La vie eternel lor la terre—Enn l’esperance ki Bondié donne nou

“Creation finn bizin soumette ar enn la vie ki pena sens . . . a cause l’esperance.”—ROM. 8:20.

1, 2. (a) Kifer l’esperance la vie eternel lor la terre li important pou nou? (b) Kifer beaucoup dimoune ena bann doute lor croyance ki enn jour nou pou kapav vive pou touletan lor la terre?

KITFOIS ou rappel la joie ki ou ti gagné kan premier fois ou ti aprann ki bientot bann dimoune pou nepli vinn vié ek pou nepli mort, mais zot pou vive pou touletan lor la terre. (Jean 17:3; Rév. 21:3, 4) Surement ou ti content pou partage sa l’esperance biblik-la ar lezot. Apré tou, l’esperance pou vive pou touletan c’est enn l’aspect important dan la bonne nouvelle ki nou preché. Sa l’esperance-la ena enn grand l’effet lor fason ki nou considere la vie.

² La plupart religion la chretienté pa prend compte l’esperance pou vive pou touletan lor la terre. Alors ki la Bible enseigné ki nâme enn dimoune li mort, majorité religion enseigne enn doctrine ki pa biblik. Zot dire ki soi-disant enn dimoune ena enn nâme immortel ki contigne vive apré la mort ek ki sa nâme-la al dan enn le monde kot ena bann l’esprit. (Ézék. 18:20) A cause sa, beaucoup dimoune ena bann doute lor croyance ki enn jour nou pou kapav vive pou touletan lor la terre. Alors, nou kapav demann nou-mem: Eski vrai-mem la Bible koz lor sa l’esperance-la? Si oui, kan eski premier fois Bondié ti faire bann dimoune konn sa?

“Soumette ar enn la vie ki pena sens . . . a cause l’esperance”

 3. Couma depuis commencement l’humanité bann dimoune ti kapav koné ki projet Bondié ti ena pou bann humain?

³ Depuis commencement l’histoire l’humanité, Jéhovah ti faire konn projet ki Li ti ena pou bann dimoune. Bondié ti montré dan enn fason bien clair ki Adam ti pou vive pou touletan si li ti obeir. (Gen. 2:9, 17; 3:22) Surement bann premier descendant Adam ti aprann couma bann dimoune ti perdi enn la vie parfait dan jardin Éden, ek zot ti kapav trouve sa par bann preuve bien visible. L’entrée jardin Éden ti bloké, ek bann dimoune ti vinn vié ek ti mort. (Gen. 3:23, 24) Avek le temps, la vie bann dimoune ti vinn pli courte. Adam ti vive 930 an. Sem, ki ti gagne la vie sauve kan ti ena deluge, ti vive zis 600 an ek so garson Arpakshad ti vive 438 an. Térah, papa Abraham, ti vive 205 an. Abraham ti vive 175 an, so garson Isaac 180 an, ek Jacob ti vive 147 an. (Gen. 5:5; 11:10-13, 32; 25:7; 35:28; 47:28) Beaucoup dimoune surement ti realisé seki sa ti vedir—l’esperance pou vive pou touletan ti’nn perdi! Eski zot ti ena enn raison pou croire ki enn jour bann dimoune pou kapav regagne la vie eternel?

 4. Kifer bann zom fidele dan le passé ti kapav croire ki Bondié ti pou retabli bann benediction ki Adam ti perdi?

⁴ Parole Bondié dire: “Creation [bann humain] finn bizin soumette ar enn la vie ki pena sens . . . a cause l’esperance.” (Rom. 8:20) Ki l’esperance? Premier prophetie ki ena dan la Bible koz lor enn “descendance” ki ti pou ‘crase la tête enn serpent.’ (Lire Genèse 3:1-5, 15.) Sa promesse concernant sa Descendance-la ti donne bann dimoune fidele bann bon raison pou pensé ki Bondié pa ti pou abandonne projet ki Li ti ena pou bann dimoune. Sa ti donne bann zom couma Abel ek Noé enn raison pou croire ki Bondié ti pou retabli bann benediction ki Adam ti perdi. Sa bann zom-la kitfois ti comprend ki kan sa ‘descendance-la ti pou blessé dan so talon,’ di-sang ti pou coulé.—Gen. 4:4; 8:20; Héb. 11:4.

