18-24 ZANVIE 2027
KANTIK 28 Gagn Lamitie Zeova
Fer To Lamitie Avek Zeova ek Zezi Vinn Pli For
“Vinn pros ar Bondie, ek li pou vinn pros ar zot.”—ZAK 4:8.
PWIN PRINSIPAL
Dan sa lartik-la, nou pou gete seki nou kapav fer pou ki nou kontign ena enn bon lamitie avek Zeova ek Zezi.
1. Kouma nou kone ki Zeova anvi ki bann dimounn aprann konn Li ek kontan Li?
ZEOVA inn kree nou dan so resanblans. Alor, nou kapav vinn so bann kamarad.a Li anvi ki bann dimounn aprann konn Li ek kontan Li. Ofet, Zeova konn tou bann dimounn ki kontan Li, ek Li kontan zot Li osi. Li ekout zot lapriyer, ek Li osi donn zot bann konsey ek Li ed zot. (Ps. 139:1-4) Nou extra kontan ek rekonesan ki sakenn parmi nou kapav vinn kamarad avek Zeova!
2. Kifer nou kapav sir ki li posib pou bann dimounn inparfe vinn kamarad Zeova?
2 Kan Adan ek Ev ti fer pese, zot ti perdi faver Zeova ek zot ti nepli so bann kamarad. Akoz sa, nou tou ki bann desandan Adan ek Ev, nou’nn vinn bann “lennmi Bondie.” (Rom. 5:10) Alor, kitfwa nou panse ki li inposib pou nou vinn kamarad Zeova. Selman, rapel seki Zezi ti dir: “Pou Bondie tou kitsoz posib.” (Mark 10:27) Me ki kitsoz Zeova inn fer pou ki nou vinn so kamarad? Li’nn donn lavi so Garson ki Li bien kontan an sakrifis pou nou. Sa montre ki kantite Li vremem anvi ki nou vinn so kamarad, pa vre! (1 Zan 4:9, 10) Nou vremem rekonesan pou seki Zeova ek Zezi inn fer pou ki nou vinn zot kamarad.—Zan 15:9, 10.
3. Kifer nou pa kapav konpar lamitie ki nou ena avek Zeova ar lamitie ki nou ena avek enn dimounn?
3 Nou pa kapav konpar lamitie ki nou ena avek Zeova ar lamitie ki nou ena avek enn dimounn. Kifer nou dir sa? Parski Zeova Limem Bondie Tou-Pwisan, Li nou Kreater, ek Li bien pli siperyer ki nou. Me kanmem sa, Li anvi ki nou vinn so kamarad, ek sa se enn extra zoli kado. (Ps. 15:1) Dan sa lartik, nou pou gete kifer nou kapav sir ki Zeova anvi ki nou vinn so kamarad. Apre sa, nou pou gete kifer Zeova Li pli bon kamarad ki nou kapav ena. Ek an dernie, nou pou examine seki nou bizin fer pou ki nou kontign ena enn bon lamitie avek Zeova ek Zezi.
ZEOVA ANVI KI NOU VINN SO BANN KAMARAD
4. Akoz nou fer bann erer, ki kitsoz kitfwa nou kapav panse?
4 Nou kone ki Zeova anvi ki bann dimounn gagn lavi pou touletan. (Rom. 6:23) Selman, parfwa, akoz nou inparfe ek nou fer boukou erer, nou kapav panse ki Zeova pa kontan nou ek Li pa anvi vinn nou Kamarad. Anou gete seki kapav ed nou pou ki nou sir ki Zeova anvi vinn nou Kamarad.
5. Kifer nou kapav sir ki Zeova anvi vinn nou Kamarad? (Get zimaz osi.)
5 Nou sir ki Zeova anvi vinn nou Kamarad parski Li’nn donn lavi so Garson an sakrifis pou sap nou. Se enn pri bien for ki Li’nn peye. (Zan 3:16) Ofet, zis apre ki Adan ek Ev inn fer pese, Zeova inn pran dispozision pou sap tou zot bann desandan. (Zen. 3:15) Mem si nou tou nou’nn erit pese, zame Zeova inn aret kontan nou. (Zer. 31:3) Alor, sa montre ki Zeova vremem anvi vinn nou Kamarad.
