Jéhovah—‘Sa Kikenn ki’nn faire so peuple sapé’ dan lepok biblik-la
“Ah Bondié, agir vite pou moi. To mo secours ek sa Kikenn ki faire moi sapé-la.”—PS. 70:5.
1, 2. (a) Kan eski bann adorateur Jéhovah prié Li pou gagne so l’aide? (b) Ki question nou kapav posé, ek kot-sa nou kapav gagne enn reponse?
PENDANT ki bann parent enn jeune madame 23 an ti en vacance, zot ti aprann ki zot tifi ti’nn disparette dan enn fason bizarre. Zot ti pensé ki sa disparition-la ti enn action criminel. Desuite, zot ti ramasse tou zot bann zaffaire ek zot ti retourne kot zot, ek zot pa ti arrete suppliye Jéhovah pou aide zot. Kan enn jeune Témoin 20 an ti aprann ki li ena enn maladie ki finalement pou faire li paralysé net, desuite, li ti prié Jéhovah. Enn mama ki elevé so zenfant tousel ti pé faire tou pou trouve enn travail. Li pa ti ena assez kass pou acheté mangé pou li ek pou so tifi 12 an. Li ti suppliye Jéhovah avek tou so leker pou aide li. Oui, kan bann serviteur Jéhovah faire face ar bann l’epreuve ek bann probleme grave, li normal ki zot prié Jéhovah pou aide zot. Eski ou finn deja suppliye Jéhovah dan enn moment kot ou ti bien bizin l’aide?
2 Ena enn question important ki nou kapav posé: Eski nou kapav vrai-mem attann ki Jéhovah reponn nou la priere kan nou demann Li so l’aide? Dan Psaume 70, nou gagne enn reponse ki fortifié nou la foi. Sa psaume bien touchant-la ti ecrire par David, enn fidele serviteur Jéhovah ki’nn passe par beaucoup l’epreuve ek difficulté bien grave dan so la vie. Sa psalmiste-la ti inspiré par Bondié ek li ti dire Jéhovah: “Ah Bondié, . . . to mo secours ek sa Kikenn ki faire moi sapé-la.” (Ps. 70:5) Si nou examine Psaume 70, sa kapav aide nou pou trouvé kifer nou aussi nou kapav prié Jéhovah kan nou dan probleme ek kifer nou kapav ena full confiance ki Li pou vinn ‘sa Kikenn ki faire nou sapé-la.’
‘To sa Kikenn ki faire nou sapé-la’
3. (a) Dan Psaume 70, ki qualité supplication David ti faire? (b) Dan Psaume 70, ki confiance David ti manifesté?
3 Psaume 70 commencé ek fini avek supplication enn dimoune ki bien bizin l’aide Bondié. (Lire Psaume 70:1-5.) David suppliye Jéhovah pou “vinn vite” ek pou “agir vite” pou delivré li. Dan verset 2-4, David faire cinq supplication ek sakenn commence par ‘ki’ ek exprime enn desir ou-soit enn souhait. Trois premier supplication concerne bann ki pé essaye touye li. David suppliye Jéhovah pou vaink sa bann l’ennemi-la ek pou faire zot honté a cause zot mechanceté. Deux lezot supplication, dan verset 4 koz lor peuple Bondié. David prié pou ki bann ki rod Jéhovah ena la joie ek loué Li. Kan li termine so psaume, David dire Jéhovah: “To mo secours ek sa Kikenn ki faire moi sapé-la.” Remarké ki David pa ti dire: “Mo souhaité ki to pou mo secours,” coumadir li pé faire enn lot supplication. Non, li ti dire plutot: “To mo secours,” pou montré so confiance. David ti koné ki li ti pou gagne l’aide Bondié.
4, 5. Ki nou aprann lor David dan Psaume 70, ek ki nou kapav sur?
4 Ki Psaume 70 montré lor David? Kan li ti bizin faire face ar bann l’ennemi ki ti bien decidé pou touye li, David pa ti choisir pou reglé sa probleme-la par li-mem. Au contraire, li ti ena confiance ki Jéhovah ti pou agir kont sa bann l’ennemi-la dan ler ki bizin ek dan So fason. (1 Sam. 26:10) David jamais pa ti perdi confiance ki Jéhovah aide ek delivré bann dimoune ki rod Li. (Héb. 11:6) David ti koné ki bann vrai adorateur ena tou bann raison pou ena la joie ek pou loué Jéhovah kan zot koz lor So grandeur ar lezot dimoune.—Ps. 5:11; 35:27.
