‘Esklav Fidel’ Reysi Pas Leprev!

“Letan fixe finn arive pu ki zizman kumanse avek lakaz Bondye.” —1 Pierre 4:17.

 1. Ki Jésus finn truve kan li’nn vinn fer linspeksyon pu gete ki sa ‘esklav-la’ pe fer?

LA Pentecôte lane 33 N.L., Jésus ti swazir enn “esklav” ki pu donn so bann “domestik” manze dan ler ki bizin. Jésus ti vinn le Rwa an 1914, ek li pa’nn tarde pu fer enn linspeksyon pu gete seki sa ‘esklav-la’ pe fer. Li finn truve ki la mazorite manb ki form sa ‘esklav-la’ finn montre zot “fidel ek avize.” Donk, li finn met zot ansarz “tu so bann dibyin.” (Matthieu 24:45-47) Me, ti ena usi enn lot esklav, enn move esklav ki ti ni fidel ni avize.

“Move Esklav”

2, 3. Kot sa, “sa move esklav-la” sorti, ek kuma eski li’nn devlope?

² Jésus ti koz lor sa move esklav-la zis apre ki li ti koz lor “esklav fidel ek avize.” Li ti dir: “Me si zame sa move esklav-la dir dan so leker: ‘Mo met pe tarde,’ ek ki li kumans bat so bann kamarad, ek ki li manze bwar avek bann sular, [so] Met pu vini enn zur ki li pa atann ek dan enn ler ki li pa kone. Li pu pini li severman ek li pu klas li parmi bann ipokrit. Lerla ki pu [tann] zot plore ek grins ledan.” (Matthieu 24:48-51) Expresyon “sa move esklav-la” atir nu latansyon lor bann parol ki Jésus ti dir lor esklav fidel ek avize. Seki vedir ki avan, sa “move esklav-la” ti form parti dan esklav fidel ek avize.a Kuma sa?

³ Avan 1914, buku manb esklav fidel ti pe atann pu al zwenn l’Époux, Jésus Christ dan lesyel an 1914. Me zot lespwar pa finn realize. Akoz sa, ek akoz lezot evennman ki’nn arive ankor, buku finn gayn desepsyon ek enn-de finn mem manifeste zot mekontantman. Sertin parmi zot finn kumans ‘bat’ zot bann frer an parol, ek zot finn asosye zot ar “bann sular,” setadir bann grup relizye la Kretyinte.—Isaïe 28:1-3; 32:6.

 4. Ki Jésus finn fer avek “sa move esklav-la” ek avek tu bann ki ena mem latitid ki li?

⁴ Donk, “move esklav” reprezant sa grup dimunn ki’nn abandonn zot lafwa Kretyin-la. Jésus finn pini zot severman. Kuma? Li finn rezet zot, ek zot finn perdi lespwar ki zot ti ena pu al viv dan lesyel. Me Jésus pa finn detrir zot tutswit. Dabor, zot ti pu bizin siport enn peryod kot zot ti pu plore ek grins ledan “dan nwarte andeor” kongregasyon Kretyin. (Matthieu 8:12) Depi sa lepok-la, lezot Kretyin oints finn ena sa mem move latitid-la. Zot usi zot finn vinn manb sa “move esklav-la.” Ek sertin manb lezot brebi usi finn fer parey. (Jean 10:16) Tu sa bann lennmi Christ-la pe konn mem “nwarte spirityel andeor” kongregasyon Kretyin.

 5. Kontrerman ar “sa move esklav-la,” kuma eski esklav fidel ek avize finn reazir?

⁵ Esklav fidel ek avize finn pas par mem leprev ki sa ‘move esklav-la.’ Selman zot, zot pa ti amer, zot ti aksepte koreksyon. (2 Corinthiens 13:11) Zot lamur pu Jéhovah ek pu zot bann frer ti vinn pli for. Rezilta: Ebyin zordi, zot “enn kolonn ek enn sipor pu la verite” dan sa bann “dernye zur” byin difisil-la.—1 Timote 3:15; 2 Timote 3:1.

