KATAK 13
Wãween an Kabuñ ko Reriab Kwal̦o̦k Men ko Rejjab M̦ool kõn Anij
El̦aññe Anij ej yokwe, etke kabuñ ko me rej ba bwe rej jutak kõn E rej kõm̦m̦ani elõñ men ko renana? Ilo tukadu, un eo ej kõnke kabuñ kein rejjab m̦ool; rejjab kwal̦o̦k m̦ool kõn Anij. Ewi wãween aer kwal̦o̦k men ko rejjab m̦ool kõn e? Ewi wãween an Anij eñjake kõn men in? Im ta eo enaaj kõm̦m̦ane?
1. Ewi wãween an katak ko an kabuñ ko reriab jab kwal̦o̦k m̦ool kõn Anij?
Kabuñ ko reriab rej kããlõt ñan tõmak im katakin men eo eriab ijello̦kun men eo em̦ool kõn Anij. (Rom 1:25) Ñan waanjoñak, enañin aolep kabuñ ko rejjab katakin armej ro dooer etan Anij. Ijoke, Baibõl̦ eo ej ba bwe ej menin aikuj ñan kõjerbal etan Anij. (Rom 10:13, 14) Jet ri-tõlin kabuñ ko rej ba bwe ñe ewõr juon men enana ej wal̦o̦k, ej ankilaan Anij. Bõtab riab men in. Anij ejãmin kõm̦m̦an nana. (Riit Jemes 1:13.) Ekabũrom̦õjm̦õj bwe riab kein rej kattol̦o̦ke armej ro jãn Anij.
2. Ewi wãween an kõm̦m̦an ko an kabuñ ko reriab jab kwal̦o̦k m̦ool kõn Anij?
Kabuñ ko reriab rejjab kõm̦m̦an ñan armej ilo wãween eo Jeova ej kõm̦m̦an ñan er. Ikijjeen kabuñ ko reriab, Baibõl̦ ej ba bwe “jerawiwi ko an rar lõñl̦o̦k im tõpar lañ.” (Revelesõn 18:5) Ium̦win elõñ bũki iiõ ko, kabuñ ko rar bõk kun̦aaer ilo m̦akũtkũt ko an kien, rejetake tarin̦ae ko, im kõm̦m̦an ak kõmãlim bwe en jorrããn im mej elõñ armej. Jet ri-tõlin kabuñ ko rekõn̦aan bwe ren m̦weiie, kõn men in rej jiroñ armej ro dooer ñan lel̦o̦k jããn ñan er. Kõm̦m̦an kein aer rej kam̦ool bwe rejjab jel̦ã kajjien Anij ñan jidik, kõn men in ejjel̦o̦k aer jim̦we im maroñ ñan jutak kõn e.—Riit 1 Jon 4:8.
3. Ewi wãween an Anij l̦õmn̦ak im eñjake kõn kabuñ ko reriab?
El̦aññe kwõj illu kõn kõm̦m̦an ko an kabuñ ko reriab, kwõl̦ak lale ewi wãween an Jeova eñjake kõn men kein? Ej yokwe armej, bõtab ellu ippãn ri-tõlin kabuñ ko me rej kwal̦o̦k men ko rejjab m̦ool kõn e im enana aer kõm̦m̦an ñan armej ro dooer. Ej kallim̦ur bwe enaaj ko̦kkure kabuñ ko reriab im “ejjel̦o̦k enaaj bar loe.” (Revelesõn 18:21) M̦õttan jidik, Anij enaaj jol̦o̦k aolep kabuñ ko reriab.—Revelesõn 18:8.
KAM̦WILAL̦L̦O̦K AM̦ MEL̦EL̦E
Kal̦apl̦o̦k am̦ jel̦ã kõn wãween an Anij watõk kabuñ ko reriab. Katak kõn ta ko em̦õj an kabuñ ko reriab kõm̦m̦ani, im lale etke men in ejjab aikuj kabõjrak eok jãn am̦ kal̦apl̦o̦k am̦ jel̦ã kõn Jeova.
4. Anij ejjab buñbũruon kõn aolep kabuñ ko
Elõñ rej tõmak bwe kabuñ ko rej ãinwõt ial̦ ko reoktak jãn doon ak aolepeer rej tõll̦o̦k ñan Anij. Bõtab m̦ool ke men in? Riit Matu 7:13, 14, innem bwebwenato kake kajjitõk in:
Ta eo Baibõl̦ ej ba kõn ial̦ eo ej tõll̦o̦k ñan mour?
Kõjo̦e PIJAIN ALWÕJ eo, innem bwebwenato kake kajjitõk in:
Baibõl̦ eo ej ke ba bwe ebool̦ kabuñ ko rej kabuñbũruon Anij?
