Avril

Ki nou kapav dir lor noumem? Eski nou pans parey kouma Zeova, ouswa kouma bann dimounn dan lemond? Antan ki Kretien, nou fer boukou zefor pou fer Zeova plezir. Me ki nou kapav dir lor nou fason panse? Eski nou pe fer zefor pou pans parey kouma Zeova, setadir, pou trouv bann kitsoz parey kouma Li? Sa demann boukou zefor pou fer sa. Parkont, li bien fasil pou pans parey kouma bann dimounn dan lemond. Kifer? Parski nou antoure ar lespri sa lemond-la. (Efe. 2:2, NW) Anplis, bann dimounn dan lemond pans zis zotmem, ek nou kapav tante pou pans parey kouma zot. Wi, li difisil pou pans parey kouma Zeova, me li bien fasil pou pans kouma bann dimounn dan lemond. Si nou les lemond inflians nou fason panse, nou riske vinn egois ek rod desid par noumem seki bon ek seki pa bon. (Mark 7:21, 22, NW) Alor, li bien inportan ki nou aprann “pans kouma Bondie,” pa “kouma imin.” w18.11 21 ¶1; 22 ¶3-4

Trwa fwa, Zeova ti koz direkteman depi lesiel, pou fer so Garson kone ki Li kontan li. Sirman sa ti bien ankouraz Zezi! Zis apre ki Zezi ti batize dan Larivier Zourdin, Zeova ti dir bann parol ki ena dan nou text azordi.Li paret ki apart Zezi, zis Zan Batis ki ti tann sa bann parol-la. Apre sa, apepre enn an avan lamor Zezi, trwa parmi bann zapot ti tann Zeova dir sa lor Zezi: “Samem mo Garson ki mo bien kontan, li donn mwa boukou lazwa, ekout li.” (Mat. 17:5) Finalman, de-trwa zour avan lamor Zezi, Zeova ti rekoz ar so Garson depi lesiel. (Zan 12:28) Zezi ti kone ki bann dimounn ti pou apel li enn blasfemater ek ki li ti pou gagn enn lamor ki ti pou imilie li. Kanmem sa, li ti priye pou ki volonte Bondie fer, olie ki so volonte. (Mat. 26:39, 42) “Li finn andir enn poto soufrans, san pran kont laont,” parski li ti anvi gagn lestim so Papa, pa lestim lemond.​—Ebre 12:2, NW. w18.07 7-8 ¶15-16

Zis apre ki Zezi ti etabli Repa Nou Segner, li ti montre enn gran kouraz. Kouma? Zezi ti aksepte pou fer seki so Papa ti demann li, mem si li ti kone ki li pou mor kouma enn blasfemater. (Mat. 26:65, 66) Zezi ti gard so lintegrite dan enn fason parfe pou onor nom Zeova, soutenir drwa ki Bondie ena pou dirize, ek fer bann dimounn ki repanti gagn posibilite pou viv pou touletan. Anmemtan, Zezi ti prepar so bann disip pou seki pe atann zot devan. Zezi ti osi montre kouraz kan li ti met enn kote bann kitsoz ki ti kapav trakas li ek li ti konsantre li lor seki so bann zapot fidel ti bizin. Apre ki Zezi ti fer Zida ale, li ti etabli sa sinp repa-la. Sa ti pou rapel bann ki ti pou al regne avek Zezi ki bann benediksion zot gagne gras-a disan ki Zezi inn verse ek lefe ki zot form parti dan sa lalians-la.​—1 Kor. 10:16, 17, NW. w19.01 22 ¶7-8

Zezi so Papa ti reponn depi lesiel: “Mo finn deza glorifie li e mo pou glorifie li ankor.” Zezi ti boulverse akoz gran responsabilite ki li ti ena pou res fidel anver Zeova. Zezi ti kone ki li ti pou soufer parski ti pou fwet li ek parski li ti pou konn enn lamor bien kriel. (Mat. 26:38) Pou Zezi, seki ti pli inportan se glorifie nom so Papa. Ti akiz Zezi pou blasfem, alor li ti per tansion so lamor gat repitasion Bondie. Parey kouma Zezi, nou osi sirman nou per ki zet dezoner lor nom Zeova. Kitfwa parey kouma Zezi, pe tret nou dan enn fason inzis. Ouswa sa fatig nou parski bann opozan pe fann bann fos rimer lor nou. Kitfwa nou pe pans lor lefe ki sa kapav ena lor nom Zeova. Dan sa bann moman-la, bann parol Zeova rekonfort nou boukou. Zeova pou touletan glorifie so nom.​—Ps. 94:22, 23; Iza. 65:17. w19.03 11-12 ¶14-16

