Sapit Nef

Puvwar Lesperans Rezireksyon

 1. San lespwar rezireksyon, ki bann mor ti pu kapav atann?

ESKI u ena bann dimunn pros ki finn mor? San rezireksyon, pa ti pu ena lespwar pu retruv zot ankor. Zot ti pu kontiyn res dan kondisyon ki Labib dekrir kan li dir: “Parski bann vivan kone ki zot pu mor; me bann dimunn mor, zot pa konn nanyin ditu, . . . parski pena ni travay, ni plan, ni konesans, ni sazes dan Seol [tom], plas kot to pe ale.”—Eklezyast 9:5, 10.

 2. Ki posibilite extraordiner rezireksyon done?

² Dan so mizerikord, Zeova ofer bann dimunn ki finn mor enn posibilite extraordiner atraver rezireksyon, kot zot pu kapav regayn lavi ek viv pu tuletan. Sa vedir ki u kapav pran kuraz ek gard lespwar ki enn zur, dan nuvo lemond Bondye, u pu kapav retruv u bann pros ki pe dormi dan lamor.—Mark 5:35, 41, 42; Akt 9:36-41.

 3. (a) Dan ki bann fason rezireksyon finn zwe enn rol inportan pu realiz volonte Zeova? (b) Kan sirtu eski lesperans rezireksyon li enn lasurs lafors pu nu?

³ Grasa rezireksyon, nu pena okenn rezon pu per lamor. Zeova kapav permet Satan servi bann mwayin pli dir ki kapav ena pu pruve ki swadizan “tu seki enn zom ena, li pu done pu [sap] so nam.” Selman, Bondye pa pu les so bann serviter fidel kontiyn sufer akoz sa. (Zob 2:4) Me, Zezi ti res fidel ar Zeova mem ziska lamor, alor Bondye finn resisit li pu al viv dan lesyel. Kumsa, Zezi ti kapav prezant valer so sakrifis imin parfe devan tronn so Papa dan lesyel, pu sap nu lavi. Atraver rezireksyon, bann manb “ti trupo,” bann zeritye ansam avek Kris, ena lesperans pu viv ansam avek li dan lesyel, dan so Rwayom. (Lik 12:32) Lezot ena lesperans rezireksyon pu viv pu tuletan dan enn paradi lor later. (Psom 37:11, 29) Tu bann Kretyin konsider lesperans rezireksyon kuma enn lasurs lafors ki “depas lafors normal” kan zot pas dan bann sityasyon difisil kot zot bizin fer fas ar lamor.—2 Korintyin 4:7.

Kifer Rezireksyon Li enn Parmi Bann Lanseynman Prinsipal pu Lafwa Kretyin

 4. (a) Dan ki sans rezireksyon li enn parmi bann “lanseynman prinsipal”? (b) Ki rezireksyon vedir pu bann dimunn an zeneral?

⁴ Kuma Ebre 6:1, 2 dir, rezireksyon li enn parmi bann “lanseynman prinsipal.” Li enn parmi bann lanseynman lor ki nu lafwa baze pu nu vinn bann Kretyin ki ena matirite. (1 Korintyin 15:16-19) Me, lanseynman Labib lor rezireksyon sonn drol dan lespri dimunn an zeneral. Pwiski zot mank spirityalite, deplizanpli dimunn konsider lavi ki nu pe viv zordi kuma vre lavi. Lerla, zot viv zis pu plezir. Lot kote, sertin pratikan bann relizyon ​tradisyonel—ki li dan ​Lakretyinte uswa andeor—panse ki zot ena enn nam ki pa mor. Me, sa krwayans la pa ale avek seki Labib anseyne lor rezireksyon, pwiski rezireksyon pa ti pu neseser si bann dimunn ti ena enn nam ki pa mor. Asterla, kan met sa de krwayans la ansam, olye li donn lespwar, li kre plis konfizyon. Kuma eski nu kapav ed bann dimunn sinser ki ule konn laverite?

 5. (a) Avan ki enn dimunn konpran rezireksyon, ki li bizin kone? (b) Ki bann verse Labib u ti pu servi pu explik nam? pu explik kondisyon bann mor? (c) Ki kapav fer si enn kikenn servi enn tradiksyon Labib ki paret kasyet laverite lor sa size la?

⁵ Avan ki sa bann dimunn la konpran ki rezireksyon li enn dispozisyon extraordiner, zot bizin byin konpran ki ete nam ek dan ki kondisyon bann dimunn mor ete. Pu enn dimunn ki swaf laverite ki ena dan Labib, suvan, zis detrwa verse Labib mem ase pu ​eklersi sa bann kitsoz la. (Zenez 2:7; Psom 146:3, 4; Ezekyel 18:4) Me, bann tradiksyon Labib modern ek bann komanter lor Labib kasyet laverite lor nam. Akoz sa, li neseser ki nu egzaminn bann lexpresyon ki ti servi dan bann premye lang ki ti ekrir Labib.

