“Ranpli ar Lespri Sin”

 1. Dekrir lanbians ki ena pandan Fet Lapantkot.

ENA enn bel lanbians dan bann semin Zerizalem.a Nou trouv lafime pe sorti depi lotel dan tanp, pandan ki bann Levit pe sant Alel. (Psom 113-118) Bann semin ranpli avek bann dimounn ki sorti dan bann lezot landrwa. Zot sorti dan bann landrwa bien lwin kouma par exanp: Elam, Mezopotami, Kapados, Pon, Lezip, ek Rom. Ki zot pe fer dan Zerizalem? Zot la pou Fet Lapantkot, ki bann Zwif apel osi “zour bann premie frwi mir.” (Nonb 28:26) Se enn fet ki fer enn fwa par an. Kan ena sa fet-la, savedir ki rekolt lorz inn fini, ek ki rekolt dible pou koumanse. Se enn zour kot ena boukou lazwa.

 2. Ki bann kitsoz extraordiner ti arive pandan Lapantkot 33 N.L.?

² Nou printan lane 33 N.L. Azordi se Dimans ek li 9-er gramatin. Enn kitsoz extraordiner arive! Ek bann dimounn pou kontign koz lor la pandan bann santenn lane apre. Enn kout depi lesiel, tann “enn tapaz kouma enn divan violan ki pe soufle.” (Zist. 2:2) Sa tapaz-la ranpli lakaz kot anviron 120 disip Zezi inn reini. Bann laflam dife dan form bann lalangb aparet, ek al poz lor sak disip. Lerla, bann disip “ranpli ar lespri sin” ek zot koumans koz dan bann lezot lang! Kan bann disip kit sa lakaz-la, zot zwenn bann dimounn ki sorti dan bann lezot landrwa. Sa bann dimounn-la gagn sok, parski zot tann bann disip pe koz ar zot dan zot lang! Wi, sakenn pe tann “bann-la koz dan so prop lang.”​—Zist. 2:1-6.

 3. (a) Kifer Lapantkot 33 N.L. se enn zour bien inportan konsernan vre ladorasion? (b) Kouma Pier servi premie “lakle Rwayom” dan diskour ki li fer pandan Lapantkot 33 N.L.?

³ Sa levennman extraordiner la se enn letap bien inportan dan proze Bondie: Formasion Izrael Bondie, setadir bann Kretien ki ena lesperans pou al viv dan lesiel. (Gal. 6:16) Me ena lezot kitsoz inportan ki’nn arive. Kan Pier koz ar lafoul sa zour-la, li servi premie dan trwa “lakle Rwayom” ki ti donn li. Sak lakle pou permet diferan group dimounn gagn bann benediksion spesial. (Mat. 16:18, 19) Premie lakle, permet bann Zwif ek bann ki’nn konvertic aksepte bon nouvel ek gagn lespri sin Bondie. Lerla, zot pou form parti Izrael Bondie, ek zot pou gagn lespwar pou dirize antan-ki lerwa ek pret dan Rwayom Lemesi. (Rev. 5:9, 10) Avek letan, bann Samariten ek bann non-Zwif osi pou gagn sa privilez-la. Azordi, ki bann Kretien kapav aprann ar bann levennman inportan ki’nn arive pandan Lapantkot 33 N.L.?

 4. Azordi, kouma lasanble Kretien pe kontign travay ki ti koumanse lane 33 N.L.?

⁴ Lasanble Kretien inn koumans forme avek anviron 120 disip ki ti gagn lespri sin ek ki ti “ansam dan mem plas,” dan enn lasam lor letaz. (Zist. 2:1) Alafin lazourne, ti ena bann milye dimounn ki ti pran batem ek ki ti form parti lasanble. Sa se zis koumansman enn lorganizasion ki pe kontign grandi ziska azordi! Azordi, Bondie servi bann zom ek bann fam ki ena enn gran respe pou Li pou “pres sa bon nouvel lor Rwayom la partou kot bann dimounn reste . . . kouma enn temwaniaz pou tou bann nasion” avan ki lafin vini.​—Mat. 24:14.

