Mars

Kan nou lir Zenez sapit 1 ek 2, nou aprann ki Adan ek Ev ti ena enn liberte ki paret inposib pou ena azordi. Zot ti ena tou seki zot ti bizin, zot pa ti per nanye, ek personn pa ti tret zot dan enn fason inzis. Zot pa ti trakase akoz manze, travay, maladi, ouswa lamor. (Zen. 1:27-29; 2:8, 9, 15) Me, li inportan ki nou rapel ki se Zeova tousel ki ena enn liberte total ek san limit. Kifer? Parski Li finn kree tou kitsoz ek se Limem ki Sef tou-pwisan dan liniver. (1 Tim. 1:17; Rev. 4:11) Parkont, liberte bann kreatir ki dan lesiel ek lor later ena sertin limit. Zeova anvi ki nou konpran ki se zis Li tousel ki ena drwa pou deside ki bann limit ki itil, zis ek rezonab. Se akoz sa ki depi koumansman, Zeova finn etabli bann limit pou Adan ek Ev. w18.04 4 ¶4, 6

Dan sa lemond-la, se zis gras-a led Zeova ki nou reisi andire. (2 Kor. 4:7, 8) Me pans bann ki pena enn bon relasion avek Zeova. Sirman li bien difisil pou zot pou viv dan sa lemond-la san led Zeova. Parey kouma Zezi, nou ena konpasion pou zot, ek sa ankouraz nou pou partaz avek zot “bann bon nouvel lor enn kitsoz ki pli bon.” Alor ena pasians ar bann dimounn ar ki to ansegn Labib. Pa bliye ki kitfwa zame zot finn reflesi lor sertin lansegnman Labib ki nou, nou konn extra bien. Ek ena boukou parmi zot ki bien atase ar zot bann krwayans. Kitfwa zot relizion ena enn gran linportans pou zot. Kifer? Parski sa permet zot res atase ar zot fami, zot bann koutim, ek zot kominote. Avan ki bann dimounn abandonn zot bann “vie” krwayans ar ki zot bien atase, nou bizin ed zot pou devlop enn gran rekonesans pou bann “nouvo” kitsoz ki zot pe aprann, setadir bann lansegnman Labib ki zot pa ti kone avan. Se lerla ki kitfwa zot pou pre pou abandonn zot bann ansien krwayans. Li kapav pran boukou letan pou ed enn dimounn fer sa sanzman-la.​—Rom. 12:2. w19.03 23 ¶10; 23-24 ¶12-13

Zeova finn les nou enn bon lexanp kan Li finn exprim so lamour ek so konfians. Sa montre nou ki nou bizin rod bann lokazion pou ankouraz lezot. (Zan 5:20) Eski sa pa ankouraz nou kan enn kikenn ki nou kontan montre nou so lamour ek felisit nou pou bann bon kitsoz ki nou fer? Li parey, nou bann frer ek ser dan kongregasion ek bann manb nou fami bizin nou lamour ek nou lankourazman. Kan nou felisit lezot, nou fortifie zot lafwa ek ed zot pou servi Zeova avek fidelite. Bann paran sirtou bizin ankouraz zot zanfan. Kan bann paran felisit zot zanfan sinserman ek montre zot lafeksion, sa ed zot zanfan pou epanwi. Sa bann parol-la: “Mo finn aprouv twa” montre ki Zeova ti ena konfians ki Zezi ti pou fer volonte so Papa avek fidelite. Si Zeova ena sa kalite konfians-la dan so Garson, nou osi nou kapav ena konfians ki Zezi pou fer tou bann promes so Papa realize. (2 Kor. 1:20) Kan nou examinn lexanp Zezi, nou plis determine pou aprann ar li ek pou swiv so lexanp.​—1 Pier 2:21. w19.03 8 ¶3; 9 ¶5-6

Kan nou gagn enn kado ki ena enn gran valer, nou ena rekonesans anver sa dimounn ki’nn donn nou sa kado-la. Pourtan, bann Izraelit pa ti ena rekonesans pou liberte ki Zeova ti donn zot. Zis de-trwa mwa apre ki Zeova ti liber zot depi Lezip, zot ti koumans rod manze ek labwason ki zot ti gagne laba. Zot ti plengne konsernan lamann, manze ki Zeova ti pe donn zot. Zot ti mem anvi retourn Lezip! Pou zot, ‘pwason, kokom, melondo, pwaro, zwanion, ek lay’ ti pli inportan ki liberte ki Zeova ti donn zot pou ador Li. Sa pa etonn nou ki Zeova ti bien ankoler ar zot. (Nonb 11:5, 6, 10; 14:3, 4) Sa ansegn nou enn leson bien inportan. Pol ti ankouraz tou bann Kretien pou pa vinn ingra pou liberte ki Zeova finn donn nou atraver so Garson, Zezi Kris.​—2 Kor. 6:1. w18.04 10-11 ¶6-7