 6. Kuma eski u pu ed enn dimunn konpran ki ete nam?

⁶ Traduction du monde nouveau li enn gran led pu nu kapav fer sa, parski partu kot li tradir mo “nam,” li tradir li dapre term Ebre neʹfes ek term Grek psu·keʹ. Dan seksyon “Appendice” sa tradiksyon Labib la, finn sit plizir verse kot sa bann term la paret. Me, bann lezot tradiksyon Labib pa tradir sa bann term orizinal la parey partu. Apart mo “nam,” zot servi usi lezot mo kuma “kreatir,” “kikenn uswa kitsoz vivan,” “kikenn,” ek “lavi”; zot kapav tradir “mo neʹfes” par “mwa,” ek “to neʹfes” par “twa.” Si enn etidyan sinser konpar lezot tradiksyon Labib avek Traduction du monde nouveau, sa pu ed li truve ki bann term Ebre ek Grek pu “nam” aplik ar dimunn ek zanimo tulede. Me, zame sa bann term la pa fer pans enn nam ki invizib, enn kitsoz ki pa materyel ki kapav kit lekor enn dimunn letan li mor ek al kontiyn viv par la.

 7. Kuma eski atraver Labib u pu explik kondisyon bann ki dan Seol? dan Ades? dan Zeenn?

⁷ Traduction du monde nouveau servi usi bann mem term pu tradir “Seol” ki sorti dan mo Ebre seʹolʹ, “Ades” dapre mo Grek aiʹdes, ek “Zeenn” pu mo Grek geʹen·na. “Seol” ena mem sinifikasyon ki “Ades.” (Psom 16:10; Akt 2:27) Labib montre klerman ki Seol ek Ades tulede vedir tom kot tu bann mor ale, ek zot asosye ar lamor, pa ar lavi. (Psom 89:48; Revelasyon 20:13) Labib montre usi ki enn dimunn mor kapav sorti dan so tom grasa rezireksyon. (Zob 14:13; Akt 2:31) Par kont, bann ki dan Zeenn pena okenn lespwar pu viv ankor, ek okenn plas pa dir ki nam al kontiyn viv laba.—Matye 10:28.

 8. Kuma eski si enn dimunn byin konpran rezireksyon, sa kapav ena enn lefe lor so manyer panse ek lor so bann aksyon?

⁸ Apre ki finn fini byin eklersi sa bann kitsoz la, asterla nu kapav ed enn dimunn pu byin sezi seki rezireksyon kapav vedir pu li. Li kapav kumans par ena rekonesans pu lamur ki Zeova montre atraver sa dispozisyon extraordiner la. Bann ki zot bann pros finn mor kapav diminye zot tristes kan zot pans lazwa ki zot pu gayne letan zot pu retruv bannla dan lemond nuvo Bondye. Li byin inportan konpran sa bann kitsoz la pu kapav byin konpran usi sinifikasyon lamor Zezi Kris. Bann premye Kretyin ti konsyan ki rezireksyon Zezi Kris li inportan pu lafwa Kretyin, pwiski li uver semin pu ki lezot usi kapav resisite. Zot ti donn buku lapenn pu pres rezireksyon Zezi ek lespwar ki sa done. Alor, zordi usi parey, bann ki konpran lanseynman rezireksyon ek ki ena rekonesans pu sa, kontan pu partaz sa laverite ki ena gran valer la avek lezot.—Akt 5:30-32; 10:42, 43.

Servi ‘Lakle Ades’

 9. Kuma eski Zezi servi “lakle pu lamor ek pu Ades” an premye?

⁹ Tu bann ki asosye ar Kris dan Rwayom pu bizin mor enn zur u lot. Me, zot konn byin lasirans ki Zezi ti donn zot kan li ti dir: “Mo ti mor, me gete! Mo vivan pu tuletan, ek mo ena lakle pu lamor ek pu Ades.” (Revelasyon 1:18) Ki li ti pe rod dir par la? Li ti pe rapel so prop lexperyans. Li usi li ti mor. Me, Bondye pa finn abandonn li dan Ades. Lor trwazyem zur so lamor, Zeova personelman finn lev li pu enn lavi spirityel ek Li finn donn li ​limortalite. (Akt 2:32, 33; 10:40) Anplis, Bondye finn donn li “lakle pu lamor ek pu Ades” pu ki li liber lezot ki dan tom ek li tir tu bann lefe pese Adan dan zot. Pwiski li ena sa bann lakle la, Zezi kapav relev so bann disip fidel ki finn mor. Li kumans par resisit avan bann manb so kongregasyon ki finn swazire avek lespri sin, ek li donn zot enn kado gran valer, lavi ​imortel dan lesyel, parey kuma so Papa finn donn li.—Romin 6:5; Filipyin 3:20, 21.