Bann disip Zezi ti gagn sok! Zot ti panse ki Zezi ti pou retabli rwayom Izrael, me Zezi ti dir zot ki biento li ti pou soufer ek mor. Lapot Pier ti koz an premie: “Tou pou pas bien, Segner! Sa pa pou zame ariv twa.” Me Zezi ti reponn: “Pas deryer mwa, Satan! To enn gro ros lor mo sime parski to pa pans kouma Bondie me kouma imin.” (Mat. 16:22, 23; Zist. 1:6) Kan li ti dir sa, Zezi ti montre dan enn fason kler ki fason panse Zeova bien diferan ar fason panse sa lemond ki kontrole par Satan la. (1 Zan 5:19) Pier ti ankouraz Zezi pou ena enn latitid egois ki boukou dimounn dan lemond ena. Me repons Zezi ti montre dan enn fason bien kler ki li ti aksepte fason panse Zeova ek ki li ti rezet fason panse lemond. w18.11 21 ¶1-2

Esey mazine seki Zeova trouve kan plizir milyon dimounn atraver later zwenn ansam pou komemor Repa Nou Segner. Li pa zis trouve ki ena boukou dimounn; me Li remark sak dimounn ki’nn vinn asiste sa levennman-la. Par exanp, Li trouve kisannla toule lane vinn asiste Memoryal avek fidelite. Parmi zot, kitfwa ena bann dimounn ki pe vini malgre ki zot pe fer fas ar bann gran persekision. Ena lezot ki pa vinn souvan nou bann renion, me zot konsider sa kouma enn kitsoz inportan pou asiste Memoryal. Zeova remark osi bann ki pe asiste Memoryal pou premie fwa, kitfwa par kiryozite. Pena dout ki sa fer Zeova kontan kan Li trouv tou sa bann dimounn-la asiste Memoryal. (Lik 22:19, NW) Me selman, seki plis interes Zeova, se pou ki rezon zot inn vini; ki zot mobil. Eski nou anvi ki Zeova ek lorganizasion ki Li pe servi ansegn nou?​—Iza. 30:20; Zan 6:45. w19.01 26 ¶1-3

Zezi pa ti zis aksepte mor pou so bann disip me osi viv enn lavi kot sak zour li ti fer lintere so bann disip pas avan so prop lintere. Par exanp, li ti ansam avek so bann disip mem kan li ti fatige fizikman ouswa fatige moralman. (Lik 22:39-46) Ek li ti plis konsantre li lor seki li ti kapav donn lezot, pa lor seki li ti kapav gagne ar lezot. (Mat. 20:28) Nou form parti dan fami bann vre Kretien, ek nou profit tou lokazion pou invit bann nouvo pou asiste renion ansam avek nou. Selman, nou anvi sirtou ed bann “ki pros avek nou dan lafwa” me ki’nn vinn inaktif. (Gal. 6:10) Nou montre zot ki nou kontan zot kan nou ankouraz zot pou asiste nou bann renion, sirtou Memoryal. Parey kouma Zeova ek Zezi, nou extra kontan kan nou trouv bann inaktif retourn ver Zeova.​—Mat. 18:14. w19.01 29 ¶12, 14; 30 ¶15

Kan li ti etabli Memoryal so lamor, Zezi ti pran seki ti reste pou repa Pak ek li ti fer sa sinp komemorasion-la. Li ti servi zis dipin ek divin Pak ki ti deza la. Zezi ti dir so bann zapot ki sa dipin-la ti reprezant so lekor parfe ek ki divin-la ti reprezant so disan parfe, ki biento li ti pou done an sakrifis pou zot. Kitfwa bann disip pa ti etone ki sa nouvo levennman-la ti sinp. Kifer? Plizir mwa avan, kot so bann kamarad, Lazar, Mart, ek Mari, ki ti bien pros ar li, Zezi ti koumans ansegne. Mart ti la, me li ti okipe pou prepar enn gran repa pou so invite spesial. Kan Zezi ti trouv sa, avek bonte li ti koriz Mart, ek ti ed li pou konpran ki li pa touletan neseser pou fer enn gran repa. (Lik 10:40-42) Plitar, zis de-trwa lertan avan so lamor, Zezi ti aplik so prop konsey. Li ti fer an-sort ki repa Memoryal li sinp. w19.01 20-21 ¶3-4

