‘Bann Dimounn Ki Pena Boukou Ledikasion ek Ki Sinp’

1, 2. Ki mirak Pier ek Zan ti fer pre kot laport tanp?

SOLEY lapremidi pe briye lor lafoul. Bann Zwif ki bien devwe, ek bann disip Lekris pe koumans rant dan tanp. Biento, pre pou “ler lapriyer.”a (Zist. 2:46; 3:1) Parmi lafoul, ena Pier ek Zan ki pe pas kot Zoli Laport pou rant dan tanp. Akoz lafoul ki ena dan tanp, ena boukou tapaz. Tann enn ta dimounn pe koze ek pe marse. Me malgre tou sa tapaz-la, tann enn mandian ki pe demann sarite. Li ena anviron 40 an ek li andikape.​—Zist. 3:2; 4:22.

² Amezir ki Pier ek Zan pe avanse, mandian-la koumans resit seki li abitie dir pou demann sarite. Toule-de zapot arete, mandian-la get zot ek ena lespwar ki li pou gagn kitsoz ar zot. Lerla, Pier dir li: “Mo pena ni larzan ni lor, me seki mo ena mo pe donn twa. Lor nom Zezi Kris ki sorti Nazaret, marse!” Esey mazine kouma lafoul gagn sok, kan zot trouv Pier trap lame sa zom ki andikape la ek fer li leve! (Zist. 3:6, 7) Pou premie fwa dan so lavi, sa zom-la pe debout drwat lor so lipie. Eski to trouv sa misie-la pe debout, pe fixe so lazam, ek pe esey marse pou premie fwa? Nou konpran kifer li koumans sot-sote partou ek loue Bondie bien for!

 3. Ki kado extraordiner sa misie ki ti andikape la ek lafoul ti gagne?

³ Lafoul extra kontan ek galoupe pou al zwenn Pier ek Zan, ki kot bann Kolonn Salomon. Se laba mem ki Zezi ti abitie debout ek ansegne, ek ki Pier explike kouma sa mirak-la inn arive. (Zan 10:23) Li donn lafoul ek sa misie ki ti andikape la enn kado, ki ena boukou plis valer ki larzan ek lor. Sa kado-la inplik plis ki gerizon sa misie-la. Gras-a sa kado-la, bann dimounn gagn lokazion pou repanti, pou gagn pardon zot pese, ek pou vinn bann disip Zezi Kris, sa kikenn ki Zeova finn swazir kouma “Azan Prinsipal ki donn lavi.”​—Zist. 3:15.

 4. (a) Apre ki Pier ek Zan ti geri sa zom-la, ki bann dimounn ki ti ena lotorite ti pou rod fer? (b) Ki de kestion nou pou reponn?

⁴ Se enn zour extraordiner! Pier ti geri enn zom ki ti andikape, ek aster-la sa zom-la pe marse. Pier inn osi donn bann milye dimounn lokazion pou konpran volonte Bondie, koumsa zot pou kapav fer Bondie plezir. (Kol. 1:9, 10) Anplis, akoz tou seki’nn arive sa zour-la, bann dimounn ki ti ena lotorite ti pou rod anpes bann disip akonpli mision ki’nn donn zot: Pres lor Rwayom Bondie. (Zist. 1:8) Sa bann dimounn-la ti konsider Pier ek Zan kouma bann zom ‘ki pena boukou ledikasion ek ki sinp.’ Me kanmem sa, ki nou kapav aprann ar fason ki zot ti rann temwaniaz ar lafoul?b (Zist. 4:13) Ek kouma nou kapav montre kouraz, parey kouma Pier, Zan, ek bann lezot disip kan zot ti gagn persekision?