Zeova ti avoy so Garson lor later pou donn so lavi an sakrifis pou ki nou kapav vinn So kamarad (Get paragraf 5)
6. Ki kitsoz Zeova fer pou ki nou vinn enn kamarad pros ar Li? (Zak 4:8)
6 Zeova pa zis dir nou vinn so kamarad, Li fer plis ki sa. Li ankouraz nou pou vinn enn kamarad bien pros ar Li. (Lir Zak 4:8.) Li kone ki nou inparfe. Me kanmem sa, Li kontan nou ek Li ed sakenn parmi nou pou aprann konn Li bien. (Zan 6:44) Li ankouraz nou pou koz ar Li souvan, pou ouver nou leker, ek pou dir Li seki nou panse ek seki nou resanti, mem bann kitsoz ki kitfwa nou pa anvi dir lezot. (Lam. 2:19; Fil. 4:6, 7) Li pa zis ekout nou bann lapriyer, me Li osi reponn nou bann lapriyer. (Mat. 7:7, 8) Alor, nou pena okenn dout ki Zeova anvi ki nou vinn so kamarad. Aster-la, anou gete kifer Zeova Li pli bon Kamarad ki nou kapav ena.
KIFER ZEOVA LI PLI BON KAMARAD KI NOU KAPAV ENA?
7. Ki kalite Zeova montre anver so bann kamarad, ek kouma sa rasir nou? (Exod 34:6)
7 Zeova montre so lamour fidel. Zeova kontan tou dimounn. Selman, Li tret so bann kamarad dan enn fason spesial, setadir Li montre lamour fidel anver zot. (Ps. 4:3) Sa rasir nou, pa vre! Sa montre ki Zeova zame pa pou aret kontan so bann kamarad. Plizir fwa, Labib dir ki Zeova ena lamour fidel an-abondans. (Lir Exod 34:6.) Ki savedir? Kan Zeova vinn nou kamarad, Li pa abandonn nou ek Li kontign kontan nou mem si nou inparfe ek nou fer bann erer. Akoz Li bien kontan nou, sa pous Li pou pardonn nou ek ed nou.—Ps. 103:11, 12.
8. Kouma Zeova ti montre ki zame Li pa ti bliye so bann kamarad Abraam ek David? (Get zimaz osi.)
8 Zeova zame pa bliye so bann kamarad. Par exanp, plizir santenn lane apre ki Abraam ti mor, Zeova ti ankor apel li “mo kamarad.” (Iza. 41:8) Anplis, Zeova ti promet Lerwa David ki enn parmi so bann desandan ti pou regne pou touletan. (1 Kro. 17:11-17) Nou kone ki Zeova zame ti bliye sa promes-la. Kifer? Parski bann santenn lane apre, Zeova ti dir ki Zezi ti pou vinn lerwa parey kouma so anset David. (Lik 1:32, 33) Sa promes-la ti realize an 1914 kan Zeova ti etabli Zezi, ki ti Lemesi, kouma lerwa dan lesiel.
Zeova zame pa bliye so bann kamarad (Get paragraf 8-9)c
9. Ki leson nou aprann ar lexanp Ann? (Get zimaz osi.)
9 Kitfwa to pe panse: ‘Abraam ek David ti spesial pou Zeova. Mwa mo enn dimounn ordiner.’ Si to ena sa santiman-la, reflesi lor seki Zeova ti fer pou Ann. Li ti marye ar Elkana ki ti ena enn lot madam ki ti apel Penina. Ann pa ti kapav gagn zanfan ek Penina ti pe rann so lavi amer. (1 Sam. 1:4-7) Kitfwa Ann ti pe demann limem si Zeova inn bliye li. Me kanmem sa, li ti devid so leker ar Zeova dan lapriyer. (1 Sam. 1:11, 15) Zeova ti montre ki Li ti enn bon kamarad pou Ann parski Li pa ti zis ekout so lapriyer. Li ti reponn so lapriyer ek Li permet li gagn bann zanfan.b Ann ti tom ansint ek li ti donn nesans enn garson, ki ti apel Samiel. (1 Sam. 1:20) Plitar, Ann ti osi gagn trwa garson ek de tifi. (1 Sam. 2:21) Alor, nou kapav sir ki Zeova montre so lamour fidel anver tou so bann kamarad, mem anver bann ki dekouraze ek ki panse ki zot pena valer.—Zer. 31:3.
10. Konpare ar konsey ki bann dimounn donn nou, kifer bann konsey Zeova zot meyer? (Psom 119:98-100)
10 Zeova so bann konsey parfe. Bann instriksion ek bann konsey ki Zeova donn nou ed nou pou gagn sazes. Zeova Limem pli bon Ansegnan ki nou kapav ena! (Lir Psom 119:98-100.) Li konn tou kitsoz ek Li anvi seki pli bon pou nou. (Iza. 48:17, 18) Azordi, kan bann dimounn bien bizin konsey, zot mem aksepte pou pey bann dimounn ki inparfe pou gagn bann konsey lor kouma zot kapav reisi dan zot lavi. Selman, konpare ar zot, nou ena enn Kikenn ki kapav donn nou bann meyer konsey. Se Zeova, nou Bondie Tou-Pwisan, ek nou kapav priye pou demann Li bann konsey. So bann konsey parfe. Li touletan pre pou ed nou ek nou pa bizin peye pou gagn so konsey. Zeova zame Li dormi, zame Li fatige, ek Li touletan ekout nou kan nou priye Li. (Ps. 121:1-4) Ek nou touletan gagn bann bienfe kan nou swiv so bann konsey.—Ps. 1:2, 3.
