“Kontiyn Obeir Mo Parol”

“Si zot kontiyn obeir mo parol, zot vremem mo bann disip.”—ZAN 8:31.

 1. (a) Kan Zezi ti return dan lesyel, ki kitsoz li ti les lor later? (b) Ki kestyon eski nu pu egzamine?

ZEZI Kris, limem ki’nn kre larelizyon Kretyin. Kan li ti return dan lesyel, li pa ti les lor later bann liv ki li ti ekrir, ni bann batiman ki li ti konstrir uswa bann rises ki li ti ramase. Me, li ti les bann disip. Li ti fer kone usi, ki bann kondisyon enn kikenn bizin ranpli pu vinn enn disip. An realite, dan Levanzil ki Zan ti ekrir, nu truve ki Zezi ti mansyonn trwa kondisyon ki enn kikenn bizin ranpli si li anvi swiv Zezi. Ki sa bann kondisyon la sa? Ki nu kapav fer pu swiv zot? Ek kuma nu kapav sir ki zordi, numem nu kalifye personelman antan ki bann disip Zezi?a

 2. Ki enn kondisyon inportan mansyone dan Levanzil Zan, enn kikenn bizin ranpli pu li vinn enn disip?

² Apepre sis mwa avan so lamor, Zezi ti al Zerizalem. Laba, li ti pres ar enn laful dimunn ki ti rasanble pu selebre Fet Rekolt pandan enn semenn. Rezilta: omilye sa fet la, “buku dimunn dan laful ti ena lafwa an li.” Dernye zur fet la, Zezi ti kontiyne prese, ek ankor enn fwa, “buku dimunn ti met lafwa an li.” (Zan 7:10, 14, 31, 37; 8:30) Dan sa moman la, Zezi ti koz avek bann nuvo krwayan. Li ti fer zot konn enn kondisyon inportan ki enn disip bizin ranpli. Nu truv sa kan nu lir seki lapot Zan ti ekrir: “Si zot kontiyn obeir mo parol, zot vremem mo bann disip.”—Zan 8:31.

 3. Ki kalite enn kikenn bizin ena pu “kontiyn obeir parol [Zezi]”?

³ Par sa bann parol la, Zezi pa ti ule dir ki sa bann nuvo krwayan la pena ase lafwa. Me plito, li ti montre ki sa bann nuvo la ti ena posibilite pu vinn so bann vre disip—akondisyon ki zot kontiyne obeir so parol ek ki zot montre zot landirans. Zot finn aksepte so parol me asterla, zot ti pu bizin kontiyne obeir li. (Zan 4:34; Ebre 3:14) Wi, Zezi ti kone ki li inportan pu so bann disip ena landirans. Nu truv sa parski dan dernye konversasyon ki li ti gayne avek so bann zapot li ti koz lor la. Dan Levanzil Zan, li ti dir de fwa: “Kontiyne swiv mwa.” (Zan 21:19, 22) Sa mem ki buku premye Kretyin ti fer. (2 Zan 4) Ki’nn ed zot pu ena landirans?

 4. Ki ti permet bann premye Kretyin ena landirans?

⁴ Lapot Zan ti enn disip fidel Zezi pandan preske swasanndizan, ek li ti dir enn kitsoz byin inportan. Li ti felisit bann Kretyin fidel, li ti dir zot: “Zot for ek Parol Bondye li dan zot leker ek zot finn gayn laviktwar lor seki move.” Sa bann disip Zezi la ti ena landirans, setadir zot ti obeir Parol Bondye, parski Parol Bondye ti res dan zot leker. Zot ti ena enn lapresyasyon sinser pu sa Parol la. (1 Zan 2:14, 24) Zordi usi parey, pu nu kapav “res fidel ziska lafin,” nu bizin sir ki Parol Bondye res dan nu leker. (Matye 24:13) Kuma eski nu kapav fer sa? Nu gayn sa repons la dan enn legzanp ki Zezi ti done.

“Tann Laparol”

 5. (a) Dan enn legzanp ki Zezi ti servi, ki bann diferan kalite later li ti mansyone? (b) Dan legzanp Zezi, ki lagrin ek later reprezante?

