngheh a, kan Kristian dinhmun chu huaisen tak, mahse, ngilnei tak leh zah thiam tak sia kan hrilhfiah chu a pawimawh hle. (1 Pet. 3:15) A nih leh, ring lotu chhûngkhatte’n thil chîn ṭha lote telh tûra min nawr lui deuh a nih chuan engtin nge ni ang? Ringtu chhûngkuate chuan mitthi vuina aṭanga inlâk hran chu an rêl tlu mai thei a ni. (1 Kor. 10:20) Chutiang thil a thlen hunah chuan, an hmangaih tak a thih avânga lungchhe tak takte chu ‘Pathian Lehkha Thua thlamuanna’ thu pêk theih nân tualchhûng Kingdom Hall-ah emaw, a hmun inâwm dangah emaw mitthi ta hriat rengna thusawi pângngai tak chu neih theih a ni ang. (Rom 15:4) A ruang chu awm lo mah se, chutiang ruahmanna chu a zahawmin, pawm theih vek a ni. (Deut. 34:5, 6, 8) Ring lotute lo inrawlh buaina chuan lungngaihna leh lungchhiatna chu a belhchhah mai thei a; mahse, thil dik tih kan tum tlatna chu ‘thiltihtheihna nasa tak’ min pe theitu Pathianin a hmuh hmaih lo tih hriatna aṭangin thlamuanna kan hmu thei a ni.—2 Kor. 4:7.
An Vui Dân Tûr Che Chu Lehkhaah Ziakin Dah Rawh
Miin amah vui liam a nih dân tûr chungchânga a kaihhruaina chu lehkhaa ziaka a dah hian, Thuhretu ni lo chhûngkuaa mite chuan mitthi ta duh dân chu an zahsak a rinawm avângin, thil a awlsam phah ṭhîn. Ziaka dah ngai thil pawimawh chu vuina hun hman dân tûr te, a hmun tûr te, leh a huaihawttu tûrte chu a ni. (Gen. 50:5) Chutiang lehkha pawimawh chu hming ziak leh hriatpuitu an awm chuan a ṭangkai lehzual ṭhîn. Bible thu bulte ṭanchhana hriatthiamna leh finna nêna nakin hun atâna ruahmanna siamtute chuan chutiang lehkha siam tûrin an tar lutuk thleng emaw, natna khirh takin a tlâk buak thleng emaw an nghah kher a ngai lo tih an hria a ni.—Thuf. 22:3; Thur. 9:12.
Mi ṭhenkhat chuan chutiang kaihhruaina lehkha ziaka dah chu an hreh deuh ṭhîn. Mahse, chutianga tih chu Kristian puitlinna târ langtu leh mi dangte kan ngaihsakzia lantîrna a ni zâwk mah a. (Phil. 2:4) Mitthi ta rinna leh pawmzâwng pawh ni hlei lo thil chîn bawlhhlawhte pawm tûra nawr luihna tâwk lungngaihnain a tlâk buak mêk chhûngkaw zînga mite chinfel tûra chûng thilte dah ai chuan mahnia lo siam fel mai chu a ṭha zâwk hle.
Mitthi Vuina Chu Pângngai Tak Nihtîr Rawh
Africa khawmual hmun tam takah chuan, thlahtute thlarau an thinur loh nân mitthi vuina chu a ropuiin mipui pung khâwm pawh an tam tûr a ni tih ngaih dân chu a hluar hle a. Mi dangte chuan mitthi vuina chu khawtlânga an challanna leh an hausakna “ropuina lem te” uanpuina hun remchângah an hmang bawk. (1 Joh. 2:16) Mitthi chu khawvêl mite ngaiha “pângngai” tâwk taka vui liam tûr chuan hun, tha leh zung, leh sum leh pai tam tak sên a ngai a. Mi a tam thei ang ber hîp tûrin, mitthi thlalâk chuanna lehkha târ lian tak takte chu hmun hrang hrangah târin mitthi vuina chu an puangzâr a ni. A sûntute’n an hâk theih nân mitthi ta thlalâk chuanna T-shirt-te siamin, an sem bawk a. Tin, a lo thlîrtute rilru lâk nân kuang man to tak takte an lei bawk a ni. Africa khawmuala ram pakhatah chuan, kuang ṭhenkhat chu car te, thlawhna te, lawng te, leh thil dang dangte ang tûra siam a ni a; chûng chu an hausakzia te, an ropuizia te, leh nuam an chenzia te târ lan nâna siam a ni. Mitthi ruang chu a kuang aṭanga la chhuakin, mawi taka chei khumah chuan an zalh a. Hmeichhe thi phei chu inneih kawr vâr hâktîr a ni a, rangkachak leh ṭhi tam taka chei a nih bâkah, a hmai pawh makeup hmanga chei a ni ṭhîn. Chutiang thiltihnaa tel chu Pathian mite tân thil inhmeh a ni tak zet thei ang em?