5 Pareil couma David, nou kapav sur ki Jéhovah Li sa Kikenn ki aide nou ek ‘ki faire nou sapé-la.’ Alors, kan nou gagne bann l’epreuve bien difficile ou-soit kan nou senti ki nou bien bizin l’aide, li bon ki nou demann Jéhovah pou aide nou vite. (Ps. 71:12) Ki Jéhovah pou faire lerla pou reponn nou bann la priere? Avant nou examiné couma Jéhovah kapav aide nou, anou guette trois fason couma Li ti sauve David ek ti aide li kan David ti bien bizin Li.
Delivré ar bann opposant
6. Ki ti aide David pou koné ki Jéhovah sauve bann dimoune juste?
6 Grace a bann livre la Bible ki li ti ena dan so lepok, David ti koné ki bann dimoune juste kapav compte lor Jéhovah pou aide zot. Kan Jéhovah ti faire deluge lor enn mauvais le monde, Li ti sauve Noé ek so famille ki ti ena la crainte pou Li. (Gen. 7:23) Kan Jéhovah ti faire enn la pluie difé ek soufre tombe lor bann mauvais dimoune ki ti reste dan Sodome ek Gomorrhe, Li ti sauve Lot, enn dimoune juste ek so deux tifi. (Gen. 19:12-26) Kan Jéhovah ti detruire Pharaon ki ti bien orgueilleux ek so l’armée dan la mer Rouge, Li ti protege so peuple pou ki zot pa detruire. (Ex. 14:19-28) Alors, fodé pa nou etonné ki dan enn lot psaume, David ti loué Jéhovah couma “enn Bondié ki faire kitsoz pou sauve so peuple.”—Ps. 68:20.
7-9. (a) Ki raison David ti ena pou mette so confiance dan pouvoir ki Jéhovah ena pou sap li? (b) Dapré bann parole David, kisannla ti delivré li?
7 David ti ena aussi enn raison bien personnel pou mette tou so confiance dan pouvoir Jéhovah pou sauve so bann serviteur. Personnellement, li ti faire l’experience ki Jéhovah ena “bann le bras eternel” ki kapav delivré so bann serviteur. (Deut. 33:27, Louis Segond) Dan plusieurs l’occasion, Jéhovah ti sauve David dan la main so “bann l’ennemi ki [ti] en colere.” (Ps. 18:17-19, 48) Anou prend enn l’exemple.
8 Kan bann femme en Israël ti commence loué David a cause so bann capacité militaire, le roi Saül ti tellement rempli ar jalousie ki li ti envoye so lance lor David deux fois pou touye li. (1 Sam. 18:6-9) Toulé-deux fois David ti reussi evite sa lance-la. Eski David ti reussi faire sa zis parski li ti ena capacité ek reflexe enn guerrier ki ti ena l’experience? Non. La Bible expliké ki “Jéhovah ti avek li.” (Lire 1 Samuel 18:11-14.) Plitar, kan Saül ti comploté pou ki bann Philistin touye David, “Saül ti trouvé ek ti koné ki Jéhovah ti avek David.”—1 Sam. 18:17-28.
9 David ti reconette ki ti ena enn kikenn ki ti delivré li. Kisannla? Dapré note ki ena la haut dan Psaume 18, David “ti dire Jéhovah bann parole sa chanté-la, jour ki Jéhovah ti delivré-li . . . dan la main Saül.” David ti exprime so bann sentiment dan enn chanté kan li ti dire: “Jéhovah Li enn grand roche ek enn forteresse pou moi, ek sa Kikenn ki faire moi sapé-la. Mo Bondié Li mo grand roche. Mo pou al cachiette derriere Li.” (Ps. 18:2) Eski sa pa fortifié nou la foi kan nou koné ki Jéhovah ena pouvoir pou delivré so bann serviteur?—Ps. 35:10.
Li ti gagne soutien kan li ti malade
10, 11. Ki kitsoz aide nou pou koné dan ki lepok kitfois David ti tombe malade couma Psaume 41 raconté?
10 Enn fois, couma Psaume 41 raconté, le roi David ti tombe bien malade ek li ti obligé reste lor lili pendant enn temps. David ti tellement malade ki certain parmi so bann l’ennemi ti croire ki jamais li pou “relevé.” (Verset 7, 8) Kan eski David ti bien malade coumsa? Dapré bann situation ki mentionné dan sa psaume-la, kitfois sa ti arrivé kan David ti bien stressé dan lepok kot so garson Absalom ti pé essaye prend so place pou vinn le roi.—2 Sam. 15:6, 13, 14.