Zeova ti onor Zezi dan enn fason ki li pa ti atann. Kan Zeova ti resisit Zezi, li ti “donn li enn pli gran pozision” dan lesiel. Li ti osi donn Zezi enn lavi imortel, enn kitsoz ki zame personn pa ti gagne avan! (Fil. 2:9, NW; 1 Tim. 6:16) Eski se pa enn fason extraordiner ki Zeova inn rekonpans Zezi pou so servis ki li’nn fer avek fidelite? Ki pou ed nou pou rod faver Zeova olie ki rod faver lemond? Nou bizin rapel ki Zeova touletan donn loner so bann serviter fidel ek souvan Li rekonpans zot dan bann fason ki zot pa atann. Nou kapav sey mazine kouma Zeova pou beni nou dan lavenir! Me asterla, amezir ki nou pe andir bann problem ek bann difikilte dan sa move lemond-la, nou bizin rapel ki sa lemond-la pe al fini. (1 Zan 2:17) Me dan enn lot kote, Zeova, nou Papa ki ena lamour, zame pa pou bliye travay ek lamour ki nou finn montre pou so nom, parski Li “pa inzis.”​—Ebre 6:10, NW. w18.07 8 ¶17-18

Zezi ti koz boukou lor linite kan li ti pran so dernie repa avek so bann zapot. Kan li ti pe priye avek zot, li ti dir ki li anvi ki so bann disip vinn enn sel, setadir ki ena linite ant zot, parey kouma ena linite ant li ek so Papa. Si ti ena linite parmi bann disip Zezi, sa ti pou montre lezot ki se Zeova ki’nn avoy Zezi lor later. Bann dimounn ti pou idantifie bann vre disip Zezi gras-a lamour ki ti pou ena ant zot, ek sa lamour-la ti pou ede pou ki ena plis linite parmi zot. (Zan 13:34, 35) Nou kapav konpran kifer Zezi ti koz boukou lor linite lanwit avan li mor. Li ti’nn remarke ki pa ti ena enn vre linite parmi so bann disip. Par exanp sa swar-la, so bann zapot ti diskite pou kone “kisannla pli gran parmi zot,” parey kouma zot ti’nn fer avan. (Lik 22:24-27; Mark 9:33, 34) Enn lot fwa, Zak ek Zan ti demann Zezi pou donn zot plas pli inportan dan Rwayom ki dan lesiel, setadir zis akote li.​—Mark 10:35-40. w18.06 9 ¶1-2

Zeova anvi ki bann konzwin devlop enn lamour telman for ant zot ki sa li dire pou touletan. (Mat. 19:3-6, NW) An realite, kan enn dimounn komet ladilter li montre ki li vremem pena lamour. Nou konpran kifer dan bann Dis Komannman, setiem-la ti kondann ladilter. (Det. 5:18) Se enn pese “kont Bondie” ek enn kitsoz kriel kont so konzwin. (Zen. 39:7-9) Enn dimounn ki’nn viktim ladilter kapav soufer akoz linfidelite so konzwin pandan plizir dizenn lane. Zeova bien interese osi ar bien-net bann zanfan. Zeova pa ti zis demann bann paran pou pran swin zot zanfan lor plan fizik me osi pou ed zot zanfan ena enn bon relasion avek Li. Bann paran ti bizin servi sak lokazion pou ed zot zanfan kontan Lalwa Zeova ek aprann kontan Li. (Det. 6:6-9; 7:13) Bann paran pa ti bizin konsider zot zanfan kouma bann sinp lobze ki zot kapav neglize ouswa maltrete, me kouma enn leritaz, enn kado ki Zeova ti donn zot ek ki zot ti bizin akord enn gran valer.​—Ps. 127:3. w19.02 21 ¶5, 7