⁵ Dan Levanzil Matye, Mark ek Lik, Zezi ti sit legzanp enn planter ki sem lagrin. (Matye 13:1-9, 18-23; Mark 4:1-9, 14-20; Lik 8:4-8, 11-15) Kan u lir sa dan Labib, u pu remarke ki ena enn kitsoz inportan dan sa legzanp la. Mem kalite lagrin tom lor diferan kalite later ek li prodir diferan rezilta. Premye kalite later la, li dir, dezyem la, li pena buku profonder ek trwazyem la, li ranpli ar pikan. Katriyem la, pa kuma sa trwa la, li enn “bon later.” Dapre lexplikasyon ki Zezi limem ti done, sa lagrin la reprezant mesaz lor Rwayom Bondye ki truv dan Labib. Later la reprezant diferan dimunn ki ena diferan kalite leker. Dan sa legzanp la, ena kitsoz ki parey ar bann dimunn ki reprezante par bann diferan kalite later. Me purtan, bann dimunn ki reprezante par bon kalite later la, ena enn kitsoz ki fer zot diferan.

 6. (a) Dan legzanp Zezi, kuma eski katriyem kalite later la, li diferan avek lezot trwa la, ek ki sa vedir? (b) Ki kitsoz neseser pu ki bann disip Zezi kapav montre landirans?

⁶ Dapre seki nu lir dan Lik 8:12-15, dan tulekat sityasyon, bann dimunn la “tann laparol.” Purtan, bann seki ena enn “bon leker” zot, zot fer plis ki zis “tann laparol.” Zot “gard li ek zot raport bann frwi avek landirans.” Sa bon later la, li mu ek li ena profonder ek sa permet rasinn plant la pu rant byin dan fon. Rezilta ki sa ena, se ki lagrin la zerme ek li prodir frwi. (Lik 8:8) Se parey pu bann dimunn ki ena enn bon leker. Zot konpran, zot apresye ek zot konsantre lor Parol Bondye, ek li okip zot lespri ek zot leker. (Romin 10:10; 2 Timote 2:7) Parol Bondye res dan zot leker. Alor, zot kontiyn raport bann frwi avek landirans. Donk, nu bizin ena enn gran lapresyasyon ki sinser pu Parol Bondye. Se sa ki pu ed nu pu montre landirans antan ki bann disip Zezi. (1 Timote 4:15) Me kuma eski nu pu kapav devlop sa kalite lapresyasyon sinser la pu Parol Bondye?

Kondisyon Leker ek enn Profon Meditasyon

 7. Ki laktivite ki asosye avek enn bon leker?

⁷ Remarke avek ki laktivite, Labib suvan asosye enn bon leker. “Leker enn dimunn drwat reflesi pu li kone kuma bizin reponn.” (Proverb 15:28) “Les bann parol ki sorti dan mo labus ek meditasyon mo leker, fer twa plezir, A Zeova.” (Psom 19:14) “Meditasyon mo leker pu lor bann kitsoz intelizan.”—Psom 49:3.

 8. (a) Ki nu bizin evite fer kan nu lir Labib, me ki nu bizin fer usi? (b) Ki profi nu gayne kan nu priye pu medit lor Parol Bondye? (Get usi lankadre “Zot Pe Tini Ferm dan Laverite.”)

⁸ Parey kuma sa bann ekrivin Labib la, nu’si nu bizin medit lor Parol Bondye ek lor so laktivite. Nu pu fer sa avek rekonesans ek avek led lapriyer. Kan nu lir Labib uswa bann lezot piblikasyon, nu bizin pa fer kuma sertin turis. Kan zot dan enn zoli landrwa zot prese pu filme tu seki zot truve. Apre, zot degaze pu al dan enn lot landrwa pu al filme ankor tu seki zot truve. Me zot pa apresye vremem bote ki ena dan sa landrwa la. Me nu okontrer, kan nu etidye Labib, nu bizin pran letan arete ek apresye seki nu pe lir.b Kan nu reflesi an silans lor seki nu lir, Parol Bondye ena enn lefe lor nu leker. Li tus nu bann santiman ek li form nu fason panse. Li pus nu usi pu priye Bondye ek partaz nu bann panse personel avek Li. Lerla nu latasman ar Zeova vinn pli for ek nu lamur pu Bondye pus nu pu kontiyn swiv Zezi. Nu pu fer sa, mem si nu bizin fer fas avek bann sityasyon byin difisil. (Matye 10:22) Wi, li kler ki si nu anvi res fidel ziska lafin, li inportan ki nu reflesi lor seki Bondye dir.—Lik 21:19.

