Sapit Set

Pwiski Bondye Finn Permet Mesanste, Ki Sa Anseyn Nu?

1, 2. (a) Si Zeova ti detrir sa bann ki ti’nn rebel kont Li la deswit dan Edenn, kuma eski sa ti pu afekte nu? (b) Ki bann dispozisyon Zeova finn pran avek lamur pu nu?

“MO FINN viv enn tigit lane mem ek sa bann lane la ti byin ranpli ar maler,” ala seki Zakob, papa nasyon Izrael ti dir. (Zenez 47:9) Kumsa mem, Zob usi ti dir ki zom “pa viv lontan, ek so lavi ranpli ar difikilte.” (Zob 14:1) Parey kuma zot, nu’si, nu finn konn bann difikilte, linzistis, ek bann sityasyon tris. Me, Bondye pa finn fer linzistis kan Li finn donn nu lavi. Li vre ki nu pena enn lespri ek enn lekor parfe parey kuma Adan ek Ev ti ena, ni nu pe viv dan enn paradi kuma bannla dan kumansman. Me ki ti pu arive si Zeova ti detrir zot deswit apre ki zot ti’nn rebel kont Li? Dakor pa ti pu ena maladi, tristes uswa lamor, me okenn ras dimunn pa ti pu egziste lor later. Nu pa ti pu ne. Parski Li ena pitye, Bondye finn donn Adan ek Ev letan pu gayn bann zanfan, malgre ki sa bann zanfan la finn erit zot linperfeksyon. Selman atraver Zezi Kris, Zeova finn pran bann dispozisyon pu fer nu regayn seki Adan finn perdi—lavi pu tuletan dan enn paradi lor later.—Zan 10:10; Romin 5:12.

² Li vremem enn lankurazman pu nu kan nu panse ki nu pu kapav viv pu tuletan dan enn nuvo lemond, dan enn Paradi kot nu pu libere ar maladi, tristes, duler ek lamor ek usi ar bann move dimunn! (Proverb 2:21, 22; Revelasyon 21:4, 5) Me, Labib montre nu ki mem ki nu delivrans byin inportan pu nu ek pu Zeova, ena enn lot kitsoz ankor ki buku pli inportan.

Akoz So Gran Non

 3. Ki kitsoz ki ena enn rapor avek seki Bondye pu fer pu later ek pu bann dimunn?

³ Non Bondye ena enn rapor avek seki Li pu fer pu later ek pu bann dimunn. Sa non Zeova la vedir “Li Fer Arive.” Alor, so non reprezant byin so repitasyon kuma Suverin Liniver, kuma Bondye laverite ek kuma sa Kikenn ki Gran ek ki tuletan reysi bann proze ki Li met debut. Akoz pozisyon siprem Zeova, so non ek tu seki sa non la reprezante bizin gayn respe ki bizin ek liniver antye bizin obeir Li pu zot konn lape ek pu zot viv byin.

 4. Ki ti vremem lintansyon Zeova pu later?

⁴ Apre ki Bondye ti finn kre Adan ek Ev, Li ti donn zot enn gran responsabilite. Li finn montre byin ki Li pa ti ena lintansyon zis pu fer later antye vinn enn paradi, me usi pu ranpli li ar bann desandan Adan ek Ev. (Zenez 1:28) Me, eski pese Adan ek Ev ti pu anpes Bondye realiz so proze? Si Zeova, sa Kikenn tu-pwisan la pa ti kapav realiz so volonte pu later ek pu bann dimunn, sa ti pu vremem donn so non enn move repitasyon!

 5. (a) Kan eski premye zom ek fam ti pu mor si zot ti manz frwi pye konesans bon ek move? (b) Kuma eski Zeova ti realiz so parol ki truv dan Zenez 2:17 ek an mem tan respekte so proze pu later?

⁵ Zeova ti averti Adan ek Ev ki si zot ti dezobeir ek zot ti manz frwi pye konesans bon ek move, zot ti pu mor “sa zur” ki zot ti pu manz sa frwi la. (Zenez 2:17) An akor avek so parol, sa zur ki zot ti fer pese la mem, Zeova ti demann zot bann kont ek Li ti kondann zot pu mor. Devan lizye Bondye, Adan ek Ev ti mor sa zur la mem. Me pu ki so volonte realize konsernan later, Zeova ti les zot form enn fami avan ki zot mor vremem. Selman, pwiski pu Bondye l,000 an kuma dir enn zur ek Adan ti mor laz 930 an, abe kuma dir tusala ti pas dan enn sel “zur.” (2 Pyer 3:8; Zenez 5:3-5) Alor, Zeova ti respekte so parol an seki konsern moman ki Li ti pu pini zot, ek zot lamor pa ti anpes Li realiz so volonte pu later. Me pandan enn sertenn letan, Bondye finn permet bann dimunn inparfe pu viv, parmi ena bann move dimunn usi.

