Kouma To Kapav Prepar Twa pou Pran Batem?

1-2. Si to pankor pre pou pran batem, kifer fode pa to dekouraze? (Get zimaz lor kouvertir.)

SI TO pe pans pou pran batem, se enn zoli lobzektif ki to’nn fixe. Eski to pre pou pran batem aster-la mem? Si to panse ki to pre ek ki bann ansien dakor, pa ezite pou pran batem prosin lokazion ki to gagne. Si to fer sa, to pou gagn enn zoli lavi kan to servi Zeova, ek Zeova pou beni twa.

² Parkont, si enn kikenn inn dir twa ki to bizin kontign fer bann progre avan ki to pran batem, ouswa si tomem to pans sa, fode pa to dekouraze. Ninport ki laz to ena, to kapav kontign fer bann progre pou realiz sa lobzektif-la.

 3. Ki kitsoz enn fonksioner lakour Etiopien ti demann Filip, ek ki kestion nou kapav poz noumem? (Zistwar Bann Zapot 8:36, 38)

³ Lir Zistwar Bann Zapot 8:36, 38. Enn fonksioner lakour Etiopien ti demann Filip: “Ki anpes mwa pran batem?” Sa zom-la ti anvi pran batem. Me eski li ti vremem pre pou pran batem?

 4. Ki kitsoz montre ki sa Etiopien-la ti anvi aprann plis?

⁴ Sa Etiopien-la ti “al Zerizalem pou ador Bondie.” (Zist. 8:27) Alor, sirman li ti aksepte relizion Zwif ek li ti konverti. Sirman li ti aprann konn Zeova gras-a bann Lekritir Ebre. Me kanmem sa, li ti anvi aprann plis. Ki sa zom-la ti pe fer kan Filip ti zwenn li lor sime? Li ti pe lir enn roulo profet Izai. (Zist. 8:28) Sa ti bann lansegnman bien profon. Sa Etiopien-la pa ti zis kontant li ar bann lansegnman debaz; li ti anvi aprann plis.

 5. Ki sa Etiopien-la ti fer ar seki li ti aprann?

⁵ Sa Etiopien-la ti enn fonksioner bien inportan, ek li ti pe servi Larenn Kandas. Li ti “an-sarz tou bann trezor sa larenn-la.” (Zist. 8:27) Alor, sirman li ti ena boukou responsabilite ek li ti bien okipe. Kanmem sa, li ti pran letan pou ador Zeova. Li pa ti zis kontant li pou aprann bann verite Biblik; li ti met an pratik seki li ti aprann. Se pou sa rezon-la ki li ti fer enn long vwayaz depi Letiopi pou al ador Zeova dan Zerizalem. Sa vwayaz-la sirman inn kout li bien ser ek inn pran boukou so letan. Selman, sa zom-la ti pre pou fer tou seki bizin pou ki li kapav ador Zeova.

6-7. Kouma sa Etiopien-la ti fer so lamour pou Zeova vinn pli for?

⁶ Gras-a Filip, sa Etiopien-la ti aprann bann verite bien inportan ki li pa ti kone. Par exanp, li ti aprann kisann-la Lemesi ete. (Zist. 8:34, 35) Sirman sa ti vremem tous so leker kan li ti aprann seki Zezi ti fer pou li. Kouma li ti reazir? Li ti kapav res kouma li ete, setadir enn kikenn ki’nn konverti dan relizion Zwif. Selman, so lamour pou Zeova ek pou Zezi ti vinn pli for, ek sa ti pous li pou pran enn desizion ki ti pou sanz so lavi net. Li ti desid pou pran batem ek pou vinn enn disip Zezi. Sa zom-la ti pare pou batem, alor Filip ti batiz li.

⁷ Si to swiv lexanp sa Etiopien-la, to pou kapav prepar twa pou pran batem. Lerla, twa osi to pou kapav dir avek tou to leker, “Ki anpes mwa pran batem?” Anou gete kouma to kapav fer parey kouma sa Etiopien-la, setadir kontign aprann, met an pratik seki to pe aprann, ek kontign fer to lamour pou Zeova vinn pli for.