Nou tou nou anvi ki lezot kontan nou. Ek nou tou nou anvi ki lezot tret nou bien. Si lezot souvan refiz pou manifeste lamour ek lazistis anver nou, nou kapav panse ki nou pena valer ek sa kapav dekouraz nou. Zeova kone ki sa inportan pou nou ki lezot manifeste lamour ek lazistis anver nou. (Ps. 33:5, NW) Nou kapav sir ki nou Bondie bien kontan nou ek anvi ki lezot tret nou avek zistis. Nou trouv sa bien kan nou get Lalwa ki Zeova ti donn nasion Izrael atraver Moiz. Kan nou etidie Lalwa Mozaik, nou aprann konn plis lor profon lafeksion ki Zeova ena pou nou ek ki Li kontan nou. (Rom. 13:8-10) Nou kapav dir ki Lalwa Mozaik ti baze lor lamour parski tou seki Zeova fer, Li fer li par amour. (1 Zan 4:8) Lalwa ki Zeova ti donn Moiz ti baze lor de komannman prinsipal​—lamour pou Bondie, ek lamour pou to prosin. (Lev. 19:18; Det. 6:5; Mat. 22:36-40, NW) Sak komannman ki form parti dan sa plis ki 600 lalwa ki Zeova ti done la, ansegn nou lor lamour Zeova. w19.02 20-21 ¶1-4

Zob ti fer atansion lor so konportman avek bann madam. (Zob 31:1) Li ti kone ki li pa bon ki li devlop bann santiman pou enn lot madam. Azordi, nou pe viv dan enn lemond ki bonbard nou ar bann tantasion lor plan sexiel. Parey kouma Zob, eski nou pou refiz get avek enn move lintansion enn kikenn ki pa nou konzwin? Eski nou pou osi refiz get bann zimaz indesan ouswa pornografi? (Mat. 5:28) Si toulezour nou fer zefor pou kontrol noumem dan sa domenn-la, nou pou reisi gard nou lintegrite. Zob ti osi obeir Zeova dan fason ki li ti konsider bann kitsoz materyel. Zob ti konpran ki si li met so konfians dan bann kitsoz ki li ena, li ti pou fer enn pese grav ek li ti pou merit enn pinision. (Zob 31:24, 25, 28) Azordi, nou pe viv dan enn lemond bien materyalis. Si nou devlop enn fason panse ekilibre lor larzan ek bann kitsoz materyel, parey kouma Labib ankouraz nou pou fer, nou pou reisi gard nou lintegrite.​—Prov. 30:8, 9; Mat. 6:19, 20. w19.02 6 ¶13-14

Dan tou seki li ti fer, Zezi ti imit dan enn fason parfe lamour ki Zeova ena pou nou. (1 Zan 4:8-10) Me pli inportan, se lamour ki finn pous Zezi pou donn so lavi pou nou. Ki nou ena lesperans pou al viv dan lesiel ouswa nou form parti bann “lezot mouton,” nou tou nou gagn bann benediksion gras-a lamour ki Zeova ek so Garson finn montre anver nou atraver sa sakrifis-la. (Zan 10:16; 1 Zan 2:2) Reflesi osi lor bann lanblem ki servi zour Memoryal; sa montre lamour ek konsiderasion ki Zezi ena pou so bann disip. Kouma? Zezi finn montre so lamour anver so bann disip ki ena lesperans pou al viv dan lesiel, kan li pa’nn etabli enn seremoni konplike, me enn sinp repa. Sa bann disip-la ti pou bizin fer Memoryal sak lane, ek zot ti pou fer sa dan diferan sitiasion, mem dan prizon. (Rev. 2:10) Eski zot ti reisi obeir Zezi? Wi! Depi premie siek ziska azordi, bann vre Kretien finn touzour fer zefor pou komemor lamor Zezi. w19.01 24 ¶13-15

