Jeremia

36 Izao no nolazain’i Jehovah tamin’i Jeremia tamin’ny taona fahefatra nanjakan’i Joiakima+ zanak’i Josia, mpanjakan’ny Joda: 2 “Makà horonam-boky, ka soraty ao ny teny rehetra nolazaiko taminao, tamin’izaho nanameloka ny Israely sy ny Joda+ ary ny firenena rehetra,+ nanomboka tamin’ny andro voalohany nitenenako taminao tamin’ny andron’i Josia ka hatramin’izao.+ 3 Angamba rehefa maheno ny loza rehetra nokasaiko hamelezana azy ny taranak’i Joda, dia mety hiala amin’ny fanao ratsiny, ka havelako ny fahadisoany sy ny fahotany.”+

4 Nantsoin’i Jeremia avy eo i Baroka+ zanak’i Neria, ary notononin’i Jeremia taminy ny teny rehetra nolazain’i Jehovah. Dia nosoratan’i Baroka tao amin’ilay horonam-boky izany.+ 5 Ary hoy i Jeremia tamin’i Baroka: “Tsy afaka mankany an-tranon’i Jehovah aho satria tsy mahazo mandeha any. 6 Koa ianao no tsy maintsy mankany an-tranon’i Jehovah amin’ny andro fifadian-kanina. Dia vakio mafy amin’ny olona ao ny tenin’i Jehovah notononiko taminao, izay nosoratanao tao amin’ilay horonam-boky. Hovakinao amin’ny vahoakan’ny Joda rehetra, izay tonga avy any amin’ny tanànany avy izany. 7 Angamba ho henon’i Jehovah ny fitalahoan’izy ireo famindram-po, ary samy hiala amin’ny fanao ratsiny izy ireo. Nilaza mantsy i Jehovah hoe tezitra be sy vinitra mafy amin’ity vahoaka ity izy.”

8 Nanao an’izay rehetra nasain’i Jeremia mpaminany nataony àry i Baroka zanak’i Neria. Novakiny mafy tao an-tranon’i Jehovah+ ny tenin’i Jehovah tao amin’ilay horonam-boky.*

9 Tamin’ny volana fahasivy, tamin’ny taona fahadimy nanjakan’i Joiakima+ zanak’i Josia, mpanjakan’ny Joda, dia nahazo filazana ny vahoaka manontolo teto Jerosalema sy ny olona rehetra avy any amin’ny tanànan’i Joda, izay tonga teto Jerosalema, hoe tokony hifady hanina eo anatrehan’i Jehovah izy ireo.+ 10 Dia novakin’i Baroka tamin’ny vahoaka manontolo ny tenin’i Jeremia tao amin’ilay horonam-boky.* Novakiny mafy tao an-tranon’i Jehovah izany, tao amin’ny efitr’i* Gemaria+ zanak’i Safana+ mpanao dika soratra,* tao amin’ny tokotany ambony, teo amin’ny fidirana amin’ilay vavahady vaovao amin’ny tranon’i Jehovah.+

11 Henon’i Mikaia zanak’i Gemaria, zanak’i Safana, ny tenin’i Jehovah rehetra tao amin’ilay horonam-boky.* 12 Dia nidina nankao an-tranon’ny* mpanjaka izy, tao amin’ny efitry ny mpitan-tsoratra. Hitany nipetraka tao daholo ny andriana:* I Elisama+ mpitan-tsoratra, Delaia zanak’i Semaia, Elnatana+ zanak’i Akbora,+ Gemaria zanak’i Safana, Zedekia zanak’i Hanania, ary ny andriana hafa rehetra. 13 Dia nolazain’i Mikaia tamin’izy ireo ny teny rehetra henony novakin’i Baroka tamin’ny vahoaka, avy tao amin’ilay horonam-boky.*

14 Koa nirahin’ny andriana rehetra ho any amin’i Baroka i Jehody zanak’i Netania, zanak’i Selemia, zanak’i Kosy, mba hilaza hoe: “Tongava atỳ dia ento miaraka aminao ilay horonam-boky novakinao tamin’ny vahoaka.” Dia nalain’i Baroka zanak’i Neria ilay horonam-boky, ary nankany amin’izy ireo izy. 15 Ary hoy izy ireo tamin’i Baroka: “Mipetraha, azafady, dia vakio mafy aminay ilay izy.” Dia novakiny tamin’izy ireo ilay izy.