5. Kabuñ ko reriab rej likjab in kwal̦o̦k yokwe eo an Anij
Kabuñ ko reriab rejjab kwal̦o̦k m̦ool kõn Anij ilo elõñ wãween ko. Juon wãween el̦ap rej kõm̦m̦ane men in ej ilo aer bõk kun̦aaer ilo tarin̦ae. Ñan lo juon waanjoñak kõn men in, kõjo̦e PIJAIN ALWÕJ eo. Innem bwebwenato kake kajjitõk kein:
Ewi wãween an kar elõñ iaan kabuñ ko bõk kun̦aaer ilo Pata eo an Lal̦ Kein Karuo?
Ta am̦ l̦õmn̦ak kõn wãween aer kar bõk kun̦aaer?
Riit Jon 13:34, 35 im 17:16. Innem bwebwenato kake kajjitõk kein:
Kwõl̦ak lale ewi wãween an Jeova eñjake ñe kabuñ ko rej bõk kun̦aaer ilo tarin̦ae?
Kabuñ ko reriab rej kõm̦m̦ani elõñ men ko renana. Ilo wãween et em̦õj am̦ loe an kabuñ ko likjab in kwal̦o̦k yokwe eo an Anij?
Kabuñ ko reriab rej likjab in kwal̦o̦k yokwe eo an Anij
6. Anij ekõn̦aan karõl̦o̦ke armej ro jãn kabuñ ko reriab
Riit Revelesõn 18:4,a innem bwebwenato kake kajjitõk in:
Ewi wãween am̦ eñjake kõn an Anij kõn̦aan lo̦mo̦o̦ren armej ro me em̦õj an kabuñ ko reriab m̦on̦e er?
7. Jab bõjrak jãn am̦ katak kõn Anij eo em̦ool
Men ko renana kabuñ ko reriab rej ba im kõm̦m̦ani rej aikuj ke jelõt wãween am̦ l̦õmn̦ak kõn Anij? Pijaikl̦o̦k m̦õk an juon likao kõjekdo̦o̦n naanin tõl ko rem̦m̦an jãn jemãn. Likao in ej etal jãn m̦weo im̦õn im ej kõm̦m̦ani men ko relukkuun nana. Jemãn ejjab buñbũruon kõn kõm̦m̦an ko an likao eo nejin. Etke ejjab juon men ejim̦we ñan n̦aruon jemãn kõn wãween an likao eo nejin mour?
Ejim̦we ke ñan n̦aruon Jeova im bõjrak jãn am̦ katak kõn e kõn wõt kõm̦m̦an ko an kabuñ ko reriab?
JET ARMEJ REJ BA: “Aolep kabuñ ko rej joñan wõt juon—aolep katak ko aer rem̦m̦an.”
Kwõj ke errã?
Meñe elõñ kabuñ ko rej ba bwe rej katakin men ko rem̦m̦an, ak etke Anij ejjab buñbũruon ippãer?
TARLEP IN KATAK EO ILO TUKADU
Kabuñ ko reriab rejjab kwal̦o̦k m̦ool kõn Anij ikijjeen katak ko aer reriab im kõm̦m̦an ko aer relukkuun nana. Anij enaaj ko̦kkure kabuñ ko reriab.
Ãlij
Ewi wãween am̦ eñjake kõn men ko kabuñ ko reriab rej katakin im men ko rej kõm̦m̦ani?
Ta eñjake eo an Jeova kõn kabuñ ko reriab?
Ta eo Anij enaaj kõm̦m̦ane ñan kabuñ ko reriab?
KAL̦APL̦O̦K AM̦ MEL̦EL̦E
Katak kõn ruo men ko elõñ iaan kabuñ ko rej kõm̦m̦ani me Anij ejjab buñbũruon kaki.
“Are All Religions the Same? Do They All Lead to God?” (Katak eo ilo online)
Etke Jeova ekõn̦aan bwe jen kabuñ ñan e ibwiljin ro jet?
“Is It Necessary to Belong to an Organized Religion?” (Katak eo ilo online)
Juon bũrij ear inepata kõn kõm̦m̦an ko an kabuñ eo an. Bõtab men in ear jab kabõjrake jãn an katak m̦ool eo kõn Anij.
Ium̦win elõñ bukwi iiõ ko, kabuñ ko rej kwal̦o̦k riab ko kõn Anij me rekõm̦m̦an an armej tõmak bwe ejjab kea kake kõj im bwe elãj. Lale m̦ool eo kõn jilu iaan riab kein rar kwal̦o̦ki.
“Etke Jet Armej Rej L̦õmn̦ak bwe Epen ñan Yokwe Anij?” (Naan in Keeañ, Nobõm̦ba 1, 2013)
a Ñan lale etke bokin Revelesõn ej ba bwe kabuñ ko reriab rej ãinwõt juon kõrã etan Babil̦on El̦ap, lale Kõmel̦el̦e 1.