 9. Ki nu kapav fer pu nu sir ki nu leker tuzur aksepte Parol Bondye?

⁹ Legzanp ki Zezi ti servi, montre usi ki ena bann difikilte ki anpes sa lagrin la, setadir Parol Bondye, grandi. Alor, pu nu kapav res bann disip fidel, li bon ki (1) nu kone ki bann difikilte ki reprezante par move kalite later dan sa legzanp la, ek (2) fer kitsoz pu koriz zot uswa evit zot. Dan sa fason la, nu pu kapav fer ansort ki nu leker tuzur aksepte sa lagrin la, setadir mesaz lor Rwayom Bondye ek kontiyn raport frwi.

“Lor Bor Semin” Reprezant Bann Dimunn Ki Ena Tro Buku Lokipasyon

10. Explike kuma premye kalite later la ete dan legzanp Zezi, ek explik seki li reprezante.

¹⁰ Premye kalite later lor ki lagrin la tonbe se “lor bor semin, kot buku dimunn finn mars lor la.” (Lik 8:5) Later ki lor semin ki amenn dan enn karo, li suvan dir parski ena buku dimunn ki ale-vini lor la. (Mark 2:23) Li parey pu bann dimunn ki tro okipe avek buku aktivite ki ena dan sa lemond la. Zot pa truv letan pu devlop enn lapresyasyon sinser pu Parol Bondye. Kifer? Parski zot les sa bann aktivite la pran tro zot letan ek zot lenerzi. Zot tann laparol, me zot pa medit lor la. Sa fer zot leker res insansib. Avan ki zot devlop enn lamur pu Parol Bondye, “Dyab vini ek tir parol la dan zot leker pu ki zot pa krwar ek zot pa sape.” (Lik 8:12) Eski kapav evite ki sa arive?

11. Kuma eski nu kapav protez nu leker pu li pa vinn kuma enn later dir?

¹¹ Li difisil pu kitsoz puse lor enn later ki lor bor semin. Me ena buku kitsoz ki kapav fer pu anpes enn leker vinn parey kuma sa later la. Enn later dir kot buku dimunn inn marse, kapav vinn mu. Kapav fer kitsoz puse lor la si travay li byin ek si aret pas lor la. Li parey usi pu enn leker. Si nu pran letan pu etidye ek medite lor Parol Bondye, sa kapav fer nu leker vinn bon, parey kuma enn later ki prodir kitsoz. Seki inportan se ki nu pa les bann aktivite ki nu fer tulezur pran tro nu letan. (Lik 12:13-15) Okontrer, fer ansort ki nu organiz nu pu nu gayn letan pu reflesi lor “bann kitsoz ki pli inportan” dan lavi.—Filipyin 1:9-11.

“Lor Ros” Reprezant Bann Dimunn Ki Per

12. Dan legzanp Zezi, pu ki rezon veritab eski plant ki pus lor dezyem kalite later la fletri?

¹² Kan lagrin la tom lor dezyem kalite later, li pa zis res lor la, kuma dan premye ka. Li fer rasinn ek li puse. Me selman, kan soley leve, plant la brile avek saler ek li fletri. Me, not sa detay inportan la. Vre rezon kifer plant la fletri se pa akoz saler. Apre tu, plant ki pus lor bon later la usi expoze ar soley, me selman li pa mor, okontrer li pus byin. Kifer ena sa diferans la? Zezi explike ki plant la fletri “parski later la pena ase profonder” ek parski “pena limidite.” (Matye 13:5, 6; Lik 8:6) Bann “ros” ki truv zis anba sa later la, anpes lagrin la avoy so rasinn dan profonder pu ki li gayn limidite ek lerla li vinn solid. Plant la fletri parski later la pena ase profonder.

13. Ki kalite dimunn ki resanble enn later ki pena profonder, ek pu ki rezon prinsipal eski zot reazir kumsa?

¹³ Isi, parti sa legzanp la, konsern bann dimunn ki “aksepte laparol avek lazwa.” Se bann dimunn ki swiv Zezi “pandan enn moman,” avek tu zot leker. (Lik 8:13) Kan zot gayn “persekisyon ek problem,” ki kumadir soley dife, zot telman per, ki zot perdi zot lazwa ek zot lafors. Lerla zot aret swiv Zezi. (Matye 13:21) Me purtan, rezon prinsipal kifer zot per, se pa parski zot gayn lopozisyon. Apre tu, bann disip Zezi par milyon pe siport tu sort kalite problem, me purtan zot res fidel. (2 Korintyin 2:4; 7:5) Rezon prinsipal kifer sertin per ek tonbe, se parski zot leker kumadir ros. Sa kalite leker la anpes zot pu medit an profonder lor bann kitsoz pozitif ek spirityel. Donk, zot lapresyasyon pu Zeova ek pu so Parol pa ase profon ek li telman feb ki zot pa kapav fer fas avek lopozisyon. Kuma eski enn kikenn kapav anpes enn kitsoz kumsa arive?

