Jeune, rappel zot Grand Createur asterla

“Rappel to Grand Createur pendant to l’adolescence.”​—ECCL. 12:⁠1.

 1. Couma Jéhovah montré so confiance dan so bann jeune adorateur?

BANN jeune chretien ena beaucoup valeur devant lizié Jéhovah. Li considere zot couma bann goutte la-rosée ki rafraichi. En realité, Li ti annoncé ki dan lepok ki so Garson pou ‘rassemblé so l’armée,’ bann jeune garson ek bann jeune fille pou ‘porte-zot volontaire’ dan service Christ. (Ps. 110:⁠3) Sa prophetie-la ti pou realisé dan enn lepok kot bann dimoune en general pa ti pou interessé ar Bondié, ti pou obsedé par zot-mem ek par l’argent, ek pa ti pou obeir l’autorité. Pourtant, Jéhovah ti koné ki bann jeune ki ti pou servi Li ti pou different. Oui, Jéhovah ena vrai-mem confiance en zot, jeune frere ek jeune soeur!

 2. Ki sa vedir rappel Jéhovah?

² Mazinn la joie ki Bondié bizin ena kan Li guette bann jeune ki rappel ki c’est Li zot Grand Createur. (Eccl. 12:⁠1) Bien sur, rappel Jéhovah pa vedir ki nou zis rappel ki Li existé. Sa vedir faire bann action​—faire seki faire Li plaisir, laisse so bann la-loi ek so bann principe dirige nou dan la vie toulé-jour. Sa vedir aussi ena confiance en Jéhovah parski nou koné ki Li envie nou bonheur. (Ps. 37:⁠3; Is. 48:17, 18) Eski ou ena sa sentiment-la envers ou Grand Createur?

“Faire Jéhovah confiance avek tou to leker”

3, 4. Couma Jésus ti montré ki li ti mette so confiance en Jéhovah, ek kifer li important pou faire Jéhovah confiance zordi?

³ Pli bon l’exemple enn kikenn ki ti faire Bondié confiance c’est bien sur Jésus Christ. Li ti amenn enn la-vie ki ti en accord avek Proverbes 3:​5, 6: “Faire Jéhovah confiance avek tou to leker ek pa fié lor to prop l’intelligence. Dan tou seki to faire, prend Li compte, ek Li, Li pou faire to bann chemin vinn droite.” Enn tipé apré so bapteme, Satan ti vinn tente Jésus pou li accepté pouvoir ek la gloire sa lé-monde-la. (Luc 4:​3-​13) Jésus pa ti laisse Satan embete li. Li ti koné ki vrai “richesse ek la gloire ek la vie” zot “resultat l’humilité ek la crainte pou Jéhovah.”​—Prov. 22:⁠4.

⁴ Zordi, enn desir pou gagne plus ki bizin ek l’egoïsme pé domine le monde. Dan enn l’environnement coumsa, nou montré ki nou sage si nou suive l’exemple Jésus. Rappel aussi ki Satan pou faire tou seki li kapav pou detourne bann serviteur Jéhovah pou zot pa marche lor la route serré ki amenn vers la vie. Li envie trouve tou dimoune marche lor chemin large ki amenn vers la destruction. Pa laisse li embete ou! Au contraire, prend enn decision ferme pou rappel ou Grand Createur. Mette tou ou confiance en Li, ek saisi bien “vrai la vie” ki sur ek ki pré pou vini.​—1 Tim. 6:⁠19.

Jeune, montré ki ou sage!

 5. Couma ou trouve l’avenir sa lé-monde-la?

⁵ Bann jeune ki rappel zot Grand Createur, zot pli sage ki bann jeune ki ena mem l’age ar zot. (Lire Psaume 119:99, 100.) Parski zot ena mem fason pensé ki Bondié, zot bien conscient ki sa lé-monde-la pena okenn l’avenir. Mem sa tigit lé-temps ki zot finn vive-la, jeune, zot finn surement remarké couma zordi bann dimoune en general pé plus peur ek tracassé concernant l’avenir. Si zot encore pé al lekol, surement zot finn tann koz lor pollution, rechauffement la terre, bann la-foret ki pé disparette, ek bann lezot probleme ki pareil. Bann dimoune bien tracassé concernant sa bann kitsoz-la, mais zis bann Témoins de Jéhovah ki comprend bien ki tousala forme partie dan signe ki montré ki le monde Satan pé al fini.​—Rév. 11:⁠18.