Gras-a Zeova, nou’nn libere ar fos relizion, liniorans ek siperstision. Dan lavenir, nou pe atann pou gagn “laliberte ek laglwar bann zanfan Bondie.” (Rom. 8:21) To kapav profit depi asterla mem enn parti sa liberte-la kan to swiv bann lansegnman Zezi Kris. (Zan 8:31) Dan sa fason-la, to pou “konn laverite” pa zis kan to aprann me osi kan to viv laverite! Dan sa vie lemond-la, mem seki bann dimounn apel enn bon lavi li bien kourt. Okenn dimounn pa kone ki pou arive demin. (Zak 4:13, 14) Alor, ki meyer kitsoz to kapav fer? Fer bann swa ki pou ed twa gagn “vre lavi,” setadir, lavi eternel dan nouvo lemond ki Bondie promet nou. (1 Tim. 6:19) Zeova pa fors personn pou servi Li. Sakenn bizin deside seki li pou fer. Alor, fer Zeova vinn to “par” kan toulezour to fer zefor pou vinn pros ar Li, ek kan to akord enn gran valer tou bann “bon” kitsoz ki Li donn twa. (Ps. 16:5; 103:5) To kapav sir ki Zeova pou donn twa lazwa ek boner an abondans pou touletan!​—Ps. 16:11. w18.12 26 ¶19, 21

Tou bann Kretien bizin onor maryaz parey kouma Zeova ek Zezi. Selman, kitfwa sertin pa reisi fer sa, parski nou tou nou inparfe. (Rom. 7:18-23) Alor, sa pa sok nou ki dan premie siek sertin Kretien ti gagn bann gran difikilte dan zot maryaz. Pol ti ekrir ki enn “fam bizin pa kit so mari.” Me parfwa sa ti arive. (1 Kor. 7:10) Pol pa ti explike ki bann sitiasion ki ti pous bann koup pou separe. Me nou kone ki se pa parski, par exanp, mari-la ti komet limoralite sexiel. Sinon, madam-la ti pou ena enn rezon valab pou divorse ek re-marye. Pol ti explike ki si enn madam separ li ar so mari li bizin “res san marye, sinon li bizin rekonsilie ar so mari.” Alor, Zeova ti ankor konsider sa koup ki ti separe la kouma enn koup marye. Pol ti dir ki mem si enn koup pe gagn bann gran difikilte, si ni mari-la ek ni fam-la pa finn komet limoralite sexiel, zot bizin esey rekonsilie, setadir, regle zot problem ek res ansam. Zot kapav demann bann ansien pou ed zot. w18.12 13 ¶14-15

Azordi, Bondie anvi ki nou vinn so kamarad ek ki nou fer nou maximum pou pres bonn nouvel. (Mat. 28:19, 20; Zak 4:8) Me sertin dimounn, ki pourtan ena bann bon lintansion, kapav esey dekouraz nou. Par exanp, to patron kapav propoz twa pli boukou kas, me to kone ki to pou bizin travay plis ek ki to pa pou ena ase letan pou to renion ek predikasion. Ouswa si to ankor lekol, mazine ki to bann profeser donn twa posibilite pou fer bann lezot letid lwin ar to fami. Si sa arive, eski to pou bizin priye, fer bann resers, ek koz ar lezot avan ki to pran enn desizion? Li pli bon si to kone ki Zeova panse lor la depi asterlamem ek ki to ena mem fason panse ki Li. Lerla, si enn zour to bizin fer fas ar sa bann sitiasion-la, kitfwa sa bann kitsoz-la pa pou mem enn tantasion pou twa. To konn exakteman seki to bizin fer, parski to’nn fini deside pou res konsantre lor to servis pou Zeova. w18.11 31 ¶18

Salomon ti vinn lerwa Izrael kan li ti ankor zenn. Dan koumansman so regn, Zeova ti aparet ar li dan enn rev ek ti dir: “Demann mwa seki to ti pou kontan mo donn twa.” Salomon ti reponn: “Mo ankor zenn ek mo pena lexperyans. . . . Alor, donn to serviter enn leker obeisan, pou ziz to pep.” (1 Ler. 3:5-10) Salomon ti demann zis “enn leker obeisan.” Seki li ti demande montre bien ki li ti modes, pa vre? Sa pa etonn nou ki Zeova ti kontan Salomon! (2 Sam. 12:24) Repons ki zenn Lerwa Salomon ti done ti telman fer Bondie plezir ki Bondie ti donn li “enn leker saz ek intelizan.” (1 Ler. 3:12) Tanki li ti fidel, Salomon ti gagn boukou benediksion. Li ti gagn loner pou konstrir enn tanp “pou nom Zeova, Bondie Izrael.” (1 Ler. 8:20) Li ti vinn seleb gras-a gran sazes ki Bondie ti donn li. Ek nou trouv bann kitsoz ki Bondie ti inspir li pou ekrir dan trwa liv Labib. Enn sa bann liv-la se liv Proverb. w19.01 14 ¶1-2