 5. Ki montré ki Abraham ti ena la foi dan resurrection?

⁵ Anou prend l’exemple Abraham. Kan so la foi ti testé, Abraham “ti coumadir offert Isaac, . . . so sel garson.” (Héb. 11:17) Kifer li ti disposé pou faire sa? (Lire Hébreux 11:19.) Li ti croire dan resurrection! Abraham ti ena enn raison pou croire dan resurrection. Apré tou, Jéhovah ti faire li regagne so capacité pou gagne zenfant ek ti faire li ek so femme, Sara, gagne enn garson alors ki zot ti vié. (Gen. 18:10-14; 21:1-3; Rom. 4:19-21) Abraham ti ena aussi sa promesse ki Jéhovah ti faire-la: “C’est par moyen Isaac ki, seki pou appel to descendance, pou vini.” (Gen. 21:12) Alors, Abraham ti ena bann bon raison pou attann ki Bondié ti pou ressuscite Isaac.

6, 7. (a) Ki l’alliance Jéhovah ti faire avek Abraham? (b) Couma promesse ki Jéhovah ti faire avek Abraham ti donne l’espoir bann dimoune lor la terre?

⁶ Parski Abraham ti ena enn la foi extraordinaire, Jéhovah ti faire enn l’alliance avek li concernant so “descendance.” (Lire Genèse 22:18.) Finalement, partie principal sa ‘descendance-la’ ti Jésus Christ. (Gal. 3:16) Jéhovah ti dire Abraham ki so “descendance” ti pou multiplié “pareil couma bann zetoile ki dan le ciel ek couma bann la grain di-sable ki dan bord la mer”—enn chiffre ki Abraham pa ti koné. (Gen. 22:17) Mais plitar, Bondié ti faire konn sa chiffre-la. Jésus Christ ek 144,000, ki pou regne avek li dan so Royaume, forme sa ‘descendance-la.’ (Gal. 3:29; Rév. 7:4; 14:1) C’est par moyen Royaume messianik ki “tou bann nation lor la terre pou . . . attire benediction lor zot.”

⁷ Abraham pa ti pou kapav comprend tou signification sa l’alliance ki Jéhovah ti faire avek li-la. Selman, la Bible dire ki “li ti pé attann enn la ville ki ena bann vrai fondation.” (Héb. 11:10) Sa la ville-la c’est Royaume Bondié. Abraham pou bizin revive pou li gagne bann benediction enba sa Royaume-la. Li pou kapav gagne la vie eternel lor la terre par moyen resurrection. Bann ki pou reussi traverse Har-Maguédôn ou-soit ki pou ressuscité, zot aussi zot pou kapav gagne la vie eternel.—Rév. 7:9, 14; 20:12-14.

“L’esprit inn mette pression lor moi”

8, 9. Kifer livre Job li pa zis enn zistoire lor bann l’epreuve enn zom?

⁸ Entre lepok Joseph, arriere ti-zenfant Abraham, ek lepok prophete Moïse, ti ena enn zom lor la terre ki ti appel Job. Livre la Bible ki appel Job, ki nou pensé Moïse ti ecrire, expliké kifer Jéhovah ti permette Job souffert ek ki ti arrive li a la fin. Mais, livre Job li pa zis enn zistoire lor bann l’epreuve ki enn zom inn gagné; sa livre-la koz lor bann kitsoz ki concerne tou bann creature intelligent ki Bondié inn crée. Li faire nou comprend ki Jéhovah regne avek justice, ek li montré nou ki l’integrité ek l’avenir tou bann serviteur Bondié impliké dan question ki ti soulevé en Éden. Mem si Job pa ti comprend sa question-la, li pa ti laisse so trois compagnon faire li pensé ki li pa ti’nn reussi garde so l’integrité. (Job 27:5) Sa livre-la bizin fortifié nou la foi ek aide nou pou comprend ki nou kapav garde nou l’integrité ek soutenir souveraineté Jéhovah.

⁹ Apré ki trois soi-disant camarade Job ti’nn fini kozé, “Élihou, garson Barakel, enn Bouzite, ti reponn.” Ki ti pousse li pou kozé? Li ti dire: “Mo’nn rempli ar parole; l’esprit inn mette pression lor moi, dan mo ventre.” (Job 32:5, 6, 18) Mem si seki Élihou ti dire par inspiration ti annoncé couma bann l’epreuve Job ti pou fini, so bann parole ena aussi enn signification pou lezot. Zot donne l’espoir tou bann dimoune ki reste fidele envers Bondié.