 6. Couma certain jeune finn tombe dan bann piege?

⁶ Malheureusement, certain jeune serviteur Bondié pa finn reste lor zot garde ek tigit par tigit zot finn blié ki pa reste beaucoup lé-temps pou sa lé-monde-la al fini. (2 Pierre 3:​3, 4) Lezot finn laisse-zot attiré par bann mauvais frequentation ou-soit par pornographie, ek sa finn amenn zot pou faire enn peché grave. (Prov. 13:⁠20) Li pou vrai-mem triste ki nou perdi faveur Bondié alors ki nou tellement pré ar la fin sa lé-monde-la! Pou sa pa arrive nou, anou tire leson ar seki ti arrive bann Israélite en 1473 a.n.l. kan zot ti pé campe dan bann la-plaine Moab, alors ki zot ti pré pou rente dan la Terre promise. Ki ti arrivé la-bas?

Zot ti tombé alors ki zot ti pré pou rentré

7, 8. (a) Ki piege sournois Satan ti servi dan bann la-plaine Moab? (b) Ki piege Satan pé servi zordi?

⁷ Satan ti vrai-mem envie empeche bann Israélite pou gagne l’heritage ki Bondié ti promette zot. Li pa ti reussi faire prophete Balaam maudit zot, alors li ti essaye enn piege pli sournois; li ti pousse zot pou faire enn kitsoz pou ki zot pa digne pou gagne benediction Jéhovah. Li ti servi bann femme moabite pou attire zot, ek sa fois-la, Satan ti reussi enn tipé dan seki li ti envie. Le peuple ti commence gagne bann relation immoral avek bann tifi Moab ek ti mem prosterne-zot devant Baal Péor! Mem si la Terre promise, sa l’heritage ki ti ena valeur-la, ti bien pré, ti ena 24,000 Israélite ki ti perdi zot la-vie. Enn vrai malheur, pa vrai?​—Nomb. 25:​1-3, 9.

⁸ Zordi, nou pé approche bien vite ar enn la-terre promise ki beaucoup pli bon​—le monde nouveau. Pareil couma li habitué faire, Satan pé servi encore enn fois l’immoralité sexuel pou gate l’esprit bann serviteur Bondié. Dan le monde, bann principe moral finn tombe tellement bas ki dimoune considere fornication couma enn kitsoz normal. Zot dire ki l’homosexualité c’est zis enn choix personnel. Enn soeur dire: “C’est zis dan lakaz ek dan la Salle du Royaume ki mo bann zenfant aprann ki l’homosexualité ek bann relation sexuel en dehors mariage c’est bann pratik mauvais ki Bondié condamné.”

 9. Ki kapav arrivé pendant “fleur la jeunesse,” ek couma bann jeune kapav faire face ar sa?

⁹ Bann jeune ki rappel zot Grand Createur koné ki relation sexuel c’est enn don sacré ki ena enn rapport avek la vie ek gagne zenfant. Alors, zot reconette ki enn dimoune kapav gagne bann relation sexuel selman dapré l’arrangement ki Bondié inn prend, setadir dan mariage. (Héb. 13:⁠4) Selman, pendant enn periode ki la Bible appel “fleur la jeunesse”​—enn periode kot bann desir sexuel vinn fort ek riské fausse jugement enn dimoune​—li kapav difficile pou enn kikenn reste pur. (1 Cor. 7:​36) Ki ou kapav faire si ena bann mauvais pensée ki traverse ou l’esprit? Prié Jéhovah avek tou ou leker pou aide ou pou concentré lor bann kitsoz pur. Jéhovah touletan ecoute bann dimoune ki prié Li avek sincerité. (Lire Luc 11:​9-​13.) Ena bann conversation ki encourageant, sa aussi pou kapav aide ou pou redonne ou bann pensée enn bon direction.

Choisir zot bann l’objectif avek sagesse!

10. Ki l’attitude negatif nou envie rejeté, ek ki bann question nou kapav demann nou-mem?

¹⁰ Enn raison kifer bann jeune dan le monde faire seki zot envie ek vive zis pou faire zot lekor plaisir c’est parski zot pena okenn “vision,” setadir zot pena direction Bondié ek okenn l’espoir sur pou l’avenir. (Prov. 29:⁠18) Zot ressemblé bann Israélite dan lepok Isaïe ki ti blié Bondié ek ti vive pou gagne ‘enn grand la joie, pou mange la viande ek pou boire di-vin.’ (Is. 22:⁠13) Jeune, au lieu ki zot envié sa qualité dimoune-la, kifer zot pa reflechi lor sa grand l’esperance ki Jéhovah inn mette devant so bann fidele serviteur-la? Si ou enn jeune serviteur Bondié, eski ou pé attann avek impatience le monde nouveau? Eski ou pé faire tou zeffort pou “vive avek bon sens . . . pendant ki [ou] pé attann sa l’esperance ki donne beaucoup la-joie” ki Jéhovah inn mette devant ou-la? (Tite 2:​12, 13) Ou reponse pou ena enn l’influence lor bann l’objectif ek bann priorité ki ou’nn fixé dan ou la-vie.