Sertin dimounn pa anvi les personn inflians zot fason panse. Zot dir: “Mo reflesi par momem.” Sirman zot pe rod fer konpran ki zot anvi pran zot prop desizion ek ki zot ena drwa fer sa. Zot pa anvi ki lezot inpoz lor zot ouswa fors zot pou vinn parey kouma tou dimounn. Li bon nou kone ki mem si nou aksepte fason panse Zeova, nou kapav kanmem ena nou prop lopinion. Dan 2 Korintien 3:17, Labib dir: “La kot Lespri [“Zeova,” NW] prezan, la ena liberte.” Zeova les nou lib pou swazir ki kalite dimounn nou anvi ete. Nou kapav ena nou bann preferans ek swazir ki kitsoz interes nou. Zeova inn kree nou dan sa fason-la. Me sa pa vedir ki nou liberte pena limit. (1 Pier 2:16) Kan nou bizin kone ki kitsoz bon ouswa move, Zeova anvi ki nou servi so Parol kouma enn gid. w18.11 22 ¶5-6

Kan nou ti konn laverite, nou ti rann nou kont ki nou servis pou Zeova boukou pli inportan ki bann kitsoz materyel, ek nou ti bien kontan pou abandonn sa bann kitsoz-la pou laverite. Me amezir ki letan pase, kitfwa nou trouv lezot pe aste bann dernie laparey elektronik ouswa pe profit lezot kitsoz ki zot inn aste. Kitfwa nou kapav koumans panse ki nou pe rat kitsoz. Kitfwa nou nepli satisfe ar seki nou ena ek nou rod gagn pli boukou kitsoz materyel, olie ki nou res konsantre lor nou servis pou Zeova. Sa fer nou rapel seki ti ariv Demas. Li ti telman kontan “lemonn” ki li ti abandonn responsabilite ki li ti gagne pou akonpagn lapot Pol. Kitfwa Demas ti kontan bann kitsoz materyel plis ki so servis pou Zeova. Li posib osi ki li ti nepli anvi fer bann sakrifis pou servi ansam avek Pol. Ki leson nou aprann? Kitfwa dan lepase, nou ti vremem kontan bann kitsoz materyel. Si nou pa fer atansion, sa lamour-la kapav rekoumans grandi dan nou ek li kapav vinn telman for ki nou perdi nou lamour pou laverite. w18.11 12 ¶9

Satan ti koz manti pou fer ditor, parski li ti kone ki si Ev ti krwar li ek ti manz sa frwi-la, Ev ti pou mor. Ek se samem ki ti arive! Ev ek plitar Adan osi ti dezobeir lord Zeova, ek finalman zot inn mor. (Zen. 3:6; 5:5) Anplis, akoz pese Adan, “lamor finn tous tou dimoun.” An realite, “lamor finn manifeste so pouvwar, mem lor bann dimoun ki pa finn komet pese kouma Adam ti fer.” (Rom. 5:12, 14) Se pou sa rezon-la ki nou inparfe ek ki nou pa viv pou touletan, kouma Bondie ti anvi pou nou. Me plito, nou viv zis “swasanndis-an, katrovin si lasante bon,” ek nou lavi ranpli ar “traka ek sagrin.” (Ps. 90:10) Tousala inn arive parski Satan ti koz manti! Konsernan Satan, Zezi ti dir: “Li pa’nn tini ferm dan laverite, parski laverite pa dan li.” Satan pa’nn sanze. (Zan 8:44, NW) Li ankor touzour pe “met tou bann dimounn lor later antie dan lerer” avek so bann mansonz. (Rev. 12:9, NW) Me nou, nou pa anvi ki Satan met nou dan lerer. w18.10 3-4 ¶1-4

Kan nou fer premie pa pou fer lape avek lezot, sa kapav rann nou ere. Disip Zak ti ekrir: “Lagrin frwi lazistis li seme dan lape pou bann ki fer lape.” (Zak 3:18) Alor si to pe fer boukou zefor pou fer lape avek enn kikenn dan kongregasion ouswa dan to fami, sipliy Zeova pou ed twa. Lerla, Zeova pou donn twa so lespri sin, ki pou ed twa pou manifeste bann kalite Kretien, ek to pou pli ere. Zezi ti montre bien ki kantite li inportan ki nou fer premie pa pou fer lape. Li ti dir: “Akoz samem si to vinn devan lotel pou ofer enn sakrifis e to rapel ki to pa bien ar to frer [“ki to frer ena kitsoz kont twa,” NW], les to ofrand lamem, rekonsilie ar to frer, apre to va prezant to ofrand Bondie.”​—Mat. 5:23, 24. w18.09 19 ¶17

