Jésus​—Dan ki fason li ti vive

“Faire volonté Celui ki’nn envoye moi ek fini so travail, c’est coumadir enn mangé pou moi.”​—JEAN 4:34.

KAN nou examine contexte ki Jésus ti dire sa bann parole-la, sa faire nou koné ki kitsoz ti priorité dan so la vie. Jésus ek so bann disciple ti’nn voyagé depuis gramatin ziska midi a travers Samarie, enn region kot ena bann montagne. (Jean 4:6, note) Bann disciple ti pensé ki surement dan sa ler-la Jésus ti faim, alors zot ti offert li inpé mangé. (Jean 4:31-33) En deux-trois mot, Jésus ti reponn zot ek ti faire zot konn but so la vie. Pou li, faire travail Bondié ti pli important ki mangé. Ki li en parole ek en action, Jésus ti vive pou faire volonté ki Bondié ti ena pou li. Ki sa ti impliké?

▪ Preché ek enseigne lezot lor Royaume Bondié Jésus ti consacré so la vie dan enn travail bien important, ek la Bible explik sa kan li dire: “Li ti al partout dan Galilée, li ti enseigne . . . ek ti preche la bonne nouvelle lor royaume.” (Matthieu 4:23) Jésus pa ti zis preché ou-soit faire bann dimoune konn Royaume Bondié. Li ti aussi enseigne bann dimoune, setadir li ti explik zot so bann l’enseignement ek li ti servi bann raisonnement solide pou convaink zot. Royaume Bondié ti theme message ki Jésus ti annoncé.

Toute longue so ministere, Jésus ti enseigne bann dimoune seki Royaume Bondié été ek seki li pou faire. Enba, ena enn la liste bann verité concernant Royaume Bondié ek ena aussi bann verset la Bible kot nou kapav trouve bann parole ki Jésus ti dire lor sa bann sujet-la.

▪ Royaume Bondié li enn gouvernement dan le ciel, ek Jésus c’est le Roi ki Jéhovah inn choisir.​—MATTHIEU 4:17; JEAN 18:36.

▪ Royaume Bondié pou sanctifié nom Bondié ek faire en sorte ki so volonté faire lor la terre pareil couma dan le ciel.​—MATTHIEU 6:9, 10.

▪ Kan Royaume Bondié pou regné, la terre entier pou transformé pou vinn enn paradis.​—LUC 23:42, 43.

▪ Bientot Royaume Bondié pou vini ek pou accompli volonté ki Bondié ena pou la terre.a​—MATTHIEU 24:3, 7-12.

▪ Faire bann mirak Bann dimoune ti konn Jésus surtout couma enn “Enseignant.” (Jean 13:13) Mais, pendant sa trois an et demi ki li’nn faire so ministere-la, li ti faire aussi enn quantité mirak. Sa bann mirak-la ti accompli au moins deux kitsoz. D’abord, sa ti aidé pou prouvé ki vrai-mem Bondié ti envoye li. (Matthieu 11:2-6) Deuxieme, bann mirak-la ti donne enn l’idée seki li ti pou faire en tant ki le Roi Royaume Bondié pou pli beaucoup dimoune encore, lor la terre entier, dan l’avenir. Anou examine certain mirak ki li ti faire.

▪ Li ti calmé enn la mer ki ti bien mauvais ek bann gros di-vent.​—MARC 4:39-41.

▪ Li ti gueri bann malade, parmi ti ena bann aveugle, bann sourde, ek bann boiteux.​—LUC 7:21, 22.

▪ Li ti multiplié di-pain ek poisson ek li ti nourri bann la foule ki ti pé faim.​—MATTHIEU 14:17-21; 15:34-38.

▪ Au moins trois fois li ti ressuscite bann dimoune mort.​—LUC 7:11-15; 8:41-55; JEAN 11:38-44.

Maziné couma la vie lor la terre pou été kan sa le Roi puissant-la pou regné!

▪ Li’nn faire nou konn personnalité Bondié, Jéhovah Pena personne ki plus qualifié ki prop Garson Bondié, ki plitar bann dimoune ti koné couma Jésus Christ, pou enseigne lezot lor Jéhovah. En tant ki “premier-né dan tou creation,” Jésus ti vive ensam avek Jéhovah dan le ciel, pli longtemps ki n’importe ki lezot creature spirituel. (Colossiens 1:15) Maziné ki quantité l’occasion li’nn gagné pou absorbe pensée so Papa ek aprann So volonté, So bann principe, ek So bann fason agir.

A cause sa Jésus ti kapav dire: “Personne pa koné kisannla sa Garson-la, a part le Père; ek personne pa koné kisannla le Père, a part so Garson, ek sa dimoune ar ki Garson-la envie faire konn so Papa.” (Luc 10:22) Kan li ti lor la terre, Jésus ti disposé, ek mem bien envie faire bann dimoune konn personnalité so Papa. Pena personne a part Jésus ki ti kapav dire ek enseigne sa bann kitsoz-la lor so Papa, couma li, li ti faire sa. Li ti base li lor bann souvenir ki li ti ena lor bann kitsoz ki li ti faire dan le ciel ek kan li ti dan presence extraordinaire Bondié Tout-Puissant.​—Jean 8:28.

Anou prend l’exemple enn transformateur electrik, pou comprend ki Jésus inn faire pou faire nou konn so Papa. Enn l’appareil coumsa kapav transforme courant bien-bien fort ek faire li vinn pli faible, coumsa nou kapav servi sa courant-la dan nou lakaz sans okenn probleme. Kan Jésus ti lor la terre, li ti prend seki li ti aprann dan le ciel concernant so Papa, ek li ti transmette sa bann ti-dimoune lor la terre dan enn fason ki zot ti pou kapav comprend ek applik sa facilement.

Anou guette deux fason important couma Jésus finn faire konn so Papa.

▪ Dan so l’enseignement, Jésus ti faire konn la verité lor Jéhovah​—So nom, So projet, ek So bann fason agir.​—JEAN 3:16; 17:6, 26.

▪ Par so bann action, Jésus ti faire bann dimoune konn bann qualité extraordinaire ki forme partie dan personnalité Jéhovah. Jésus ti tellement imite personnalité so Papa dan enn fason parfait, ki dan enn certain sens li ti kapav dire: ‘Si zot envie koné couma mo Papa été, zot bizin zis guette moi.’​—JEAN 5:19; 14:9.

Nou etonné par fason ki Jésus ti vive. Nou kapav gagne bann bienfait extraordinaire si nou examiné kifer li’nn mort ek si nou agir en accord avek seki nou aprann.

[Note]