Zob ti gard so lintegrite parski li ti fixe so latansion lor rekonpans ki Bondie ti pou donn li. Li ti sir ki pou Zeova so lintegrite ti ena valer. Malgre so bann leprev, Zob ti ena konfians ki alafin Bondie ti pou rekonpans li. Pena dout ki sa konfians-la finn ed li pou gard so lintegrite. Zeova ti telman kontan ki Zob ti gard so lintegrite ki Li ti rekonpans li alor ki li ti ankor enn zom inparfe! (Zob 42:12-17; Zak 5:11) Ek ena bann pli gran rekonpans ki pe atann Zob. Nou Bondie pa’nn sanze. (Mal. 3:6) Si nou rapel ki nou lintegrite ena valer pou Li, nou kapav gard nou lespwar pou sa zoli lavenir-la bien vivan dan nou lespri. (1 Tes. 5:8, 9) Parfwa, to kapav santi ki se zis to tousel ki pe gard to lintegrite, me zame to pou tousel. To pou retrouv twa parmi bann milyon dimounn ki pe gard zot lintegrite avek fidelite dan lemond antie. To pou osi trouv twa parmi bann zom ek fam fidel dan lepase ki ti gard zot lintegrite, mem devan lamor.​—Ebre 11:36-38; 12:1. w19.02 7 ¶15-16

Apre Memoryal, nou bizin demann noumem sa bann kestion-la: ‘Kouma mo kapav imit ankor plis lamour ki Zezi ti montre? Eski mo pans plis seki mo bann konpagnon Kretien bizin olie ki seki mwa mo bizin? Eski mo atann tro ar mo bann frer ek ser, ouswa eski mo rekonet ki zot ena bann limit?’ Anou touletan imit Zezi ek “met [nou] dan plas [nou] kamarad.” Dan enn tigit letan ankor nou pou aret komemor Memoryal lamor Kris. Kan Zezi pou “vini” pandan gran detres, li pou rasanble dan lesiel “bann ki li finn swazir” ek ki ankor lor later, ek lerla pou nepli fer Memoryal. (1 Kor. 11:26, NW; Mat. 24:31) Mem kan pou nepli komemor Memoryal, nou kapav sir ki pep Zeova pou kontign rapel sa levennman sinp la. Sa pou fer zot rapel pli gran lexanp limilite, kouraz, ek lamour ki finn existe. w19.01 25 ¶17-19

Anou gete kouma kan nou konpran linportans pou pran swin nou lasante fizik, sa ed nou pou konpran linportans pou pran swin nou leker sinbolik. Premierman, pou ki nou res an bonn sante, nou bizin manz bann manze ki bon pou nou lasante ek fer lexersis regilierman. Li parey, pou ki nou ena enn bon relasion avek Zeova, regilierman nou bizin lir Labib ek bann piblikasion ki baze lor Labib ek montre ki nou ena lafwa dan Zeova. Nou montre ki nou ena lafwa dan Zeova kan nou aplik seki nou aprann ek kan nou koz lor nou lafwa. (Rom. 10:8-10; Zak 2:26) Deziemman, kan nou get nou, kitfwa nou paret an bonn sante alor ki an realite nou ena enn maladi. Li parey, kan nou zis get nou bann labitid spiritiel, nou kapav panse ki nou ena enn lafwa for, me kitfwa ena bann move dezir ki pe grandi dan nou leker. (1 Kor. 10:12; Zak 1:14, 15) Nou bizin rapel ki Satan ti pou kontan kontaminn nou avek so fason panse. w19.01 15 ¶4-5

Nou kapav demann noumem: ‘Eski mo pe fer parey? Eski mo pe fer seki sa bon Samariten-la ti fer?’ (Lik 10:30-35) ‘Kan lezot soufer, eski mo kapav fer kitsoz pou ed zot? Par exanp, eski mo kapav ed bann aze dan kongregasion, bann vev, ouswa bann zanfan ki zot paran pa pe servi Zeova? Eski mo kapav “ankouraz bann ki deprime” par bann parol ki rekonfort zot?’ (1 Tes. 5:14, NW; Zak 1:27) Kan nou montre mizerikord anver lezot, nou pe done, ek Zezi ti dir ki kan nou done sa rann nou ere. Enn lot rezon se ki nou kone ki nou pe fer Zeova plezir. (Zist. 20:35, NW; Ebre 13:16) Lerwa David ti dir konsernan enn kikenn ki montre mizerikord: “Zeova pou protez li ek pou gard li vivan. Li pou ere lor later.” (Ps. 41:1, 2, NW) Si nou montre mizerikord ek konpasion anver lezot, nou pou osi gagn mizerikord Zeova ek nou kapav ere pou touletan.​—Zak 2:13. w18.09 18 ¶11-12