6, 7. (a) Dapre Egzod 9:15, 16, kifer eski Zeova permet bann move kontiyn viv pandan enn sertenn letan? (b) Kuma eski dan ka Faraon, Zeova ti montre so puvwar ek Li ti fer konn So non? (c) Ki pu arive kan sa move sistem kot nu pe viv la pu detrir?

⁶ Seki Zeova ti dir dirizan Lezip dan lepok Moiz donn nu bann lezot lindikasyon ankor kifer Bondye finn permet bann move kontiyn viv. Kan Faraon ti anpes bann garson Izrael kit Lezip ale, Zeova pa ti detrir li deswit. Li ti avoy Dis Ple (uswa maler) dan Lezip pu montre so puvwar dan diferan manyer. Kan Zeova ti averti Faraon kont setyem maler, Li ti dir li ki Li ti byin kapav balye li ek so pep net lor later. Zeova ti dir li: “Me, avredir akoz sa mem mo finn les twa egziste pu ki mo montre twa mo lafors ek pu ki mo non li anonse lor later antye.”—Egzod 9:15, 16.

⁷ Kan Zeova ti sap bann Izraelit, partu, tu dimunn ti konn so non. (Zozye 2:1, 9-11) Mem si zordi preske 3,500 an finn pase, nu pa finn bliye sa levennman la. Pa zis non Bondye ki ti’nn kone partu, me usi laverite lor sa Kikenn ki port sa non la. Sa finn konfirm repitasyon Zeova, ki Li enn Bondye ki tini so bann promes ek ki azir an faver so bann serviter. (Zozye 23:14) Sa finn montre usi ki akoz so puvwar tu-pwisan, nanyin pa kapav anpes Li realiz so volonte. (Izai 14:24, 27) Alor, nu kapav ena konfyans ki byinto Li pu azir an faver so bann serviter fidel kan Li pu detrir sa move sistem Satan la net. Fason ki Zeova pu servi so puvwar tu-pwisan, ek laglwar ki sa puvwar la pu donn so non, tusala pu res enn memwar. Pu ena bann benediksyon pu tuletan.—Ezekyel 38:23; Revelasyon 19:1, 2.

‘O Profonder Sazes Bondye!’

 8. Ki bann fakter Pol ankuraz nu pu pran an konsiderasyon?

⁸ Dan let ki li ti ekrir bann Romin, lapot Pol ti poz sa kestyon la: “Eski ena linzistis avek Bondye?” Limem, li reponn avek buku pwa: “Ki zame sa pa arive!” Apre sa, li montre byin mizerikord Bondye ek li mansyonn seki Zeova ti dir konsernan Faraon, ki Li ti pu les li viv enn tipe letan ankor. Pol montre usi ki bann dimunn zot parey kuma larzil dan lamin enn potye. Lerla, li dir: “Asterla, si Bondye, malgre ki Li ti ule montre so koler ek fer konn so puvwar, finn toler avek enn gran pasyans bann vaz koler ki merit destriksyon, pu ki Li kapav fer konn rises so laglwar ar bann vaz mizerikord, ki Li finn prepare an avans pu laglwar, setadir nu, bann ki Li finn apele pa zis parmi bann Zwif, me usi parmi bann nasyon, eski nu, nu kapav truv kitsoz pu redir?”—Romin 9:14-24.

 9. (a) Kisannla ki “bann vaz koler ki merit destriksyon”? (b) Kifer eski Zeova finn ena buku pasyans avek bann ki kont Li ek kuma eski rezilta final pu an faver bann ki kontan Li?

⁹ Depi dezobeisans dan Edenn, tu seki kont Zeova ek so bann lalwa zot “bann vaz koler ki rann zot diyn pu destriksyon.” Depi tu sa letan la, Zeova finn ena pasyans. Bann move finn mok so bann semin, zot finn persekit so bann serviter, ek zot finn mem tuy so Garson. Zeova finn konn kontrol Limem, ek Li finn les ase letan pase pu ki tu so bann kreasyon truv byin bann move rezilta ki ena kan dezobeir Bondye ek kan zom rod dirize par limem. An mem tan, lamor Zezi finn furni enn mwayin pu sap bann dimunn ki obeir ek pu ‘kas-kas bann travay Dyab.’—1 Zan 3:8; Ebre 2:14, 15.

