Bann Fam Ki’nn Fer Leker Zeova Kontan

“Mo swete Zeova rekonpans to fason azir, ek Zeova, . . . donn twa enn saler parfe.”—RUT 2:12.

1, 2. Ki profi nu kapav gayne kan nu reflesi lor legzanp bann fam mansyone dan Labib, ki ti fer leker Zeova kontan?

LA KRINT pu Bondye, ti pus de fam pu refiz obeir Faraon. Lafwa enn prostitye, ti fer li riske so lavi pu protez de espyon Izraelit. Grasa so bon zizman ek so limilite dan enn sityasyon kritik, enn fam ti sov buku lavi ek ti anpes David vinn kupab lamor plizir dimunn. Lafwa an Zeova ek lospitalite enn vev, ti pus li pu donn so dernye buse manze enn profet Bondye. Ala zis detrwa legzanp bann fam ki’nn fer leker Zeova kontan, parmi buku ki Labib mansyone.

² Zeova ti apresye sa bann fam-la ek Li ti beni zot. Ki sa montre nu? Ki pu Zeova, seki pli inportan, se bann kalite spirityel ki enn dimunn ena, ki li enn zom uswa enn fam. Dan lemond ki nu pe viv zordi, dimunn atas buku plis linportans ar laparans fizik ek rises, olye ar kitsoz spirityel. Donk, li difisil pu donn priorite nu spirityalite, me li pa inposib. Dayer, nu truv sa par legzanp enn gran kantite fam ki pe servi Zeova dan So lorganizasyon zordi. Sa bann fam Kretyenn-la imit bann fam mansyone dan Labib, ki ti ena la krint pu Bondye. Zot usi zot manifeste lafwa, bon zizman, lospitalite ek lezot kalite spirityel. Byinsir, bann frer usi anvi imit bann kalite ki sa bann fam dan letan Biblik-la ti manifeste. Pu nu kapav fer sa pli byin, nu pu egzaminn plis an detay seki Labib rakonte lor bann fam ki mansyone dan premye paragraf.—Romin 15:4; Zak 4:8.

Bann Fam Ki Ti Refiz Obeir Faraon

3, 4. (a) Kifer Sifra ek Pua ti refiz obeir lord Faraon pu tuy tu bann ti-garson Izraelit omoman zot nesans? (b) Kuma Zeova ti rekonpans sa de fam-saz-la pu zot kuraz ek la krint ki zot ti ena pu Li?

³ Dan Nuremberg, an Allemagne, apre dezyem lager mondyal, ti ziz bann kriminel ki ti kupab lamor plizir milye dimunn. Pu zistifye seki zot ti fer, sa bann kriminel-la ti dir ki zot ti zis obeir lord ki zot ti gayne. Asterla, anu konpar sa bann dimunn-la avek de fam-saz Izraelit, ki ti apel Sifra ek Pua. Sa de fam-la ti res Lezip pandan reyn enn Faraon dominer. Labib pa mansyonn non sa Faraon-la. Sa lerwa-la ti per pangar popilasyon Ebre miltipliye, akoz sa li ti donn lord sa de fam-saz-la pu tuy tu bann ti-garson Ebre, omoman zot nesans. Ki sa bann fam-la ti fer devan enn lord terib kumsa? Labib raporte: “Zot pa ti fer seki Lerwa Lezip ti dir zot. Me zot ti les bann ti garson viv.” Wi, sa bann fam-la pa ti per dimunn. Kifer zot pa’nn tom dan sa pyez-la? Parski zot “ti ena la krint pu vre Bondye.”—Egzod 1:15, 17; Zenez 9:6.

⁴ Wi, sa bann fam-la ti rod proteksyon Zeova. An retur, kuma “enn bukliye,” Zeova ti protez zot kont la koler Faraon. (2 Samyel 22:31; Egzod 1:18-20) Me benediksyon Zeova pa ti aret la. Li ti rekonpans Sifra ek Pua; Li ti fer zot ena zot prop zanfan. Li finn mem onor zot kan Li ti fer ekrir zot non ek zot bann aksyon dan Labib. Kumsa, mem bann zenerasyon apre inn kapav lir seki zot inn fer, alor ki sa Faraon-la li, personn nepli rapel so non.—Egzod 1:21; 1 Samyel 2:30b; Proverb 10:7.

