Rod Rwayom Bondie, Pa Bann Kitsoz Materyel

 1. Ki diferans ena ant seki nou bizin ek seki nou anvi?

NOU bizin bien tigit kitsoz pou nou viv. Par exanp, nou bizin manze, linz, ek enn plas pou reste. Me bann kitsoz ki nou anvi, zame pa fini. Ek boukou dimounn pa realize ki zot pa vremem bizin tou seki zot anvi.

 2. Sit sertin kitsoz ki bann dimounn anvi.

² Enn dimounn ki res dan enn pei pov, li pa pou rod mem kitsoz ki enn dimounn ki res dan enn pei ris. Dan sertin pei, bann dimounn ti pou kontan gagn enn portab, enn motosiklet, ouswa enn ti bout terin. Dan lezot pei, bann dimounn anvi enn ta linz bien ser, enn pli gran lakaz, ouswa enn loto pli ser. Me ninport kotsa nou reste ouswa komie kas nou ena, pli ale nou kapav koumans rod bann kitsoz ki nou pa bizin ouswa ki nou mwayin pa permet nou.

 3. Ki ete materyalis?

³ Ki ete materyalis? Se kan enn dimounn interes li plis ar bann kitsoz materyel plito ki ar so relasion avek Bondie. Li pa kontant li avek seki li ena, okontrer, touletan li rod plis. Mem bann ki pena boukou kas ouswa ki pa aste bann kitsoz ser kapav vinn materyalis. Zot riske nepli met Rwayom Bondie an premie dan zot lavi.​—Ebre 13:5.

 4. Kouma Satan servi “dezir lizie”?

⁴ Satan anvi fer nou krwar ki nou pou kapav profit lavi zis kan nou ena enn ta kitsoz. Akoz sa, li servi so lemond ek “dezir lizie” pou esey pous nou pou touletan rod plis. (1 Zan 2:15-17, NW; Zenez 3:6; Proverb 27:20) Souvan nou tann ek trouv bann piblisite ki esey konvink nou pou aste bann nouvo kitsoz. Eski to finn deza aste enn kitsoz zis parski li ti atiran dan magazin ouswa parski to’nn trouv so piblisite? Si wi, kitfwa plitar to finn realize ki to pa ti vremem bizin sa. Kan nou kontign aste bann kitsoz ki nou pa bizin, nou konplik nou lavi. Sa bann kitsoz-la kapav distrer nou dan nou servis pou Zeova. Par exanp, kitfwa nou pou nepli ena letan pou etidie Labib, pou prepar ek asiste bann renion ouswa pou al prese regilierman. Rapel lavertisman ki lapot Zan ti done: “Lemond pe al fini ek so dezir osi.”

 5. Ki kapav ariv bann ki servi tou zot lenerzi pou gagn pli boukou kitsoz?

⁵ Satan anvi ki nou servi nou lenerzi pou gagn plis kas ek bann kitsoz materyel, olie ki nou servi sa pou Zeova. (Matie 6:24) Me si nou zis anvi gagn pli boukou kitsoz pou noumem, nou lavi pa pou ena enn sans. Nou kapav gagn bann desepsion ouswa bann problem finans. Ouswa pli pir, nou kapav perdi konfians an Zeova ek So Rwayom. (1 Timote 6:9, 10; Revelasion 3:17) Zezi ti dir ki “bann dezir pou tou lezot kitsoz” zot kouma bann pikan ki anpes enn lagrin pouse ek gagn frwi.​—Mark 4:14, 18, 19, NW.

 6. Ki leson nou aprann ar lexanp Barouk?

⁶ Reflesi pou enn ti moman lor Barouk, sekreter Zeremi. Kan Barouk ti koumans rod “bann gran kitsoz” pou limem, Zeova ti rapel li ki biento Zerizalem ti pou detrir. Me Li ti promet Barouk ki Li ti pou sov so lavi. (Zeremi 45:1-5) Barouk pa ti bizin atann plis ki sa. Zeova pa ti pou sap tou seki bann dimounn ti ena. (Zeremi 20:5) Azordi, nou pe viv dan enn lepok kot lafin lemond Satan bien pre. Alor, se pa enn ler pou kontign rod plis kitsoz materyel pou noumem. Ek fode pa nou atann ki apre gran detres, nou pou ankor ena bann kitsoz ki nou ti ena, mem si zot ena valer pou nou.​—Proverb 11:4; Matie 24:21, 22; Lik 12:15.