 5. Ki nou kapav aprann ar fason ki Pier koz ar lafoul?

⁵ Pier ek Zan pe debout devan lafoul. Zot kone ki pa tro lontan, parmi sa lafoul-la ena ki ti demande pou touy Zezi. (Mark 15:8-15; Zist. 3:13-15) Mazine ki kantite kouraz Pier bizin ena pou dir ki sa zom ki ti andikape la inn geri lor nom Zezi. Pier pa kasiet laverite zis pou fer lafoul plezir. Dan enn fason fran, li dir ki lafoul ena so par responsabilite dan lamor Lekris. Me Pier pa gard sa bann dimounn-la dan leker, parski zot “inn azir dan liniorans.” (Zist. 3:17) Li apel zot “mo bann frer” ek li koz lor bon nouvel lor Rwayom Bondie. Si zot repanti ek ena lafwa dan Lekris, Zeova pou “donn zot bann lepok soulazman.” (Zist. 3:19) Nou osi nou bizin ena kouraz ek koz dan enn fason fran, kan nou ena pou anons mesaz zizman Bondie. Me kanmem sa, fode pa ki nou agresif ouswa ki nou ziz bann dimounn. Okontrer, nou bizin konsider sa bann dimounn-la kouma nou bann fitir frer ek ser. Ek parey kouma Pier, nou bizin koz lor bon nouvel Rwayom Bondie.

 6. Kouma Pier ek Zan montre ki zot ena limilite?

⁶ Bann zapot ena limilite. Zot pa dir ki se gras-a zot prop lafors ki zot inn fer sa mirak-la. Okontrer, Pier dir lafoul: “Kifer zot pe get nou koumadir se par nou prop lafors ouswa gras-a nou latasman pou Bondie ki nou’nn fer li marse?” (Zist. 3:12) Pier ek lezot zapot kone ki si zot reisi fer bann bon kitsoz dan predikasion, se pa gras-a zot prop lafors, me gras-a lafors Bondie. Akoz sa, avek limilite zot donn Zeova ek Zezi loner pou bann bon kitsoz ki zot inn reisi fer.

7, 8. (a) Ki kado nou kapav ofer bann dimounn? (b) Kouma promes pou “retabli tou bann kitsoz” pe realize azordi?

⁷ Nou osi nou bizin ena limilite kan nou pe pres mesaz lor Rwayom Bondie. Li vre ki azordi, lespri sin pa donn bann Kretien pouvwar pou fer bann mirak. Me kanmem sa, nou kapav ed bann dimounn pou ena lafwa dan Bondie ek dan Lekris. Nou kapav ed zot osi pou gagn mem kado ki Pier ti donn bann dimounn: Lokazion pou gagn pardon zot pese ek gagn rekonfor ar Zeova. Sak lane, bann milye dimounn aksepte sa kado-la, ek vinn bann disip Kris ki batize.

⁸ Nou kone ki nou pe viv lepok ki Pier ti apel lepok kot “retabli tou bann kitsoz.” Ek sa ti koumanse an 1914, kan Rwayom Bondie inn koumans dirize dan lesiel, ek sa inn realiz bann profesi ki “Bondie ti dir par labous so bann profet ki sin dan lepase.” (Zist. 3:21; Ps. 110:1-3; Dan. 4:16, 17) Inpe apre sa, Lekris ti ed so bann disip pou retabli vre ladorasion lor later. Gras-a sa, bann milyon dimounn inn vinn bann sitwayen Rwayom Bondie, ek aster-la zot pe ador Zeova dan lape ek linite. Zot inn rezet zot vie personalite, ek zot inn “met lor zot nouvo personalite ki finn kree dapre volonte Bondie.” (Efe. 4:22-24) Se pa gras-a lafors bann dimounn ki sa mandian andikape la ti gagn so gerizon, me gras-a lespri sin Bondie, ek se lespri sin Bondie osi ki’nn ed bann dimounn pou sanze ek ador Bondie. Parey kouma Pier, avek kouraz nou bizin servi bien Parol Bondie pou ansegn lezot. Ek nou bizin rapel ki, si nou’nn reisi fer bann dimounn vinn bann disip Lekris, se pa gras-a nou prop lafors, me gras-a lafors Bondie.

