Fer To Lamitie Avek To Bann Frer ek Ser Vinn Pli For

1-2. Ki difikilte boukou dimounn gagne?

NOU tou nou bizin bann bon kamarad, bann kamarad ki kontan nou ek ki soutenir nou dan bann bon moman ek bann moman difisil. Anplis, kan nou vinn enn bon kamarad pou lezot, eski sa pa rann nou zwaye? (Zist. 20:35) Pou ki nou kontign servi Zeova ek nou ere, nou bizin kamarad ar bann ki kontan Zeova ek Zezi. (Ps. 119:63) Malerezman, nou viv dan enn lemond kot boukou dimounn gagn difikilte pou fer kamarad ek pou res kamarad ar lezot. Kitfwa sertin parmi nou gagn sa difikilte-la.

² Alor, ki nou bizin fer pou vinn kamarad ar nou bann frer ek ser? Dan lartik avan, nou ti gete kouma nou kapav vinn kamarad avek Zeova ek Zezi. Sertin kitsoz ki nou ti aprann kapav ed nou pou fer nou lamitie ar nou bann frer ek ser vinn pli for. Dan sa lartik-la, nou pou examinn sink kitsoz ki kapav ed nou pou fer kamarad ar lezot ek pou res enn bon kamarad. Me avan, nou pou gete kifer li difisil pou fer kamarad ar lezot ek kouma nou kapav sirmont sa bann difikilte-la.

KIFER LI DIFISIL POU FER KAMARAD AR LEZOT?

3. Ki kitsoz kapav anpes nou pou fer bann bon kamarad, ek kouma nou kapav sirmont sa difikilte-la?

³ Nou pans zis nou-mem. Azordi, bann dimounn pans zis zotmem ek zot pa gagn traka lezot. (2 Tim. 3:1, 2) Selman, si nou ena sa latitid-la, lezot pa pou anvi vinn nou kamarad. Alor, si nou anvi ena bann bon kamarad, nou bizin aprann pou interes nou vremem ar nou bann frer ek ser. Lapot Pol ti dir: “Pa rod zis zot prop lintere, me rod osi lintere lezot.”—Fil. 2:3, 4.

4. Kifer fode pa nou res dan nou kwin? (2 Zan 12) (Get zimaz osi.)

⁴ Nou res dan nou kwin. Si nou tro res dan nou kwin, nou pou strese ek nou pou santi nou malalez ar lezot. Avek letan, sa pou rann nou tris ek sa kapav gat nou lamitie avek Zeova. (Prov. 18:1) Parfwa, li bon ki nou pas inpe letan tousel. Selman, si nou pran labitid pou fer sa, sa pou anpes nou pas letan ar lezot. Par exanp, kitfwa nou kapav koumans pas boukou letan lor bann rezo sosio. Kifer sa li danzere? Parski mem si sa bann dimounn-la kitfwa kontan bann mem kitsoz ki nou, nou pa vremem konn zot. Alor, ki kitsoz kapav ed nou? Nou kapav fer zefor pou zwenn ansam ar bann frer ek ser ek pas letan ar zot. (Lir 2 Zan 12.) Kan nou ansam avek zot, nou pou kapav ankouraz sakenn nou kamarad.—Ebre 10:24, 25.

5. Kifer fode pa nou per pou dir lezot seki nou panse ek seki nou resanti?

⁵ Sertin per pou dir lezot seki zot panse ek seki zot resanti. Labib pa dir ki nou bizin touletan dir lezot tou seki nou panse ouswa resanti. (Prov. 13:3; Ekle. 3:7) Selman, Zeova inn kree nou dan enn fason kot nou bizin exprim nou bann santiman. Alor, si to pa ouver to leker ar lezot, li pou difisil pou to gagn bann bon kamarad. Parkont, si to exprim to santiman ar enn kamarad, kitfwa zot lamitie pou vinn pli for parski li pou trouve ki to fer li konfians. Par exanp, Zezi pa ti per pou dir so bann disip seki li ti pe resanti. (Lik 19:41; Zan 11:35) Sa ti ed li pou ena boukou bon kamarad.—Zan 15:15.

6. Ki nou kapav fer si nou timid? (Get osi lankadre “Ki To Kapav Fer Si To Timid?”)

⁶ Nou timid. Kitfwa sertin parmi nou timid ouswa trakase plis ki bizin lor seki lezot panse lor nou. Si to timid, priye Zeova ek demann Li pou ed twa. Apre sa, azir an-akor avek to lapriyer ek fer zefor pou koz ar lezot. (Fil. 2:13) Reflesi lor bann rezon kifer to kontan to bann frer ek ser, ek fer bann kitsoz ki pou montre zot ki to kontan zot. (Zan 15:12) Par exanp, kan to al renion, to kapav fer enn ti sourir ek dir bonzour enn kikenn ki to pa tro kone. To kapav poz li enn sinp kestion. Par exanp, to kapav demann li, “Kouma to lazourne inn pase?” Apre sa, ekout li bien.