 7. Ki nou pou al examine, ek kifer?

⁷ Alor kouma nou kapav okip noumem ek nou fami, ek anmemtan res konsantre lor seki pli inportan dan lavi? Kouma nou kapav evit vinn materyalis? Ek ki kapav ed nou pou aret trakase plis ki bizin pou gagn bann kitsoz ki neseser? Zezi finn donn nou bann meyer konsey ki ena dan so Sermon lor Montagn. (Matie 6:19-21) Anou lir ek examinn Matie 6:25-34. Sa pou konvink nou ki nou bizin kontign rod Rwayom Bondie, pa bann kitsoz materyel.​—Lik 12:31.

8, 9. (a) Kifer fode pa nou trakase plis ki bizin pou bann kitsoz ki nou bizin? (b) Ki Zezi ti kone konsernan bann dimounn ek seki zot bizin?

⁸ Lir Matie 6:25. Zezi ti kone ki so bann disip ti trakase konsernan seki zot pou manze, bwar, ek mete. Akoz sa dan so Sermon lor Montagn, li ti dir zot: “Pa fatig zot ar zot lavi.” Zezi ti anvi ed zot pou konpran kifer fode pa zot trakase konsernan sa bann kitsoz-la. Li ti kone ki si zot trakase plis ki bizin, mem pou bann kitsoz ki zot ti vremem bizin, sa kapav fer zot bliye seki pli inportan dan lavi. Zezi ti telman trakase pou so bann disip ki li’nn rapel zot sa danze-la, kat fwa ankor dan so sermon.​—Matie 6:27, 28, 31, 34.

⁹ Me kifer Zezi ti dir nou pa gagn traka konsernan seki nou pou manze, bwar, ouswa mete? Eski nou pa bizin manze ek abiye? Biensir! Ek si nou pena ase kas pou aste sa bann kitsoz-la, li normal ki nou pou gagn traka. Zezi ti konn sa. Li ti kone ki bann dimounn bizin. Li ti kone ki “dan bann dernie zour,” so bann disip ti pou konn bann moman bien difisil. (2 Timote 3:1, NW.) Azordi, boukou dimounn pa pe reisi gagn enn travay, ek bann kitsoz pe vinn deplizanpli ser. Dan boukou landrwa, bann dimounn bien pov ek zot ena bien tigit manze ouswa pena mem manze. Me Zezi ti kone osi ki lavi enn dimounn pli inportan ki manze, ek lekor pli inportan ki linz.

10. Kan Zezi ti ansegn so bann disip kouma zot bizin priye, ki kitsoz li ti dir zot bizin pli inportan dan zot lavi?

¹⁰ Enn tipe avan, Zezi ti ansegn so bann disip ki kan zot priye, zot bizin demann zot Papa dan lesiel pou donn zot seki zot bizin. Zot ti kapav priye: “Donn nou azordi dipin ki nou bizin.” (Matie 6:11) Enn lot fwa, li ti dir zot priye: “Donn nou sak zour dipin ki nou bizin.” (Lik 11:3) Me sa pa vedir ki touletan nou bizin trakas nou pou bann kitsoz ki nou bizin. Ofet, Zezi ti dir so bann disip ki li pli inportan ki zot priye pou Rwayom Bondie vini, olie ki zot priye pou seki zot bizin. (Matie 6:10; Lik 11:2) Pou ed so bann disip aret gagn traka, Zezi ti rasir zot kan li ti rapel zot ki kantite Zeova pran swin tou so kreasion.

11, 12. Ki nou kapav aprann ar fason ki Zeova pran swin bann zwazo dan lesiel? (Get zimaz dan koumansman lartik.)

