Eski kikenn kapav vrai-mem change le monde?

“Bann dimoune misere dire nou ki seki zot envie avant tou, c’est la paix ek la securité—ek apré, possibilité pou ameliore zot la-vie. Zot envie ki etabli bann system national ek international kot ena la justice, pou ki sa grand pouvoir ki bann pays ek bann compagnie riche ena, pa bloque zot bann zeffort.”

ALA couma directrice enn l’organisation humanitaire decrire l’espoir ek desir bann dimoune misere. En verité, ti kapav servi sa bann parole-la pou decrire desir tou bann victime catastrophe ek l’injustice. Zot tou pé attann kan pou ena enn lé-monde kot ena vrai la-paix ek securité. Eski vrai-mem pou kapav ena enn lé-monde coumsa enn jour? Eski ena kikenn ki ena vrai-mem sa pouvoir ek sa capacité ki bizin pou change sa lé-monde ki rempli ar l’injustice-la?

Bann ki finn essaye change la situation

Beaucoup dimoune inn essaye change la situation. Par exemple, Florence Nightingale, enn madame anglais ki ti vive dan bann l’année 1800, ti consacré so la-vie pou lutté pou ki donne soin bann dimoune malade dan la propté, ek ki occupe zot avek compassion. Dan sa lepok-la, pa ti encore ena antiseptik ek antibiotik; alors dan l’hopital pa ti gagne bann soin ki gagné zordi. Enn livre dire: “Bann infirmier pa ti ena grand l’instruction, zot pa ti prop, ek dimoune ti konn zot couma bann soulard ek bann ki amenn mauvais la-vie.” Eski Florence Nightingale ti reussi faire bann changement dan domaine nursing? Oui. Pareil couma li, enn quantité dimoune ki interessé avek lezot ek envie aidé, finn reussi faire bann grand changement dan bann domaine couma, par exemple, faire dimoune aprann lire, l’education, medecine, logement, distribution mangé. Resultat: sa finn bien ameliore qualité la vie bann million dimoune ki pa ti pou kapav gagne sa bann kitsoz-la sinon.

Mais nou bizin prend compte sa realité ki bien triste-la: bann centaine million dimoune encore pé souffert a cause la guerre, crime, maladie, la famine, ek lezot problem encore. Enn l’organisation humanitaire irlandais ki appel Concern dire: “Chaque jour 30,000 dimoune mort a cause la misere.” Mem l’esclavage, enn kitsoz ki bann dimoune finn rod aboli depuis bien longtemps, encore toujours existé. Livre Disposable People—New Slavery in the Global Economy dire: “Zordi ena pli beaucoup esclave ki dan lepok kot ti enleve dimoune en Afrique ek ti vann zot couma esclave en Amérique.”

Ki finn bloque bann zeffort ki bann dimoune inn faire pou amenn en changement total? Eski c’est zis a cause sa grand pouvoir ki bann pays ek bann compagnie riche ena-la, ou-soit eski plus ki sa impliké?

Bann barriere ki empeche changement

Dapré Parole Bondié, pli grand barriere ki pé bloque tou bann zeffort ki dimoune kapav faire pou gagne enn lé-monde kot ena la justice, c’est Satan le Diable. L’apotre Jean dire nou ki “le monde entier li dan pouvoir Satan.” (1 Jean 5:19) Avredir, asterla-mem, Satan pé “mette tou bann dimoune lor la terre entier dan l’erreur.” (Révélation 12:9) Tant ki pa enleve so mauvais l’influence, pou ena bann dimoune ki pou souffert a cause le mal ek l’injustice. Couma sa situation bien triste-la inn arrivé?