9-11. (a) Kouma bann sef relizie zwif reazir ar seki Pier ek Zan dir? (b) Me ki bann zapot bien deside pou fer?

⁹ Lafoul exsite ek pe fer boukou tapaz dan tanp, parski sa mandian-la pe sote-pile ek kriye, ek akoz diskour Pier. Lerla, bann sef pretc ek sef gard tanp ki responsab sekirite dan tanp, degaze al fer enn lanket. Li paret ki sa bann zom-la ti bann Sadisein, enn sekt ki ti ris ek ki ti ena boukou linflians dan politik. Bann Sadisein ti fer boukou zefor pou ki ena lape avek bann Romin. Konpare ar bann Farizien ki ti obeir lalwa oral, bann Sadisein ti rezet li net. Anplis, bann Sadisein pa ti krwar dan rezireksion. Alor, zot bien agase kan zot trouve ki Pier ek Zan pa per pou dir ki Zezi inn resisite!

¹⁰ Bann Sadisein telman agase ar Pier ek Zan, ki zot fer zet bann-la dan prizon. Ek le-landemin, zot fer Pier ek Zan pas devan lakour siprem zwif. Bann Sadisein panse ki zot pli siperyer ki lezot. Akoz sa, zot konsider Pier ek Zan kouma ‘bann dimounn ki pena boukou ledikasion ek ki sinp.’ Bann-la pa ti etidie dan okenn gran lekol relizie. Alor pou zot, Pier ek Zan pa gagn drwa ansegne dan tanp. Me kan zot trouv Pier ek Zan pe koz avek lasirans ek dan enn fason fran, zot bien etone. Kifer Pier ek Zan pe reisi koz avek konviksion? Enn rezon, se parski zot “ti avek Zezi.” (Zist. 4:13) Zot Met ti ansegn zot avek enn vre lotorite, pa kouma bann exper lalwa.​—Mat. 7:28, 29.

¹¹ Lakour donn bann zapot lord pou aret prese. Pou bann Zwif sa lepok-la, sa lakour-la ti ena boukou pouvwar. Pa tro lontan, kan Zezi ti pas devan sa lakour-la, zot ti dir ki “li merit lamor.” (Mat. 26:59-66) Kanmem sa, Pier ek Zan pa gagn per. Mem si zot devan bann zom ris, ki ena enn bel ledikasion, ek ki ena boukou linflians, avek respe zot dir: “Zize zotmem, si li bon devan lizie Bondie ki nou ekout zot olie Bondie. Me nou, nou pa kapav aret koz lor bann kitsoz ki nou’nn trouve ek tande.”​—Zist. 4:19, 20.

12. Ki kapav ed twa pou ena plis konviksion ek kouraz?

¹² Eski twa osi, to kapav ena mem kouraz? Ki to resanti kan to bizin pres avek enn kikenn ki ris, ki ena enn bel ledikasion, ouswa enn dimounn ki ena enn bel linflians dan to landrwa? Ki to pou fer si bann manb to fami, bann kamarad lekol, ouswa to bann koleg boufonn twa akoz to bann krwayans? Eski to pou per? Si wi, pa gagn traka se enn kitsoz ki kapav arive. To kapav sirmont to laper. Kan Zezi ti lor later, li ti montre so bann disip kouma pou defann zot lafwa avek konviksion ek respe. (Mat. 10:11-18) Apre so rezireksion, Zezi ti promet so bann disip ki li pou avek zot “toulezour ziska peryod lafin sa lemond-la.” (Mat. 28:20) Azordi, Zezi servi “esklav fidel ek saz” pou ansegn nou kouma pou defann nou lafwa. (Mat. 24:45-47; 1 Pier 3:15) Nou gagn sa lansegnman-la gras-a bann renion, kouma par exanp, renion Nou Lavi Kretien ek Nou Predikasion. Nou gagn sa osi dan nou bann piblikasion, kouma par exanp, bann lartik ki ena dan seksion “Repons pou Bann Kestion Biblik” lor nou sit jw.org. Eski to pe asiste sa bann renion-la ek servi sa bann piblikasion-la? Si to pe fer sa, to pou ena plis konviksion ek kouraz. Lerla, parey kouma bann zapot, to pa pou les nanye anpes twa koz lor bann zoli verite ki to’nn aprann dan Labib.