 8. Dapre Zan 17:3, ki to bizin fer?

⁸ Lir Zan 17:3. Sa bann parol-la inn pous boukou parmi nou pou etidie Labib. Me eski sa bann parol-la montre nou ki nou bizin kontign aprann? Wi. Parski zame nou pou fini “aprann konn . . . sel vre Bondie.” (Ekle. 3:11) Mem kan nou pou viv pou touletan, nou pou kontign aprann. Anplis, plis nou aprann konn Zeova, plis nou vinn pros ar Li.​—Ps. 73:28.

 9. Ki nou bizin fer apre ki nou’nn aprann bann lansegnman debaz ki ena dan Labib?

⁹ Kan nou aprann konn Zeova, nou koumans par aprann bann lansegnman prinsipal ki ena dan Labib. Dan let ki li ti ekrir bann Ebre, Pol apel sa bann lansegnman-la “bann kitsoz debaz.” Selman, li pa ti dir ki “bann lansegnman debaz” pa ti inportan. Okontrer, li ti dir ki sa bann lansegnman-la zot kouma dile ki servi pou nouri enn ti-baba. (Ebre 5:12; 6:1) Me li ti osi ankouraz tou bann Kretien pou aprann plis ki bann lansegnman debaz. Li ti dir zot aprann bann verite profon ki ena dan Parol Bondie. Eski to kontan aprann bann lansegnman profon ki ena dan Labib? Eski to anvi kontign aprann plis lor Zeova ek so proze?

10. Kifer sertin kapav trouv sa difisil pou etidie?

¹⁰ Selman, kitfwa boukou parmi nou gagn difikilte pou etidie. Eski to dan sa sitiasion-la? Kan to ti al lekol, eski to ti aprann pou etidie ek pou lir bien? Eski to ti kontan etidie, ek to ti santi ki to ti pe aprann boukou kitsoz? Ouswa eski to ti konpran ki to pa kontan aprann? Si to pa kontan aprann, ena boukou dimounn ki parey kouma twa. Selman, Zeova kapav ed twa. Li parfe ek Limem meyer Profeser ki ena.

11. Kouma Zeova montre ki Li nou “Gran Instrikter”?

¹¹ Zeova dir ki Li nou “Gran Instrikter.” (Iza. 30:20, 21) Li enn Profeser ki ena pasians, ki bon, ek ki konpran nou. Li trouv seki bon kot so bann zelev. (Ps. 130:3) Ek zame Li pou demann nou pou fer plis ki seki nou kapav fer. Pa bliye osi ki Li’nn donn nou enn kado extraordiner, setadir nou servo. (Ps. 139:14) Li’nn osi donn nou dezir pou aprann plis. Zeova anvi ki nou kontign aprann. Li anvi ki nou fer sa pou touletan ek ki nou vremem apresie sa. Alor, li bon ki, depi aster-la mem, to “aprann pou ena enn gran dezir” pou bann verite ki ena dan Labib. (1 Pier 2:2) Fixe bann lobzektif ki to kapav realize, ek lir ek etidie Labib regilierman. (Zozwe 1:8) Avek led Zeova, to pou aprann kontan lir ek etidie, pou ki to kapav konn plis lor to Kreater.

12. Dan nou letid personel, kifer nou bizin etidie lor Zezi?

¹² Pran letan pou reflesi lor lavi Zezi ek lor so laktivite predikasion, ek fer sa regilierman. Si nou anvi servi Zeova, sirtou dan sa lepok difisil ki nou pe viv la, li bien inportan ki nou swiv bien lexanp Zezi. (1 Pier 2:21) Zezi ti dir so bann disip ki zot ti pou gagn boukou difikilte. (Lik 14:27, 28) Selman, li ti sir ki so bann disip ti pou res fidel ar Bondie, parey kouma li. (Zan 16:33) Alor, etidie lor lavi Zezi, ek fixe bann lobzektif pou to kapav imit li dan to lavi toulezour.