Enn ser fidel ki apel Yoshiko ti gagn enn move nouvel. So dokter ti dir li ki li ena zis de-trwa mwa pou viv. Kouma li ti reazir? Yoshiko ti rapel enn so bann verse Labib prefere, setadir nou text pou azordi. Lerla avek kalm li ti dir so dokter ki li pa per, parski Zeova ti pe trap so lame. Mesaz rekonfortan ki ena dan sa verse-la ti ed nou ser pou met tou so konfians an Zeova. Sa mem verse-la kapav ed nou pou gard nou kalm kan nou ena pou fer fas ar bann gran difikilte. O-koumansman, Zeova ti demann Izai pou ekrir sa bann parol-la pou rekonfort bann Zwif ki plitar ti pou al an exil dan Babilonn. Selman, Zeova finn prezerv sa mesaz-la pa zis pou bann Zwif ki ti al an exil me pou tou so bann serviter ki ti pou vini apre. (Iza. 40:8; Rom. 15:4) Zordi, nou pe viv dan “bann moman difisil,” ek plis ki avan, nou bizin bann lankourazman ki ena dan liv Izai.​—2 Tim. 3:1. w19.01 2 ¶1-2

Sertin Kretien rann zot kont ki si zot separe dan enn sitiasion koumsa, zot pou ankor enn koup marye ek zot pou gagn bann difikilte. Lapot Pol ti donn sa rezon-la pou bann koup res ansam: “Enn mari non-krwayan li sanktifie par so fam e enn fam non-krwayan li sanktifie par so mari. Sinon zot zanfan ti pou inpir, tandi ki la, zot pre ar Bondie.” (1 Kor. 7:14) Boukou Kretien ti desid pou res avek zot konzwin ki pa servi Zeova mem si zot sitiasion ti bien difisil. Zot ti bien kontan ki zot inn fer sa sakrifis-la kan plitar zot konzwin inn vinn enn Temwin Zeova. (1 Kor. 7:16; 1 Pier 3:1, 2) Zordi, dan lemond antie, dan nou bann kongregasion, ena boukou maryaz ki pe reisi. Kitfwa to trouv bann koup ere dan to kongregasion, kot bann mari fidel kontan zot madam ek bann madam kontan ek respekte zot mari. Zot tou zot montre ki bann Kretien kapav onor zot maryaz.​—Ebre 13:4. w18.12 14 ¶18-19

Mo “Edenn” vedir “Plezir,” ek sa zardin-la ti vremem enn landrwa agreab. Li ti extra zoli, ti ena boukou manze laba, ek ti ena lape ant bann dimounn ek bann zanimo. (Zen. 1:29-31) Mo Ebre ki’nn servi pou tradir “zardin,” an Grek se paradéïsos. Dapre enn lansiklopedi (Cyclopaedia, M’Clintock ek Strong), enn Grek ki tann mo paradéïsos, pou pans enn zardin ki zoli, ki bien gran ek ki proteze kont ninport ki danze, kot ena bann pie inpresionan ki raport tou sort kalite frwi, bann ti larivier bien kler kot ena bann lerb sak kote ek kot bann serf ek bann mouton kapav manze. (Konpar avek Zenez 2:15, 16.) Se dan enn zardin koumsa, enn paradi, ki Zeova ti met Adan ek Ev. Me parski zot inn dezobeir Zeova, zot ek zot bann zanfan inn perdi privilez pou viv dan sa Paradi-la. (Zen. 3:23, 24) Mem si apre ti nepli ena okenn imin ki ti viv dan sa Paradi-la, li paret ki li ti kontign existe ziska Deliz dan lepok Noe. w18.12 3-4 ¶3-5