Bondié ti donne nou bann premier parent, Adam ek Ève, enn la-terre ki Li ti’nn preparé pou vinn enn paradi parfait, kot tou bann dimoune ti pou kapav resté—enn lé-monde ki ti “bien bon.” (Genèse 1:31) Ki finn change sa situation-la? Satan. Li ti mette en doute droit ki Bondié ena pou etabli bann la-loi ki bann dimoune bizin suive. Li ti rod faire croire ki pa ti ena la justice dan fason ki Bondié dirigé. Li finn pousse Adam ek Ève pou choisir pou vive independant ar Bondié pou ki zot kapav decidé par zot-mem seki bon ek mauvais. (Genèse 3:1-6) A cause sa, finn ena enn deuxieme barriere ki bloque zeffort ki bann dimoune faire pou gagne enn lé-monde kot ena la justice. Sa barriere-la, c’est peché ek l’imperfection.—Romains 5:12.

Kifer Bondié inn permette sa?

Certain kapav demandé: ‘Mais kifer Bondié inn laisse peché ek l’imperfection developpé? Kifer Li pa ti servi so puissance ki pena limite, pou detruire sa bann rebelle-la ek recommence tou?’ Sa parette enn solution bien simple. Seulement, kan servi la force, sa faire bann dimoune pose-zot bann question serieux. Eski li pa vrai ki bann dimoune misere ek bann avek ki faire dominere, plaigné souvent parski lezot abuse pouvoir ki zot ena? Eski sa pa faire bann dimoune sincere gagne doute dan zot l’esprit kan enn dictateur servi so pouvoir pou elimine kikenn ki pa d’accord avek so politik?

Pou donne bann dimoune sincere l’assurance ki Li pa enn dominere ki abuse so pouvoir, Bondié ti prefere laisse Satan ek bann dimoune rebelle contigne agir sans prend compte So bann la-loi ek principe—mais zis pou enn lé-temps limité. Le temps ti pou montré ki fason Bondié dirigé, sa-mem sel bon fason ki ena. Sa ti pou montré aussi ki n’importe ki restriction ki Bondié mette lor nou, c’est pou nou bien. Avredir, rebellion kont domination Bondié finn ena bann consequence triste, ki’nn deja confirme sa. Ek sa prouvé ki Bondié ena raison pou servi so grand pouvoir pou tire tou mechanceté kan Li envie. Et c’est sa-mem ki Li pou faire bientot.—Genèse 18:23-32; Deutéronome 32:4; Psaume 37:9, 10, 38.

Avant ki Bondié agir, nou obligé vive dan enn lé-monde kot pena la justice, ek kot nou pé “plaigné ensam ek souffert ensam.” (Romains 8:22) N’importe ki kitsoz ki nou faire pou change la situation, nou pa kapav debarrasse-nou ar Satan, ni tire sa l’imperfection ki responsable pou tou sa souffrance ki nou pé koné-la. Nou pena pouvoir pou trouve enn solution pou bann l’effet peché ki nou’nn herité avek Adam.—Psaume 49:7-9.

Jésus Christ pou amenn enn changement ki permanent

Eski sa vedir ki situation-la completement desesperé? Non. Enn kikenn ki bien pli fort ki bann simple dimoune, finn gagne responsabilité pou amenn enn changement permanent. Kisannla sa? C’est Jésus Christ. La Bible decrire li couma Agent principal ki Bondié pou servi pou sauve bann dimoune.—Actes 5:31.

Asterla li pé attann “le temps fixé” par Bondié pou li agir. (Révélation 11:18) Ki li pou faire vrai-mem? Li pou “retabli tou kitsoz ki Bondié ti annoncé par la bouche so bann saint prophete dan le temps passé.” (Actes 3:21) Par exemple, Jésus pou “sap sa dimoune misere ki pé crié au secours-la, ek sa dimoune ki dan grand chagrin-la, ek n’importe kisannla ki pena personne pou aide li. . . . Li pou delivré zot nâme ar bann ki pé faire dominere avek zot, ek li pou tire zot nâme dan violence.” (Psaume 72:12-16) Bondié promette ki par moyen Jésus Christ, Li pou faire “bann la-guerre arreté ziska dan boute la terre.” (Psaume 46:9) Li promette: “Okenn habitant pa pou dire: ‘Mo malade.’ ” Bann ki pa trouve clair, bann ki sourde, bann ki boiteux—tou bann ki affecté par tou qualité maladie—pou regagne enn la-santé parfait. (Isaïe 33:24; 35:5, 6; Révélation 21:3, 4) Mem bann ki finn mort dan le passé pou kapav profite sa. Bondié promette ki Li pou ressuscite bann ki’nn mort a cause l’injustice.—Jean 5:28, 29.