10. Kan eski bann fidel Kretyin ki finn swazire ti pu resisite?

¹⁰ Kan eski bann Kretyin ki finn swazire ti pu resisite pu al viv dan lesyel? Labib indike ki sa finn deza fini kumanse. Lapot Pol ti explike ki zot ti pu leve ‘pandan prezans Kris,’ ki finn kumanse an 1914. (1 Korintyin 15:23) Kan sa bann manb ki pu al dan lesyel la fini zot lavi lor later zordi, pandan prezans Zezi, zot pena pu atann dan lamor ziska zot Senyer returne. Kuma zot mor, zot leve dan lespri, zot “sanze deswit, enn sel ku.” Zot lazwa li vremem gran pwiski bann bon travay ki zot finn fer “pe akonpayn zot”!—1 Korintyin 15:51, 52; Revelasyon 14:13.

11. Ki rezireksyon pu ena pu bann dimunn an zeneral, ek kan eski sa pu kumanse?

¹¹ Me, pena zis rezireksyon bann zeritye Rwayom ki pu al viv dan lesyel. Pwiski dan Revelasyon 20:6, sa rezireksyon la apel “premye rezireksyon,” sa montre ki pu ena enn lot rezireksyon apre. Bann ki pu profit sa rezireksyon la pu gayn posibilite pu zwir lavi pu tuletan dan enn paradi lor later. Kan eski sa pu arive? Liv Revelasyon montre ki sa pu arive apre ki pu finn fini tir “later ek lesyel”—move sistem ki egziste zordi ek so bann lotorite ki pe dirize. Lafin sa vye sistem la byin pre. Apre sa, dan ler ki Bondye finn fixe, rezireksyon lor later pu kumanse.—Revelasyon 20:11, 12.

12. Kisannla pu parmi bann fidel ki pu resisite pu viv lor later, ek kifer eski nu kapav atann sa avek inpasyans?

¹² Ki bann ki pu resisite lor later? Parmi bann resisite, pu ena bann fidel serviter Zeova lontan, bann zom ek bann fam ki, akoz zot lafwa dan rezireksyon, “pa finn aksepte liberasyon par okenn ranson.” Setadir, zot pa finn fer konpromi pu zot fidelite anver Bondye, zis pu zot pa mor avan ler uswa pu pa konn enn lamor vyolan. Li pu vremem enn plezir pu konn zot personelman ek pu tann zot rakont avek zot prop labus bann levennman ki Labib pa rakonte dan tu detay! Parmi bann ki pu resisite pu viv lor later, pu ena Abel, premye fidel temwin Zeova; Enok ek Noe, bann ki ti pe pres mesaz avertisman Bondye avan Deliz; Abraam ek Sara, ki ti resevwar bann anz; Moiz, atraver ki Bondye ti donn Lalwa lor Montayn Sinai; bann profet vinker kuma Zeremi, ki ti truv destriksyon Zerizalem dan lane 607 A.N.L.; ek Zan Batis, ki ti tann Bondye Limem idantifye Zezi kuma So Garson. Pu ena usi buku zom ek fam fidel ki finn mor dan bann dernye zur sa sistem kot nu pe viv la.—Ebre 11:4-38; Matye 11:11.

13, 14. (a) Ki pu ariv Ades ek bann mor ki ladan? (b) Kisannla ankor ki pu resisite, ek kifer?

¹³ Avek letan, apart bann fidel serviter Bondye, lezot usi pu resisite ek kumsa pa pu ena okenn dimunn mor reste dan tom. Ziska ki pwin tom pu vid, sa pu depann lor fason ki Zezi pu servi ‘lakle Ades’ an faver bann dimunn. Enn vizyon ki lapot Zan ti gayne montre byin ki ‘finn zet Ades dan lak dife.’ (Revelasyon 20:14) Ki sa vedir? Sa vedir ki Ades, tom kot bann dimunn ale, pu detrir net. Li pu aret egziste; li pu devide net parski apart bann fidel serviter Zeova, dan so mizerikord, Zezi pu resisit mem bann dimunn ki pa drwat. Parol Bondye donn nu sa lasirans la: “Pu ena enn rezireksyon bann dimunn drwat ek bann dimunn ki pa drwat.”—Akt 24:15.