Pandan dernie lanwit ki li ti pase avek so bann disip, avan so lamor, Zezi ti mansionn lamour anviron 30 fwa. Li ti dir so bann disip ki zot bizin “kontan zot prosin.” (Zan 15:12, 17) Lamour ki zot ti pou ena ant zot ti pou telman extraordiner ki lezot ti pou remark sa ek ti pou kone ki zot bann vre disip Zezi. (Zan 13:35) Sa lamour lor ki Zezi ti koze la, li pa inplik zis bann santiman; se enn lamour bien for ki pa egois. Zezi ti dir: “Pena pli gran lamour ki existe ler kikenn donn so lavi pou so bann kamarad. Zot mo bann kamarad si zot fer tou seki mo komann zot.” (Zan 15:13, 14) Azordi, bann dimounn konn bann serviter Zeova pou zot lamour sinser ki pa egois, ek pou zot gran linite. (1 Zan 3:10, 11) Mem si zot sorti dan diferan nasion ouswa tribi, koz diferan lang, ouswa inn gagn diferan ledikasion, partou atraver later, bann Temwin Zeova vremem kontan zot kamarad. w18.09 8 ¶1-2

Zeova atann ki nou pran swin nou fami. Par exanp, kitfwa to bizin travay pou donn to fami seki li bizin pou viv. Boukou mama bizin res lakaz pou okip zot bann zanfan ki ankor tipti. Ek kan nou bann paran nepli kapav pran zotmem swin, kitfwa nou bizin okip zot. Tousala se bann kitsoz inportan. Si to ena bann responsabilite familial, kitfwa to pa pe kapav fer otan ki to ti pou anvi pou Zeova. Me pa dekouraze! Sa fer Zeova kontan kan to pran swin to fami. (1 Kor. 10:31) Si to pena bann gran responsabilite familial, eski to kapav ed bann frer ouswa bann ser ki malad ouswa vie ouswa ki bizin lezot led? Ouswa eski to kapav ed bann ki pe okip enn dimounn malad ouswa aze? Eski dan to kongregasion to konn kikenn ki pe bizin led dan sa fason-la? Kan to fer sa, li posib ki to pe travay ansam avek Zeova pou reponn enn kikenn so lapriyer.​—1 Kor. 10:24. w18.08 22 ¶3, 5

Zozef ti garson prefere Zakob, ek akoz sa, so bann frer ti bien zalou li. Kan Zozef ti ena 17 an, so bann frer ti vann li kouma enn esklav. (Zen. 37:2-4, 23-28) Pandan apepre 13 an, Zozef ti bien pas mizer dan Lezip kouma enn esklav ek apre sa, kouma enn prizonie. Zozef ti bien lwin avek so papa, ki li ti bien kontan. Zozef ti kapav ankoler ek perdi lespwar akoz so sitiasion, me li pa ti les li abat. Ki kitsoz ti ed li? Pandan ki li ti pe soufer dan prizon, sirman Zozef ti fixe so latansion lor fason ki Zeova ti pe ed li. (Zen. 39:21; Ps. 105:17-19) Kitfwa li ti osi reflesi lor bann rev profetik li ti gagne kan li ti pli zenn ek sa ti donn li lasirans ki Zeova ti avek li. (Zen. 37:5-11) Sirman li ti priye souvan ek li ti dir Zeova tou seki ti ena lor so leker. (Ps. 145:18) Zeova ti reponn so bann lapriyer ek ti rasir Zozef ki Li ti pou “ar li” dan ninport ki sitiasion ki ti pou arive. w18.10 23 ¶3-4

Fason ki nou trouv lezot kapav inflianse par ki kantite enn dimounn ris ouswa pov. Kouma rises ouswa povrete enn dimounn kapav inflians fason ki nou trouv li? Salomon ti inspire pou ekrir sa verite bien tris ki nou trouve dan text pou azordi la. Ki sa proverb-la ansegn nou? Si nou pa fer atansion, li kapav arive ki nou rod fer kamarad avek bann frer ki ris ek pa avek bann ki pov. Kifer li danzere kan nou ziz bann dimounn dapre seki zot ena ouswa seki zot pena? Kan nou fer sa, nou kapav kree divizion dan kongregasion. Sa ti arive dan sertin kongregasion dan premie siek, ek Zak ti met sa bann Kretien-la an gard kont sa. (Zak 2:1-4) Fode pa ki nou permet ki ena divizion dan kongregasion ek nou bizin fer tou pou evit ziz bann dimounn dapre seki zot ena. w18.08 11-12 ¶8-10

