Kouma Nou Kapav Ena Kontantman kan Ena Bann Problem Ekonomik?

Boukou parmi nou bann frer ek ser res dan bann pei kot li difisil pou gagn enn travay ouswa kot bann dimounn bien pov. Akoz sa bann sitiasion-la, sertin frer ek ser inn pran bann desizion ki zot ti panse pou fer zot gagn plis kas san ki zot reflesi lor bann konsekans ki sa kapav ena apre. Par exanp, pou ki zot gagn plis kas, sertin inn desid pou al dan enn lot pei ek zot inn bizin kit zot madam ek zot bann zanfan ki miner. Lezot inn met zot kas dan bann proze kot zot kapav gagn plis kas dan enn tigit letan. Selman, kan zot inn fer sa, zot sitiasion inn pli anpire. Si to trakase akoz bann problem ekonomik, ki kitsoz kapav ed twa pou pran bann bon desizion?

APRANN POU ENA KONTANTMAN

Lapot Pol ti dir ki li’nn aprann enn “sekre,” setadir kouma pou ena kontantman dan ninport ki sitiasion. Li ti dir: “Mo kone kouma pou viv avek tigit ek mo kone kouma pou viv dan labondans. Mo finn aprann sekre pou kontant mwa dan tou kitsoz ek dan tou sirkonstans, ki mo ena boukou manze ouswa mo pe gagn fin, ki mo dan labondans ouswa mo pena.”—Fil. 4:11, 12.

Dan sa verse-la, Pol dir ki li’nn aprann pou ena kontantman. Anou get kat prinsip Labib ki kapav ed nou pou fer parey.

1^e prinsip Labib: “Montre par zot fason viv ki zot pena lamour pou larzan ek kontant zot ar seki zot ena. Parski li’nn dir: ‘Zame mo pa pou kit twa, ek zame mo pa pou abandonn twa.’”—Ebre 13:5.

Kouma sa prinsip-la ed twa? Lamour pou larzan kapav pous nou pou konpar nou sitiasion ar lezot. Kan enn kikenn kontan kas, li nepli ena lape lespri ek li pa satisfe ar bann kitsoz ki li ena. Si nou lit kont dezir pou gagn plis kas ek nou satisfe ar seki nou ena, nou pou ena kontantman ek lape lespri.

Seki to kapav fer. Konsantre twa lor seki to deza ena ek seki to mwayin permet twa aste, olie ki to konsantre lor bann kitsoz ki lezot ena. Pa bliye ki Zeova promet ki Li pou donn nou seki nou bizin si nou met Li an premie dan nou lavi. (Mat. 6:24, 33) Parkont, li pa’nn fer sa promes-la pou bann ki fer larzan pas an premie dan zot lavi. Alor, to bizin touletan rekonesan anver Zeova parski Li donn twa bann kitsoz ki to bizin. Pol ti dir: “Si nou ena manze ek linz, nou pou kontant nou ar sa bann kitsoz-la.”—1 Tim. 6:8.

2^em prinsip Labib: “Fode zame zot gagn traka ek dir: ‘Ki nou pou manze?’ ouswa, ‘Ki nou pou bwar?’ ouswa, ‘Ki nou pou mete?’ Parski tou sa bann kitsoz-la, bann lezot nasion pe fer tou pou gagn sa. Me zot Papa ki dan lesiel kone ki zot bizin tou sa bann kitsoz-la.”—Mat. 6:31, 32.

Kouma sa prinsip-la ed twa? Kan nou ena konfians ki Zeova pou ed nou ek donn nou seki nou bizin, nou pa pou trakase plis ki bizin konsernan lavenir. Par exanp, nou pa pou kontign demann nou-mem, “Ki pou arive si mo sitiasion anpire?” ouswa “Ki mo pou fer si mo pa kapav donn mo fami seki zot bizin?” Eric, ki res Ghana, ti trakase pou sa bann kitsoz-la. Me aster-la, li nepli pans koumsa. Li dir: “Kan nou ena kontantman, sa pa vedir ki nou fer swadizan ki nou pena okenn problem. Olie sa, nou konsantre lor seki nou kapav fer ek nou rekonesan pou seki nou ena mem dan bann sitiasion difisil.”