Bann Vyerz Ki Avize ek Bann Vyerz Ki Bet

 6. (a) Kuma eski Jésus finn montre ki so esklav fidel li avize? (b) Avan 1914, ki lespwar buku Kretyin oints ti ena?

⁶ Apre ki li ti’nn fini koz lor “sa move esklav-la,” Jésus ti donn de parabol pu montre ki sertin Kretyin oints ti pu montre zot fidel ek avize, kontrerman ar sertin.b Pu montre ki vedir “avize,” Jésus ti dir: “Rwayom dan lesyel pu vinn parey kuma dis vyerz ki finn pran zot lalanp ek zot inn al zwenn l’Époux (le marye). Sink parmi zot ti bet, alor ki lezot sink-la ti avize. Dayer, bann vyerz bet-la finn pran zot lalanp, me zot finn bliye pran delwil avek zot, alor ki bann vyerz avize finn pran zot lalanp ek zot finn pran delwil usi dan zot resipyan.” (Matthieu 25:1-4) Sa dis vyerz-la fer nu rapel bann Kretyin oints avan 1914. Dapre zot bann kalkil, zot ti kone ki l’Époux, setadir Jésus Christ, ti pre pu aparet. Donk, zot ti “al zwenn” li, setadir zot ti pres avek zel ki “letan fixe bann nasyon” ti pu fini an 1914.—Luc 21:24.

 7. Kan ek kifer eski bann Kretyin ‘ti dormi’ lor plan spirityel?

⁷ Zot ti ena rezon. Letan fixe bann nasyon vremem ti fini an 1914, ek Rwayom Bondye dirize par Christ Jésus, ti’nn kumans so fonksyon. Me sa ti arive dan lesyel. Lor later, limanite ti kumans konn bann “maler,” parey kuma la Bib ti anonse. (Révélation 12:10, 12) Tutswit apre, enn peryod leprev ti kumanse. Bann Kretyin oints pa ti pe byin konpran seki ti pe arive; zot ti panse ki “l’Époux ti pe tarde.” Zot ti dan konfizyon ek zot ti pe bizin fer fas ar lopozisyon. Akoz sa, zot ti ralanti zot laktivite preske partu dan lemond, ek predikasyon dan enn fason organize, ti preske arete. Parey kuma bann vyerz dan parabol Jésus, zot ‘ti pe kas ku ek dormi’ lor plan spirityel. Se seki bann swadizan Kretyin infidel usi ti fer, apre lamor bann zapot Jésus.—Matthieu 25:5; Révélation 11:7, 8; 12:17.

 8. Kifer bann Kretyin oints ti tann kriye: “Ala l’Époux!” ek ler ti’nn arive pu zot fer ki kitsoz?

⁸ Lerla, an 1919, enn kitsoz ki zot pa ti atann, finn arive. Nu lir: “Omilye la nwit, zot ti tann kriye: ‘Ala l’Époux! Sorti, vinn zwenn li.’ Lerla, tu bann vyerz leve, zot kumans prepar zot lalanp.” (Matthieu 25:6, 7) Alor ki zot ti’nn perdi tu lespwar, se lerla mem ki zot tann enn kikenn dir zot leve, buze! An 1918, Jésus, “mesaze lalyans,” ti vinn dan tanp spirityel Jéhovah pu inspekte ek netway kongregasyon Bondye. (Malaki 3:1) Ti’nn ariv ler pu bann Kretyin oints sorti ek al zwenn li dan bann lakur sa tanp-la, ki lor later. Wi, ti’nn ariv ler pu zot “fann lalimyer.”—Isaïe 60:1; Philippiens 2:14, 15.

 9, 10. An 1919, kifer eski sertin Kretyin ti “avize” ek lezot “bet”?