Kristian mi puitlingte chuan Pathian thu bulte hre lo leh ngaihsak lotute thiltih hleihluak takte pumpelh a finthlâkzia chu an hria a. Hleihluak tak leh Bible nêna inmil lo thil chîn leh thiltih te chu ‘Pathiana chhuak a ni lo va, khawvêl boral mêk aṭanga chhuak a ni’ tih kan hria a ni. (1 Joh. 2:15-17) Kristiante tân mi dang aia ṭha nih tumna, inelna rilru nei lo tûra an fîmkhur a ngai hle. (Gal. 5:26) Mitthi hlauhna chu tualchhûng thil chîn leh khawtlâng nuna thil pawimawh tak a nih hian, mitthi vuinaah mi tam tak an kal khâwmin, huaihawt chu a harsa fo va, chu mi avâng chuan mipui chu thunun hleih theih loh an lo ni thuai ṭhîn. Mitthi chawimawina chuan ring lotute chu thiltih bawlhhlawhte ti hial tûr khawpin awlsam takin a chawktho thei a. Chutiang chi mitthi vuinaah chuan, ring tak leh insûm hlek lova ṭah vak vak te, a ruang kuah nawn fo te, mitthi chu la nung reng ang maia biak te, pawisa leh thil dang chhawmtîr te a awm thei a. Kristian mitthi vuinaah chutiang thil a thleng a nih chuan, Pathian Jehova leh a mite hming chu nasa takin a tichhe dâwn a ni.—1 Pet. 1:14-16.
Mitthi dinhmun dik tak hriatna chuan khawvêl thiltih engmah tel lo va mitthi vui tûrin huaisenna min pe tûr a ni. (Eph. 4:17-19) Isua kha nung dam tawh zînga ropui ber leh mi pawimawh ber a ni chung pawhin, remhre tak leh pângngai taka phûm a ni a. (Joh. 19:40-42) “Krista rilru” putute tân chuan chutianga invui liam chu zahpuiawm a ni lo. (1 Kor. 2:16) Tluangtlam tak leh pângngai taka Kristian mitthi invuina chu Bible-in thil bawlhhlawh a tihte pumpelh theih dân leh zahawm, pawm tlâk, leh Pathian hmangaihtute tih atâna inâwm tak boruak muanawm siam theih dân kawng ṭha ber a ni.
Hlimhlawp Bâwlna Hun A Ni Em?
Mitthi phum a nih hnu chuan ruai ṭheh tûra chhûngkhatte, ṭhenawmte, leh mi dangte kal khâwm leh rimawi ring tak nêna lâm chu tih ṭhin dân a ni mai thei a. Hêng mitthi vui liam hnua ei leh ina hlimhlawp bâwlna hunte hi nasa taka zu inna leh nungchang bawlhhlawhna thiltihte nên a inzawm fo ṭhîn. Mi ṭhenkhat chuan, chutianga intihhlimnain thihna avânga lungngaihna a la bo niin an sawi mai thei a. Mi dangte erawh chuan an thil chîn ṭhan mai niin an hre bawk. Amaherawhchu, mi tam tak chuan chutianga hlimhlawp bâwlna chu mitthi ta chawimawi nân leh fak nân, leh mitthi thlarau chu a thlahtute hnêna awm tûra thlah nâna thiltih ngai niin an ring a ni.
Kristian dikte chuan: “A ṭha zâwk e lungngaih, nuihza aiin; hmêla lungngaih lo lang zârah thinlung a lo ṭha si,” tih Bible fuihna thu a finthlâkzia chu an hmu a. (Thur. 7:3) Chu bâkah, kan dam chhûng nîte a tâwizia leh thawhleh beiseina ngaihtuah neuh neuh chu a ṭangkai tih an hre bawk. Dik takin, Pathian Jehova nêna inlaichînna ṭha leh nghet tak neitute tân chuan ‘pian nî aiin thih nî a ṭha zâwk’ a ni. (Thur. 7:1) Chuvângin, mitthi vui liam hnua hlimhlawp bâwlna chu dawithiamna thiltih leh nungchang bawlhhlawhna nên a inzawm tlat a ni tih hriatna chuan Kristian dikte tân chutiang intihhlimna huaihawt emaw, mi dang huaihawtnaa va tel emaw chu thiltih âwm loh tak a nihtîr a ni. Mitthi vuinaa nawmsip bâwl ûmtute zînga telna chuan Pathian Jehova leh Amah betute chhia leh ṭha hriatna kan zah lohzia a târ lang ngei ang.
Mi Dangte Chuan Kan Dang Lamzia Hmu Rawh Se
Thutak hre lotute zînga hluar tak mitthi râpna aṭanga kan zalên hi a va lâwmawm tak êm! (Joh. 8:32) “Êng fate” kan nih angin, kan lungngaihna leh kan sûnna chu thlarau lama kan bengvârzia târ lang tûr zâwngin kan lantîr a ni; pângngai tak, zahawm tak, leh kan tawrhna chu thawhleh beiseinain a tinêp a ni tih hriat takin. (Eph. 5:8-10; Joh. 5:28, 29) Chutiang beiseina chuan “beiseina rêng nei lote” zînga kan hmuh fo, hleihluak taka sûnna chu lantîr lo tûrin min vêng ang. (1 Thes. 4:13) Chu chuan mihring hlauhna laka tlu lût lovin, biakna dik atâna ding nghet tlat tûrin huaisenna min pe bawk ang.—1 Pet. 3:13, 14.
Bible thu bulte rinawm taka kan zuina chuan mite chu ‘Pathian rawngbâwltu leh bâwl lotu thliar’ theihna hun remchâng a pe ang. (Mal. 3:18) Engtik nîah emaw chuan thihna a awm tawh lo vang. (Thup. 21:4) Chu thutiam ropui tak a lo thlen hun tûr kan nghah lai hian, Pathian Jehova chuan bawlhhlawh kai lo, sawisêl bo, leh he khawvêl suaksual leh Pathian zah lohna târ langtu a thiltihte aṭanga inla hrang nalhin kan awm a ni tih min hmu ṭheuh rawh se.—2 Pet. 3:14. (w09 2/15)
[Phêk 12-naa milem]
Invui dân tûr chungchânga mahni duh dân lehkhaa ziaka dah chu a finthlâk