 5. Ki bienfe bann frer ek ser dan premie siek ek azordi gagne kan zot zwenn ansam?

⁵ Bann frer ek ser enn gran soutien pou sakenn zot kamarad. Sa lepok-la, sa ti konsern bann ki ena lesperans pou al viv dan lesiel, ek plitar, sa ti pou konsern osi bann “lezot mouton.” (Zan 10:16) Kan Pol ti ekrir bann Kretien dan Rom,d li ti montre ki kantite sa ti inportan pou li ki bann frer ek ser soutenir sakenn zot kamarad. Li ti dir: “Mo bien anvi trouv zot pou ki mo kapav partaz avek zot bann don spiritiel pou fer zot lafwa vinn pli for; ouswa plito, ki nou tou nou kapav ankouraze par lafwa nou kamarad, zot par mo lafwa ek mwa par zot lafwa.”​—Rom. 1:11, 12.

6, 7. Kouma bann frer ek ser dan nou lepok pe obeir lord ki Zezi inn done pou pres dan tou nasion?

⁶ Bann Kretien azordi ena mem lobzektif ki bann premie Kretien. Zezi ti donn so bann disip enn mision ki pa fasil, me ki pou donn zot boukou lazwa. Li ti dir zot: “Al get bann dimounn dan tou nasion ek ansegn zot pou vinn mo bann disip, batiz zot lor nom mo Papa, lor nom so Garson ek lor nom lespri sin, ansegn zot pou obeir tou bann kitsoz ki mo’nn donn zot lord pou fer.”​—Mat. 28:19, 20.

⁷ Azordi, Zeova servi lasanble bann Temwin Zeova pou fer sa travay-la. Li pa fasil pou pres avek bann dimounn ki koz diferan lang. Me kanmem sa, bann Temwin Zeova finn pibliye bann piblikasion ki baze lor Labib dan plis ki 1,000 lang. Nou sir ki si to pe asiste bann renion ek prese, sa donn twa boukou lazwa. Konpare ar kantite dimounn ki ena lor later, to form parti sa tigit dimounn ki ena privilez pou rann temwaniaz afon lor nom Zeova!

 8. Ki led nou gagne gras-a lasanble?

⁸ Zeova finn donn twa bann frer ek bann ser partou dan lemond pou ed twa pou andir bann moman difisil avek lazwa. Dan let ki Pol ti ekrir bann Kretien ebre, li ti dir: “Anou interes nou ar sakenn nou kamarad pou ankouraz sakenn pou montre lamour ek fer bann bon aksion, san ki nou abandonn nou bann rasanbleman, kouma sertin ena labitid fer, me anou ankouraz sakenn nou kamarad, ek ankor plis kan zot trouv zour-la pe koste.” (Ebre 10:24, 25) Lasanble Kretien se enn kado ki Zeova finn donn twa, pou ki to kapav ankouraz lezot ek pou ki twa osi to gagn bann lankourazman. Res pros avek to bann frer ek ser. Zame pa abandonn to bann renion!

9, 10. Ki sertin pe fer pou kapav pres avek bann dimounn ki koz enn lot lang?

⁹ Mazinn lanbians ki ena pandan Lapantkot 33 N.L. Ena bann Zwif ek bann ki’nn konverti, ek laplipar parmi zot konn koz Grek ouswa Ebre. Me aster-la ‘sakenn pe tann bann disip koz dan so prop lang.’ (Zist. 2:6) Nou sir ki sa tous bann dimounn kan zot tann bon nouvel dan zot lang maternel.e Li vre ki azordi Zeova nepli servi bann mirak pou fer bann Kretien koz dan enn lot lang. Me kanmem sa, boukou Kretien port zot volonter pou partaz bon nouvel ar bann dimounn ki koz diferan lang. Kouma zot fer sa? Sertin aprann enn nouvo lang, ek apre al servi dan enn lasanble ki koz sa lang-la, ouswa mem al servi dan bann lezot pei. Souvan, bann dimounn bien inpresione par bann zefor ki zot pe fer.