Jésus Christ pa pou zis change certain kitsoz pou inpé lé-temps. Li pou tire net tou seki empeche ena enn lé-monde kot vrai-mem ena la justice. Li pou tire peché ek l’imperfection ek li pou detruire Satan ek tou bann ki suive li dan so rebellion. (Révélation 19:19, 20; 20:1-3, 10) Sa situation critik ek sa souffrance ki Bondié inn permette pou inpé lé-temps-la, “pa pou arrivé enn deuxieme fois.” (Nahoum 1:9) C’est sa-mem ki Jésus ti pé maziné kan li ti montré nou prié pou ki Royaume Bondié vini ek pou ki volonté Bondié faire “lor la terre pareil couma dan le ciel.”—Matthieu 6:10.

Ou kapav dire: ‘Mais eski Jésus li-mem pa ti dire ki nou “pou touletan ena dimoune misere avek nou”? Eski sa pa vedir ki touletan pou ena l’injustice ek la misere?’ (Matthieu 26:11) Oui, Jésus ti dire ki ti touletan pou ena dimoune misere. Mais, kan nou guette contexte so bann parole ek bann promesse ki ena dan Parole Bondié, sa montré nou ki touletan pou ena dimoune misere tant ki nou vive dan sa system-la. Li ti koné ki jamais personne pa ti pou kapav tire la misere ek l’injustice dan le monde. Li ti aussi koné ki li ti pou change tousala. Bientot li pou amenn enn nouveau system ki completement different—“enn nouveau lé-ciel ek enn nouveau la-terre” kot pou nepli ena la souffrance, la maladie, la misere, ek la mort.—2 Pierre 3:13; Révélation 21:1.

“Pa blié faire di-bien”

Eski sa vedir ki li pa vaut la peine faire seki nou kapav pou aide lezot? Surement pa. La Bible encourage nou pou aide lezot kan zot faire face ar bann l’epreuve ek bann situation critik. Le roi Salomon ki ti vive dan lepok longtemps ti ecrire: “Pa refuse faire di-bien pou bann dimoune ki merité, chaque fois ki to trouvé to kapav faire sa.” (Proverbes 3:27) L’apotre Paul encourage nou pou “pa blié faire di-bien ek partage avek lezot.”—Hébreux 13:16.

Jésus Christ li-mem inn encourage nou pou faire tou seki nou kapav pou aide lezot. Li ti raconte l’exemple enn Samaritain ki ti trouve enn missié ki ti’nn gagne batté ar bann voleur ki ti’nn prend tou seki li ti ena. Jésus ti dire ki sa Samaritain-la “inn ressenti beaucoup pitié” ek li’nn servi seki li ti ena pou faire pansement so bann blessure ek pou aide li retabli. (Luc 10:29- 37) Sa Samaritain ki ti ena beaucoup pitié-la pa ti change le monde, mais li ti faire enn grand changement dan la vie enn lot dimoune. Nou kapav faire pareil.

Mais Jésus kapav faire plus ki aide bann dimoune en particulier. Li kapav vrai-mem amenn changement, ek li pou faire sa bientot. Lerla, bann ki victime l’injustice zordi pou kapav ameliore zot la-vie ek vive dan vrai la-paix ek securité.—Psaume 4:8; 37:10, 11.

Alors ki nou pé attann ki sa arrivé, anou jamais hesité pou faire n’importe ki kitsoz, lor plan spirituel ek materiel toulé-deux pou “faire di-bien” pou tou bann ki victime sa lé-monde kot pena la justice-la.—Galates 6:10.

[Zimage, page 5]

Florence Nightingale ti faire bann vrai changement dan domaine nursing

[Remerciement photo]

Courtesy National Library of Medicine

[Zimage, page 7]

Bann disciple Jésus faire di-bien pou lezot

[Remerciement photo page 4]

The Star, Johannesburg, S.A.