11 Par exemple, David ti mentionne enn bon camarade ki li ti kapav faire confiance, enn kikenn ki ti habitué mange avek li, mais ki ti trahir li. (Verset 9) Sa faire nou rappel enn l’evenement dan la vie David. Kan Absalom ti rebellé, Ahithophel, conseiller David, enn kikenn ki li ti kapav faire confiance, ti al dan coté Absalom kan li ti rebelle kont le roi. (2 Sam. 15:31; 16:15) Mazinn sa le roi ki ti malade lor so lili-la, li ti tellement faible ki li pa ti kapav levé. Pendant tou sa le temps-la, li ti koné ki bann dimoune ki ti autour li ti bann traitre ki ti comploté kont li ek ki ti envie li mort pou zot kapav realise zot bann mauvais projet.—Verset 5.
12, 13. (a) Ki l’assurance David ti dire li ena? (b) Couma kitfois Bondié ti fortifié David?
12 Pourtant confiance ki David ti ena dan sa ‘Kikenn ki faire li sapé-la’ ti reste intact. Concernant enn serviteur fidele Jéhovah ki malade, David ti dire: “Jour ki pou ena malheur, Jéhovah pou faire li sapé. Jéhovah Li-mem pou soutenir li lor so lili douleur; oui, to pou change so lili net pendant so maladie.” (Ps. 41:1, 3) Encore enn fois, remark l’assurance ki David ti ena kan li ti dire: “Jéhovah Li-mem pou.” David ti sur ki Jéhovah ti pou faire li sapé. Couma?
13 David pa ti attann ki Jéhovah pou faire enn mirak ek gueri li. Au contraire, li ti ena l’assurance ki Jéhovah ti pou “soutenir li,” setadir, donne li courage ek la force pendant ki li ti lor so lili kan li ti malade. Oui, David ti bien bizin gagne sa l’aide-la. En plus sa maladie ki ti faire li faible-la, li ti entouré ar bann l’ennemi ki ti pé dire bann mauvais kitsoz lor li. (Verset 5, 6) Li possible ki Jéhovah ti fortifié David kan li ti faire li rappel bann pensée encourageant. Li interessant pou remarké ki David ti dire: “A cause mo l’integrité to finn soutenir moi.” (Verset 12) Kitfois David ti aussi trouve la force kan li ti reflechi ki, malgré so faiblesse ek bann mauvais kitsoz ki so bann l’ennemi ti pé dire, Jéhovah ti considere li couma enn dimoune ki bien fidele. Finalement, David ti gueri. Eski sa pa encourage nou pou koné ki Jéhovah kapav soutenir bann ki malade?—2 Cor. 1:3.
Li ti gagne seki li ti bizin pou vive
14, 15. Kan eski David ek so bann zom ti dan enn situation difficile, ek ki l’aide zot ti gagné?
14 Kan David ti vinn le roi en Israël, li ti kapav profite pli bon mangé ek boire ki ti ena, li ti mem kapav invite beaucoup dimoune pou vinn mange avek li. (2 Sam. 9:10) Pourtant, David ti koné aussi seki sa vedir pena assez mangé. Kan so garson Absalom ti organise enn rebellion kont li ek ti rod prend so place le roi, David ek certain parmi bann dimoune fidele ki ti soutenir li, ti bizin quitte Jérusalem. Zot ti sauvé, zot ti al dan pays Guiléad, dan l’est la riviere Jourdain. (2 Sam. 17:22, 24) David ek so bann zom ti obligé sauvé ek cachiette a cause bann ki ti pé poursuive zot. Apré enn ti periode le temps, zot ti bien bizin mangé, boire ek reposé. Kot-sa zot ti pou gagne mangé dan enn l’endroit desert coumsa?
15 Finalement, David ek so bann zom ti arrive dan la ville Mahanaïm. La, zot ti joinde trois zom ki ti ena beaucoup courage—Shobi, Makir ek Barzillaï. Sa bann zom-la ti pré pou riské zot la vie pou aide le roi ki Jéhovah ti choisir. Zot la vie ti en danger parski si Absalom ti reussi vinn le roi, pena doute ki li ti pou puni dan enn fason bien severe tou bann dimoune ki ti’nn soutenir David. Kan zot ti trouvé dan ki difficulté David ek so bann zom ti été, sa trois zom fidele-la ti amenn bann kitsoz ki zot ti bizin, parmi ti ena lili, di-blé, l’orge, bann la grain grillé, bann gros pois, lentille, di-miel, di-beurre, ek mouton. (Lire 2 Samuel 17:27-29.) Sa fidelité ek l’hospitalité extraordinaire ki sa trois zom-la ti manifesté ti surement touche leker David beaucoup. Couma David ti pou kapav blié seki zot ti faire pou li?