¹⁰ Anou pran lexanp Christine. Li ek set lezot frer ek ser ti pran bann kour Goujrati. Kan li ti zwenn enn koleg ki koz Goujrati, li ti dir li bonzour dan so lang. Sa madam-la ti bien inpresione ek ti anvi kone kifer Christine ti pe fer sa kantite zefor-la pou aprann enn lang difisil kouma Goujrati. Christine finn kapav rann enn bon temwaniaz. Sa zenn madam-la ti dir Christine: “Zot bizin vremem ena enn kitsoz ki inportan pou partaz avek bann dimounn.”

11. Kouma nou kapav prepar nou pou pres avek bann dimounn ki koz enn lot lang?

¹¹ Li vre ki pa tou dimounn kapav aprann enn lot lang. Me selman, nou kapav prepar nou pou rann temwaniaz avek bann dimounn ki koz bann lezot lang. Kouma? Enn fason ki nou fer sa, se kan nou servi aplikasion JW Language^® pou aprann dir “Bonzour” dan enn lang ki sertin dimounn koze dan nou teritwar. Nou kapav osi aprann de-trwa fraz dan sa lang-la, pou fer dimounn-la anvi konn plis lor Labib. Ankouraz zot pou al lor jw.org. Nou kapav montre zot osi bann video ek bann piblikasion ki ena dan zot lang. Si nou servi sa bann zouti-la kan nou prese, nou pou kapav gagn mem lazwa ki bann Kretien dan premie siek, kan ‘sakenn ti pe tann bon nouvel dan so prop lang.’

12. (a) Kouma seki Zoel ti profetize konsern seki’nn arive pandan Lapantkot 33 N.L.? (b) Kifer bann disip Zezi ti pe atann ki profesi Zoel realize dan premie siek?

¹² “Pier . . . debout” ek koz avek enn lafoul dimounn ki sorti dan diferan landrwa. (Zist. 2:14) Li explik zot ki se gras-a enn mirak ki Bondie inn fer, ki zot pe kapav tann bann disip Zezi koz dan diferan lang. Sa mirak-la pe realiz enn profesi ki Zoel ti ekrir: “Mo pou avoy mo lespri lor tou sort kalite dimounn.” (Zoel 2:28) Avan ki Zezi mont dan lesiel, li ti dir so bann disip: “Mo pou demann mo Papa ek li pou donn zot enn lot asistan.” Zezi ti dir ki sa asistan-la se ‘lespri sin.’​—Zan 14:16, 17.      

13, 14. Kouma Pier ti fer zefor pou tous leker bann dimounn, ek kouma nou kapav imit li?

¹³ Alafin so diskour, Pier koz fran avek lafoul: “Ki zot tou dan nasion Izrael kone dan enn fason sir ki Bondie finn fer Zezi vinn Segner ek Kris toule-de, sa Zezi ki zot finn touye lor enn poto la.” (Zist. 2:36) Li vre ki laplipar dimounn ki pe ekout Pier, pa ti la kan ti koulout Zezi lor enn poto. Me selman, antan-ki enn nasion zot tou koupab. Me remarke ki kanmem sa, Pier koz avek bann Zwif avek respe ek fer zefor pou tous zot leker. Pier pa anvi kondann zot. Okontrer, li anvi ankouraz zot pou repanti. Eski bann ki ekout Pier agase ar seki li dir? Non. Labib dir ki kan sa bann dimounn-la ti tann Pier, “koumadir zot ti gagn enn kout kouto dan zot leker,” setadir sa ti bien tous zot. Zot ti ­demande: “Ki nou bizin fer?” Pier inn reisi tous leker boukou dimounn parski li’nn koz avek zot avek respe, ek sa inn pous zot pou ­repanti.​—Zist. 2:37.