11. Ki kitsoz montre ki Zeova Li enn Kamarad ki bien zenere?
11 Zeova Li zenere. Li montre sa kalite-la dan tou seki Li fer. Par exanp, Li’nn donn nou lavi ek tou seki nou bizin pou ki nou kapav profit lavi. (Ps. 145:16; Zist. 14:17) Anplis, Li bien zenere parski Li pa ezite pou donn nou sazes ki nou bizin pou pran bann bon desizion kan nou gagn bann difikilte. (Zak 1:5) Ek Li touletan pre pou pardonn nou kan nou fer pese. Selman, Li fer boukou plis ki sa. Mem si nou inparfe, Li montre ki nou ena boukou valer pou Li kan li tret nou avek lamour ek respe. Anplis, Zeova inn donn nou pli gran kado ki ena, setadir sakrifis so Garson Zezi. Gras-a sa kado-la, nou’nn gagn posibilite pou viv pou touletan. Vremem, Zeova Li enn Kamarad ki bien zenere! Alor, ki nou kapav fer pou res so kamarad pou touletan?
SEKI NOU BIZIN FER POU KI NOU KONTIGN ENA ENN BON LAMITIE AVEK ZEOVA
12. Ki nou bizin fer pou ki nou ena enn bon lamitie ar Zeova? (Ebre 11:6)
12 Zeova atann ki nou fer tou seki nou kapav pou ki nou kontign ena enn bon lamitie avek Li. (Lir Ebre 11:6.) Pou ki nou vinn so kamarad, nou bizin ena lafwa dan Li ek krwar ki Li pou rekonpans nou pou nou lafwa. Me ena ankor trwa kitsoz ki nou bizin fer si nou anvi res so bon kamarad.
13. Ki savedir ena enn gran respe pou Zeova?
13 Nou bizin ena enn gran respe pou Zeova. Psom 25:14 dir: “Se bann ki ena enn gran respe pou Zeova ki vinn so bann kamarad bien pros.” Kan nou ena enn gran respe pou Zeova ek ki nou bien kontan Li, zame nou pou fer bann kitsoz ki pou fer so leker fermal. Akoz sa, nou rod so bann konsey dan Labib. (Prov. 3:5, 6) Ek kan nou swiv bann konsey ki nou bon Kamarad, Zeova donn nou, nou pou pran bann desizion ki pou ed nou kontign res so kamarad. Se akoz sa ki Proverb 9:10 dir ki kan nou ena enn gran respe pou Zeova, se “samem koumansman lasazes.”
14. Sit sertin fason kouma nou kapav montre ki nou fidel anver Zeova.
14 Nou bizin fidel ar Zeova. Parey kouma Zeova fidel anver so bann kamarad, Li atann ki nou fidel anver Li. (2 Sam. 22:26; Prov. 3:32) Nou montre ki nou fidel anver Zeova dan diferan fason. Premierman, nou met Zeova an premie dan nou lavi. Deziemman, nou swiv lexanp Zezi ek nou koz lor Zeova ek so bann zoli kalite. (Mat. 28:19, 20) Trwaziemman, nou montre nou fidelite kan nou kontign res fidel anver Zeova malgre lopozision. Anplis, nou pa pou les nanye gat nou lamitie ar nou Kamarad Zeova ki touletan fidel ar nou.
15. Kouma nou kapav montre lamour fidel anver lezot?
15 Nou bizin montre lamour fidel anver lezot. Zeova anvi ki so bann kamarad imit so lexanp ek montre lamour fidel anver lezot. Sa vedir ki nou bizin montre lamour fidel anver nou bann frer ek ser, ki zot osi zot bann kamarad Zeova. Alor, fode pa nou bliye bann bon kitsoz ki lezot inn fer pou nou. Nou bizin kontign kontan nou bann kamarad ek ed zot. Nou bizin osi zenere ek montre zantiyes anver zot. Zeova anvi ki nou konsider fidelite kouma enn kalite ki bien inportan ek ki ena boukou valer pou nou. (Mish. 6:8) Dan prosin lartik, nou pou koz lor lezot fason kouma nou kapav montre lamour anver lezot. Me aster-la, anou gete kouma nou kapav ena enn bon lamitie avek Zezi.