Bann paran esey ansegn zot zanfan bann bon prinsip. Si bann zanfan swazir pou viv dapre bann bon prinsip ki zot paran finn ansegn zot, sa pou ed zot pran bann bon desizion ek evit bann problem, traka, ek regre. Parey kouma enn bon paran, Zeova anvi ki so bann zanfan profit pli bon lavi ki ena. (Iza. 48:18) Alor, Li ansegn nou kouma nou bizin tret lezot, ek osi bann prinsip debaz pou ki nou ena enn bon kondwit. Li invit nou pou aprann trouv bann kitsoz kouma Li, Li trouve, ek pou viv an-akor avek so bann prinsip. Sa pa priv nou nou liberte. Okontrer, sa fer nou vinn pli saz ek ed nou pran bann bon desizion. (Ps. 92:5; Prov. 2:1-5; Iza. 55:9) Nou pou touzour ena nou bann preferans personel, me nou pou fer bann swa ki pou rann nou ere. (Ps. 1:2, 3) Kan nou ena fason panse Zeova, nou gagn boukou bienfe! w18.11 23 ¶7-8

Pou nou kontign mars dan laverite, fode pa nou les nou inflianse par bann dimounn ki pa servi Zeova. Kan nou ti konn laverite, nou relasion avek nou bann kamarad ek bann fami ki pa Temwin ti sanze. Sertin kitfwa ti respekte nou nouvo krwayans, me lezot ti opoze ar sa. Bann manb nou fami, bann koleg travay, ek bann kamarad lekol kapav ankouraz nou pou vinn dan zot bann fet ki pa fer Zeova plezir. Kan lezot met presion lor nou pou partisip dan bann fet ouswa koutim ki Zeova pa kontan, kouma nou kapav tini ferm? Li bizin kler dan nou lespri kifer Zeova pa kontan sa bann fet-la. Nou kapav fer bann resers dan bann piblikasion ek rod lorizinn sa bann fet-la. Kan nou reflesi lor bann rezon Biblik kifer nou pa fer sa bann fet-la, sa konvink nou ki nou pe mars dan fason ki “fer Bondie plezir.” (Efe. 5:10) Si nou fer Zeova ek so Parol konfians, nou pa pou per seki lezot panse.​—Prov. 29:25. w18.11 12 ¶10; 13 ¶12

Kan nou sitiasion sanze enn sel kout, li kapav arive ki nou telman trakase ki nou pans zis nou bann problem. Sa ti kapav ariv Zozef. Me Zozef ti fer tou seki li ti kapav dan so sitiasion, ek lerla li ti donn Zeova lokazion pou beni li. Parey kouma li ti travay bien dir pou Potifar, li ti donn so maximum dan tou travay ki sef prizon ti donn li pou fer. (Zen. 39:21) Parey kouma Zozef, nou kapav trouv nou dan bann sitiasion lor ki nou pena okenn kontrol. Me kan nou ena pasians ek nou fer nou best, Zeova pou beni nou. (Ps. 37:5) Mem kan nou trakase ek nou pa kone ki pou fer, nou pa pou santi nou “dezespere.” (2 Kor. 4:8) Zeova pou avek nou, sirtou si nou res konsantre lor nou minister. w18.10 24 ¶11; 25 ¶13

Ki to resanti kan enn kikenn ki to kone ek ki to respekte bliye to nom, ouswa mem pli pir, li pa rekonet twa? Sa kapav bien dekouraz twa. Kifer? Parski nou tou nou ena sa dezir ki lezot aksepte nou. Me nou pa anvi ki zot zis rekonet nou. Nou anvi ki zot kone ki kalite dimounn nou ete ek seki nou finn akonpli. (Nonb 11:16, not; Zob 31:6) Me si nou pa fer atansion, sa dezir ki nou ena ki lezot apresie nou la kapav deforme. Lemond Satan kapav fer nou anvi vinn seleb ek inportan. Kan sa arive, nou pa donn Zeova, nou Papa ki dan lesiel, loner ek ladorasion ki Li merite.​—Rev. 4:11. w18.07 3 ¶1-2

