Izai

65 “Bann ki pa ti pe demann pou koz ar mwa, mo’nn les zot rod mwa;

Bann ki pa ti pe rod mwa, mo’nn les zot trouv mwa.

 2 Toutlong lazourne mo’nn ouver mo lebra ar enn pep ki teti,

Ar bann ki ti pe mars lor enn move semin,

Ki ti pe swiv zot prop fason panse;

 3 Enn pep ki kontign ofans mwa devan tou dimounn,*

Ki fer bann sakrifis dan bann zardin ek fer bann lafime sakrifis monte lor bann brik.

 4 Zot asiz parmi bann tom,

Ek zot pas lanwit dan bann plas ki kasiet;*

Zot manz laviann koson,

Ek dan zot bann resipian ena enn bouyon bann kitsoz ki degoutan.*

 5 Zot dir, ‘Gard to distans; pa vinn pre ar mwa,

Parski mo pli sin ki twa.’*

 6 Gete! Sa inn ekrir devan mwa;

Mo pa pou debout lebra krwaze,

Me mo pou fer zot peye,

Mo pou fer zot peye pou tou,*

 7 Pou zot bann erer ek pou bann erer zot bann anset osi,” ala seki Zeova dir.

“Parski zot inn fer bann lafime sakrifis monte lor bann montagn

Ek zot inn zet dezoner lor mwa lor bann kolinn,

Pou koumanse, mo pou donn zot lapey ki zot merite.”*

“Parey kouma gagn nouvo divin dan enn grap rezin

Ek enn kikenn dir, ‘Pa detrir sa, parski ena kitsoz debon* ladan,’

Koumsa mem mo pou fer pou mo bann serviter;

Mo pa pou detrir zot tou.

 9 Mo pou fer enn desandan sorti dan Zakob

Ek mo pou fer sa kikenn ki pou erit mo bann montagn la sorti dan Zida;

Sa pei-la pou vinn pou bann ki mo’nn swazir,

Ek mo bann serviter pou res laba.

10 Saronn pou vinn enn patiraz pou bann mouton

Ek Vale Akor enn plas kot bann bef repoze,

Pou fer sa pou mo pep ki pe rod mwa.

11 Me zot, zot parmi bann ki pe kit Zeova,

Bann ki pe bliye mo montagn ki sin,

Bann ki pe prepar enn latab pou bondie Lasans,

Ek bann ki pe ranpli koup bondie Destin avek divin melanze.

12 Alor mo’nn deside pou fer zot mor ar lepe,

Ek zot tou pou kourbe pou ki masakre zot,

Parski mo ti apel zot, me zot pa ti reponn,

Mo ti koze, me zot pa ti ekoute;

Zot ti kontign fer seki move devan mo lizie,

Ek zot ti swazir pou fer bann kitsoz ki mo pa kontan.”

14 Gete! Mo bann serviter pou kriye dan lazwa parski zot leker pou kontan,

Me zot, zot pou kriye parski zot leker pou dan lapenn,

Ek zot pou plore for-for parski zot lespri pou abat net.

15 Zot pou kit deryer zot enn nom

Ek bann dimounn ki mo’nn swazir pou servi sa nom-la kouma enn malediksion,

Ek Segner Siprem Zeova pou fer sakenn parmi zot mor,

Me li pou apel so bann serviter par enn lot nom;

16 Koumsa ninport kisann-la ki pou rod enn benediksion lor later

Pou beni par Bondie laverite,*

Ek ninport kisann-la ki fer enn serman lor later

Li pou fer serman par Bondie laverite.*

Parski pou vremem bliye tou bann maler* ki finn gagne avan;

Pou kasiet zot devan mo lizie.

17 Parski gete! Mo pe kree enn nouvo lesiel ek enn nouvo later;

Ek pa pou rapel bann kitsoz avan,*

Ni zot pa pou enn pwa lor leker.

Parski gete! Mo pe kree Zerizalem ki pou amenn lazwa

Ek so pep ki pou amenn enn gran lazwa.

19 Mo pou kontan pou Zerizalem ek mo pou kontan pou mo pep;

Nepli pou tann personn plore ouswa kriye o-sekour laba.”

20 “Dan sa landrwa-la, nepli pou ena okenn tibaba ki pou viv zis de-trwa zour,

Ek bann vie dimounn pou viv lontan.

Parski si enn dimounn mor laz 100 an li pou ankor enn zanfan,

Ek enn kikenn ki fer pese pou mor akoz enn malediksion mem si li ena 100 an.*

21 Zot pou ranz bann lakaz ek zot pou res ladan,

Zot pou plant bann karo rezin ek zot pou manz zot bann frwi.

22 Zot pa pou ranze pou ki enn lot reste,

Ni zot pou plante pou ki lezot manze.

Parski bann zour mo pep pou parey kouma bann zour enn pie,

Ek bann ki mo’nn swazir, pou profit maximum tou travay zot lame.

23 Zot pa pou rinte* pou nanye,*

Ni zot pou gagn bann zanfan pou ki ariv zot maler,

Parski zot ek zot bann desandan,

Zot form parti desandans ki Zeova inn beni.

24 Avan mem ki zot kriye, mo pou reponn;

Pandan ki zot ankor pe koze, mo pou tande.

25 Loulou ek ti mouton pou manz ansam,

Lion pou manz lapay parey kouma toro,

Ek serpan pou manz lapousier.