11. Kifer bann jeune chretien ki encore lekol bizin travail dur?

¹¹ Le monde envie ki bann jeune consacré zot lé-temps ek zot la-force ar bann kitsoz ki pena okenn rapport avek bann kitsoz spirituel. Bien sur, certain parmi zot ki encore lekol bizin travail dur pou gagne enn bon base en seki concerne l’education. Apré tou, zot but c’est pa zis pou gagne enn travail ki correct mais aussi pou vinn enn kikenn ki kapav aidé dan congregation, ki encourageant ek ki enn bon proclamateur Royaume Bondié. Pou sa, ou bizin aprann pou bien communiké, pou reflechi dan enn fason logik ek pou raisonne avek respé ek dan enn fason calme avek lezot. Mais, bann jeune ki etudié la Bible ek ki faire zeffort pou applik bann principe biblik dan zot la-vie gagne pli bon l’education ki ena ek pose enn bon fondement pou enn l’avenir heureux ek eternel.​—Lire Psaume 1:​1-3.a

12. Ki l’exemple bann famille chretien bizin suive?

¹² En Israël, bann parent ti considere l’education ki zot ti donne zot bann zenfant couma enn priorité. Zot ti forme zot zenfant dan preské tou l’aspect zot la-vie, surtout en rapport avek bann kitsoz spirituel. (Deut. 6:​6, 7) Alors, bann jeune israélite ki ti ecoute zot parent ek lezot adulte ki ti ena la crainte pou Bondié, pa ti gagne zis connaissance, mais zot ti gagne aussi sagesse, bon jugement, l’intelligence ek capacité pou reflechi​—bann qualité rare ki zis enn l’education spirituel kapav donné. (Prov. 1:​2-4; 2:​1-​5, 11-​15) Zordi, bann famille chretien bizin faire pareil ek ena mem l’attitude lor l’education ki zot donne zot zenfant.

Ecoute bann ki content ou

13. Ki qualité conseil certain jeune gagné, ek kifer zot bizin prudent?

¹³ Bann jeune gagne conseil ar tou sorte qualité dimoune, parmi ena bann conseiller l’education ki donne zot bann conseil dan zot la-vie personnel, dan zot l’etude, ek zot carriere. Sa bann dimoune-la zot surtout montré bann etudiant couma zot kapav reussi zot la-vie professionnel. Prend le temps pou prié Bondié pou ou kapav bien analyse tou sa bann conseil-la avek l’aide la Bible ek bann publication ki l’esclave fidele et avisé donne nou. Grace a ou l’etude la Bible, ou finn aprann ki Satan vise surtout bann jeune ek bann ki pena l’experience. Par exemple, dan jardin Éden, Ève, ki pa ti ena l’experience, ti ecoute Satan, enn etranger ki jamais pa ti montré okenn l’amour pou li. Situation ti pou vrai-mem bien different si selman Ève ti ecoute Jéhovah, ki ti’nn prouve so l’amour pou li dan beaucoup fason!​—Gen. 3:​1-6.

14. Kifer nou bizin ecoute Jéhovah ek nou bann parent ki servi Li?

¹⁴ Ou Grand Createur content ou aussi, ek so l’intention bien pur. Li envie ki ou vive heureux, pa zis asterla mais pou touletan! Alors, avek mem tendresse ki enn parent kapav ena pou so zenfant, Jéhovah dire ou ek tou seki adore Li: “Ala chemin-la. Marche ladan.” (Is. 30:⁠21) Si ou ena bann parent ki vrai-mem content Jéhovah, ou ena enn benediction en plus. Ecoute zot conseil avek respé kan ou bizin decide lor ou bann priorité ek ou bann l’objectif. (Prov. 1:​8, 9) Apré tou, zot envie ki ou gagne la vie, enn kitsoz ki ena beaucoup plus valeur ki la richesse ou-soit enn grand position dan sa lé-monde-la.​—Mat. 16:⁠26.

15, 16. (a) Ki confiance nou kapav ena en Jéhovah? (b) Ki leson important nou aprann ar l’experience Barouk?

¹⁵ Bann ki rappel zot Grand Createur essaye amenn enn la-vie simple, zot ena confiance ki “jamais” Jéhovah pa pou quitte zot ni pou abandonne zot. (Lire Hébreux 13:⁠5.) Parski sa bon l’attitude-la li bien different avek l’attitude ki ena dan le monde, nou bizin faire bien attention pou pa laisse l’esprit sa lé-monde-la influence nou. (Éph. 2:⁠2) En rapport avek sa, prend l’exemple Barouk, secretaire Jérémie, ki ti vive dan lepok difficile kot Jérusalem ti pré pou al detruire en l’an 607 a.n.l.