10. Ki l’exemple montré nou ki, kan Jéhovah donne enn dimoune enn message, parfois sa ena enn pli grand signification pou bann dimoune en general?

¹⁰ Parfois Jéhovah donne enn dimoune enn message ek sa message-la ena aussi enn pli grand signification pou bann dimoune en general. Prend par exemple seki Daniel ti dire dan enn prophetie kan li ti koz lor rêve ki le roi babylonien Neboukadnetsar ti faire concernant enn pié ki ti bizin coupé. (Dan. 4:10-27) Alors ki sa rêve-la ti realisé lor Neboukadnetsar, li ti applik ar enn kitsoz ki pli grand. Li ti montré ki regne Bondié en rapport avek la terre, ki ti representé par enn le roi ki ti sorti dan descendance le roi David, ti pou apparette encore enn fois. Sa ti pou arrivé apré enn periode 2,520 an. Sa periode-la ti pou commencé a partir 607 avant nou lepoka ek ti pou fini en 1914 kan souveraineté Bondié en rapport avek la terre ti manifesté dan enn nouveau fason kan Jésus Christ ti vinn le Roi dan le ciel. Maziné couma sa Royaume-la bientot pou realise tou l’espoir bann dimoune obeissant lor la terre!

“Libere-li pou li pa al dan fossé!”

11. Ki bann parole Élihou ti montré lor Bondié?

¹¹ Kan Élihou ti reponn Job, li ti koz lor “enn messager, enn porte-parole, enn parmi mille, pou faire enn dimoune koné ki li droite.” Ki pou arrivé si sa messager-la “suppliye Bondié pou ki Bondié apprecié li”? Élihou dire: “Lerla, Li [Bondié] donne li so faveur ek dire: ‘Libere-li pou li pa al dan fossé! Mo finn trouve enn ranson! Ki so la peau vinn pli frais ki dan so jeunesse; ki li regagne la force ki li ti ena kan li ti jeune.’ ” (Job 33:23-26) Sa bann parole-la montré ki Bondié disposé pou accepté “enn ranson,” setadir enn “couverture,” dan faveur bann dimoune ki repenti.—Job 33:24, note.

12. Ki l’espoir bann parole Élihou donne bann dimoune en general?

¹² Kitfois Élihou pa ti comprend net signification la ranson, pareil couma bann prophete pa ti comprend tou seki zot ti ecrire. (Dan. 12:8; 1 Pierre 1:10-12) Mais kan-mem, seki Élihou ti dire montré ki ti ena enn l’espoir ki enn jour Bondié ti pou accepté enn ranson ek delivré bann dimoune ar bann mauvais consequence ki zot gagné a cause vieillesse ek la mort. Élihou ti koz lor l’esperance extraordinaire en rapport avek la vie eternel. Livre Job montré aussi ki pou ena enn resurrection.—Job 14:14, 15.

13. Ki signification bann parole Élihou ena pou bann chretien?

¹³ Zordi, seki Élihou ti dire ena toujours enn signification pou plusieurs million chretien ki ena l’esperance pou survive kan sa mauvais systeme-la pou detruire. Bann chretien agé ki pou parmi sa bann dimoune ki pou reussi sapé-la, pou regagne la force ki zot ti ena dan zot jeunesse. (Rév. 7:9, 10, 14-17) En plus, l’espoir pou trouve bann ressuscité pareil couma zot ti été kan zot ti jeune, contigne donne la joie bann dimoune fidele. Bien sur, l’esperance pou gagne la vie immortel dan le ciel pou bann chretien oint ek la vie eternel lor la terre pou bann membre “lezot brebis,” toulé-deux depann lor la foi dan sacrifice Christ.—Jean 10:16; Rom. 6:23.

La mort pou disparette lor la terre

14. Kifer bann Israélite pa ti kapav ena l’espoir pou gagne la vie eternel par moyen la Loi mosaïk?

¹⁴ Bann descendant Abraham ti vinn enn nation independant kan zot ti rente dan enn l’alliance avek Bondié. Kan Jéhovah ti donne zot la Loi, Li ti dire: “Zot bizin garde mo bann la loi ek mo bann jugement: si enn dimoune pratik sa, li pou bizin aussi vive par sa.” (Lév. 18:5) Mais bann Israélite pa ti’nn kapav obeir bann principe parfait ki ti ena dan la Loi, a cause sa, la Loi ti condamne zot ek zot ti bizin enn delivrance ar sa condamnation-la.—Gal. 3:13.