7. Parfwa ki nou resanti, me ki kitsoz li bon nou fer?

⁷ Nou tro fatige pou pas letan ar lezot. Kitfwa nou extra fatige parski nou ena tro boukou kitsoz pou fer toulezour. Akoz sa, nou santi ki nou pena ase letan ouswa lenerzi pou pas letan ar enn kamarad. Li vre ki parfwa nou bizin enn ti moman pou res tousel ek pou repoze. (Ekle. 4:6) Selman, nou bizin ena bann kamarad, ek nou bizin pas letan avek lezot pou gagn bann kamarad. Alor, mem si parfwa nou bien fatige ek nou pa anvi pas letan ar lezot, nou bizin fer zefor pou fer li. Kifer? Parski sa kapav ed twa pou ena bann kamarad ki donn twa lafors ek ki ankouraz twa pou servi Zeova avek lazwa.—Prov. 11:25.

8. (a) Kifer nou bizin fer kamarad ar bann dimounn ki diferan ar nou? (b) Ki nou aprann ar seki lapot Pol ti dir lor so kamarad Timote? (Filipien 2:19-22)

⁸ Nou panse ki ena bien tigit dimounn ki kapav vinn nou kamarad. Kitfwa pena personn dan to lasanble ki ena mem laz ki twa ouswa ki kontan fer bann mem kitsoz ki twa. Selman, parey kouma enn plant ki pou aret grandi si li res dan enn ti po, dan mem fason si nou fer kamarad zis ar bann ki mem laz ki nou, ki kontan bann mem kitsoz ki nou ouswa ki sorti dan mem kiltir ki nou, nou pa pou grandi lor plan spiritiel. Lapot Pol ek Timote ti sorti dan diferan kiltir, me kanmem sa, zot ti bann bon kamarad. Alor, nou gagn boukou bienfe kan nou frekant bann frer ek ser ki sorti dan diferan kiltir ouswa ki pena mem personalite ki nou. (Lir Filipien 2:19-22.) Avek led Zeova, nou pou kapav fer bann bon kamarad.

KOUMA NOU KAPAV VINN ENN BON KAMARAD?

9. Kifer nou bizin fer zefor pou gagn enn kamarad?

⁹ Souvan, nou tann sa: “Pou to gagn enn bon kamarad, to bizin vinn enn bon kamarad.” Sa montre ki nou bizin fer zefor pou gagn bann kamarad. Aster-la, anou get sink kalite ki kapav ed nou pou vinn enn bon kamarad ek pou res kamarad ar lezot: (1) Nou bizin fidel, (2) nou bizin montre nou rekonesans, (3) nou bizin montre lamour, (4) nou bizin pardone, ek (5) nou bizin zenere.

10. Kifer nou bizin ena lamour fidel anver nou bann kamarad, ek kouma nou kapav fer sa?

¹⁰ Nou bizin fidel. Zeova ‘ena lamour fidel an abondans.’ (Ex. 34:6) Li pa abandonn so bann kamarad mem si zot inparfe. Alor, pou ki nou fer Zeova plezir, nou bizin fidel anver nou bann kamarad. (Mish. 6:8) Savedir ki nou bizin res pros ar nou bann kamarad ki li dan bann bon moman ouswa bann moman difisil. (Prov. 18:24; Rom. 12:15) Anplis, nou pa pou dir bann move kitsoz lor zot. Olie sa, nou pou koz lor zot bann zoli kalite. (Ps. 15:3) Kan nou fidel anver nou bann kamarad, zot osi zot pou fidel anver nou. Ek kitfwa, enn zour zot kapav mem riske “zot prop lavi” pou ed nou!—Rom. 16:3, 4.

11. (a) Kifer nou bizin montre rekonesans pou seki nou bann kamarad fer pou nou? (b) Kouma Zezi ti montre ki li inportan ki nou ena rekonesans? (Lik 17:11-18) (Get zimaz osi.)

¹¹ Nou bizin montre rekonesans. Si nou anvi ena bann bon kamarad, li inportan ki nou montre rekonesans anver zot. Kifer? Parski bann dimounn pa kontan vinn kamarad ar enn kikenn ki ingra. Akoz sa, kan enn kamarad fer enn bon kitsoz pou nou, nou bizin touletan montre nou rekonesans ek remersie li. (Lir Lik 17:11-18; Kol. 3:15) Kan nou fer sa, sa ogmant lamour ki nou ena pou sakenn nou kamarad ek nou lamitie pou vinn pli for.