⁹ Me atann! Dan sa parabol la, sertin vyerz ti ena enn problem. Jésus ti kontiyne dir: “Bann vyerz bet-la dir bann vyerz avize, ‘Donn nu inpe delwil ar zot parski nu bann lalanp pre pu teyn.’ ” (Matthieu 25:8) San delwil, bann lalanp-la pa pu donn lalimyer. Sa delwil-la fer nu pans la Bib, Parol Bondye, ek so lespri sin ki donn bann vre adorater la fors pu fann lalimyer. (Psaume 119:130; Daniel 5:14) Avan 1919, bann Kretyin oints avize ti fer bann gran zefor pu konpran seki Bondye anvi zot fer, mem si tanporerman zot ti feb lor plan spirityel. Me, kan zot finn konpran ki zot ti bizin fann lalimyer, zot ti pare.—2 Timothée 4:2; Hébreux 10:24, 25.

¹⁰ Me, sertin Kretyin oints pa ti prepare pu fer bann sakrifis, uswa pu depans zotmem, malgre ki zot ti byin anvi res avek l’Époux. Donk, kan ler ti’nn arive pu met lavi dan travay predikasyon, zot pa ti pare. (Matthieu 24:14) Zot ti rod mem ralanti bann ki ti zele; dan enn fason sinbolik, kumadir zot ti pe demann bannla inpe delwil. Me kuma eski bann vyerz avize dan parabol Jésus ti reazir? Zot ti dir: “Kitfwa pa pu ena ase pu nu ek pu zot. Al plito kot bann ki vann [delwil], ek aste [inpe] pu zot.” (Matthieu 25:9) Pareyman, an 1919, bann fidel Kretyin oints ti refiz fer ninport ki kitsoz ki ti pu anpes zot fer zot lalimyer briye kuma bizin. Zot ti reysi pas sa tes-la.

11. Ki finn ariv bann vyerz bet?

¹¹ Jésus terminn so parabol: “Alor ki [bann vyerz bet-la] pe al aste delwil, l’Époux finn vini. Bann vyerz ki ti pre, finn rant avek li dan resepsyon maryaz, ek laport finn ferme. Plitar, lezot vyerz-la vini zot usi ek zot dir: ‘Misye, misye, uver laport pu nu!’ Me, l’Époux reponn: ‘An verite mo dir zot, mo pa konn zot.’ ” (Matthieu 25:10-12) Wi, sertin pa ti pare pu akeyir l’Époux kan li ti vini. Donk, zot inn fel sa tes-la, ek zot finn perdi privilez pu asiste resepsyon maryaz dan lesyel. Byin tris pu zot!

Parabol lor Bann Talan

12. (a) Ki legzanp Jésus ti pran pu explik seki vedir “fidel”? (b) Dan sa parabol-la, kisannla sa misye ki ‘pe al an vwayaz-la’?

¹² Apre ki Jésus finn explike ki vedir “avize,” asterla, li donn enn dezyem legzanp pu montre seki vedir “fidel.” Li dir: “Li parey kuma enn zom ki pe prepar li pu fer enn vwayaz dan enn lot peyi. Li apel so bann esklav ek li konfye zot so dibyin. Li donn enn esklav sink talan, enn lot de talan, ek li donn enn talan enn lot esklav ankor. Li’nn donn sakenn dapre so kapasite, ek lerla li al an vwayaz.” (Matthieu 25:14, 15) Dan sa parabol-la, propriyeter-la reprezant Jésus limem. Li, ‘ti al an vwayaz’ kan li ti mont dan lesyel an lan 33 N.L. Me avan so depar, Jésus ti konfye so bann fidel disip “so dibyin.” Kuma?

13. Kuma eski Jésus ti prepar enn gran laktivite predikasyon, ek kuma li ti donn “so bann esklav” lotorizasyon pu ogmant so dibyin?

¹³ Pandan so minister lor later, Jésus ti kumans enn gran laktivite predikasyon, kan li ti pres la bonn nuvel lor Rwayom Bondye partu dan Israël. (Matthieu 9:35-38) Avan ki li “al dan enn lot peyi,” li ti konfye so bann fidel disip sa gran travay-la, kan li ti dir zot: “Ale, ek fer bann disip dan tu bann nasyon, batiz zot au nom du Père, du Fils ek de l’esprit saint, anseyn zot pu swiv tu bann kitsoz ki mo finn dir zot fer.” (Matthieu 28:18-20) Par sa bann parol-la, Jésus finn donn so “bann esklav” lotorizasyon pu ogmant so dibyin, ‘sakenn dapre so kapasite,’ ziska ki li returne.