¹¹ Lir Matie 6:26. Nou bizin “get bann zwazo dan lezer.” Mem si bann zwazo se bann ti kreatir, zot manz boukou. Ofet, si enn zwazo ti mem groser avek enn dimounn, li ti pou manz plis ki enn dimounn. Bann zwazo manz bann frwi, lagrin, insekt, ek lever. Me zot pa bizin plant lagrin ouswa travay later pou gagn manze. Zeova donn zot tou seki zot bizin. (Psom 147:9) Me biensir, Li pa met manze dan zot labek! Zot bizin al rode, me li pa difisil pou zot trouve.

¹² Zezi pa ti ena okenn dout ki si so Papa pran swin bann zwazo, Li pou osi pran swin bann dimounn.^[1] (Get not alafin lartik.) (1 Pier 5:6, 7) Me biensir, parey kouma bann zwazo, fode pa nou pares. Nou bizin travay dir pou plante ek rekolte ouswa pou gagn kas pou aste manze. Zeova kapav beni nou bann zefor. Ek kan nou pena ase kas ouswa manze, Li kapav donn nou seki nou bizin. Par exanp, lezot kapav partaz seki zot ena avek nou. Zeova donn osi bann zwazo enn plas pou reste. Li finn donn zot kapasite pou ranz bann nik, ek Li finn fer bann kitsoz ki zot kapav servi pou ranz zot nik. Li parey pou nou osi, Zeova kapav ed nou pou trouv enn plas pou ki nou ek nou fami reste.

13. Ki kitsoz montre nou ki nou ena plis valer ki bann zwazo?

¹³ Apre ki Zezi ti rapel so bann disip ki Zeova nouri bann zwazo, li ti demann zot: “Eski zot pena plis valer ki zwazo?” (Konpar avek Lik 12:6, 7.) Kan Zezi ti dir sa, sirman li ti pe pans seki biento li ti pou fer, setadir, donn so lavi pou tou dimounn. Zezi pa’nn mor pou bann zwazo ouswa pou okenn lezot zanimo. Li’nn mor pou nou, pou ki nou kapav viv pou touletan.​—Matie 20:28.

14. Ki kitsoz enn dimounn ki trakase zame pa pou kapav fer?

¹⁴ Lir Matie 6:27. Ki Zezi ti pe rod dir kan li ti dir ki nou pa kapav azout enn sel koude dan nou lavi kan nou trakase? Li ti pe rod dir ki kan nou trakase pou bann kitsoz ki nou bizin, sa pa pou fer nou viv pli lontan. An realite, si nou tro strese, nou kapav tom malad ouswa mem mor.

15, 16. (a) Ki nou aprann ar fason ki Zeova pran swin bann fler lis dan karo? (Get zimaz dan koumansman lartik.) (b) Ki bann kestion kitfwa nou kapav poz noumem, ek kifer?

¹⁵ Lir Matie 6:28-30. Nou kontan kan nou ena enn zoli linz pou mete, sirtou kan nou al prese, nou al renion ouswa lasanble. Me eski nou bizin “trakase ar linz”? Ankor enn fwa, Zezi ti rapel so bann disip kouma Zeova pran swin so kreasion. Zezi ti servi lexanp bann “fler lis dan karo.” Nou kapav konpar bann “fler lis” ar bann fler kouma glaïeuls, jacinthes, iris ouswa tulipes. Okenn parmi sa bann fler-la pa bizin koud linz pou zot mete. Pourtan, zot telman zoli ki Zezi ti dir ki ‘mem Salomon dan tou so laglwar zame pa finn abiye kouma sa bann fler la’!

¹⁶ Reflesi lor seki Zezi ti dir apre: “Si Bondie abiy enn karo lerb . . . , eski li pa pou abiy zot ankor pli zoli ki sa? Ala zot lafwa mins la!” Biensir Li pou fer li! Me bann disip Zezi ti bizin ena plis lafwa. (Matie 8:26; 14:31; 16:8; 17:20) Zot ti bizin ena konfians ki Zeova anvi pran zot swin ek ki vremem Li pou fer li. Ki nou kapav dir lor nou? Eski nou sir ki Zeova pou pran nou swin?