10. Kifer eski Zeova finn toler bann move pandan sa 1,900 an ki finn pase la?

¹⁰ Pandan sa plis ki 1,900 an ki finn pase depi rezireksyon Zezi la, Zeova finn kontiyn toler “bann vaz koler.” Li pe tini-tini zot destriksyon. Kifer? Enn premye rezon, parski Li ti pe prepar bann ki pu asosye avek Zezi Kris dan Rwayom ki dan lesyel. Sa bann asosye la zot 144,000 antu, ek zot “bann vaz mizerikord” ki Pol ti mansyone. Bann Zwif ti bann premye dimunn ki ti invite pu fer parti dan sa grup ki pu al dan lesyel la. Plitar, Bondye finn invit bann dimunn ki fer parti dan bann nasyon ki pa Zwif. Zeova pa finn fors personn parmi zot pu servi Li. Me, parmi bann ki finn aksepte avek rekonesans bann laranzman ki Li fer avek lamur, Zeova finn donn sertin privilez pu reyne ansam avek so Garson dan Rwayom ki dan lesyel. Zordi, preparasyon sa grup la finn preske konplete.—Lik 22:29; Revelasyon 14:1-4.

11. (a) Ki grup zordi pe profit pasyans Zeova? (b) Ki benediksyon bann dimunn mor pu gayne?

¹¹ Me, ki nu kapav dir konsernan bann ki pu res lor later? Pasyans Zeova finn permet usi rasanbleman “enn gran laful” dimunn ki sorti dan tu bann nasyon. Zordi, zot plizir milyon. Zeova finn promet ki sa grup ki pu viv lor later la pu sape dan lafin sa sistem la ek zot pu kapav viv pu tuletan lor enn later ki pu vinn enn paradi. (Revelasyon 7:9, 10; Psom 37:29; Zan 10:16) Dan letan ki Bondye finn fixe, enn gran kantite dimunn ki ti mor pu leve ek zot pu gayn lokazyon pu viv lor later kan Rwayom Bondye pu guverne dan lesyel. Dan Akt 24:15, Labib predir: “Pu ena enn rezireksyon bann dimunn drwat ek bann dimunn ki pa drwat.”—Zan 5:28, 29.

12. (a) Pwiski Zeova finn toler mesanste, ki sa aprann nu lor Li? (b) Ki u santiman kan u reflesi lor fason ki Zeova finn tret sa bann kitsoz la?

¹² Eski finn ena kit linzistis dan tusala? Non, pwiski Bondye pe tini destriksyon bann move, uswa “bann vaz koler,” avredir Li pe montre ki Li ena santiman pu lezot, an akor avek so volonte. Sa montre ki kantite lamur ek pitye Li ena. An plis, amezir nu truve kuma so proze pe devlope, nu aprann buku lor Zeova Limem. Nu inpresyone par bann diferan kalite ki nu dekuver dan so personalite—so lazistis, so mizerikord, so pasyans, so sazes ki byin gran. Fason ki Zeova pe tret sa kestyon an rapor avek so drwa pu reyne la, sa pu res enn temwaynaz pu tuletan ki fason ki Bondye reyne sa mem meyer. Avek lapot Pol, nu kapav dir: “O profonder rises ek sazes ek konesans Bondye! So bann zizman inposib pu kalkile ek pa kapav konpran so bann fason fer!”—Romin 11:33.

Lokazyon pu Montre Nu Latasman

13. Kan nu sufer personelman, ki lokazyon prezant devan nu ek ki pu ed nu pu reazir avek sazes dan sa sityasyon la?

¹³ Zordi, buku serviter Bondye dan bann sityasyon kot zot pe sufer personelman. Zot sufrans pe kontinye parski Bondye pankor detrir bann move ek retabli bann dimunn, parey kuma Li finn promet. Eski sa bizin fer nu vinn amer? Uswa eski nu pa kapav plito konsider sa bann sityasyon la kuma bann lokazyon pu pruve ki Dyab enn manter? Nu kapav gayn lafors pu fer sa, si nu pran kont seki Bondye pe demann nu: “Vinn saz, mo garson, ek fer mo leker kontan, pu ki mo kapav reponn sa kikenn ki pe provok mwa la.” (Proverb 27:11) Satan, sa kikenn ki provok Zeova la, ti usi pretann ki si bann dimunn perdi zot dibyin materyel uswa zot konn bann sufrans fizik, zot pu akiz Bondye ek zot pu mem modi Li. (Zob 1:9-11; 2:4, 5) Nu fer leker Zeova kontan kan nu res fidel dan bann sityasyon difisil, ek kumsa nu montre ki lakizasyon Satan pa vre dan nu ka.

14. Si nu kont lor Zeova kan nu pas dan bann sityasyon difisil, ki bann benediksyon nu kapav gayne?

¹⁴ Si nu kont lor Zeova kan nu pas dan bann sityasyon difisil, nu kapav devlop bann kalite ki ena buku valer. Par egzanp, atraver so bann sufrans, Zezi “finn aprann lobeisans” enn fason ki zame li pa ti aprann avan. Nu’si, nu kapav aprann atraver nu bann sityasyon difisil; nu kapav devlop bann kalite kuma pasyans, landirans, ek enn profon rekonesans pu bann semin drwat Zeova.—Ebre 5:8, 9; 12:11; Zak 1:2-4.