16 Raha vao ren’izy ireo izany teny rehetra izany, dia nifampijery izy ireo sady natahotra, ka nilaza tamin’i Baroka hoe: “Tsy maintsy lazainay amin’ny mpanjaka izany teny rehetra izany.” 17 Ary nanontany an’i Baroka izy ireo hoe: “Mba lazao aminay, azafady, hoe ahoana no nanoratanao an’izany teny rehetra izany? Notononiny taminao ve?” 18 Dia hoy i Baroka: “Notononiny tamiko daholo izany teny izany, dia nosoratako tamin’ny ranomainty tato amin’ity horonam-boky* ity.” 19 Ary niteny tamin’i Baroka ireo andriana hoe: “Mandehana miafina ianao sy Jeremia, ary aza atao misy mahalala mihitsy izay misy anareo.”+

20 Dia nankany amin’ny mpanjaka tao an-tokotany ireo andriana, fa ilay horonam-boky kosa navelany tao amin’ny efitr’i Elisama mpitan-tsoratra. Ary nolazain’izy ireo tamin’ny mpanjaka izay rehetra henony.

21 Koa nirahin’ny mpanjaka i Jehody+ mba haka an’ilay horonam-boky. Dia nalain’i Jehody tao amin’ny efitr’i Elisama mpitan-tsoratra ilay izy, ka novakiny tamin’ny mpanjaka sy ny andriana rehetra nitsangana teo akaikin’ny mpanjaka. 22 Volana fahasivy* tamin’izay, ka nipetraka tao amin’ny trano fonenany rehefa ririnina ny mpanjaka, ary nisy afo nirehitra tao amin’ilay fatana teo anoloany. 23 Rehefa nahavaky tsanganan-tsoratra telo na efatra i Jehody, dia notapahin’ny mpanjaka tamin’ny antsin’ny mpitan-tsoratra izay voavakiny, ka natsipin’ny mpanjaka tao anaty afo tao am-patana. Nodorany tao am-patana daholo ilay horonam-boky tamin’ny farany. 24 Tsy mba natahotra na ny mpanjaka na ny mpanompony rehetra, rehefa naheno an’izany teny rehetra izany. Tsy nandrovitra ny akanjony koa izy ireo. 25 Na dia niangavy an’ilay mpanjaka aza i Elnatana+ sy Delaia+ ary Gemaria+ mba tsy handoro an’ilay horonam-boky, dia tsy nohenoiny izy ireo. 26 Ary nomen’ny mpanjaka baiko i Jeramela zanaky ny mpanjaka sy Seraia zanak’i Azriela ary Selemia zanak’i Abdela, mba hisambotra an’i Baroka mpitan-tsoratra sy Jeremia mpaminany. Nafenin’i Jehovah+ anefa izy roa lahy.

27 Rehefa avy nodoran’ny mpanjaka ilay horonam-boky nosoratan’i Baroka, izay nisy ny teny notononin’i Jeremia,+ dia niteny tamin’i Jeremia indray i Jehovah hoe: 28 “Makà horonam-boky hafa, ary soraty ao daholo ny teny tao amin’ilay horonam-boky voalohany, izay nodoran’i Joiakima mpanjakan’ny Joda.+ 29 Ary izao no holazainao amin’i Joiakima mpanjakan’ny Joda: ‘Izao no lazain’i Jehovah: “Efa nodoranao ilay horonam-boky teo iny, ary niteny ianao hoe: ‘Nahoana ianao no nanoratra tao amin’iny hoe: “Tsy maintsy ho avy handrava an’ity tany ity ny mpanjakan’i Babylona, ka haringany daholo na olona na biby”?’+ 30 Koa izao no lazain’i Jehovah mba hanamelohana an’i Joiakima mpanjakan’ny Joda: ‘Tsy hisy amin’ny taranany hipetraka eo amin’ny seza fiandrianan’i Davida,+ ary ny fatiny havela hodanihin’ny andro amin’ny antoandro ary hirotsahan’ny lanezy manify amin’ny alina.+ 31 Hataoko ampamoaka noho ny fahadisoany izy sy ny taranany ary ny mpanompony. Ary hataoko tonga amin’izy ireo sy amin’ny mponin’i Jerosalema ary amin’ny fokon’i Joda ny loza rehetra izay efa nolazaiko hamelezana azy+ fa tsy nohenoiny.’”’”+

32 Dia naka horonam-boky hafa i Jeremia, ka natolony an’i Baroka mpitan-tsoratra,+ zanak’i Neria. Koa nosoratan’i Baroka tao ny teny rehetra notononin’i Jeremia, izay efa tao amin’ilay horonam-boky* nodoran’i Joiakima mpanjakan’ny Joda.+ Ary mbola nampiana teny maro hafa hoatran’ireo, tao amin’ilay izy.