17. Ki kitsoz kapav gat nou relasion avek Zeova?

¹⁷ Lir Matie 6:31, 32. Boukou parmi bann ki pa konn Zeova pas tou zot letan pou rod plis kas ek bann kitsoz materyel. Me si nou osi nou ti fer parey, nou ti pou gat relasion ki nou ena avek Zeova. Nou kone ki Zeova Li nou Papa ek ki Li kontan nou. Ek nou sir ki si nou fer tou seki Li demann nou ek nou met so Rwayom an premie dan nou lavi, Li pou donn nou tou seki nou bizin ek mem plis. Nou kone osi ki se enn bon relasion avek Zeova ki pou fer nou vremem ere ek sa pou ed nou pou kontant nou zis ar “manze ek linz” ki nou bizin.​—1 Timote 6:6-8.

18. Ki Zeova kone lor nou personelman, ek ki Li pou fer pou nou?

¹⁸ Lir Matie 6:33. Si nou met Rwayom Bondie an premie dan nou lavi, Zeova pou donn nou tou seki nou bizin. Zezi ti explike kifer nou kapav ena konfians dan sa promes-la. Li ti dir: ‘Zot Papa ki dan lesiel, li kone ki bann kiksoz ki neseser pou zot.’ Zeova kone ki to bizin avan mem ki to realize to bizin sa. (Filipien 4:19) Li kone ki linz nou pou bizin plitar. Li kone osi ki manze to bizin. Ek Li kone ki twa ek to fami, zot bizin enn plas pou reste. Zeova pou fer sir ki to ena seki to bizin.

19. Kifer fode pa nou trakase pou seki kapav arive dan lavenir?

¹⁹ Lir Matie 6:34. Ankor enn fwa, Zezi ti dir so bann disip: “Pa bizin trakase.” Zeova pou donn nou seki nou bizin toulezour. Alor nou pa bizin trakase plis ki bizin pou seki kapav arive dan lavenir. Si nou fer sa, nou kapav koumans kont lor noumem, ek se samem ki pou gat nou relasion avek Zeova. Me olie sa, nou bizin fer Li konfians.​—Proverb 3:5, 6; Filipien 4:6, 7.

20. (a) Ki lobzektif to kapav fixe dan servis Zeova? (b) Ki to kapav fer pou sinplifie to lavi?

²⁰ Li pou telman tris si nou pena ase lafors pou servi Zeova parski nou pe rod gagn plis kitsoz! Okontrer nou bizin donn Zeova nou meyer. Par exanp, eski to kapav al ede dan enn kongregasion kot bizin plis proklamater? Eski to kapav fer pionie? Ouswa si to deza pe fer pionie, eski to finn pans pou ranpli form pou Lekol pou bann Evanzelizater Rwayom Bondie? Eski to kapav al ede pandan de-trwa zour ouswa enn semenn dan Béthel ouswa enn biro tradiksion? Kitfwa to kapav travay kouma volonter dan bann proze konstriksion ek servi to letan pou ede pou konstrir bann Lasal. Reflesi lor seki to kapav fer pou sinplifie to lavi pou ki to ena plis letan ek lenerzi pou fer bann aktivite pou Rwayom Bondie. Lankadre “Kouma Sinplifie To Lavi?” donn bann sigzesion. Priye Zeova pou ki Li ed twa pou deside ki to bizin fer. Apre sa, koumans fer bann sanzman neseser.

21. Ki pou ed nou pou vinn pli pros ar Zeova?

²¹ Zezi ti ansegn nou pou rod Rwayom Bondie an premie. Kan nou fer sa, nou aret trakas nou plis ki bizin pou bann kitsoz ki neseser. Nou vinn pli pros ar Zeova parski nou ena konfians ki Li pou pran nou swin. Nou aprann pou kontrol noumem ek pou pa aste seki nou anvi ouswa tou seki lemond ofer, mem si nou mwayin permet nou. Si nou sinplifie nou lavi asterla, sa pou ed nou pou res fidel ar Zeova ek pou “tini ferm vre lavi” ki Li finn promet nou.​—1 Timote 6:19.