Anou honore Jéhovah kan nou manifesté dignité

“Seki [Jéhovah] faire li dignité ek enn grand beauté.”—PS. 111:3.

1, 2. (a) Couma ou pou defini mot “dignité”? (b) Ki bann question nou pou examiné dan sa lartik-la?

KAN ti demann Madison, enn tifi dix an ki li comprend par mot “digne,” desuite li ti reponn: “Bien habillé.” Kitfois sa tifi-la pa ti koné ki la Bible dire ki Bondié Li enn kikenn ki’nn ‘habille-Li ar dignité.’ (Ps. 104:1) Pou bann dimoune, manifesté dignité parfois sa vedir ki zot bien habillé. Par exemple, l’apotre Paul ti souhaité ki bann femme chretien “habille[-zot] bien, avek modestie ek bon sens, pa avek bann fason tresse cheveux, ni avek l’or, ou-soit perle ou-soit bann linge ki coute cher.” (1 Tim. 2:9) Mais enn conduite digne ki honore ‘dignité ek grand beauté Jéhovah,’ al pli loin ki enn bon l’habillement.—Ps. 111:3.

² Dan la Bible, mot hébreu ki’nn traduire par “dignité” kapav aussi traduire par “enn grand beauté,” “majesté,” “la gloire,” ek “l’honneur.” Dapré enn dictionnaire, “dignité” vedir “respé ki nou bizin ena envers enn dimoune, enn kitsoz, ou-soit envers nou-mem.” Personne pa merite gagne pli grand l’honneur ek respé ki Jéhovah Li-mem. Alors, en tant ki bann serviteur Jéhovah, nou manifesté dignité par nou parole ek nou action. Mais kifer bann dimoune ena capacité pou agir avek dignité? Couma li clair ki Jéhovah ena dignité ek enn grand beauté? Ki l’effet dignité Bondié bizin ena lor nou? Ki Jésus Christ kapav enseigne nou lor fason ki nou bizin manifesté sa qualité-la? Ek couma nou kapav manifesté enn dignité ki honore Bondié?

Kifer nou ena capacité pou agir avek dignité

3, 4. (a) Couma nou bizin reagir ar dignité ki Bondié inn donne nou? (b) Lor kisannla prophetie ki trouve dan Psaume 8:5-9 appliké? (Guette note.) (c) Kisannla Jéhovah ti donne dignité dan le passé?

³ Bondié inn faire bann dimoune dan so ressemblance, alors tou dimoune ena capacité pou agir avek dignité. Jéhovah ti donne l’honneur premier zom kan Li ti donne li responsabilité pou prend soin la terre. (Gen. 1:26, 27) Mem kan bann dimoune ti nepli parfait, Jéhovah ti confirme responsabilité ki Li ti donne zot en rapport avek la terre. Kan Li’nn faire sa, Bondié encore toujours mette dignité couma enn “couronne” lor bann dimoune. (Lire Psaume 8:5-9.)a Sa dignité ki Bondié inn donne nou-la bizin faire nou reagir dan enn fason ki digne—nou bizin loué so grand nom avek respé ek dignité.

⁴ Jéhovah inn donne enn certaine dignité surtout bann ki offert Li enn service sacré. Bondié ti donne Abel dignité kan Li ti accepté so sacrifice ek Li ti rejette seki pou so frere Caïn. (Gen. 4:4, 5) Moïse ti gagne l’ordre pou ‘mette inpé so dignité’ lor Josué, ki ti bizin remplace li pou dirige nation Israël. (Nomb. 27:20) Concernant Salomon, garson David, la Bible dire: “Jéhovah ti contigne faire Salomon vinn extra grand devant lizié tou bann Israélite ek Li ti mette lor li enn dignité royal ki jamais avant okenn le roi en Israël pa ti’nn ena.” (1 Chron. 29:25) Bondié pou donne enn dignité special bann chretien oint ki ressuscité, ki finn annonce avek fidelité “la gloire beauté so royauté.” (Ps. 145:11-13) Enn grand la foule “lezot brebis” Jésus Christ ki pé contigne augmenté lor la terre, zot aussi zot ena privilege pou prend part dan sa l’activité ki rempli ar dignité-la, setadir pou donne Jéhovah louange.—Jean 10:16.

Nou trouve bien dignité ek grand beauté Jéhovah

 5. Ki grandeur dignité Jéhovah ena?

⁵ Dan enn cantik ki montré ki quantité bann dimoune tipti comparé ar grandeur Bondié, David ti chanté: “Ah Jéhovah nou Seigneur, to nom vrai-mem bien grand partout lor la terre, pé raconte to dignité dan bann place pli haute ki le ciel!” (Ps. 8:1) Jéhovah Li-mem pli grand ek pli digne dan l’univers depuis l’eternité ziska l’eternité; Li ti existé avant creation “le ciel ek la terre” ek Li pou contigne existé mem apré grand realisation so projet pou faire la terre vinn enn paradi ek pou faire bann dimoune vinn parfait.—Gen. 1:1; 1 Cor. 15:24-28; Rév. 21:1-5.