12. Ki nou aprann ar lexanp Zeova ek Zezi? (Zan 11:3, 5, 33-36; 13:1)

¹² Nou bizin montre lamour. Si nou anvi ena bann bon kamarad, nou bizin montre ki nou kontan zot. (2 Kor. 6:12, 13; 1 Pier 4:8) Zeova ek Zezi, zot enn zoli lexanp dan sa domenn-la. Mem si Zezi ti kone ki so Papa kontan li, sirman li ti extra kontan kan Zeova ti dir li “mo Garson ki mo bien kontan.” (Lik 3:22) Dan Labib, Zeova pa zis dir ki Li kontan nou, me Li osi montre ki Li kontan nou. Ek sa fer nou kontan Zeova plis. (Zer. 31:3) Zezi osi ti montre so bann kamarad ki Li kontan zot. Labib dir ki li “ti kontign kontan zot ziska lafin.” (Lir Zan 11:3, 5, 33-36; 13:1.) Ek sa ti pous bann-la pou fer parey kouma li. Par exanp, lapot Pier ti montre ki li kontan Zezi.—Zan 21:15-17.

13. Kouma nou kapav montre ki nou kontan nou bann kamarad?

¹³ Nou kapav imit Zeova ek Zezi kan nou dir nou bann kamarad ki nou kontan zot. (Rom. 12:10; 1 Pier 1:22) Nou felisit zot pou bann zoli kalite ki zot ena ek nou touletan pre pou ed zot. Ek parski nou kontan zot, nou pa pou ezite pou donn zot bann konsey si nou trouv zot pe al tom dan enn piez. (Prov. 27:9) Wi, kan nou montre nou bann kamarad ki nou kontan zot, nou lamitie avek zot pou vinn pli for.

14. Kifer nou bizin pardonn nou bann kamarad?

¹⁴ Nou bizin pardone. Nou bizin pre pou pardonn nou bann kamarad si nou anvi res enn bon kamarad ar zot. Zeova pa atann ki nou parfe, alor nou osi fode pa ki nou atann ki nou bann kamarad zot parfe. Parfwa, mem enn bon kamarad kapav bles nou. (Ekle. 7:21, 22) Kan sa arive, eski nou pou imit Zeova ek pre pou pardonn li? Kitfwa sa inn pran twa boukou letan pou to vinn kamarad ar sa dimounn-la. Alor, si to pa fer zefor pou “kontign fer tou seki [to] kapav pou favoriz lape,” to kapav perdi enn zoli lamitie. (Rom. 14:19) Kan to pa pardonn lezot, to pou vinn amer ek personn pa pou anvi vinn kamarad ar twa. Parkont, kan to pardonn lezot, to pou ena bann bon kamarad ki kontan twa.—Prov. 17:9.

15. Kan to zenere, ki lefe sa ena lor to lamitie avek lezot?

¹⁵ Nou bizin zenere. Pou to vinn enn bon kamarad, to bizin zenere. Savedir to bizin aksepte pou pas letan ar to bann kamarad ek partaz seki to ena avek zot. (Prov. 11:25; Lik 6:38) Par exanp, to kapav donn zot enn lift, pran letan pou ekout zot kan zot pe ouver zot leker, ouswa zot kapav manz enn ti manze ansam. Kan to fer bann kitsoz koumsa pou to bann kamarad, zot lamitie pou vinn pli for. Ek si to fer tou bann kitsoz ki nou’nn gete dan sa lartik-la, to pou touletan ena bann bon kamarad.

KONTIGN KONTAN TO BANN KAMARAD

16. Kifer nou bizin bann bon kamarad?

¹⁶ Nou bizin bann bon kamarad. Zot rann nou zwaye, zot ed nou pou kontign servi Zeova avek fidelite ek zot rekonfort nou “touletan,” mem dan “bann moman difisil.”—Prov. 17:17; 2 Kor. 7:5-7.

17. Kifer li posib ki nou ena bann lamitie ki pou dire pou touletan? (Get lankadre “Zot Ti Vinn Bann Bon Kamarad.”)

¹⁷ Kontign fer tou seki to kapav pou sirmont bann difikilte ki kapav anpes twa pou fer kamarad ar lezot. Kontign ena rekonesans pou bann kamarad ki to deza ena. Nou bien kontan ki Zeova inn kree nou avek dezir pou fer kamarad ar lezot ek pou res bon kamarad ar zot. Nou sir ki lamitie ki nou ena ar bann kamarad ki kontan Zeova pou dire pou touletan!