¹⁶ Li possible ki Barouk ti envie amenn enn la-vie pli confortable lor plan materiel. Jéhovah ti remark sa, ek avek bonté Li ti averti Barouk pou arrete rod bann “grand kitsoz” pou li-mem. Barouk ti montré ki li ti ena l’humilité ek sagesse parski li ti ecoute Jéhovah ek li ti sapé kan Jérusalem ti detruire. (Jér. 45:​2-5) Parkont, bann dimoune ki ti vive dan mem lepok ki Barouk, ki ti’nn ramasse bann “grand kitsoz” materiel ek ki ti mette Jéhovah dan deuxieme place, ti perdi tou kan bann Chaldéen (Babylonien) ti vinn detruire Jérusalem. Ti ena beaucoup aussi ki ti perdi zot la-vie. (2 Chron. 36:​15-​18) L’experience Barouk aide nou pou bien comprend ki bann bon relation avek Bondié beaucoup pli important ki la richesse ek enn grand position dan sa lé-monde-la.

Bann pli bon l’exemple ki nou kapav imité

17. Kifer Jésus, Paul ek Timothée zot bann bon l’exemple pou bann serviteur Jéhovah zordi?

¹⁷ Pou aide nou pou marche lor chemin la vie, Parole Bondié donne nou bann bon l’exemple pou nou suive. Par exemple, parmi tou dimoune ki’nn vive lor la terre, pa ti ena personne ki ti ena plus talent ki Jésus. Pourtant, li ti consacré so la-vie pou enn kitsoz ki ti pou aide bann dimoune pou touletan​—“la bonne nouvelle lor royaume Bondié.” (Luc 4:​43) Pou ki l’apotre Paul kapav donne Jéhovah seki pli bon, li ti abandonne enn grand carriere ek li ti servi so lé-temps ek so la-force pou preche la bonne nouvelle. Timothée so “vrai zenfant dan la foi” ti imite so bon l’exemple. (1 Tim. 1:⁠2) Eski Jésus, Paul ek Timothée ti regrette la vie ki zot ti’nn choisir? Non, jamais! En realité Paul ti dire ki li ti considere tou seki le monde ti ena pou offert couma “enn tas saleté” comparé ar privilege pou servi Bondié.​—Phil. 3:​8-​11.

18. Ki bann grand changement enn jeune frere inn faire, ek kifer li pa regretté?

¹⁸ Zordi, beaucoup jeune chretien imite la foi Jésus, Paul ek Timothée. Anou prend l’exemple enn jeune frere ki ti ena enn travail kot li ti gagne enn bon la paye. Li ti ecrire: “Parski mo ti mette bann principe biblik en pratik dan mo la-vie, mo pa ti tardé pou gagne bann promotion. Mais malgré bann l’avantage ki mo ti ena lor plan materiel, mo ti ena l’impression ki mo ti pé galope derriere di-vent. Kan mo ti al guette bann ki ti en charge dan mo compagnie pou dire zot mo l’intention pou faire service a plein temps, desuite zot ti offert pou donne moi plus kass, dan l’espoir ki mo pou resté. Mais mo ti’nn fini prend mo decision. Beaucoup dimoune pa ti kapav comprend kifer mo pé quitte enn travail ki bien payé pou al faire service a plein temps. Mo reponse li simple: Mo zis envie vive dapré promesse ki mo’nn faire Jéhovah pou consacré mo la-vie pou servi Li. Zordi, parski mo la-vie tourne autour bann kitsoz spirituel, mo ressenti enn bonheur ek enn satisfaction ki okenn somme l’argent ni okenn position dan le monde pa pou kapav donne moi.”

19. Ki bon choix bann jeune encouragé pou faire?

¹⁹ Dan le monde entier, plusieurs millier jeune finn faire bann bon choix pareil couma sa frere-la. Alors, jeune, kan ou reflechi lor ou l’avenir, garde bien dan ou l’esprit jour Jéhovah. (2 Pierre 3:​11, 12) Pa commence envié bann ki pé profite sa lé-monde-la net. Au contraire, ecoute bann dimoune ki vrai-mem content ou. L’investissement pli sur ki ou kapav faire ek sel l’investissement ki pou donne ou bann benediction eternel, c’est kan ou ramasse “bann tresor dan le ciel.” (Mat. 6:​19, 20; lire 1 Jean 2:​15-​17.) Oui, rappel ou Grand Createur, lerla, Jéhovah pou beni ou.

[Note]

Eski ou rappel?

• Couma nou montré ki nou ena confiance en Bondié?

• Ki pli bon l’education ki nou kapav gagné?

• Ki bann leson nou kapav tiré ar l’exemple Barouk?

• Ki bann dimoune ki’nn donne nou enn bon l’exemple, ek kifer?

[Zimage lor page 21]

Jéhovah donne pli bon l’education ki ena