 6. Kifer enn psalmiste ti dire ki Jéhovah habille-Li ar dignité?

⁶ Enn psalmiste ki ti ena la crainte pou Bondié ti surement bien touché kan a-soir li ti observe grandeur enn le ciel trankil ki rempli ar zetoile, coumadir bann “bijou” ti pé brillé la-haut! Sa psalmiste-la ti bien impressionné pou trouve fason extraordinaire ki Bondié inn “tal le ciel couma la toile enn la tente,” ek li ti decrire Jéhovah couma enn kikenn ki’nn habille-Li ar dignité a cause so bann capacité extraordinaire pou crée. (Lire Psaume 104:1, 2.) Nou trouve dignité ek grand beauté nou Createur tout-puissant ki invisible dan tou seki Li’nn faire ki visible.

7, 8. Concernant dignité ek beauté Jéhovah, ki preuve nou trouvé dan l’univers?

⁷ Anou prend l’exemple galaxie la Voie lactée. Dan sa grand l’espace kot ena bann zetoile, bann planete, ek bann systeme solaire-la, planete la Terre parette bien tipti, li pareil couma enn la grain di-sable lor enn grand la plage ki pena finition. Ou rann-ou compte, zis dan sa galaxie-la tousel ena plus ki 100 milliard zetoile! Si ou kapav compte enn zetoile chaque seconde sans arreté pendant 24 heure, sa pou prend ou plus ki 3,000 an pou compte 100 milliard zetoile.

⁸ Si dan la Voie lactée tousel ena 100 milliard zetoile, ki nou kapav dire lor le reste l’univers? Bann astronome supposé ki la Voie lactée li kapav enn parmi sa 50 milliard ou-soit mem 125 milliard galaxie ki existé dan l’univers. Ki quantité zetoile ena dan l’univers entier? Reponse sa question-la surement depasse tou seki nou l’esprit kapav comprend. Pourtant, Jéhovah “compte quantité zetoile ki ena; Li appel zot tou par zot nom.” (Ps. 147:4) Asterla ki ou’nn comprend dan ki sens Jéhovah habille-Li avek dignité ek enn grand beauté, eski sa pa pousse ou pou loué so grand nom?

 9, 10. Couma di-pain loué sagesse nou Createur?

⁹ Apré ki nou’nn examine seki ena dan le ciel, asterla, anou baisse nou lizié ek considere enn kitsoz ki parette bien simple: di-pain. Jéhovah Li pa zis “Createur le ciel ek la terre,” mais Li aussi “sa Kikenn ki donne di-pain bann ki gagne faim-la.” (Ps. 146:6, 7) Nou trouve ‘dignité ek grand beauté’ Bondié dan bann kitsoz extraordinaire ki Li’nn crée, parmi ena bann plante ki servi pou faire di-pain. (Lire Psaume 111:1-5.) Jésus ti enseigne so bann disciple sa la priere-la: “Donne nou nou di-pain pou zordi.” (Mat. 6:11) Dan le passé, di-pain ti enn mangé de base pou beaucoup peuple, pou bann Israélite aussi. Mem si nou considere di-pain couma enn mangé simple, bann reaction chimik ki transforme bann ingredient de base ek faire li vinn enn di-pain ki bon pou mangé, li pa simple ditou.

¹⁰ Dan lepok ki ti ecrire la Bible, bann Israélite ti servi la farine di-blé ou-soit l’orge ek de l’eau pou faire di-pain. Parfois zot ti ajoute levain aussi. Kan melange sa bann ingredient simple-la, sa produire enn quantité substance chimik ki ena enn reaction sakenn lor so camarade, ek ziska ler nou pa comprend exactement couma sa arrivé. En plus, fason ki nou lekor digere di-pain c’est aussi enn lot kitsoz ki compliké. Nou pa etonné ki enn psalmiste ti chanté: “To’nn faire beaucoup kitsoz, o Jéhovah! To’nn faire zot tou avek sagesse”! (Ps. 104:24) Eski ou aussi ou envie loué Jéhovah pareil couma li?

Ki l’effet dignité ek grand beauté Bondié ena lor ou?

11, 12. Kan nou medite lor bann kitsoz extraordinaire ki Bondié inn crée, ki l’effet sa kapav ena lor nou?