Nou montre ki nou lamitie avek Zeova ena boukou valer par fason ki nou tret nou bann frer ek ser. Zot pou Zeova, parey kouma nou. Si nou rapel sa, nou pou touletan tret zot avek bonte ek lamour. (1 Tes. 5:15) Kifer sa li bien inportan? Zezi ti dir so bann disip: “Si zot ena lamour pou zot kamarad, tou dimoun pou kone ki zot mo disip.” (Zan 13:35) Malaki ti dir ki Zeova ‘pe pran kont, ek pe ekoute’ kouma so pep tret sakenn zot kamarad. (Mal. 3:16) Zeova “konn so dimoun.” (2 Tim. 2:19) Li konn tou seki nou dir ek fer. (Ebre 4:13) Zeova remarke kan nou pa azir bien anver nou bann frer ek ser. Me nou kapav sir osi ki Zeova remarke kan nou manifeste lospitalite, zenerozite, pardon ek bonte.​—Ebre 13:16. w18.07 25 ¶15, 17

Li dan nou lavantaz kan nou res pros ar Zeova. Pena personn ki pli pwisan, pli saz, ek ki kontan nou plis ki Li! Pena dout ki touletan nou anvi res fidel ar Li ek res dan so kote. (Ps. 96:4-6) Me sertin dimounn ki ti ador Bondie pa ti reisi fer sa. Par exanp, reflesi lor Kain. Li pa ti ador bann fos bondie, me kanmem sa Zeova pa ti aksepte so ladorasion. Kifer? Zeova ti trouv bann move tandans dan Kain so leker. (1 Zan 3:12, NW) Zeova ti averti Kain: “Si to sanze, ek fer seki bon, eski to pa pou regagn mo faver? Me si to pa sanze ek fer seki bon, ena pese devan laport, ek li pe atann twa avek inpasians; me eski to pou kapav dominn li?” (Zen. 4:6, 7) Zeova ti montre dan enn fason bien kler ki si Kain ti repanti ek ti swazir pou res dan kote Bondie, Li ti pou avek Kain. Me Kain pa ti ekout Bondie. w18.07 15 ¶1; 15-16 ¶3-4

Prese ek fer bann disip se enn fason inportan ki nou fer nou lalimier briye. (Mat. 28:19, 20) Pena zis nou predikasion ki donn laglwar Zeova, ena osi nou kondwit. Boukou dimounn obzerv nou kan nou prese. Kan nou fer zot enn sourir ek dir zot bonzour, sa ed zot pou ena enn bon lopinion lor nou ek lor Bondie ki nou pe adore. Zezi ti dir so bann disip: “Letan zot rant dan enn lakaz, souet lape tou dimoun.” (Mat. 10:12) Dan rezion kot Zezi ti prese, li ti dan koutim bann dimounn pou invit bann etranze kot zot. Me dan boukou landrwa azordi, bann dimounn nepli fer sa. Souvan bann dimounn trakase ouswa agase kan zot trouv bann etranze devan zot laport. Me si nou zanti ek amikal, kitfwa zot pou santi zot plis alez. Kan to pe fer prezantwar dan bann plas piblik, eski to finn remarke ki bann dimounn santi zot plis alez pou vinn pran bann piblikasion kan to fer zot enn sourir ek to dir zot bonzour? w18.06 22 ¶4-5

Lapot Pier ti abitie pas letan avek zis bann Zwif. Me apre sa, Bondie finn montre dan enn fason kler ki fode pa ki bann Kretien fer preferans, ek Pier ti pres avek Korney, enn solda Romin. (Zist. 10:28, 35) Apartir sa moman-la, Pier ti koumans pas letan avek bann Kretien non-Zwif ek ti manz ar zot. Me plizir lane apre, dan lavil Antios, li ti aret manz avek bann Kretien non-Zwif. (Gal. 2:11-14) Pol ti koriz Pier, ek Pier ti aksepte sa koreksion-la. Kouma nou konn sa? Dan premie let ki Pier ti ekrir bann Kretien Zwif ek non-Zwif dan Lazi Miner, li ti koz lor linportans pou kontan tou nou bann frer. (1 Pier 1:1; 2:17) Li kler ki gras-a lexanp Zezi, bann zapot ti aprann pou kontan “tou sort kalite dimounn.” (Zan 12:32, NW; 1 Tim. 4:10, NW) Mem si sa finn pran letan, zot ti sanz fason ki zot ti konsider lezot. Parski sa bann Kretien-la ti met “nouvo personalite” lor zot, zot ti aprann pou trouv tou dimounn parey kouma Zeova, setadir zot tou egal.​—Kol. 3:10, 11, NW. w18.06 12-13 ¶15-16