SEKI NOU BIZIN FER POU KONTIGN ENA ENN BON LAMITIE AVEK ZEZI
16-17. (a) Kouma nou kone ki Zezi anvi ki nou vinn so bon kamarad? (b) Kouma lamitie ki nou ena avek Zezi li diferan ar lamitie ki nou ena avek Zeova?
16 Zezi inn montre ki li anvi vinn nou kamarad. Kouma li’nn fer sa? Avan mem nou pran nesans, li’nn donn so lavi pou nou. Li dir: “Personn pena enn pli gran lamour ki sa, ki enn kikenn donn so lavi pou so bann kamarad.” (Zan 15:13) Se vremem enn kitsoz extraordiner ki Zezi inn fer pou montre ki li anvi vinn nou kamarad!
17 Zezi invit sakenn parmi nou pou vinn so bon kamarad. (Mat. 11:28-30; Zan 15:15) Selman, lamitie ki nou ena avek Zezi li bien diferan ar lamitie ki nou ena avek Zeova. Kifer? Parski, par exanp, nou pa priye Zezi ouswa ador li. (Mat. 4:10; 6:9) Selman, nou rekonesan pou tou seki li’nn fer pou nou ek akoz sa, nou anvi vinn so bon kamarad.
18. Ki Zezi pe fer pou nou?
18 Zezi li nou kamarad ek li fer boukou kitsoz pou nou. Par exanp, profet Izai ti predir ki Zezi ti pou enn “Konseye Extraordiner,” enn “Papa Eternel,” ek “Prins Lape.” (Iza. 9:6) Zezi enn “Konseye Extraordiner,” parski li donn nou bann bon konsey ki kapav sap nou lavi. Zeova ti osi dir ki Zezi ti pou vinn enn “Papa Eternel.” Sa vedir ki Zeova inn donn Zezi pouvwar pou donn bann dimounn posibilite pou viv pou touletan. (Zan 11:25, 26) Li konpran nou bann febles ek seki nou resanti parski li’nn “pas par leprev dan tou domenn.” (Ebre 4:15) Ek parski Zezi li “Prins Lape,” nou anpe ar nou Papa Zeova ek nou kapav vinn kamarad ar Li. Wi, Zezi vremem enn bon kamarad!
19. Ki nou bizin fer pou ki nou vinn kamarad Zezi? (Zan 15:14) (Get zimaz osi.)
19 Ki nou bizin fer pou ki nou vinn kamarad Zezi? (1 Pier 1:8) Nou bizin etidie bann Levanzil pou aprann seki li’nn dir ek fer. Lerla, kan nou ena pou pran enn desizion, nou pou swiv so lexanp ek so bann konsey. Anplis, nou kone ki se Zezi ki pe diriz bann lasanble ek li servi bann ansien pou pran nou swin. (Lir Zan 15:14.) Alor, nou montre ki nou respekte Zezi so lotorite kan nou obeir bann linstriksion ki bann ansien donn nou. (Efe. 4:8; Ebre 13:17) Ek kan nou gagn enn responsabilite dan lasanble, nou fer zefor pou donn nou best. Zezi trouv tou seki nou fer pou vinn so kamarad, ek sa ena boukou valer pou li.
Nou montre ki nou bann kamarad Zezi kan nou donn nou best kan nou gagn enn responsabilite dan lasanble (Get paragraf 19)
20. Kan to kone ki to kamarad ar Zeova ek Zezi, ki to resanti?
20 Li vremem enn gran privilez pou vinn kamarad avek nou Bondie Tou-Pwisan Zeova ek so Garson Zezi! Zeova Li nou pli bon Kamarad parski Li kontan nou, Li ekout nou lapriyer ek Li reponn zot. Anplis, Zeova ek Zezi donn nou tou seki nou bizin pou ki nou kontign res zot bon kamarad. (Mat. 5:3) Wi, zot lamitie ena boukou valer pou nou ek nou anvi res zot kamarad pou touletan!
KANTIK 31 Mars ar Bondie!
a Zeova pa’nn kree bann anz ek bann imin parski Li ti bizin bann kamarad. Olie sa, Li ti anvi ki zot vinn so bann kamarad parski Li kontan zot.—1 Zan 4:8.
b Azordi, nou pa atann ki Zeova fer enn mirak pou reponn nou lapriyer, kouma par exanp geri nou kan nou malad, parey kouma Li ti fer pou sertin serviter dan lepase.
c DESKRIPSION ZIMAZ: Abraam, Ann ek Lerwa David ki ti ena lesperans ki Zeova pou resisit zot lor later, pe deboute ansam ar bann serviter Zeova ki dan nou lepok.