14. Kifer pa ti kapav atann ki tu Kretyin dan premye syek ogmant dibyin Jésus parey?

¹⁴ Expresyon ‘sakenn dapre so kapasite’ montre nu ki tu bann Kretyin dan premye syek pa ti ena mem sityasyon uswa posibilite. Sertin, kuma Paul ek Timothée par egzanp, ti kapav donn tu zot letan dan laktivite predikasyon ek lanseynman. Parkont, lezot pa ti lib pu fer parey. Par egzanp, sertin Kretyin ti esklav, lezot ti malad, vye uswa zot ti ena bann responsabilite familyal. Byinsir, pa tu bann disip ki ti kapav gayn sertin privilez dan kongregasyon. Bann ser oints ek sertin frer oints pa ti anseyne dan kongregasyon. (1 Corinthiens 14:34; 1 Timothée 3:1; Jacques 3:1) Me, malgre zot sityasyon personel, tu bann disip oints, zom ek fam tulede, ti ena responsabilite pu ogmant dibyin Christ, setadir profit tu lokazyon ek sityasyon pu partisip dan minister Kretyin. Zordi usi, bann disip Jésus Christ fer parey.

Lepok Inspeksyon Kumanse!

15, 16. (a) Kan eski ti’nn ariv ler pu regle bann kont? (b) Ki bann nuvo lokazyon pu ‘ogmant dibyin’ Jésus, bann fidel serviter ti’nn gayne?

¹⁵ Sa parabol-la kontiyne: “Apre enn bon but letan, met-la finn vini pu regle so bann kont avek [so bann esklav].” (Matthieu 25:19) Se an 1914, plizir santenn lane apre lane 33 N.L., ki Jésus Christ ti kumans so prezans invizib an tan ki le Rwa. Trwa zan edmi plitar, an 1918, li ti vinn dan so tanp spirityel ek li ti realiz bann parol ki Pierre ti ekrir: “Letan fixe finn arive pu ki zizman kumanse avek lakaz Bondye.” (1 Pierre 4:17; Malaki 3:1) Wi, ti’nn ariv ler pu regle bann kont.

¹⁶ Bann esklav-la, ki reprezant bann frer oints Jésus, ki zot finn fer avek “bann talan” ki le Rwa ti konfye zot? Depi lane 33 N.L. ziska 1914, buku finn travay dir pu ‘ogmant dibyin’ Jésus. (Matthieu 25:16) Mem pandan premye lager mondyal, zot ti montre ki zot ena enn gran dezir pu servi zot Met. Donk, li ti apropriye asterla ki sa bann fidel esklav-la gayn bann nuvo posibilite pu ‘ogmant dibyin’ Christ. Avredir, lepok la fin sa lemond-la ti’nn kumanse. La bonn nuvel ti pu bizin prese partu lor later. Ti’nn ariv ler pu fer “rekolt” lor later. (Révélation 14:6, 7, 14-16) Ti pu bizin rod bann dernye manb 144,000, ek rasanble “enn grand ful” lezot brebi.—Révélation 7:9; Matthieu 13:24-30.

17. Kuma eski bann fidel Kretyin oints finn ‘vinn partaz lazwa zot met’?

¹⁷ Lepok rekolt li enn lepok zwaye. (Psaume 126:6) Donk, kan Jésus ti donn so bann fidel frer oints bann pli gran responsabilite an 1919, so bann parol ti apropriye, kan li ti dir: “To finn montre twa fidel dan bann ti kitsoz. Mo pu etabli twa lor buku kitsoz. Vinn partaz lazwa to met.” (Matthieu 25:21, 23) Li difisil pu imazinn lazwa ki Met-la finn resanti kuma nuvo le Rwa dan Rwayom Bondye. (Psaume 45:1, 2, 6, 7) Esklav fidel ek avize partaz sa lazwa-la kan lor later, zot reprezant zot le Rwa ek zot ogmant so dibyin. (2 Corinthiens 5:20) Isaïe 61:10 dekrir byin sa plezir ki zot resanti-la: “San fot, mo pu dan enn gran lazwa pu Jéhovah. Mo nam pu dan lazwa pu mo Bondye. Parski li finn abiy mwa avek bann linz, ki kapav sov mwa.”