 5. Kuma buku fam Kretyenn zordi pe manifeste mem latitid ki Sifra ek Pua, ek kuma Zeova pu rekonpans zot?

⁵ Eski ena bann fam kuma Sifra ek Pua zordi? Wi, ena buku fam kumsa! Sak lane, zot par milye pu pres avek kuraz mesaz Parol Bondye ki kapav sov lavi bann dimunn. Zot pe pres dan bann peyi kot “lord lerwa” finn interdi predikasyon. Kan zot fer sa, zot pe riske zot liberte ek mem zot lavi. (Ebre 11:23; Akt 5:28, 29) Parski sa bann fam Kretyenn-la ena lamur pu Bondye ek pu zot prosin, zot pa les personn anpes zot pu partaz la bonn nuvel lor Rwayom Bondye avek lezot. Akoz sa, zot bizin afront lopozisyon ek persekisyon. (Mark 12:30, 31; 13:9-13) Parey kuma dan legzanp Sifra ek Pua, Zeova pran byin kont seki sa bann fam Kretyenn-la pe fer avek kuraz. Li pu montre zot so lamur kan Li pu prezerv zot non dan so “liv lavi,” akondisyon ki zot andire fidelman ziska la fin.—Filipyin 4:3; Matye 24:13.

Enn Ex-Prostitye Fer Leker Zeova Kontan

6, 7. (a) Ki Raab ti kone lor Zeova ek So pep, ek kuma sa konesans-la ti inflyans li? (b) Kuma Parol Bondye onor Raab?

⁶ An 1473 A.N.L., Raab, enn prostitye, ti res dan enn lavil Kananein ki ti apel Zeriko. Aparaman Raab ti enn fam byin informe. Kan de espyon Izraelit ti al kasyet kot li, li ti kapav rakont zot an detay kuma Zeova, par bann mirak, ti delivre nasyon Izrael dan Lezip. Raab ti kapav rakont sa evennman-la, mem si sa ti arive 40 an avan! Li ti konn usi viktwar ki bann Izraelit ti fek gayne lor bann Lerwa Amorit, Sionn ek Og. Remark linflyans ki sa konesans-la ti ena lor li. Li ti dir bann espyon-la: “Mo kone ki vremem Zeova pu donn zot sa peyi-la, . . . parski Zeova, zot Bondye, Limem Bondye lao dan lesyel, ek anba lor later.” (Zozye 2:1, 9-11) Wi, leker Raab ti tuse par seki li ti aprann lor Zeova ek seki Li’nn fer an faver bann Izraelit. Sa ti pus li pu ena lafwa an Zeova.—Romin 10:10.

⁷ Lafwa Raab ti pus li pu azir. Li ti akeyir bann espyon Izraelit “dan lape.” Li ti usi obeir zot linstriksyon pu li gayn lavi sov kan Izrael ti atak Zeriko. (Ebre 11:31; Zozye 2:18-21) Nu sir ki bann aksyon ki Raab inn fer par lafwa, ti fer leker Zeova kontan. Dayer, par linspirasyon, disip Zak ti ekrir non Raab ansam avek non Abraam, kamarad Bondye, kuma enn legzanp pu bann Kretyin imite. Zak ti ekrir: “Pareyman, eski Bondye pa ti konsider usi Raab, enn prostitye, kuma enn dimunn drwat par so bann aksyon, apre ki li ti byin akeyir bann mesaze ek li ti fer zot sorti par enn lot semin?”—Zak 2:25.