15. Kan nu siport bann sityasyon difisil avek pasyans, kuma eski sa kapav fer lezot tir profi?

¹⁵ Lezot pu obzerv seki nu fer. Kan zot remark seki nu pe siporte akoz nu kontan lazistis, avek letan sertin kapav truve kisannla vremem bann vre Kretyin zordi. Ek si sa bann dimunn la vinn ansam ar nu pu ador Bondye, zot kapav ranpli bann kondisyon pu gayn bann benediksyon lavi pu tuletan. (Matye 25:34-36, 40, 46) Zeova ek so Garson ule ki bann dimunn gayn sa lokazyon la.

16. Ki rapor ena ant fason ki nu konsider nu sityasyon difisil ek linite?

¹⁶ Li vremem enn bon kitsoz kan nu konsider mem bann sityasyon difisil kuma bann lokazyon pu montre nu latasman ar Zeova ek pu fer nu par dan seki Li demann nu! Letan nu fer sa, nu montre klerman ki nu’le viv dan linite avek Bondye ek Zezi Kris. Zezi ti priye Zeova an faver tu bann vre Kretyin. Li ti dir: “Mo pe fer enn demann, pa zis pu sa bannla [so bann disip ki ti ar li], me usi pu bann ki met lafwa an mwa par zot parol; pu ki zot kapav vinn enn sel, parey kuma twa, Papa, to ini avek mwa, ek mwa mo ini avek twa, zot usi zot ini avek nu.”—Zan 17:20, 21.

17. Ki lasirans nu kapav ena si nu fidel ar Zeova?

¹⁷ Si nu fidel ar Zeova, Li pu uver so gran lebra pu rekonpans nu. So Parol dir: “Vinn ferm, solid, ena tuzur buku pu fer dan travay Senyer, parski zot kone ki zot lapenn pa pu dan vid devan Senyer.” (1 Korintyin 15:58) Li dir usi: “Bondye pa enn kikenn ki pena lazistis, ki pu bliye zot travay ek lamur ki zot finn montre pu so non.” (Ebre 6:10) Zak 5:11 fer sa remark la: “Gete! Nu deklar ere, tu bann ki finn siporte. Zot finn tann landirans ki Zob ti ena ek zot finn truve ki rezilta Zeova finn donn li, ek zot finn truve ki Zeova ena buku lafeksyon ek pitye.” Ki rezilta eski Zob finn gayne? “Apre sa, Zeova finn beni bann dernye zur Zob plis ki so kumansman.” (Zob 42:10-16) Wi, Zeova Li “rekonpans bann ki fer zefor pu rod Li.” (Ebre 11:6) Ek nu, get sa rekonpans ki pe atann nu la—lavi pu tuletan dan enn paradi lor later!

18. Ki pu ariv bann move suvenir ki kitfwa nu ena?

¹⁸ Rwayom Bondye pu repar tu bann domaz ki bann dimunn finn kone pandan bann milye lane ki finn pase. Bann lazwa ki nu pu kone lerla pu kuver tu sufrans ki nu pe kone zordi. Nu pa pu afekte par okenn move suvenir bann sufrans ki nu finn kone avan. Bann panse ek bann aktivite ankurazan ki pu fer parti dan nu lavi tulezur dan lemond nuvo pu efas dusma-dusma bann move suvenir. Zeova dir: “Mo pe kre bann nuvo lesyel [enn nuvo guvernman dan lesyel ki pu reyn lor bann dimunn] ek enn nuvo later [enn sosyete dimunn ki drwat]; ek pa pu rapel bann kitsoz avan, ek ni zot pu mont dan leker. Zot mo pep, rezwir ek res zwaye pu tuletan dan seki mo pe kre.” Wi, dan nuvo lemond Zeova, bann dimunn drwat pu kapav dir: “Later antye finn kalme, li finn truv so trankilite. Bann dimunn finn montre zot kontantman kan zot finn kriye dan lazwa.”—Izai 14:7; 65:17, 18.

Kestyon Revizyon

• Kuma eski, an mem tan ki Li finn permet mesanste egziste, Zeova finn vremem montre enn gran respe pu so prop non?

• Pwiski Bondye finn toler “bann vaz koler,” kuma eski sa finn permet nu tu pu profit so pitye?

• Kuma eski nu bizin sey konsider bann sityasyon difisil ki nu kone personelman?

[Bann zimaz paz 67]

Zeova “finn beni bann dernye zur Zob plis ki so kumansman”