Alor, nou pa etone ki Satan ek so bann demon inflians bann ki ena pouvwar dan sa lemond-la pou vinn bann “manter.” (1 Tim. 4:1, 2) Li pli move ankor kan bann sef relizie koz manti. Kifer? Parski si enn dimounn krwar zot bann fos lansegnman ek fer bann kitsoz ki Bondie pa kontan, sa dimounn-la kapav perdi posibilite pou viv pou touletan. (Oze 4:9) Zezi ti kone ki bann sef relizie dan so lepok ti pe anbet bann dimounn. Avek kouraz, li ti dir zot: “Maler lor zot, bann skrib ek Farizien! Ipokrit! Parski zot fer letour lamer ek later pou konverti enn sel dimounn, ek kan li’nn konverti, zot fer li vinn enn kikenn ki merite al dan Lazeenn,” setadir detrir pou touletan. (Mat. 23:15, NW) Zezi ti dir ki sa bann fos sef relizie la ti parey kouma zot papa Lediab, ki “enn kriminel.”​—Zan 8:44, NW. w18.10 4 ¶5-6

Ki Zezi ti pe rod dir? Li ti azoute: “Zot bizin dan lazwa e santi zot ere parski zot ena enn rekonpans dan lesiel; koumsamem zot ti persekit bann ansien profet.” (Mat. 5:12) Letan bann zapot ti fek gagn bate ek ti donn zot lord pou aret prese, zot “ti kit lasal konsey leker kontan.” Zot pa ti kontan ki zot inn gagn bate. Me zot ti kontan “parski ti konsider zot dign pou gagn maltrete akoz nom Zezi.” (Zist. 5:41) Azordi, pep Zeova osi andire avek lazwa kan zot gagn persekision akoz nom Zezi. (Zak 1:2-4) Parey kouma bann zapot, nou pa kontan kan nou soufer ouswa kan nou gagn persekision. Me si nou res fidel ar Zeova, Li pou donn nou kouraz ki nou bizin pou andire. Kan nou fer Zeova, “Bondie ere,” plezir, nou kapav ere mem si nou gagn persekision ouswa si nou gagn lopozision dan lafami.​—1 Tim. 1:11, NW. w18.09 20 ¶18-20

Akoz nou pe viv dan “bann moman difisil,” boukou dimounn pe telman soufer ki zot nepli anvi viv. Plis ki 800,000 dimounn komet swisid sak lane. Sa reprezant enn dimounn toule 40 segonn. Malerezman, mem sertin nou bann frer finn ena sa bann santiman-la ek finn swisid zot. Azordi, boukou nou bann frer ek ser pe konn bann sitiasion stresan ek zot bizin nou lamour. Bann dimounn boufonn ek persekit sertin parmi zot. Ena ki dan zot travay, bizin kontign andire parski zot bann koleg met presion ouswa fer palab lor zot. Ouswa ena sertin ki extra fatige parski zot bizin travay ziska bien tar ouswa zot ena enn travay ki bien stresan. Ena sertin ki ena bann problem familial bien grav. Kitfwa zot inn marye avek enn kikenn ki pa servi Zeova ek ki touletan pe kritik zot. Akoz sa bann sitiasion-la ek lezot presion ankor, boukou santi zot fatige moralman ek fizikman. w18.09 9 ¶3, 5

Bann paran Kretien kapav travay ansam avek Zeova kan zot ed zot zanfan pou fixe bann lobzektif dan servis Zeova. Boukou paran finn fer sa. Ek zot finn gagn bann bon rezilta, parski plitar zot bann garson ouswa tifi finn swazir pou servi Zeova aplintan, parfwa bien lwin ar zot fami. Sertin pe servi kouma misioner, lezot kouma pionie kot bizin plis proklamater, ek ena lezot ki pe servi dan Betel. Kan bann zanfan bien lwin ar zot paran, li vre ki bann paran-la pa kapav pas boukou letan avek zot kouma zot ti pou kontan. Me zot montre ki zot pa egois ek ankouraz zot zanfan pou kontign servi Zeova ninport kot sa zot ete. Kifer? Parski zot bien kontan ki zot bann zanfan pe met Zeova an premie dan zot lavi. Boukou sa bann paran-la ena mem santiman ki Ann, ki ti dir ki li’nn “pret” Zeova so garson, Samiel. Pou sa bann paran-la, se enn gran loner pou travay ansam avek Zeova dan sa fason-la.​—1 Sam. 1:28. w18.08 22 ¶4