15. Concernant ki benediction ki pou ena dan l’avenir, David ti inspiré pou ecrire?

¹⁵ Apré Moïse, Jéhovah ti inspire lezot ecrivain la Bible pou koz lor l’esperance la vie eternel. (Ps. 21:4; 37:29) Par exemple, psalmiste David ti termine enn psaume ki ti koz lor l’unité bann vrai adorateur Bondié dan Sion, kan li ti dire: “C’est la ki Jéhovah finn donne l’ordre pou ki ena benediction, oui la vie pou touletan.”—Ps. 133:3.

16. Par moyen prophete Isaïe, ki Jéhovah ti promette lor l’avenir “la terre entier”?

¹⁶ Jéhovah ti inspire Isaïe pou prophetise lor la vie eternel ki pou ena lor la terre. (Lire Isaïe 25:7, 8.) Pareil couma enn ‘l’enveloppe’ ou-soit enn molton ki touffe dimoune, peché ek la mort zot couma bann poids bien lourd lor bann dimoune. Jéhovah donne l’assurance so bann serviteur ki peché ek la mort pou disparette, setadir ki Li pou tire sa “lor la terre entier.”

17. Couma le Messie ti pou ouvert chemin pou la vie eternel, pareil couma sa ti representé par bouc pou Azazel?

¹⁷ Prend par exemple aussi seki ti pé faire dapré la Loi mosaïk concernant bouc pou Azazel. Enn fois par an, pendant jour Propitiation, grand pretre ‘ti mette so deux la main lor la tête enn bouc vivant ek ti confesse lor li tou peché bann Israélite, ek li ti mette sa lor la tête sa bouc-la ek bouc-la ti bizin sarié lor li tou zot peché, dan desert.’ (Lév. 16:7-10, 21, 22) Isaïe ti annoncé ki le Messie pou vini, ek li ti pou joué mem role ek sarié “bann maladie,” “bann douleur,” ek “peché beaucoup dimoune,” coumsa li ti pou ouvert chemin pou la vie eternel.—Lire Isaïe 53:4-6, 12.

18, 19. Ki l’esperance nou trouvé dan Isaïe 26:19 ek Daniel 12:13?

¹⁸ Par moyen Isaïe, Jéhovah ti dire bann Israélite: “To bann mort pou vive. Enn cadavre pou moi [“bann ki finn mort ek ki pou moi,” note]—zot pou regagne la vie. Levé ek criyé dan la joie, zot bann ki reste dan la poussiere! Parski to la rosée, li pareil couma la rosée bann fleur mauve, ek la terre li-mem pou laisse tombé, setadir pou donne naissance mem bann ki sans okenn la force dan la mort.” (Is. 26:19) Bann l’Écritures hébraïques montré bien l’esperance resurrection ek la vie lor la terre. Par exemple, kan Daniel ti ena preské 100 an, Jéhovah ti donne li sa l’assurance-la: “To pou reposé, mais to pou levé pou gagne to part kan la fin bann jour vini.”—Dan. 12:13.

¹⁹ Parski Marthe ti ena l’espoir ki pou ena enn resurrection, li ti kapav dire Jésus concernant so frere ki ti’nn mort: “Mo koné ki li pou ressuscité kan pou ena resurrection dan dernier jour.” (Jean 11:24) Eski bann l’enseignement Jésus ek bann livre ki Bondié finn inspire so bann disciple pou ecrire, ti change sa l’esperance-la? Eski Jéhovah encore offert bann dimoune l’esperance pou vive pou touletan lor la terre? Dan prochain lartik, nou pou examine reponse sa bann question-la.

[Note]

Eski ou kapav expliké?

• A cause ki l’esperance, creation finn “soumette ar enn la vie ki pena sens”?

• Ki preuve nou ena ki Abraham ti ena la foi dan la resurrection?

• Ki l’esperance bann parole ki Élihou ti dire Job, donne bann dimoune?

• Couma bann l’Écritures hébraïques mette l’accent lor l’esperance resurrection ek la vie eternel lor la terre?

[Zimage lor page 11]

Bann parole ki Élihou ti dire Job montré ki ti ena enn l’espoir ki bann dimoune pou delivré ar vieillesse ek la mort

[Zimage lor page 12]

Daniel ti gagne l’assurance ki ‘li pou levé pou gagne so part kan la fin bann jour vini’