¹¹ Nou pa bizin ki nou bann astronome pou trouvé ki enn le ciel rempli ar zetoile a-soir, li joli ek li extraordinaire, ni ki nou bann chimiste pou nou apprecié di-pain. Mais pou nou apprecié grandeur nou Createur, nou bizin prend le temps pou medite lor seki Li’nn crée. Ki l’effet enn meditation coumsa kapav ena lor nou? Mem l’effet ki kan nou medite lor seki Jéhovah inn faire dan lezot domaine.

¹² Concernant bann grand action ki Jéhovah ti faire pou So peuple, David ti chanté: “Mo pou prend compte beauté extraordinaire to dignité ek bann kitsoz extraordinaire ki to’nn faire.” (Ps. 145:5) Nou montré ki nou interessé ar sa bann kitsoz ki Jéhovah inn faire-la kan nou etudié la Bible ek nou prend le temps pou medite lor seki nou lire ladan. Ki l’effet sa meditation-la ena lor nou? Nou l’appreciation pou dignité ek grand beauté nou Bondié augmenté. Lerla, pena doute ki pareil couma David, nou envie loué Jéhovah ek dire: “En seki concerne to grandeur, mo envie annonce li.” (Ps. 145:6) Kan nou medite lor bann kitsoz extraordinaire ki Jéhovah inn faire, sa bizin fortifié nou relation avek Li ek pousse nou pou koz lor Li ar lezot avek enthousiasme ek zele. Eski ou pé annonce la bonne nouvelle avek zele ek aide bann dimoune pou apprecié dignité, beauté ek la gloire Jéhovah?

Jésus reflete dignité Jéhovah dan enn fason parfait

13. (a) Dapré Daniel 7:13, 14, ki Jéhovah ti donne so Garson? (b) En tant ki le Roi, couma Jésus traite bann dimoune ki li dirigé?

¹³ Jésus Christ, Garson Bondié, ti preche la bonne nouvelle avek zele ek li ti honore Jéhovah, so Papa ki dan le ciel, ki ena dignité ek la gloire. Jéhovah ti donne enn dignité special so Garson ki Li ti’nn crée direct kan Li ti donne li ‘domination ek royaume.’ (Lire Daniel 7:13, 14.) Pourtant, Jésus li pa enn kikenn ki ena l’orgueil ni enn kikenn ki garde so distance. Au contraire—li enn le Roi ki ena compassion, ki comprend limite bann dimoune lor ki li dirigé ek li traite zot avek dignité. Anou prend enn l’exemple ki montré couma Jésus, en tant ki le Roi ki Bondié inn choisir, ti traite bann dimoune ki li ti joinde, surtout bann dimoune ki lezot ti rejeté ek meprisé.

14. Couma dan le passé bann Israélite ti considere bann lepreux?

¹⁴ Dan le passé, bann dimoune ki ti ena la lepre ti bien souffert ek souvent ti konn enn la mort bien lente. Zot ti trouve tou bann partie zot lekor affecté tigit par tigit par sa maladie-la. Bann dimoune ti considere couma enn kitsoz preské impossible pou soigne enn lepreux, pareil couma li ti impossible pou ressuscite enn dimoune mort. (Nomb. 12:12; 2 Rois 5:7, 14) Dapré la Loi, bann lepreux ti bann dimoune impur; bann dimoune ti reste loin ar zot ek ti rejette zot. Kan zot ti kosté ar bann dimoune, bann lepreux ti bizin criyé fort: “Impur, impur!” (Lév. 13:43-46) Enn lepreux ti coumadir enn dimoune mort. Dapré livre bann rabbin, enn lepreux ti gagne droit vinn zis enn distance environ 1 metre 80 ar enn dimoune. Bann dimoune raconté ki, kan enn certain chef religieux ti trouve enn lepreux, mem si li ti loin, chef religieux-la ti envoye li coute ros pou li reste loin.

15. Couma Jésus ti reagir kan enn lepreux ti kosté ar li?

¹⁵ Mais li interessant pou remarké couma Jésus ti reagir kan enn lepreux ti kosté ar li ek ti suppliye li pou gueri li. (Lire Marc 1:40-42.) Au lieu ki li ti faire lepreux-la allé, li ti montré beaucoup compassion pou sa missié ki lezot ti rejeté-la ek li ti traite li dan enn fason digne. Seki Jésus ti trouvé c’est enn missié ki ti faire pitié ek ki ti bizin soulagement. Leker Jésus ti touché, ek so compassion ti pousse-li pou faire kitsoz. Li ti avance so la main, li ti touche sa lepreux-la ek li ti gueri li.