Zile proteksion ki enn solda Romin ti mete souvan ti fer ar bann band feray orizontal. Sak fwa, solda-la ti bizin verifie si bann band feray la ti dan zot plas parski sa zile-la ti protez so leker ek so bann lezot organn. Bann prinsip Zeova zot drwat, ek zot protez nou “leker,” ouswa dimounn ki nou ete andan. Akoz sa, nou kapav konpar sa bann prinsip-la ar sa zile-la. (Prov. 4:23) Zame enn solda ti pou sanz so zile ki’nn fer ar feray kont enn zile ki’nn fer ar enn metal ki mwin solid. Dan mem fason, zame nou pa pou rod sanz bann prinsip Zeova kont nou prop fason panse. An realite, nou pena ase sazes pou protez nou prop leker. (Prov. 3:5, 6) Se akoz sa ki regilierman nou bizin verifie ki nou “zile proteksion” pe ankor protez nou leker. Pli nou kontan bann verite ki sorti kot Bondie, pli li pou fasil pou sarye nou “zile proteksion,” setadir pou viv dapre bann prinsip Bondie.​—Ps. 111:7, 8; 1 Zan 5:3. w18.05 22 ¶3-4; 22-23 ¶6-7

Mem si pandan tou sa letan-la Moiz inn gid lepep avek boukou konsiderasion, bann dimounn ti pe plegne pa zis konsernan delo me osi konsernan Moiz, koumadir sa ti so fot si zot ti pe gagn swaf. (Nonb 20:1-5, 9-11) Dan lakoler, Moiz ti perdi so douser. Olie ki li ti koz avek lafwa ar sa ros-la, parey kouma Zeova ti demann li, Moiz ti koz dan enn fason brit ar lepep ek ti dir ki se limem ki pou fer enn mirak. Lerla, li ti tap sa ros-la de fwa ek boukou delo ti sorti. Lorgey ek lakoler ti pous li pou fer enn erer bien grav. (Ps. 106:32, 33) Pou sa ti moman ki Moiz ti mank douser la, Zeova pa ti les li rant dan Later Promiz. (Nonb 20:12) Nou aprann bann leson inportan avek seki ti ariv Moiz. Premierman, touletan nou bizin fer zefor pou kontign manifeste douser. Si nou pa fer atansion mem pou enn ti moman, lorgey kapav dominn nou ek pous nou pou koz ek azir dan enn fason bet. Deziemman, kan nou strese li pli difisil pou manifeste douser. Akoz sa, nou bizin fer zefor pou manifeste sa kalite-la, mem si nou pe fer fas ar bann gran presion. w19.02 12-13 ¶19-21

Eski li enn fardo pou nou pou prese? Non. Apre ki Zezi ti donn lexanp pie rezin, li ti dir ki kan nou prese nou pou gagn so lazwa. (Zan 15:11) Kouma sa li posib? Zezi ti konpar limem ar enn pie rezin ek so bann disip ar bann brans. (Zan 15:5) Bann brans gagn delo ek bann mineral ki zot bizin kan zot ar pie rezin-la. Parey, nou pou zwaye parey kouma Zezi ti ete si nou res atase ar li ek imit li. Lerla nou pou gagn lazwa ki li ena, lazwa ki nou gagne kan nou fer volonte Bondie. (Zan 4:34; 17:13; 1 Pier 2:21) Hanne, ki pionie depi plis ki 40 an, dir: “Lazwa ki mo gagne dan mo minister motiv mwa pou kontigne dan servis Zeova.” Lazwa pou donn nou lafors pou kontign prese mem si laplipar dimounn pa ekout nou.​—Mat. 5:10-12. w18.05 9 ¶2; 13 ¶14

Lapot Pol ti abitie ankouraz so bann frer ek li finn les nou enn bon lexanp. Lespri sin ti avoy Pol pou pres avek bann Grek, Romin, ek lezot dimounn ki ti ador plizir bondie. (Gal. 2:7-9, NW) Pol ti vwayaz dan enn rezion ki asterla apel Turquie, ek osi dan la Grèce ek l’Italie. Li ti pres avek bann non-Zwif ki ti res dan sa bann landrwa-la, ek li ti form bann kongregasion Kretien. Lavi pa ti fasil pou bann nouvo Kretien. Bann dimounn dan zot prop pei ti persekit zot, akoz sa zot ti bizin lankourazman. (1 Tes. 2:14, NW) Ver lane 50, Pol ti ekrir enn let pou ankouraz nouvo kongregasion dan Tesalonik. Li ti dir: “Toultan nou pe remersi Bondie pou zot tou e nou pa fini pans zot dan nou lapriyer . . . Nou rapel seki zot finn fer akoz zot lafwa, kouma zot finn travay dir akoz zot lamour . . . e kouma zot finn tini ferm.” (1 Tes. 1:2, 3) Li ti osi demann zot pou fortifie sakenn zot kamarad ek li ti ekrir: “Ankouraz zotmem e fortifie zot bien, parey kouma zot deza pe fer.”​—1 Tes. 5:11. w18.04 19-20 ¶16-17