Seki to kapav fer. Priye Zeova pou bann kitsoz ki to bizin, ek demann Li so sazes. (Zak 1:5) Koz lor to sitiasion ar bann Kretien ki ena matirite, ek esey konpran kouma zot zot inn fer fas ar bann sitiasion koumsa. (Prov. 20:18) Reflesi osi lor kouma Zeova pran twa swin sak zour. Sa pou ed twa pou mwins trakase ek pou konsantre lor bann kitsoz ki to bizin aster-la. (Mat. 6:25-30, 34) Rapel bann parol ki David ti dir: “Enn dimounn drwat gagn boukou maler, me Zeova delivre li ar tousala.”—Ps. 34:19.

3^em prinsip Labib: “Enn dimounn ki ena bon zizman kasiet kan li trouv danze, me enn dimounn ki pena lexperyans kontign ale ek pey bann konsekans.”—Prov. 27:12.

Kouma sa prinsip-la ed twa? Kitfwa souvan lor bann piblisite ek bann rezo sosio, to trouv bann lide kouma to kapav vinn ris bien vit. Ek kan to ena bann problem ekonomik, sa bann lide-la kapav paret bien interesan. Me malerezman, bann ki’nn met zot kas dan bann proze koumsa, zot sitiasion inn anpire. (Prov. 18:11; 1 Tim. 6:9) Bon zizman pou ed twa pou pa rant dan bann piez koumsa.

Seki to kapav fer. Labib dir: “Enn dimounn naif krwar tou seki li tande, me enn dimounn ki ena enn bon zizman reflesi bien lor sak pa ki li fer.” (Prov. 14:15) Alor, to bizin fer bien atansion si enn kikenn dir twa ki to kapav gagn boukou kas bien vit. Fer boukou resers avan ki to pran enn desizion. Fer tou seki to kapav pou ki to pa les to leker inflianse pou met to kas dan bann proze kot to pou bizin fer bann kitsoz malonet.—Prov. 28:6, 20; Zer. 17:9.

4^em prinsip Labib: “Si enn parmi zot anvi aranz enn latour, eski li pa pou asize avan ek kalkile komie sa pou kout li pou gete si li pou ena tou seki bizin pou fini sa?”—Lik 14:28.

Kouma sa prinsip-la ed twa? Kitfwa si to gagn enn travay, sa kapav regle sertin problem me sa kapav osi kree lezot problem. Kan to pe deside si to pou aksepte enn travay ouswa non, to bizin reflesi bien lor so bann lavantaz ek so bann dezavantaz. Lerla, to pou pran enn bon desizion, ek to pou evit bann konsekans ki to kapav gagne si to pran enn desizion san reflesi.

Seki to kapav fer. Pran letan pou reflesi bien kan to trouv enn travay ki interes twa. Par exanp, si to desid pou al viv dan enn lot pei, kitfwa to pou gagn plis kas. Selman, kitfwa to pou bizin plis kas osi pou ki to kapav viv laba. Reflesi lor lefe ki sa pou ena lor to madam ek to bann zanfan si to kit zot, ek ki lefe sa pou ena lor zot lamitie avek Zeova. Anplis, reflesi osi lor lefe ki sa pou ena lor to servis pou Zeova. Eski to pou ankor kapav servi Zeova “avek tou to lavi”?—Lik 10:27.

BANN BIENFE KI NOU GAGNE KAN NOU ENA KONTANTMAN

Si nou aprann sekre pou ena kontantman, nou pou ena plis konfians ki Zeova kontan nou ek ki Li pran nou swin. (Ps. 34:8) Lerla, nou pou ena plis rekonesans pou seki Li donn nou sak zour ek pou lamour ki Li montre anver nou kan Li pran nou swin.

Samuel, ki’nn mansione dan koumansman lartik, ti fer sa lexperyans-la. Li dir: “Apre ki nou ti priye Zeova pou gagn so sazes, mo madam ek mwa ti desid pou retourn dan nou pei, pou refer travay ki nou ti pe fer avan, ek pou okip nou bann zanfan. Aster-la, nou etidie avek sakenn parmi zot regilierman, ek nou amenn zot renion ek predikasion. Ek parski nou plis konsantre nou lor nou servis pou Zeova, sa inn ed mwa pou mo mwins trakase. Nou extra kontan ki nou’nn desid pou retourn dan nou pei.”

Pa bliye ki nou servi enn “Bondie ere” ek ki so lespri sin kapav ed nou pou ena lazwa dan ninport ki sitiasion. (1 Tim. 1:11; Gal. 5:22, 23) Biento, dan lemond nouvo ki Zeova inn promet, pou ena bann bon kitsoz an-abondans ek personn pa pou mank nanye.—Ps. 72:16; 145:16.