16. Kisannla ki ti vrai-mem responsable pou donne David ek so bann zom seki zot ti bizin pou vive?
16 Mais, kisannla ki ti vrai-mem responsable pou faire David ek so bann zom gagne seki zot ti bizin pou vive? David ti ena l’assurance ki Jéhovah prend soin so bann serviteur. Nou sur ki Jéhovah kapav motive so bann lezot serviteur pou ki zot aide enn lot adorateur ki dan le besoin. Kan li ti reflechi lor seki ti arrivé dan pays Guiléad, surement David ti considere bonté sa trois zom-la couma enn preuve ki Jéhovah ti ena l’amour pou li. Kan David ti pré pou mort, li ti ecrire: “Mo ti enn jeune homme, mo finn mem vinn vié, ek pourtant mo pa finn trouve enn dimoune juste [li aussi parmi] ki’nn abandonné net, ni so descendance ki pé rod di-pain.” (Ps. 37:25) Eski sa pa encourage nou pou koné ki la main Jéhovah jamais trop courte pou donne so bann serviteur seki zot bizin?—Prov. 10:3.
“Jéhovah koné couma pou delivré so peuple”
17. Ki Jéhovah inn montré plusieurs fois?
17 David ti zis enn parmi beaucoup adorateur ki Jéhovah ti sapé dan lepok biblik. Depuis lepok David, plusieurs fois Bondié inn montré ki bann parole ki Pierre ti dire, zot vrai: “Jéhovah koné couma pou delivré bann dimoune ki attaché ar Li, kan zot dan l’epreuve.” (2 Pierre 2:9) Anou examine encore deux l’exemple.
18. Couma Jéhovah ti delivré so peuple dan lepok Hizqiya?
18 Kan l’armée assyrien ki ti bien puissant, ti vinn attak Juda ek ti menace Jérusalem, dan huitieme siecle avant nou lepok, le roi Hizqiya ti faire sa la priere-la: “Ah Jéhovah nou Bondié, sap nou . . . pou ki tou bann royaume lor la terre kapav koné ki toi, o Jéhovah, to tousel Bondié.” (Is. 37:20) Seki ti tracasse Hizqiya plus, c’est nom ek reputation Jéhovah. Jéhovah ti reponn sa la priere sincere-la. Dan enn sel la nuit, enn sel ange ti touye 185,000 soldat assyrien, ek sa ti permette ki bann fidele serviteur Jéhovah delivré.—Is. 37:32, 36.
19. Ki l’avertissement bann chretien premier siecle ti obeir pou zot reussi sapé ek evite malheur ki ti vinn lor Jérusalem?
19 Zis deux-trois jour avant li mort, Jésus ti donne enn l’avertissement prophetik pou di-bien so bann disciple ki ti dan Judée. (Lire Luc 21:20-22.) Plusieurs dizaine l’année ti’nn passé depuis ki Jésus ti donne sa l’avertissement-la. Mais en 66 nou lepok, bann Juif ti rebellé ek sa ti faire l’armée romain vinn attak Jérusalem. Sa l’armée ki ti commandé par Cestius Gallus-la ti reussi detruire tigit par tigit enn partie muraille temple; apré sa, enn sel coute zot ti allé. Bann chretien fidele ti reconette ki sa ti enn l’occasion pou zot sauvé avant destruction ki Jésus ti annoncé. Zot ti sauvé zot ti al dan bann montagne. L’armée romain ti retourné en l’an 70 nou lepok. Sa fois-la, zot pa ti allé ek zot ti detruire Jérusalem net. Bann chretien ki ti’nn obeir l’avertissement Jésus ti reussi sapé ek evite sa grand malheur-la.—Luc 19:41-44.
20. Kifer nou kapav ena confiance ki Jéhovah Li sa ‘Kikenn ki faire nou sapé-la’?
20 Kan nou medite lor fason ki Jéhovah ti sauve so peuple dan le passé sa fortifié nou la foi. Seki Jéhovah inn faire dan le passé donne nou bann bon raison pou ena confiance en Li. N’importe ki difficulté ki nou kapav gagné asterla ou-soit dan l’avenir, nou aussi nou kapav mette tou nou confiance en Jéhovah, sa ‘Kikenn ki faire nou sapé-la.’ Mais couma Jéhovah sauve nou? Ki’nn arrive bann dimoune ki nou ti mentionné au commencement sa lartik-la? Nou pou trouve sa dan prochain lartik.
Eski ou rappel?
• Kan nou lire Psaume 70, ki confiance sa donne nou?
• Ki soutien David ti gagné kan li ti malade?
• Cite bann l’exemple ki montré ki Jéhovah kapav delivré so peuple ar bann opposant.
[Zimage page 12]
Jéhovah ti reponn la priere Hizqiya