13, 14. Si nou gagn persekision, ki nou bizin fer, ek kifer?

¹³ Deswit kouma lakour liber Pier ek Zan, bann-la al zwenn bann lezot manb lasanble. ‘Zot tou priye Bondie ansam’ ek zot demann Li kouraz pou kontign prese. (Zist. 4:24) Pier kone ki kantite li bet ki enn dimounn kont lor so prop lafors kan li anvi fer volonte Bondie. Parski inn gagn de-trwa semenn, avek lasirans li ti dir Zezi: “Mem si zot tou abandonn twa, mwa zame mo pa pou abandonn twa!” Me pourtan, parey kouma Zezi ti predir, akoz laper bann zom Pier ti renie so kamarad ek so ansegnan. Me selman, Pier inn aprann ar so erer.​—Mat. 26:33, 34, 69-75.

¹⁴ Si to anvi kontign obeir komannman pou rann temwaniaz lor Lekris, li pa ase ki to zis determine pou prese. Kan bann dimounn esey anpes twa servi Zeova ouswa esey anpes twa prese, swiv lexanp Pier ek Zan. Demann Zeova pou donn twa kouraz. Pa ezite pou demann led bann frer ek ser dan to lasanble. Koz lor bann problem ki to pe gagne ar bann frer ek ser ki ena lexperyans ek bann ansien. Kan lezot priye pou twa, sa kapav donn twa plis lafors.​—Efe. 6:18; Zak 5:16.

15. Ki kitsoz kapav ankouraz twa si pandan enn tan to’nn aret prese?

¹⁵ Eski to’nn deza aret prese parski bann dimounn inn met presion lor twa? Si wi, pa dekouraze. Pa bliye ki apre lamor Zezi, tou bann zapot ti aret prese pandan enn tan. Me apre, bien vit zot ti rekoumans zot bann laktivite. (Mat. 26:56; 28:10, 16-20) Olie ki to les bann erer ki to’nn fer dan lepase fatig twa, servi to lexperyans ek bann leson ki to’nn aprann pou ankouraz lezot.

16, 17. Ki nou kapav aprann ar lapriyer ki bann disip Lekris ti fer?

¹⁶ Kan bann gouvernman pe persekit nou, pou ki kitsoz nou kapav priye? Rapel ki kan bann disip ti priye, zot pa ti demann Zeova pou fer zot aret gagn persekision. Bann disip ti rapel seki Zezi ti dir: “Si bann-la finn persekit mwa, bann-la pou persekit zot osi.” (Zan 15:20) Alor, sa bann disip ki fidel la, ti demann Zeova pou “pran kont” menas bann ki ti pe persekit zot. (Zist. 4:29) Bann disip ti kone ki seki pli inportan, se volonte Bondie. Zot ti konpran ki kan zot pe gagn persekision, sa pe realiz bann profesi. Zot ti kone osi ki, parey kouma Zezi ti ansegn zot, volonte Bondie ‘ti pou fer lor later,’ ek sa malgre seki bann imin kapav dir ek fer.​—Mat. 6:9, 10.