18. Kan Jésus ti fer so inspeksyon, kifer sertin pa finn reysi pas sa tes-la, ek ki finn ariv zot?

¹⁸ Kan Jésus ti fer so linspeksyon, malerezman, sertin finn fel sa tes-la. Nu lir: “Esklav ki ti gayn enn sel talan-la vinn devan, li dir: ‘Met, mo ti kone ki to enn zom egzizan, ki rekolte la kot to pa’nn seme, ek ki ramase la kot to pa’nn vane. Alor, mo’nn gayn per ek mo’nn al kasyet mo talan dan later. Ala, mo rann twa seki pu twa.’ ” (Matthieu 25:24, 25) Parey kuma sa esklav-la, sertin Kretyin oints pa finn ‘ogmant dibyin’ ki Jésus ti donn zot. Avan 1914, zot pa ti ena okenn lantuzyas pu koz lor zot lesperans avek lezot, ek zot pa ti anvi kumans fer sa an 1919. Kuma eski Jésus finn reazir, kan li’nn truve ki zot inn mepriz seki li ti donn zot? Li finn anlev tu zot privilez. Li finn fer ‘zet zot dan nwarte, andeor.’ Se la ki pu tann zot ‘plore ek grins ledan.’—Matthieu 25:28, 30.

Inspeksyon Kontiyne

19. Kifer nu kapav dir ki linspeksyon Jésus pe kontiyne, ek ki kitsoz tu bann Kretyin oints dertermine pu fer?

¹⁹ Byinsir, laplipar bann manb oints ki’nn rasanble dan lepok lafin, pa ti ankor mem kumans servi Jéhovah kan Jésus ti kumans so inspeksyon an 1918. Eski sa vedir ki zot finn rat sa inspeksyon-la? Non! Kan esklav fidel ek avize ti reysi pas sa tes-la, antan ki grup, an 1918/19, sa ti zis enn kumansman sa inspeksyon-la. Me Jésus kontiyn inspekte sak Kretyin oint individyelman ziska ki zot sele dan enn fason permanan. (Révélation 7:1-3) Konsyan ki Jésus pe fer sa, bann manb oints determine pu kontiyn ‘ogmant dibyin’ ki zot Met inn konfye zot. Zot determine pu res avize, setadir gard enn bon kantite delwil pu ki zot lalimyer kontiyn briy for. Zot kone ki, kan sakenn parmi zot pu fini so lavi fidelman lor later, Jésus pu resevwar li kot li, dan lesyel.—Matthieu 24:13; Jean 14:2-4; 1 Corinthiens 15:50, 51

20. (a) Ki lezot brebi determine pu fer? (b) Ki bann Kretyin oints konn byin?

²⁰ La grand ful lezot brebi pe imit lafwa zot bann frer oints. Zot konsyan ki la konesans lor bann proze Bondye amenn bann gran responsabilte. (Ézékiel 3:17-21) Donk, avek led Parol Jéhovah ek so lespri sin, zot usi zot pe ramas enn bon stok dewlil kan zot etidye ek asiste bann reynion. Ek zot fer zot lalimyer briye kan zot prese ek zot anseyn bann dimunn. Kumsa, zot usi zot pe ‘ogmant dibyin’ zot Met ansam avek zot bann frer oints. Me, bann Kretyin oints konn byin ki se dan zot lamin ki Jésus finn plas bann talan. Zot pu bizin rann kont pu fason ki zot pe kontrol dibyin le Senyer lor later. Mem si zot pa buku, zot kone ki zot pa kapav zet zot responsabilte lor la grand ful. Akoz sa, “esklav fidel ek avize” kontiyn pran latet pu ‘ogmant dibyin’ le Rwa. Me zot rekonesan pu led ki zot gayne avek bann manb la grand ful byin devwe. Bann manb la grand ful rekonet responsabilite zot bann frer oints ek pu zot, se enn loner pu travay anba zot direksyon.