¹⁴ Okenn sa bann dimunn ki pa drwat la pa pu leve zis pu zot gayn kondanasyon lamor ankor. Dan lanvironnman drwat ki pu ena lor later kan Rwayom Bondye pu dirize, zot pu gayn led pu viv an akor avek seki Zeova demande. Vizyon la montre ki enn “rulo lavi” pu uver. Alor, zot pu gayn lokazyon fer enn manyer ki zot non ekrir dan sa rulo la. ‘Sakenn pu zize dapre so bann aksyon’ ki li pu fer apre rezireksyon. (Revelasyon 20:12, 13) Lerla, rezilta final pu montre ki zot rezireksyon pu sirman enn “rezireksyon lavi,” me non pa enn “rezireksyon zizman [kot zot pu kondane].”—Zan 5:28, 29.

15. (a) Kisannla ki pa pu resisite? (b) Ki lefe konesans laverite lor rezireksyon ena lor nu?

¹⁵ Me, pa tu dimunn ki finn mor, ki pu resisite. Ena ti fer bann pese ki pa merit pardon ditu. Sa bannla, zot pa dan Ades, me dan Zeenn, kot zot gayn destriksyon pu tuletan. Ansam avek zot pu ena usi bann ki pu detrir dan “gran detres,” ki byin pre asterla. (Matye 12:31, 32; 23:33; 24:21, 22; 25:41, 46; 2 Tesalonisyin 1:6-9) Alor, mem si Zeova montre enn mizerikord extraordiner kan Li pu liber bann dimunn dan Ades, lesperans rezireksyon pa enn rezon pu nu pa pran kont fason ki nu pe amenn nu lavi zordi. Pena okenn rezireksyon pu bann ki revolte volonterman kont reyn siprem Zeova. Sa konesans la bizin pus nu pu viv an akor avek so volonte ek kumsa, montre ki nu ena enn gran rekonesans pu faver Bondye ki nu pa merite.

Fortifye par Lesperans Rezireksyon

16. Kuma eski lesperans rezireksyon kapav enn lasurs gran lafors?

¹⁶ Bann ki parmi nu krwar avek tu zot leker dan rezireksyon, gayn buku kuraz dan sa lesperans la. Zordi, kan nu finn ariv dan laz, nu kone ki nu pa kapav kontiyn ranvway nu lamor—malgre ninport ki kalite tretman nu swiv. (Eklezyast 8:8) Si nu finn servi Zeova fidelman avek so lorganizasyon, nu kapav get lavenir avek konfyans. Nu kone ki par mwayin rezireksyon, nu pu kapav zwir lavi ankor, dan ler ki Bondye finn fixe. Ek lerla, sa pu vremem enn lavi! “Vre lavi,” kuma lapot Pol finn apel li.—1 Timote 6:19; Ebre 6:10-12.

17. Ki kapav ed nu gard enn latasman fidel ar Zeova?

¹⁷ Pwiski nu kone ki pu ena enn rezireksyon ek nu kone Kisannla pu donn nu sa, sa fer nu res solid dan lafwa. Sa fortifye nu pu res fidel ar Bondye mem si nu gayn menas lamor ar bann ki persekit nu. Satan fer bann dimunn gayn per pangar zot mor avan ler ek tuletan li servi sa mwayin la pu gard bann dimunn dan lesklavaz. Me, Zezi pa ti ena sa kalite laper la. Li finn res fidel ar Zeova ziska lamor. Atraver so sakrifis ranson, Zezi finn donn enn mwayin pu liber bann dimunn ar sa laper la.—Ebre 2:14, 15.

18. Ki finn ed bann serviter Zeova pu donn enn bon legzanp latasman fidel ar Li?

¹⁸ Akoz zot lafwa dan sa dispozisyon sakrifis Zezi Kris la ek dan rezireksyon, bann serviter Zeova finn les enn bon legzanp latasman fidel ar Zeova. Kan finn ena presyon lor zot, zot finn pruve ki ‘zot pa kontan zot prop nam’ plis ki zot kontan Zeova. (Revelasyon 12:11) Avek sazes, zot pa abandonn bann prinsip Kretyin, zis pu zot sey sov zot lavi asterla. (Lik 9:24, 25) Zot kone ki mem si zot perdi zot lavi asterla parski zot pe sutenir fidelman suverennte Zeova, Li pu rekonpans zot par mwayin rezireksyon. Eski u ena sa kalite lafwa la? U pu ena li si vremem u kontan Zeova ek si vremem u apresye avek tu u leker seki lesperans rezireksyon vedir vremem.

Kestyon Revizyon

• Kifer eski enn dimunn bizin byin konpran ki ete nam ek dan ki kondisyon bann mor ete avan ki li konpran rezireksyon ?

• Kisannla ki pu leve parmi bann mor, ek ki lefe eski sa konesans la bizin ena lor nu?

• Kuma eski lesperans rezireksyon fortifye nu?

[Zimaz paz 84, 85]

Zeova promet ki pu ena enn rezireksyon bann dimunn drwat ek bann dimunn ki pa drwat tulede