16. Ki leson ou finn aprann ar fason ki Jésus ti traite lezot?

¹⁶ En tant ki bann disciple Jésus, couma nou kapav imite fason ki Jésus ti reflete dignité so Papa? Enn fason c’est kan nou reconette ki tou dimoune merite l’honneur ek respé, n’importe ki so position dan la societé, couma so la santé été, ou-soit ki l’age li ena. (1 Pierre 2:17) Surtout, bann ki ena responsabilité couma par exemple bann mari, bann parent, ek bann ancien, bizin traite bann dimoune ki zot bizin occupé avek dignité, ek aide zot pou garde enn certaine respé pou zot-mem. La Bible montré ki c’est enn responsabilité ki tou chretien ena parski li dire: “Dan l’amour fraternel, ena enn grand l’affection sakenn pou so camarade. Zot bizin toujours premier pou honore sakenn so camarade.”—Rom. 12:10.

Manifesté dignité dan ou l’adoration

17. Ki nou kapav aprann dan la Bible concernant dignité ki nou bizin manifesté kan nou adore Jéhovah?

¹⁷ Nou bizin surtout faire bien attention pou montré-nou digne kan nou adore Jéhovah. Ecclésiaste 5:1 dire: “Veille to bann pas kan to al lakaz vrai Bondié.” Moïse ek Josué toulé-deux ti gagne l’ordre pou tire zot sandalette kan zot ti dan enn place sacré. (Ex. 3:5; Jos. 5:15) Zot ti bizin faire sa pou montré enn grand respé. Bann pretre Israélite ti obligé mette bann caleson en lin enba zot robe “pou couvert zot la chair touni.” (Ex. 28:42, 43) Sa ti evité ki lezot dimoune trouve zot indecent kan zot ti pé servi devant l’autel Jéhovah. Chaque membre famille enn pretre ti bizin agir en accord avek bann principe ki Bondié ti donné concernant dignité.

18. Couma nou montré dignité dan nou l’adoration pou Jéhovah?

¹⁸ Alors, manifesté dignité dan nou l’adoration vedir manifesté l’honneur ek respé. Pou nou merite l’honneur ek respé, nou-mem nou bizin agir avek respé. Kan nou manifesté dignité, fodé pa nou faire semblant coumadir nou’nn mette enn mask lor nou figure. Fodé ki nou dignité li depasse seki dimoune trouvé; li bizin enn kitsoz ki Bondié trouvé, enn kitsoz ki dan nou leker. (1 Sam. 16:7; Prov. 21:2) Dignité bizin forme partie dan nou personnalité ek influence nou conduite, nou l’attitude, nou relation avek lezot, li bizin mem influence fason ki nou considere nou-mem. Oui, bann dimoune bizin trouvé touletan ki nou ena enn conduite ek bann parole ki digne. En rapport avek nou conduite, fason ki nou comporte-nou, nou l’habillement ek nou coiffure, nou prend compte bann parole l’apotre Paul: “Dan okenn fason, nou pa donne okenn l’occasion ki kapav faire lezot tombé, pou ki personne pa critik nou ministere; mais dan tou fason, nou recommande nou-mem couma bann ministre Bondié.” (2 Cor. 6:3, 4) Nou “faire l’enseignement nou Sauveur, Bondié, vinn pli joli, dan tou kitsoz.”—Tite 2:10.

Contigne manifesté enn dignité ki honore Bondié

19, 20. (a) Cite enn bon fason pou nou montré ki nou traite lezot avek dignité. (b) En rapport avek dignité, ki nou bizin bien decidé pou faire?

¹⁹ Bann chretien oint ki bann “ambassadeur dan place Christ,” zot manifesté dignité. (2 Cor. 5:20) Bann “lezot brebis” ki soutenir zot fidelement, zot montré ki zot bann envoyé ki digne pou Royaume messianik. Enn ambassadeur ou-soit enn envoyé koz avek courage ek dignité pou so gouvernement. Alors, nou bizin koz avek dignité ek courage pou soutenir gouvernement, ou-soit Royaume Bondié. (Éph. 6:19, 20) Ek kan nou amenn enn “bon nouvelle lor enn kitsoz ki pli bon” vers lezot, eski nou pa pé traite zot avek dignité?—Is. 52:7.

²⁰ Nou bizin bien decidé pou glorifié Bondié par enn conduite ki en accord avek so dignité. (1 Pierre 2:12) Anou touletan montré enn grand respé pou Li, pou so l’adoration ek pou nou bann frere ek soeur spirituel. Nou souhaité ki Jéhovah, ki finn habille-Li avek dignité ek enn grand beauté, pou content kan Li trouve nou pé adore Li avek dignité.

[Note]

Couma ou pou reponn?

• Kan nou apprecié grand beauté ki dignité Jéhovah ena, ki l’effet sa bizin ena lor nou?

• Ki nou kapav aprann lor dignité ar fason ki Jésus ti traite enn lepreux?

• Couma nou kapav honore Jéhovah dan bann fason ki digne?

[Zimage lor page 18]

Couma Jéhovah ti donne Abel dignité?

[Zimagel or page 20]

Ki ou finn aprann lor dignité ar fason ki Jésus ti traite enn lepreux?