Sual Chu Eng Nge Ni?

Sual chu Pathian tehnate kalha thiltih, rilru vei zâwng, a nih loh leh ngaihtuahna eng pawh a ni a. Chutah chuan Pathian mit hmuha thil sual, a nih loh leh thil fel lo tihna hmanga a dânte bawhchhiat a tel a ni. (1 Johana 3:4; 5:17) Bible-in thil ṭha tih tûr hriaa ti si lo chu sual tiin a sawi bawk.—Jakoba 4:17.

A tîra ziak Bible ṭawngkamah chuan sual tih hi “tum ṭhelh” tihna a ni a. Entîr nân, hmânlai Israel sipai ho khat chu virvawm an vawm thiam êm avângin “ṭhelh hlek lo mi” tia sawi an ni. Chu ṭawngkam chu a ngial a ngana lehlin chuan “thilti sual lo” tihna a ni a. (Rorêltute 20:16) Chuvângin, sual tih chu Pathian tehna ṭha famkim ṭhelh tihna a ni.

Pathian chuan Siamtu a nih angin mihringte tâna tehnate siam tûrin dikna a nei a. (Thu Puan 4:10, 11) Kan thiltih zawng zawng a hnênah kan la sawi ṭheuh dâwn a ni.—Rom 14:12.

Thil sual tih miah loh chu thil theih a ni em?

Ni lo. Bible chuan, “mi zawng zawngin thil an tisual tawh vek a, Pathian ropuina an chang zo ta lo,” tiin a sawi a. (Rom 3:23; 1 Lalte 8:46; Thuhriltu 7:20; 1 Johana 1:8) Engvângin nge chutiang chu a nih?

Mihring hmasa ber Adama leh Evi khân, a tîrah chuan sualna an nei lo va. A chhan chu, Pathian anpui ṭha famkima siam an nih vâng a ni. (Genesis 1:27) Mahse, Pathian thu âwih lovin, an ṭhat famkimna chu an hloh va. (Genesis 3:5, 6, 17-19) An fate chuan an sualna leh ṭhat famkim lohna chu an rochun ta zêl a ni. (Rom 5:12) Israel Lal Davida’n, “khawlohnaa dinin ka awm a,” tia a sawi ang khân.—Sâm 51:5.

Sual ṭhenkhat chu a dangte aiin a pawi bîk em?

Pawi bîk e. Entîr nân, Bible chuan hmânlai Sodom mite chu “nasa taka suaksual leh mi sual” an ni tih leh an sual chu a “nasa êm êm” tih a sawi a. (Genesis 13:13; 18:20) Sual lian tak nihtîrtu thil pathum lo ngaihtuah ta ila.

1. A nasat zâwng. Bible chuan hêng sual pawi tak inngaihna te, milem biakna te, rûkrûkna te, zu ruihna te, hlêp rûkna te, tualthahna te, leh dawithiamna te hi pumpelh tûrin min vaukhân a. (1 Korinth 6:9-11; Thu Puan 21:8) Hêng sualte hi ngaihtuah lo leh tum rêng vâng ni lo va ṭawngkam leh thiltiha mi dangte tihnat nên a inang lo tih a târ lang bawk. (Thufingte 12:18; Ephesi 4:31, 32) Chuti chung pawhin, Pathian dân bawhchhiatna pawi zâwk a thlen theih avângin eng sual pawh ngaihthah lo tûrin min fuih tel bawk a ni.—Matthaia 5:27, 28.

2. Rilru put hmang. Sual ṭhenkhat chu Pathian thil phût hriat loh vânga tih a ni a. (Tirhkohte 17:30; 1 Timothea 1:12, 13) Chûng sualte chu pawm zam ni lo mah se, Bible chuan duhrêng vânga Pathian dânte bawhchhiatna sual lakah a thliar hrang a ni. (Numbers 15:30, 31) Duhrêng vânga sualna chu “rilru ngawltâwt sual” aṭanga lo awm a ni.—Jeremia 16:12.

3. A zin zâwng. Bible chuan sual vawi khat tih leh hun rei tak chhûng sual tihnawn fo inan lohna a sawi bawk a. (1 Johana 3:4-8) Thil dik tih tûr hriat hnua ‘thil sual tiluitute’ chuan Pathian rorêlna an hmachhawn ang.—Hebrai 10:26, 27.

Chûng sual pawi tak titute chu an thil sual tih avângin rilru hrehawm takin an awm thei a. Entîr nân, Lal Davida chuan: “Ka khawlohnate chuan ka lû hi a chîm pil a, phur rit tak ang, ka zawh rual loh hi a ni,” tiin a ziak a ni. (Sâm 38:4) Mahse, Bible chuan he beiseina hi min pe a ni: “Mi suaksual chuan a awm dân chu bânsan sela, mi fel lo chuan a ngaihtuahte chu bânsan bawk rawh se; LALPA hnênah kîr leh rawh se; tichuan, anin a lo khawngaih ang; kan Pathian hnênah kîr leh rawh se, anin a ngaidam nasa khawp dâwn si a,” tiin.—Isaia 55:7.