¹⁴ Nou kapav imit fason ki Pier ti tous leker bann dimounn.f Kan nou prese, souvan bann dimounn dir nou bann kitsoz ki pa an-akor avek Labib. Me fode pa ki nou diskit lor tou ti kitsoz ki zot dir nou. Okontrer, nou bizin koz lor bann kitsoz lor ki nou toule-de dakor. Si nou reisi fer sa, lerla li pou pli fasil pou ed bann dimounn konpran Parol Bondie. Kan nou partaz bann verite ki ena dan Labib avek respe, souvan bann ki ena enn bon kondision leker aksepte nou mesaz.

15. (a) Ki Pier ti dir, ek kouma bann dimounn ti reazir? (b) Kifer bann milye dimounn ki ti tann bon nouvel pandan Lapantkot ti kapav pran batem mem zour?

¹⁵ Lapantkot 33 N.L. ti enn bon lazourne, boukou Zwif ek bann ki’nn konverti reazir bien ar bon nouvel. Lerla, Pier dir zot: “Repanti, ek ki sakenn parmi zot batize.” (Zist. 2:38) Ki lefe so bann parol ena? Anviron 3,000 dimounn pran batem dan bann pisinn Zerizalem ouswa dan lezanviron.g Eski zot ti fer sa san reflesi? Eski sa levennman-la se enn lexanp pou ankouraz bann etidian Labib, ouswa bann zanfan bann frer ek ser, pou degaze pran batem mem si zot pankor pare? Non. Fode pa ki nou bliye ki bann Zwif ek bann ki’nn konverti, ki ti pran batem pandan Lapantkot 33 N.L., ti deza bann bon etidian Labib. Zot ti osi form parti enn nasion ki ti promet pou servi Zeova. Anplis, zot ti pe deza montre ki zot ti bien devwe, parski zot ti sorti bien lwin pou vinn Zerizalem pou selebre Lapantkot. Apre ki zot ti aksepte bann verite inportan konsernan rol ki Zezi Kris ena dan realizasion proze Bondie, zot ti pare pou kontign servi Bondie, me aster-la kouma bann disip Lekris ki’nn batize.

16. Kouma bann Kretien dan premie siek ti montre ki zot ena lespri sakrifis?

¹⁶ Sa bann dimounn-la ti vremem ena benediksion Zeova, parski Zistwar Bann Zapot 2:44, 45 dir: “Tou bann ki ti vinn krwayan ti zwenn ansam ek ti partaz tou seki zot ti ena ar zot kamarad, ek zot ti pe vann zot later ek zot bann dibien ek zot ti pe partaz sa kas-la ar zot tou, dapre seki sakenn ti bizin.”h Nou sir ki tou bann vre Kretien pou anvi imit lespri sakrifis ki sa bann Kretien-la inn manifeste.

17. Ki bann diferan letap enn dimounn bizin fer pou ki li vinn enn Kretien?

¹⁷ Pou ki enn dimounn vinn enn Kretien, li bizin swiv diferan letap ki mansione dan Labib. Li bizin ena enn bon konesans lor Parol Bondie. (Zan 17:3) Li bizin ena lafwa, ek li bizin repanti konsernan lavi ki li ti pe amene avan. Sa pou montre ki li vremem regrete. (Zist. 3:19) Lerla, li bizin retourn ar Bondie, setadir li bizin konverti, ek koumans fer bann kitsoz ki an-akor avek volonte Bondie. (Rom. 12:2; Efe. 4:23, 24) Apre ki li’nn fer sa bann kitsoz-la, dan enn lapriyer, li pou kapav ofer so lavi Bondie ek lerla, pran batem.​—Mat. 16:24; 1 Pier 3:21.

18. Ki privilez bann disip Kris ki batize ena?

¹⁸ Eski to enn disip Zezi ki’nn donn so lavi Zeova ek pran batem? Si wi, to bizin ena boukou rekonesans ki to finn gagn sa privilez-la. Parey kouma bann disip dan premie siek ki ti gagn lespri sin, Zeova kapav servi twa dan enn fason extraordiner pou rann temwaniaz afon ek pou fer so volonte!