 8. Kuma Zeova ti beni Raab pu so lafwa ek so lobeisans?

⁸ Zeova ti rekonpans Raab dan plizir fason. Premyerman, par enn mirak, Li ti sov so lavi ek lavi tu seki ti vinn rod proteksyon dan so lakaz—setadir “tu seki ti res kot so papa ek tu so bann fami.” Answit, Zeova ti permet zot res “parmi nasyon Izrael,” ek lepep ti bizin tret zot kuma bann Izraelit. (Zozye 2:13; 6:22-25; Levitik 19:33, 34) Me pa zis sa. Zeova ti usi donn Raab loner pu vinn enn anset Zezi Kris. Wi, li vremem extraordiner pu truve kuma Zeova inn manifeste so lamur fidel dan enn fason remarkab anver enn fam ki avan, ti pe ador bann zidol dan Kanaan!a—Psom 130:3, 4.

 9. Kuma latitid Zeova anver Raab ek sertenn fam Kretyenn dan premye syek, kapav ankuraz sertenn fam zordi?

⁹ Raab ti enn fam ki ti abandonn enn lavi imoral pu fer Bondye plezir. Depi premye syek ziska zordi, finn ena sertenn fam Kretyenn ki’nn fer parey kuma li. (1 Korintyin 6:9-11) Sirman ki sa bann fam-la inn grandi dan enn lanvironnman parey kuma peyi Kanaan, kot limoralite ti partu ek ki ti mem konsidere kuma enn kitsoz normal. Me selman, zot lafwa ki baze lor enn konesans egzak lor Labib, finn pus zot pu sanz zot lavi. (Romin 10:17) Alor, konsernan sa bann fam-la, nu kapav dir usi ki “Bondye pa onte pu dir ki Li zot Bondye.” (Ebre 11:16) Se vremem enn gran loner!

Li Ti Beni Akoz So Bon Zizman

10, 11. Ki sityasyon ki inplik Nabal ek David, ti fer Abigayl azir?

¹⁰ Buku fam fidel dan lepase ti manifeste enn bon zizman dan enn fason remarkab. Sa bann fam-la ti ena enn gran valer pu bann serviter Zeova. Parmi ti ena Abigayl, fam Nabal, enn zom ris ki ti proprieter buku terin. Grasa bon zizman Abigayl, buku dimunn ti gayn lavi sov. Li ti usi anpes David, fitir Lerwa Izrael, vinn kupab lamor buku dimunn. Nu kapav lir zistwar Abigayl dan 1 Samyel sapit 25.

¹¹ Okumansman sa zistwar-la, nu truv David ek so bann zom pe kanpe pre kot bann trupo Nabal. Zot ti pe protez so bann trupo zur ek nwit, san ki zot demann li enn lapey. Kifer zot ti fer sa? Parski zot ti bon anver Nabal, zot frer Izraelit. Kan stok manze David pe kumans diminye, li avoy dis zennzan kot Nabal pu demann li inpe manze. La, Nabal gayn lokazyon pu montre so rekonesans anver David ek pu onor li antan ki lerwa ki Zeova inn swazir. Me Nabal fer tu lekontrer. Dan enn gran koler, li dir bann insilt lor David ek li return bann zennzan-la lamin vid. Kan David tann sa, li rasanble 400 solda pu al tir vanzans. Antretan, Abigayl inn aprann kuma so mari inn koz brit ar bann zom David. Deswit, avek bon zizman, li degaze fer kitsoz pu kalme David. Li avoy enn gran kantite manze pu li. Apre sa, limem li al get David personelman.—Verse 2-20.

12, 13. (a) Kuma Abigayl ti montre so bon zizman ek so fidelite anver Zeova ek lerwa ki Li ti swazir? (b) Ki Abigayl ti fer kan li ti return kot li, ek ki’nn arive apre?

¹² Kan Abigayl zwenn David, fason ki li sipliy li pu ena pitye, montre so gran respe pu lerwa ki Zeova inn swazir. Li dir David: “Zeova pa pu manke fer fami mo Senyer kontiyne existe pandan lontan, parski se lager Zeova ki mo Senyer pe konbat.” Abigayl dir usi ki Zeova pu fer David diriz nasyon Izrael. (Verse 28-30) An mem tan, avek buku kuraz, li dir David ki, si li pa kontrol limem, so vanzans pu fer li vinn kupab lamor buku dimunn. (Verse 26, 31) Abigayl finn amenn David ala rezon grasa so bon zizman, so limilite ek fason kler ki li’nn rezonn ar li. David finn reponn li: “Mo beni Zeova, Bondye Izrael, ki finn avoy twa ver mwa zordi! Ek mo beni to bon zizman, ek mo beni twa, parski to’nn anpes mwa al tuy bann dimunn inosan zordi.”—Verse 32, 33.