13. Pou ki kitsoz to bizin kontign priye Zeova, ek kifer?

¹³ Li pa ase ki to ena zis konesans. Rezon pou kifer to bizin konesans, se pou to aprann plis lor Zeova ek pou to devlop bann kalite kouma lamour ek lafwa. (1 Kor. 8:1-3) Amezir ki to pe etidie, kontign demann Zeova pou ed twa pou ena plis lafwa. (Lik 17:5) Zeova bien zenere ek Li reponn sa kalite lapriyer-la. Gras-a enn konesans exakt lor nou Bondie, to pou kapav devlop enn vre lafwa ek sa pou ed twa pou to kontign progrese.​—Zak 2:26.

14. Kouma Pier ti montre ki li bien inportan ki nou met an pratik seki nou pe aprann? (Get zimaz osi.)

¹⁴ Pier ti servi lexanp Noe pou explike kifer li inportan ki bann disip Zezi kontign met an pratik seki zot pe aprann. Zeova ti dir Noe ki Li ti pou detrir bann move dimounn. Li ti pou fer sa gras-a enn deliz. Noe ti kone ki ti pou ena enn deliz, me sa pa ti ase pou ki li ek so fami gagn lavi sov. Kan Pier ti koz lor lepok avan Deliz, li ti dir “ki ti pe konstrir lars.” (1 Pier 3:20) Wi, kan Noe ek so fami ti aprann seki Bondie ti pou fer, zot ti azir ek zot ti konstrir enn lars, setadir enn gro bato. (Ebre 11:7) Lerla, Pier ti konpar seki Noe ti fer ar batem. Li ti dir: “Batem, ki koresponn avek sa, pe osi sov zot aster-la.” (1 Pier 3:21) Dan enn sertenn fason, nou kapav konpar bann zefor ki to pe fer aster-la pou to prepar twa pou batem, ar bann zefor ki Noe ek so fami ti fer pandan plizir lane pou konstrir enn lars. Ki zefor to bizin fer pou ki to pare pou pran batem?

15. Ki savedir vremem repanti?

¹⁵ Enn parmi bann premie kitsoz ki to bizin fer, se ki to bizin vremem repanti pou to bann pese. (Zist. 2:37, 38) Kan enn kikenn vremem repanti, li fer bann gran sanzman dan so lavi. Eski to’nn rezet bann kitsoz ki Zeova deteste, kouma par exanp limoralite, sigaret, ek bann koze ki grosie? (1 Kor. 6:9, 10; 2 Kor. 7:1; Efe. 4:29) Si to pankor fer sa, kontign fer zefor pou sanze. Koz ar sa dimounn ki pe fer to letid la, ouswa demann enn ansien pou ed twa. Si to ankor zenn ek ki to res kot to bann paran, demann zot pou ed twa pou rezet bann move labitid ki pe anpes twa pran batem.

16. Ki kitsoz bizin form parti nou bann bon labitid spiritiel?

¹⁶ Li inportan osi ki to ena bann bon labitid spiritiel. Par exanp, asiste bann renion ek partisipe pandan bann renion. (Ebre 10:24, 25) Ek kan to ranpli bann kondision pou prese, fer to maximum pou prese regilierman. Plis to prese, plis to pou kontan prese. (2 Tim. 4:5) Si to ankor zenn ek ki to res kot to bann paran, demann tomem: ‘Eski mo bann paran bizin deryer mwa pou mo al renion ek mo al prese? Ouswa eski mo fer sa par momem?’ Kan to fer sa bann kitsoz-la par tomem, to montre ki to ena lafwa, ki to kontan Zeova, ek ki to rekonesan pou tou seki Li donn twa. Sa bann kitsoz-la, se “bann aksion ki montre ki . . . [to] atase ar Bondie,” bann kado ki to kapav donn Zeova. (2 Pier 3:11; Ebre 13:15) Tou bann kado ki to donn Zeova volonterman, san ki personn fors twa, sa fer Li plezir. (Konpar ar 2 Korintien 9:7.) Anplis, kan nou fer sa bann kitsoz-la, sa rann nou ere parski nou pe fer nou best pou Zeova.