14. Ki kitsoz enn dimunn kapav fer pu anpes so leker vinn kuma enn later ki pena profonder?

¹⁴ Enn dimunn bizin fer sir ki pena okenn kitsoz ki kumadir enn ros ki dan fon so leker, ki pu anpes li progrese. Kitfwa li finn telman marke par enn kitsoz, ki sa finn fer li vinn amer. Kapav ena enn tandans byin kasyet dan limem pu get so prop lintere avan. Uswa, li kapav ena usi bann lezot move santiman inpe parey, ki’nn byin anrasine me ki kasyet dan so leker. Si zame ena deza enn kitsoz kumsa dan leker enn dimunn, puvwar ki Parol Bondye ena, kapav tir sa. (Zeremi 23:29; Efezyin 4:22; Ebre 4:12) Apre, si avek led lapriyer, li medit lor Parol Bondye, sa pu permet ki ‘laparol res fixe’ dan so leker. (Zak 1:21) Sa pu donn li lafors pu fer fas avek bann peryod dekurazman. Li pu gayn usi kuraz pu res fidel mem si ena bann difikilte.

“Parmi Bann Pikan” Reprezant Bann Dimunn Ki Ena enn Leker Partaze

15. (a) Kifer eski nu bizin sirtu pran kont trwazyem kalite later ki Zezi mansyone? (b) Ki finalman arive avek sa trwazyem kalite later la ek kifer sa arive?

¹⁵ Trwazyem kalite later ki Zezi mansyone, ena pikan lor la. Nu bizin pran li kont parski dan sertenn fason, li parey kuma bon later. Parey kuma bon later la, lor later ki ena pikan la usi, lagrin la fer rasinn ek puse. Okumansman, pena okenn diferans dan fason ki nuvo plant la puse lor sa de diferan later la. Me selman, avek letan ena enn kondisyon ki devlope ki apre tuf plant la. Ena enn pake pikan ki puse lor sa later la ek ranpli li, alor ki lor bon kalite later la, li pa parey. Kan tipti plant la kumans puse ek sorti dan later, li gayn difikilte pu puse parski ena bann ‘pikan ki pus ansam avek li.’ Pandan enn moman, tulede rod manze, lalimyer ek lespas pu zot kapav puse. Me selman, avek letan bann pikan la kumans kuver plant la ek zot ‘tuf li.’—Lik 8:7.

16. (a) Ki kalite dimunn ki resanble later kot ena pikan? (b) Dapre seki nu lir dan tuletrwa Levanzil, ki bann pikan la reprezante?—Get not.

¹⁶ Ki kalite dimunn ki resanble sa later kot ena pikan la? Zezi limem explike: “Se bann dimunn ki finn tande, me zot les traka, larises ek bann plezir sa lavi la, tuf zot net ek lerla zot pa rekolte okenn frwi.” (Lik 8:14) Lagrin ki sa planter la inn seme ek bann pikan, tulede pus ansam. Li parey usi pu bann dimunn, zot esey fer de kitsoz alafwa. Zot aksepte Parol Bondye ek an mem tan bann “plezir ki ena dan lavi.” Parol Bondye inn seme dan zot leker, me ena lezot lokipasyon ankor dan zot lavi ki pran zot latansyon. Zot leker sinbolik partaze. (Lik 9:57-62) Sa anpes zot pu konsakre ase letan pu priye ek pu byin medite lor Parol Bondye. Zot pa reysi les Parol Bondye rant byin dan zot leker. Lerla zot pena enn lapresyasyon sinser ki pu permet zot ena landirans. Tigit par tigit, bann lokipasyon ki pa spirityel kumans pas avan bann kitsoz spirityel ziska ki sa bann kitsoz spirityel la ‘tufe net.’c Se enn lafin byin tris pu bann ki pa kontan Zeova avek tu zot leker!—Matye 6:24; 22:37.