¹³ Kan Abigayl rant kot li, avek kuraz li rod fer so mari kone ki kado li’nn donn David. Me kan li truv li, Nabal ti “su dernye degre.” Alor Abigayl atann ki so mari azin pu rakont li seki’nn arive. Kuma Nabal reazir? Telman li gayn sok, ki li gayn enn zar paralizi. Finalman, dis zur apre, Bondye fer li mor. Kan David aprann ki Nabal inn mor, li demann Abigayl an maryaz. Li vremem admir sa fam-la, ek li ena enn gran respe pu li. Abigayl aksepte so demann.—Verse 34-42.

Eski U Kapav Vinn Kuma Abigayl?

14. Ki kalite Abigayl ti ena, ki nu ti pu kontan manifeste inpe plis dan nu lavi?

¹⁴ Ki u enn zom uswa enn fam, eski u truv sertin kalite ki Abigayl ti ena, ki u ti pu kontan manifeste inpe plis dan u lavi? Sirman kan u dan problem, u ti pu kontan ena enn pli bon zizman. Uswa kan lezot dimunn otur u pa kapav kontrol zot lemosyon, sirman ki u ti pu kontan koz dan enn fason kalm ek rezonab. Si se u dezir, kifer u pa priye Zeova lor sa size-la? Li promet pu donn sazes, disernman ek kapasite pu rezone, tu dimunn ki “kontiyn demann sa avek lafwa.”—Zak 1:5, 6; Proverb 2:1-6, 10, 11.

15. Dan ki sirkonstans eski li sirtu inportan pu bann fam Kretyenn manifeste bann kalite kuma Abigayl?

¹⁵ Sa bann bon kalite-la sirtu inportan pu enn fam ki pe res avek enn konzwin ki pa pran kont bann prinsip Labib. Li posib ki li enn sular. Nu swete ki bann mari kumsa sanze. Ena buku ki’nn sanze grasa duser, profon respe ek bon kondwit ki zot madam inn manifeste.—1 Pyer 3:1, 2, 4.

16. Ninport ki sityasyon ena kot li, kuma enn ser kapav montre ki li akord valer so relasyon avek Zeova plis ki tu kitsoz?

¹⁶ Ninport ki difikilte u bizin siporte kot u, rapel ki Zeova tuzur la pu sutenir u. (1 Pyer 3:12) Donk, fer tu seki u kapav pu fortifye u spirityalite. Dan lapriyer, demann Zeova la sazes ek dir Li fer u resanti enn kalm andan umem. Wi, vinn pli pros ar Zeova par enn letid Labib regilye, par lapriyer, meditasyon ek frekantasyon lezot Kretyin. Abigayl pa ti les li inflyanse par move latitid so mari ki pa ti spirityel. Li pa ti les sa inflyans so lamur pu Bondye ek so latitid anver lerwa ki Zeova ti swazir. Li ti les li gide par bann prinsip drwat. Mem dan enn lakaz kot enn mari, li enn fidel serviter Zeova, enn fam Kretyenn konsyan ki li bizin travay dir pu gayn enn bon spirityalite ek pu res tuzur spirityel. Li vre ki, dapre Labib, so mari ena responsabilite pu pran li swin lor plan spirityel ek materyel. Me selman, se li finalman ki bizin pran so responsabilite ‘pu so prop delivrans avek la krint ek tranbleman.’—Filipyin 2:12; 1 Timote 5:8.

Li Ti Gayn “Rekonpans enn Profet”

17, 18. (a) Ki sityasyon etonan ti teste lafwa vev lavil Sarfat? (b) Kuma sa vev-la ti reazir ar seki Eliya ti demann li, ek kuma Zeova inn rekonpans li?