21. Ki lankurazman aplik ar tu Kretyin depi le zenviron 1919 ziska zordi?

²¹ Donk, mem si sa de parabol-la fer nu konpran bann evennman ki finn arive an 1919 uswa dan le zenviron 1919, zot bann prinsip aplik ar tu bann vre Kretyin ki pe viv dan bann dernye zur. Kumsa, mem si lankurazman ki Jésus ti done alafin parabol bann dis vyerz, li aplik prinsipalman ar bann Kretyin oints avan 1919, sa prinsip-la ankor tuzur valab pu sak Kreytyin zordi. Donk, nu tu, anu pran byin kont sa bann parol Jésus-la: “Kontiyn veye, parski zot pa konn ni zur-la, ni ler-la.”—Matthieu 25:13.

[Notes]

Eski U Kapav Explike?

• Kan Jésus finn vinn inspekte so bann disip, ek ki li’nn truve?

• Kifer eski sertin Kretyin oints finn devlop mem latitid ki sa move esklav-la?

• Kuma nu kapav montre ki nu avize lor plan spirityel?

• Si nu’le imit bann fidel frer oints Jésus, dan ki fason nu kapav kontiyn ‘ogmant dibyin’ nu Met?

[Lankadre lor paz 29]

KAN ESKI JÉSUS PE VINI?

An Matthieu sapit 24 ek 25, la Bib dir nu ki Jésus pu “vini” dan diferan fason. Sa pa vedir ki Jésus pu bizin sorti dan enn landrwa pu “vini.” Kan la Bib dir ki Jésus pe “vini,” sa vedir ki ki li pe turn so latansyon ver limanite uswa ver so bann disip, byin suvan pu fer enn zizman. Donk, an 1914, li ti “vini” pu kumans so prezans antan ki le Rwa. (Matthieu 16:28; 17:1; Actes 1:11) An 1918, li “ti vini” antan ki mesaze lalyans ek li ti kumans ziz bann ki pretann servi Jéhovah. (Malaki 3:1-3; 1 Pierre 4:17) Kan Harmaguedôn pu deklanse, li pu “vini” pu ziz bann lennmi Jéhovah.—Révélation 19:11-16.

La Bib mansyonn larive Jésus plizir fwa, dan Matthieu 24:29-44 ek 25:31-46. Sa pu realize kan “gran tribilasyon” kumanse. (Révélation 7:14) Parkont, kan Matthieu 24:45–25:30 koz lor larive Jésus, zot fer referans ar zizman ki li pe amene lor bann swadizan Kretyin apartir 1918. Li pa rezonab pu dir par egzanp ki, rekonpans esklav fidel, zizman bann vyerz bet, ek zizman sa esklav pares ki ti kasyet talan so Met-la, tusala pu arive kan Jésus pu “vini” pandan gran tribilasyon. Sinon, sa pu vedir ki kan gran tribilasyon kumanse, buku Kreytin oints pu infidel devan lizye Jésus, ek donk lerla pu bizin ranplas zot. Me, Révélation 7:3, montre ki tu bann manb oints pu’nn fini “sele” kan gran tribilasyon kumanse.

[Zimaz lor paz 27]

Sa ‘move esklav-la’ pa ti gayn okenn benediksyon an 1919

[Zimaz lor paz 28]

Bann vyerz saz ti pre kan l’Époux ti arive

[Zimaz lor paz 30]

Esklav fidel ti ‘ogmant dibyin’ so Met

Esklav pares li, li pa’nn fer sa

[Zimaz lor paz 31]

Bann Kretyin oints ek “la grand ful” pe kontiyn fer zot lalimyer briye