17. Ki bann swa nu bizin fer dan nu lavi pu ki nu pa tufe par bann pikan sinbolik ki Zezi ti mansyone dan so legzanp?

¹⁷ Dan nu lavi, bann kitsoz spirityel bizin ena priyorite lor bann kitsoz materyel. Se lerla ki nu pu kapav anpes bann sufrans ek bann plezir ki ena dan sa lemond la tuf nu. (Matye 6:31-33; Lik 21:34-36) Nu bizin zame pa negliz nu lektir Labib ni negliz pas letan pu reflesi lor seki nu lir. Si nu fer nu lavi vinn pli sinp ki posib, lerla nu pu gayn plis letan pu konsantre ek medite dan lapriyer. (1 Timote 6:6-8) Ena bann serviter Bondye ki finn fer sa—kumadir zot finn derasinn bann pikan pu ki plant la gayn plis manze, lalimyer ek lespas pu li kapav puse ek raport bann frwi. Kan zot inn fer sa, zot inn gayn benediksyon Zeova. Sandra, ki ena 26 an dir: “Kan mo reflesi lor bann benediksyon ki mo’nn gayne dan laverite, mo realize ki sa lemond la pa kapav ofer nu nanyin ki parey kumsa!”—Psom 84:11.

18. Antan ki Kretyin, kuma eski nu kapav kontiyn obeir Parol Bondye ek ena landirans?

¹⁸ Li kler alor, ki nu zenn uswa vye, nu tu pu kontiyn obeir Parol Bondye akondisyon ki nu les li res dan nu leker. Lerla nu pu kapav usi ena landirans antan ki bann disip Zezi. Donk, nu bizin fer sir ki nu leker sinbolik zame pa vinn kuma enn later ki dir, ki pena profonder uswa ki kuver avek bann move plant. Me nu les li res tuzur mu ek profon. Dan sa fason la, nu pu kapav fer Parol Bondye rant byin dan nu leker. Lerla nu pu “raport bann frwi avek landirans.”—Lik 8:15.

[Not anba paz]

Ki Repons U Pu Done?

• Kifer eski nu bizin ‘kontiyn obeir parol Zezi’?

• Kuma eski nu kapav les Parol Bondye res dan nu leker?

• Ki kalite dimunn ki reprezante par kat diferan kalite later ki Zezi mansyone?

• Kuma eski u kapav truv letan pu reflesi lor Parol Bondye?

[Lankadre/Zimaz lor paz 19]

“ZOT PE TINI FERM DAN LAVERITE”

BUKU disip Zezi Kris, ki byin lontan dan laverite, pe montre lane apre lane, ki “zot pe tini ferm dan laverite.” (2 Pyer 1:12) Ki kitsoz ki ed zot pu gard zot landirans? Nu egzaminn sertin zot bann komanter.

“Sak zur mo terminn mo lazurne avek lektir enn porsyon Labib ek mo fer lapriyer. Apre sa, mo reflesi lor seki mo finn lir.”—Jeanne, batize an 1939.

“Kan mo reflesi lor profon lamur ki Zeova, enn Bondye byin gran, ena pu nu, sa donn mwa enn santiman sekirite ek lafors pu mo res fidel.”—Patricia, batize an 1946.

“Mo’nn reysi kontiyn servi Zeova parski mo’nn gard bann bon labitid pu etidye Labib ek mo’nn konsantre mo lespri lor ‘bann kitsoz profon an rapor avek Bondye.’ ”—1 Korintyin 2:10; Anna, batize an 1939.

“Mo lir Labib ek bann piblikasyon Biblik pu mo kapav egzaminn mo leker ek mo bann lintansyon.”—Zelda, batize an 1943.

“Bann pli bon moman dan mo lavi, se kan mo kapav al fer enn lamars ek koz ar Zeova dan lapriyer ek zis fer Li kone seki mo resanti vremem.”—Ralph, batize an 1947.

“Mo kumans mo lazurne kan mo egzaminn tex dizur ek lir enn porsyon dan Labib. Lerla mo ena enn nuvo kitsoz lor ki mo kapav medite pandan lazurne.”—Marie, batize an 1935.

“Bann diskisyon lor enn liv Labib verse par verse, donn mwa vremem lafors.”—Daniel, batize an 1946.

Kan eski u pran letan pu u medite dan lapriyer lor parol Bondye?—Danyel 6:10b; Mark 1:35; Akt 10:9.

[Zimaz lor paz 22]

Kan nu donn priyorite bann kitsoz spirityel, nu kapav “raport bann frwi avek landirans”