Zonas
1 Ala parol ki Zeova ti dir Zonas,* garson Amitay: 2 “Leve, al Niniv, sa gran lavil-la, ek anons enn zizman kont li, parski mo’nn trouv tou bann move kitsoz ki li pe fer.”
3 Me Zonas ti leve, li ti sove pou al lwin ar Zeova, ek li ti al Tarsis; li ti desann Zope ek li ti trouv enn bato ki ti pe al Tarsis. Li ti pey pri vwayaz-la ek li ti rant dan bato avek bann-la pou al Tarsis, lwin ar Zeova.
4 Lerla, Zeova ti avoy enn divan bien for lor lamer, ek ti ena enn tanpet telman for ki bato-la ti pre pou koule. 5 Bann marin-la ti telman per ki sakenn ti koumans priye so bondie pou ed li. Zot ti koumans zet bann marsandiz ki ti lor bato dan lamer pou fer bato-la vinn pli leze. Me Zonas ti desann anba dan lakal* bato-la, li ti alonze, ek li ti gagn enn gran somey. 6 Lerla kapitenn bato-la ti al get Zonas ek ti dir li: “Kifer to pe dormi? Leve, priye to bondie! Kitfwa vre Bondie pou montre ki li gagn nou traka, ek nou pa pou mor.”
7 Lerla sakenn ti dir so kamarad: “Vini, anou fer tirazosor pou kone akoz kisann-la nou pe gagn sa maler-la.” Alor zot ti fer tirazosor, ek sa ti tom lor Zonas. 8 Zot ti dir li: “Silteple, dir nou akoz kisann-la nou pe gagn sa maler-la? Ki travay to fer, ek kotsa to sorti? Dan ki pei ek dan ki pep to sorti?”
9 Li ti reponn zot: “Mo enn Ebre, mo ador* Zeova, Bondie lesiel, limem sa Kikenn ki’nn fer lamer ek later la.”
10 Lerla bann marin-la ti gagn plis per ankor, ek zot ti demann li: “Ki to’nn fer?” (Bann-la ti aprann ki li ti pe sove pou al lwin ar Zeova, parski li ti dir zot sa.) 11 Alor zot ti dir li: “Ki nou bizin fer avek twa pou ki lamer kalme?” Parski pli ale, lamer-la ti pe vinn pli move. 12 Li ti reponn zot: “Pran mwa ek zet mwa dan lamer, lerla lamer pou kalme; parski mo kone ki akoz momem ki zot pe gagn sa gran tanpet-la.” 13 Me selman, bann marin-la ti ram bien for* pou esey amenn bato-la ater, me zot pa ti kapav parski lamer ti pe vinn pli move.
14 Lerla zot ti priye Zeova ek zot ti dir: “A Zeova, silteple, pa fer nou mor akoz sa zom-la! Pa rann nou responsab pou lamor enn inosan,* parski twa, A Zeova, to’nn fer seki to ti anvi.” 15 Lerla zot ti pran Zonas ek zot ti zet li dan lamer; ek lamer ti kalme. 16 Lerla bann marin-la ti koumans ena enn gran respe pou Zeova, ek zot ti fer enn sakrifis pou Zeova ek zot ti fer bann promes.
17 Apre sa, Zeova ti fer enn gro pwason aval Zonas, ek Zonas ti res dan vant sa pwason-la pandan trwa zour ek trwa nwit.