17-18. Ki kalite bien inportan pou ed twa pou progrese ek pran batem, ek kifer? (Proverb 3:3-6)

¹⁷ Amezir ki to pe progrese pou pran batem, to pou gagn bann difikilte. Sertin dimounn kapav boufonn twa parski to pe sanz relizion, ouswa zot kapav mem opoz ar twa ek persekit twa. (2 Tim. 3:12) Anplis, si to pe fer zefor pou rezet enn move labitid, li kapav arive ki to retom ladan. Ouswa kitfwa to kapav inpasian ouswa agase, parski to pa pe reisi realiz to lobzektif. Ki kitsoz kapav ed twa pou andire? Enn kalite bien inportan​—lamour pou Zeova.

¹⁸ Pli zoli kalite ki to kapav ena se to lamour pou Zeova. (Lir Proverb 3:3-6.) Si to bien kontan Zeova, to pou kapav fer fas ar ninport ki difikilte. Labib dir ki Zeova ena lamour fidel pou so bann serviter, savedir ki zame Li pa pou abandonn zot ek ki zame Li pa pou aret kontan zot. (Ps. 100:5) Zeova inn kree twa dan so resanblans. (Zen. 1:26) Alor, kouma to kapav devlop lamour fidel?

19. Kouma to kapav ogmant to rekonesans pou Zeova? (Galat 2:20)

¹⁹ Ogmant to rekonesans pou Zeova. (1 Tes. 5:18) Sak zour, demann tomem, ‘Kouma Zeova inn montre ki Li kontan mwa azordi?’ Apre sa, pa bliye priye Zeova pou remersie Li pou bann kitsoz presi ki Li’nn fer pou twa. Parey kouma Pol, rod bann kitsoz ki Zeova inn fer personelman pou twa parski Li kontan twa. (Lir Galat 2:20.) Demann tomem, ‘Eski mo anvi montre Zeova ki mo kontan Li?’ To lamour pou Zeova pou ed twa pou kontign reziste kont bann tantasion ek pou fer fas ar bann difikilte. Sa lamour-la pou motiv twa pou gard bann bon labitid spiritiel, pou ki to kapav montre to Papa sak zour ki to kontan Li.

20. Ki to bizin fer pou to donn to lavi Zeova, ek kifer sa desizion-la bien inportan?

²⁰ Avek letan, to lamour pou Zeova pou pous twa pou fer enn lapriyer spesial. Dan sa lapriyer-la, to pou promet Zeova ki to pou donn Li to lavi. Enn fwa ki to donn Zeova to lavi, to vinn pou Li pou touletan. Kan to donn Zeova to lavi, to promet ki to pou servi Li mem si to gagn bann difikilte. Sa promes-la, to fer li zis enn sel fwa, ek to pa bizin refer li ankor. Kan to desid pou donn to lavi Zeova, se enn desizion bien inportan. To pou pran boukou desizion dan to lavi, me samem meyer desizion ki to kapav pran. (Ps. 50:14) Satan pou esey diminie to lamour pou Zeova. Li pou esey fer twa abandonn Zeova. Fode zame to les Satan fer sa! (Zob 27:5) Plis to kontan Zeova, plis to pou kapav tini promes ki to’nn fer Li, ek plis to pou vinn pros ar Li.

21. Kifer nou kapav dir ki batem se pa enn lafin, me se enn koumansman?

²¹ Apre ki to’nn fini priye Zeova pou donn Li to lavi, koz ar bann ansien to lasanble ek dir zot ki to anvi pran batem. Selman, pa bliye ki batem se pa enn lafin, me se enn koumansman. Se koumansman enn lavi kot to servi Zeova ek sa lavi-la pou dire pou touletan. Alor, depi aster-la mem, fer to lamour pou to Papa vinn pli for. Ek fixe bann lobzektif spiritiel pou ki sak zour to lamour vinn pli for. Kan to fer sa, sa pou motiv twa pou pran batem. Sa zour-la pou enn zour spesial. Me sa se zis enn koumansman! Nou espere ki to lamour pou Zeova ek so Garson grandi pou touletan!