¹⁷ Bann disip ti anvi fer volonte Bondie. Alor, zot ti fer sa lapriyer-la: “Ed to bann esklav pou kontign koz lor to parol avek boukou kouraz.” Kouma Zeova ti reponn zot lapriyer? “Sa plas kot zot ti rasanble ansam la ti tranble, ek zot tou ti ranpli ar lespri sin ek zot ti pe koz lor parol Bondie avek kouraz.” (Zist. 4:29-31) Nanye pa kapav anpes Bondie akonpli so volonte. (Iza. 55:11) Kitfwa nou bann lennmi paret bien pwisan ek li paret ki li inposib ki Bondie so volonte realize. Me si nou priye Bondie, ek demann Li pou donn nou lafors, Li pou donn lafors ki nou bizin pou ki nou kontign prese avek kouraz.

18. Ki bann frer ek ser dan lasanble Zerizalem ti fer pou sakenn zot kamarad?

¹⁸ Sa nouvo lasanble dan Zerizalem la pe grandi bien vit, ena plis ki 5,000 frer ek ser.d Mem si bann disip sorti dan diferan landrwa, zot “ena mem santiman ek mem fason panse.” Wi, ena linite ant zot, dan zot fason panse ek dan zot lopinion! (Zist. 4:32; 1 Kor. 1:10) Bann disip demann Zeova pou beni zot bann zefor. Me zot fer enn lot kitsoz ankor: Zot fortifie lafwa sakenn zot kamarad, ek kan bizin, zot pa ezite pou soutenir zot bann frer ek ser lor plan materyel. (1 Zan 3:16-18) Par exanp, disip Zozef, ki bann zapot apel osi Barnabas, vann enn terin ki li ti ena, ek li donn bann zapot kas ki li’nn gagne. Kifer li fer sa? Li anvi ed bann frer ek ser ki res lwin, ek ki’nn desid pou res Zerizalem inpe pli lontan pou aprann plis lor zot nouvo krwayans.

19. Kifer Zeova ti touy Ananias ek Safira?

¹⁹ Dan sa lasanble-la, ena osi enn koup. Misie-la apel Ananias, ek madam-la apel Safira. Zot vann enn bout terin ek zot donn bann zapot kas-la. Me zot fer bann dimounn krwar ki zot inn donn tou kas ki zot inn gagne ar sa lavant-la. Me sa li fos, parski ‘an sekre zot ti gard enn parti larzan-la.’ (Zist. 5:2) Zeova touy sa koup-la. Eski Li fer sa parski zot pa ti donn ase kas? Non, se pa akoz sa. Li’nn fer sa, parski sa koup-la ti ena bann move lintansion ek ki zot inn esey anbet lezot. Ananias ek Safira ti ‘koz manti pa ar bann zom, me ar Bondie.’ (Zist. 5:4) Parey kouma bann ipokrit ki Zezi ti kondane, Ananias ek Safira ti plis interese pou gagn laglwar bann zom, ki faver Bondie.​—Mat. 6:1-3.

20. Ki leson nou aprann konsernan seki nou donn Zeova?

²⁰ Azordi, bann Temwin bien kontan pou imit bann disip dan premie siek N.L. ki ti bien zenere. Sa bann Temwin-la montre ki zot zenere ek zot fer bann kontribision pou soutenir travay predikasion ki pe fer dan lemond antie. Nou pa fors personn pou donn so letan ouswa so larzan pou soutenir sa travay-la. Ofet, Zeova pa anvi ki nou servi Li akoz kiafer ouswa par obligasion. (2 Kor. 9:7) Seki pli inportan pou Zeova, se pa kantite kas ki nou pe done, me avek ki lintansion nou pe done. (Mark 12:41-44) Fode zame ki nou fer kouma Ananias ek Safira. Fode pa ki nou les bann dezir egois ouswa lanvi pou gagn laglwar, motiv nou pou fer kitsoz pou Bondie. Okontrer, anou imit lexanp Pier, Zan, ek Barnabas. Anou servi Zeova parski nou kontan Li ek nou kontan nou prosin.​—Mat. 22:37-40.