Eski bann zenfant bizin konn Bondié?

“Nou ena assez religion pou faire nou ena la haine, mais pa assez pou faire nou content sakenn nou camarade.”​—JONATHAN SWIFT, ENN ECRIVAIN ANGLAIS.

JONATHAN SWIFT ti dire sa bann pensée-la dan 18^eme siecle, mais beaucoup dimoune zordi d’accord avek li. En realité, certain pensé ki bann parent pa gagne droit enseigne zot zenfant lor Bondié. Zot pensé ki bann zenfant ki grandi dan enn lakaz kot ena enn religion, pena certain l’avantage.

Ki ou pensé? Parmi sa bann raisonnement-la, lekel ki pli raisonnable?

● Fodé pa laisse bann parent enseigne zot zenfant lor Bondié.

● Bann parent bizin attann ki zot zenfant vinn grand avant koz la religion avek zot.

● Kan bann zenfant encore jeune, bann parent bizin enseigne zot, bann croyance ki zot-mem zot ena lor Bondié. Mais a mesure ki zot bann zenfant grandi, bann parent bizin encourage zot pou raisonne lor sa sujet-la par zot-mem.

● Bann zenfant bizin suive religion zot parent sans pose okenn question.

Eski la religion faire bann zenfant di-tort?

Okenn parent ki content so zenfant pa pou envie faire li di-tort. Certain dimoune dire ki fodé pa ki bann zenfant aprann lor Bondié. Mais eski bann preuve soutenir seki zot dire? Pendant plusieurs dizaine l’année, bann ki faire recherche finn faire bann grand l’etude lor l’effet ki croyance religieux enn parent ena lor so bann zenfant. Ki conclusion zot finn tiré?

Bann ki faire recherche finn trouvé ki au lieu ki la religion ena enn mauvais l’influence lor enn zenfant, sa kapav ena enn l’effet positif lor so developpement. En 2008, enn rapport ki ti publié dan magazine Social Science Researcha ti dire: “Nou finn trouvé ki la religion finn ameliore relation ki ena entre parent-zenfant, sa finn faire di-bien bann mama ek bann papa toulé-deux.” Sa rapport-la ti dire aussi: “Li parette ki religion ek spiritualité ena enn place important dan la vie beaucoup zenfant ek zot bien important dan bann relation familial.” Remarké couma seki zot finn decouvert ressemblé beaucoup avek seki Jésus Christ ti dire: “Heureux bann ki reconette ki zot pauvre lor plan spirituel.”​—Matthieu 5:3.

Ki nou kapav dire lor l’idée ki bann zenfant bizin vinn grand avant ki zot kapav aprann lor Bondié ek lor la religion? Sa l’idée-la pa prend compte sa fait-la: l’esprit enn zenfant pareil couma enn séau vide ki pé attann pou rempli li avek kitsoz. Oui, bann parent bizin faire enn choix; soit rempli sa “séau-la” dan lakaz avek bann principe moral ek bann croyance ki zot pensé bon, ou-soit laisse zot zenfant aprann n’importe seki zot tendé ar lezot en dehors zot lakaz.

Eski ena enn secret ki kapav aide bann parent?

L’histoire inn prouvé ki la religion ena pouvoir pou encourage bann dimoune ena bann l’opinion fanatik ek ena la haine. Alors, couma bann parent kapav evite resultat ki Jonathan Swift ti decrire? Couma zot kapav enseigne zot zenfant bann croyance ki pou aide zot pou content lezot?

Secret-la trouve dan reponse sa trois question-la: (1) Ki bann zenfant bizin aprann? (2) Kisannla bizin enseigne zot? (3) Ki bann methode pou enseigne zot ki pli efficace?

[Note]