Zezi pa ti dir ki li pou inposib. Li ti dir osi: “Bienere zot ki bann pov, Rwayom Bondie pou zot.” (Lik 6:20) Me sa pa vedir ki tou bann dimounn pov ti pou ekout Zezi ek ti pou gagn bann benediksion spesial. Ti ena boukou dimounn pov ki pa ti swiv Zezi. An realite, nou pa kapav ziz relasion ki enn dimounn ena avek Zeova par bann kitsoz materyel ki li ena. Parmi pep Zeova, ena bann frer ek ser ki ris ek ena lezot ki pov. Me zot tou zot kontan Zeova ek zot servi Li avek tou zot leker. Bann Lekritir dir bann dimounn ris “pa met zot lesperans dan bann fos rises. Met zot lesperans plito dan Bondie.” (1 Tim. 6:17-19) Parol Bondie averti tou bann serviter Zeova, ki zot ris ouswa pov, ki li danzere pou kontan kas. (1 Tim. 6:9, 10) Kan nou ena mem fason panse ki Zeova lor nou bann frer ek ser, nou pa pou ziz zot dapre seki zot ena ouswa seki zot pena. w18.08 12-13 ¶11-12

Nou anvi montre Zeova ki kantite nou rekonesan ki Li’nn swazir nou pou vinn so pep. Nou kone ki kan nou finn vwe nou lavi ar Li, se meyer desizion ki nou’nn pran. Alor, nou bien determine pou pa fer bann kitsoz ki Zeova deteste. Ek nou kontan ek respekte nou bann frer ek ser parski zot osi zot pou Zeova. (Rom. 12:10) Labib promet nou ki Zeova “zame pou abandonn so pep.” (Ps. 94:14) Se enn garanti ki ninport ki arive, Zeova pou avek nou. Mem si nou mor, Li pa pou bliye nou. (Rom. 8:38,39) Alor ki nou viv ou ki nou mor, nou apartenir ar Lesegner [“Zeova,” NW].” (Rom. 14:8) Nou pe atann sa moman kot Zeova pou re-donn lavi tou so bann kamarad fidel ki finn mor. (Mat. 22:32) Ek mem depi asterla nou pe kapav profit bann zoli kado ki nou Papa donn nou. Parey kouma Labib dir: “Ere sa nasion ki so Bondie li Zeova, pep ki Li’nn swazir kouma so prop dibien.”​—Ps. 33:12, NW. w18.07 26 ¶18-19

Kan sa konsern bann kitsoz personel, kouma ledikasion, travay, ouswa enn karyer, sertin kapav panse ki zot lib pou swazir seki zot anvi, tanki sa pa fatig zot konsians. Kitfwa zot pans sa bann parol Pol la: “Kifer mo liberte bizin depann lor konsians enn lot?” (1 Kor. 10:29) Mem si nou lib pou fer nou prop swa, nou bizin rapel ki nou liberte ena bann limit ek ki tou nou bann desizion ena bann konsekans. Akoz sa Pol ti dir bann parol nou text azordi. Alor, mem si nou lib pou fer bann swa konsernan bann kitsoz personel, se pa seki nou anvi ki pli inportan. w18.04 12 ¶10

Enn Kretien azordi kapav dir ki li pe ador Zeova, me an realite li pe fer bann kitsoz ki Zeova deteste. (Zid 11) Li kapav aktif dan so minister ek regilie dan bann renion. Me anmemtan, kitfwa li pe les bann panse imoral, lanvi pou gagn plis, ouswa mem bann santiman laenn kontrol so fason panse. (1 Zan 2:15-17; 3:15) Sa bann kalite panse-la kapav amenn nou pou komet bann pese. Lezot dimounn kitfwa pa kone ki nou pe panse ouswa ki nou pe fer, me Zeova kone. Li kone kan nou pa dan so kote dan enn fason konple. (Zer. 17:9, 10) Mem kan nou fer bann erer, Zeova pa abandonn nou deswit. Si nou pe pran enn move sime, Zeova donn nou sa linvitasion-la: “Retourne.” Zeova konpran ki nou pe bizin lit kont nou bann febles. Me Li anvi ki nou res ferm ek rezet seki move. (Iza. 55:7) Si nou fer sa, Li promet ki Li pou ed nou ek Li pou donn nou lafors ki bizin pou vink nou bann move dezir.​—Zen. 4:7. w18.07 16 ¶5-6