¹⁷ Dan lepok Eliya, Zeova ti pran swin enn vev ki ti mizer. Fason ki Li’nn azir avek sa madam-la, montre nu ki Li byin apresye bann dimunn ki sutenir vre ladorasyon, kan zot donn zot letan ek tu seki zot ena. Kan ti ena enn long lasesres dan lepok Eliya, la faminn ti afekte buku dimunn. Sa ti tus usi enn vev ek so ti garson ki ti res dan lavil Sarfat. Zis kan zot ti res zot dernye repa, enn viziter—profet Eliya, ti vinn vizit zot. Li ti demann enn kitsoz etonan. Malgre ki li ti kone dan ki difikilte sa madam-la ete, li ti demann li pu fer “enn ti gato ron” pu li avek dernye delwil ek lafarinn ki ti reste. Me, li ti azute: “Ala seki Zeova, Bondye Izrael finn dir: ‘Gran resipyan lafarinn pa pu vid, ek ti resipyan delwil pa pu diminye, ziska ki Zeova avoy enn gro lapli lor later.’ ”—1 Lerwa 17:8-14.

¹⁸ Kuma u ti pu reazir si ti demann u fer enn kitsoz kumsa? Aparaman vev lavil Sarfat ti rekonet ki Eliya enn profet Zeova, akoz sa, li ti fer “dapre seki Eliya ti dir li.” Kuma Zeova ti rekonpans lospitalite sa fam-la? Par enn mirak, Li ti fer sa vev-la, so garson ek profet Eliya, gayn manze pandan lepok lasesres. (1 Lerwa 17:15, 16) Wi, Zeova ti donn vev lavil Sarfat, “rekonpans enn profet,” mem si li pa ti enn Izraelit. (Matye 10:41) Garson Bondye usi ti onor sa vev-la. Dan Nazaret, lavil kot Zezi ti sorti, li ti sit sa vev-la kuma enn legzanp devan bann abitan ki pa ti ena lafwa.—Lik 4:24-26.

19. Dan ki fason buku fam Kretyenn zordi, manifeste mem latitid ki vev lavil Sarfat, ek ki Zeova panse lor zot?

¹⁹ Zordi, buku fam Kretyenn manifeste mem latitid ki sa vev-la. Zot pa get zis zot prop lintere. Par egzanp, sak semenn, zot montre lospitalite anver bann sirveyan ek zot madam. Purtan, parmi sa bann ser-la, ena buku ki pov ek ki ena enn fami pu pran swin. Ena lezot ki partaz zot repa avek bann serviter aplintan, ek zot ed bann ki bizin led. Ena lezot fason ankor ki zot donn zot letan ek seki zot ena pu sutenir bann laktivite spirityel. (Lik 21:4) Eski Zeova remark sa kalite sakrifis-la? Byinsir! “Bondye pa inzis pu Li bliye zot travay ek lamur ki zot finn montre pu so non, kan zot finn servi bann sin, ek ki zot pe kontiyn fer sa.”—Ebre 6:10.

20. Ki nu pu egzamine dan prosin lartik?

²⁰ Dan premye syek, plizir fam ki ti ena la krint pu Bondye ti gayn privilez pu servi Zezi ek so bann zapot. Dan prosin lartik, nu pu egzamine kuma sa bann fam-la ti fer leker Zeova kontan. Nu pu usi get legzanp bann fam zordi ki pe servi Zeova ar tu zot leker, mem si zot dan bann sityasyon byin difisil.

[Notes]

Revizyon

• Kuma sa bann fam-la ti fer leker Zeova kontan?

• Sifra ek Pua

• Raab

• Abigayl

• Vev lavil Sarfat

• Si nu medit lor legzanp sa bann fam-la, kuma sa kapav ed nu? Donn enn legzanp.

[Zimage page 23]

Buku fam fidel, finn servi Bondye malgre “lord lerwa”

[Zimage page 24]

Kifer Raab finn les enn bon legzanp enn kikenn ki ti ena lafwa?

[Zimage page 24]

Ki bann kalite ki Abigayl ti manifeste, u ti pu kontan imite?

[Zimage page 26]

Buku fam Kretyenn zordi montre mem latitid ki vev lavil Sarfat