Si avan tou kitsoz to rod fer plezir Zeova, to pou anvi koz lor Li ar lezot. Travay predikasion li irzan ek li bizin enn bann kitsoz pli inportan pou nou. Eski to kapav fixe lobzektif pou pres pli souvan? Eski to kapav fer pionie? Me ki to pou fer si to pa tro kontan prese? Ek kouma to kapav explik pli bien to bann krwayans? De kitsoz pou ed twa: Prepar twa bien, ek kontign partaz avek lezot seki to kone lor Zeova. Kitfwa to pou etone kan to pou remarke ki kantite to pou kontan prese. Pou koumanse, prepar enn repons pou bann kestion ki to bann kamarad lekol kapav poz twa, kouma par exanp, “Kifer to krwar dan Bondie?” Ena bann lartik lor nou sit jw.org ki kapav ed twa pou reponn sa kestion-la. Al dan fiche de réflexion ki ena tit « Pourquoi est-ce que je crois en Dieu ? » ek swiv bann letap ki ena lor sa fiche-la pou prepar to prop repons. w18.04 29-30 ¶10-11

Mem si Adan ek Ev ti ena boukou liberte, zot liberte ti ena bann limit. Sertin sa bann limit-la ti natirel pou zot. Par exanp, pou kontign viv, zot ti bizin respire, manze, ek dormi. Eski savedir ki zot pa ti lib? Non. An realite, Zeova ti fer sir ki kan zot pou fer sa bann kitsoz-la, zot ti pou ere ek gagn satisfaksion. (Ps. 104:14, 15; Ekle. 3:12, 13) Zeova ti donn Adan ek Ev enn lord bien presi. Li ti dir zot gagn bann zanfan, ranpli later, ek pran li swin. Eski sa lord-la ti priv zot zot liberte? Non! Sa ti donn zot lokazion pou fer later antie vinn enn paradi, fer li vinn enn plas kot zot ti pou res pou touletan avek zot bann zanfan ki ti pou parfe. Se sa proze lamem ki Bondie ti ena pou later. (Ps. 127:3; Iza. 45:18) Si Adan ek Ev ti obeir Zeova, zot ti pou ena enn maryaz ek enn lavi fami ere pou touletan. w18.04 4 ¶7-8

Si nou ena pasians avek bann dimounn ki dan nou teritwar, nou pa pou atann ki zot konpran ek aksepte bann lansegnman Labib premie fwa ki zot tann sa. Par exanp, reflesi kouma nou kapav ed enn dimounn konpran lesperans pou viv pou touletan lor later ki pou vinn enn paradi. Boukou dimounn krwar ki enn kikenn ki’nn mor pa kapav reviv ouswa ki tou bann bon dimounn al dan lesiel. Anou gete kouma enn frer ed bann dimounn pou konpran lesperans pou viv pou touletan lor later. Premierman, li lir Zenez 1:28. Apre sa, li demann dimounn-la kotsa Bondie ti anvi ki bann dimounn viv ek ki kalite lavi Li ti anvi zot ena. Laplipar dimounn reponn: “Lor later, ek dan bann bon kondision.” Apre sa, frer-la lir Izai 55:11, ek demann dimounn-la si proze Bondie inn sanze. Souvan, dimounn-la dir non. Ek finalman, frer-la lir Psom 37:10, 11 ek demann dimounn-la ki kalite lavenir bann dimounn pou ena. Kan li rezonn lor Labib dan sa fason-la, li ed plizir dimounn pou konpran ki Bondie anvi ki bann bon dimounn viv pou touletan dan Paradi lor later. w19.03 24 ¶14-15; 25 ¶19

Zeova ti montre dan enn fason kler ki Li anvi ki nou ekout bann parol so Garson ek obeir li. Zezi avek lamour ti ansegn so bann disip kouma pou pres bonn nouvel, ek plizir fwa li ti rapel zot pou kontign veye. (Mat. 24:42; 28:19, 20) Li ti osi ankouraz zot pou fer bann gran zefor ek pou pa bes lebra. (Lik 13:24) Zezi ti montre so bann disip linportans pou kontan sakenn zot kamarad, res dan linite, ek swiv so bann komannman. (Zan 15:10, 12, 13) Sa bann konsey-la ankor touzour valab azordi. Zezi ti dir: “Tou seki dan kote laverite ekout mo lavwa.” (Zan 18:37, NW) Nou montre ki nou pe ekout so lavwa kan nou kontign “siport [nou] kamarad, e si [nou] ena kit repros, donn pardon.” (Kol. 3:13; Lik 17:3, 4) Nou montre osi ki nou pe ekout so lavwa kan, avek zel, nou pres bonn nouvel “dan lepok favorab, dan lepok difisil.”​—2 Tim. 4:2, NW. w19.03 10 ¶9-10