23-ШО УРОК
Тынеш пурымаш — суапым кондышо цель!
Иисусын туныктымыжо почеш кажне христиан тынеш пурышаш. (Матфейын 28:19, 20 лудын лекса.) Мо тыгай тынеш пурымаш? Тынеш пураш цельыш шуашлан мом ыштыман?
1. Мо тыгай тынеш пурымаш?
«Тынеш пурташ» кусарыме грек мут «уло кап дене вӱдыш пуртымым» ончыкта. Тынеш пурымо годым Иисус Иордан эҥерыш уло кап дене пуртымо лийын да вара вӱд гыч лектын (Маркын 1:9, 10). Тудын семынак чын христиан-влак тынеш пурымо годым уло кап дене вӱдыш пурат.
2. Тынеш пурымо дене айдеме мом ончыкта?
Тынеш пурымо дене айдеме теве мом ончыкта: тудо Иегова Юмылан ӱшанле лияш сӧрымашым пуэн. Кузе айдеме тиде сӧрымашым пуа? Тынеш пурымо деч ончыч айдеме ойыртемалтше кумалтыш мутым ойла. Тиде кумалтыш мутышто тудо Иеговалан курымеш служитлаш кумылжо нерген ойла да тудлан гына кумалаш сӧра. Тыгак тудо Юмын эрыкшым шуктымым илышыштыже эн тӱҥ верыш шындаш сӧра. Тудо шке эрыкшым кудалташ да Иисус Христосын пример ден туныктымыжо почеш илаш решенийым луктеш (Матфейын 16:24). Ӱшанле лияш сӧрымашым пуымаш да тынеш пурымаш айдемылан йӧным пуат Иегован лишыл йолташыже лияш да тудын калыкше деке ушнаш.
3. Тынеш пураш цельыш шуашлан мом ыштыман?
Тынеш пураш решенийым лукмо деч ончыч Иегова нерген пален налаш да тудлан ӱшанымашым пеҥгыдемдаш кӱлеш. (Еврей-влаклан 11:6 лудын лекса.) Мыняр шукырак шинчымашда да мыняр пеҥгыдырак ӱшанымашда лиеш, тынар чотрак Иеговам йӧраташ тӱҥалыда. Тидлан кӧра Юмо нерген весе-влаклан каласкалаш да тудын нормыжо почеш илаш кумылда лектеш (2 Тимофейлан 4:2; 1 Иоаннын 5:3). Кунам айдеме Иеговалан келшыше илыш дене ила да чыла шотыштат тудлан йӧрышын ышта, тунам Юмылан ӱшанле лияш сӧрымашым пуаш да тынеш пураш кумылжо лиешa (Колоссян-влаклан 1:9, 10).
КЕЛГЫНРАК ШЫМЛЕН НАЛЗА
Пален налза, мо́лан Иисусын тынеш пурымыжо мемнам туныкта да тынеш пураш цельыш шуашлан мом ыштыман.
4. Иисусын тынеш пурымыжо мемнам мо́лан туныкта?
Матфейын 3:13—17 лудын лекса да Иисусын тынеш пурымыжо нерген шукырак пален налза. Вара вашмутым пуыза:
Иисус аза лиймыж годым тынеш пурен мо?
Кузе тудо тынеш пурен? Тудын ӱмбак вӱдым шыжыктеныт але тудо ала-кузе вес семын тынеш пурен?
Тынеш пурымо деч вара Иисус Иегован пуымо заданийжым шукташ тӱҥалын. Лукан 3:21—23 да Иоаннын 6:38 лудын лекса да вашмутым пуыза:
Тынеш пурымо деч вара Иисуслан могай паша эн тӱҥ лийын?
5. Тынеш пурымаш — шуаш лийше цель
Очыни, те Иеговалан ӱшанле лияш сӧрымашым пуаш да тынеш пураш лӱдыда. Но, жап эртымеке, тиде лӱдмаш пыта, да те тиде кӱлешан ошкылым ыштен кертыда. Теве икмыняр еҥын примерже. ВИДЕОРОЛИКЫМ ончалза.
Иоаннын 17:3 да Иаковын 1:5 лудын лекса да вашмутым пуыза:
Тынеш пураш цельыш шуаш мо полшен кертеш?
А. Иеговалан курымеш служитлаш кумылжо нерген ойлен, айдеме ӱшанле лияш сӧрымашым пуа
Б. Тынеш пурымо дене айдеме весе-влаклан ончыкта: тудо Юмылан ӱшанле лияш сӧрымашым пуэн
6. Тынеш пурымаш Иегован калыкше дек ушнаш йӧным пуа
Кунам айдеме тынеш пура, тудо тӱнямбалысе йӧратыше еш деке ушна. Ме, Иегован Таныкше-влак, тӱрлӧ кундемыште илена да тӱрлӧ калык гыч улына гынат, мемнан туныктымашна-влак огыт ойыртемалт да ме ик нравственный нормо-влак почеш илена. Притчи 3:32 да 1 Петрын 2:17 лудын лекса да вашмутым пуыза:
Нине почеламут-влак дене келшышын, тынеш пурымаш могай пайдам конда?
ИКТАЖ-КӦ КАЛАСЕН КЕРТЕШ: «Мый тынеш пураш ямде омыл».
Теат тыге шонеда гын, молан тынеш пураш цельым садак шындаш кӱлеш?
ТӰҤ ШОНЫМАШ
Кажне христиан тынеш пурышаш манын, Иисус туныктен. Тиде ошкылым ышташлан Иеговалан ӱшанымашым пеҥгыдемдаш, тудын нормыжо-влак почеш илаш да тудлан ӱшанле лияш сӧрымашым пуаш кӱлеш.
Ушештарымаш
Мо тыгай тынеш пурымаш да молан тынеш пураш кӱлеш?
Тынеш пурымо дене айдеме мом ончыкта?
Иеговалан ӱшанле лияш сӧрымашым пуаш да тынеш пураш решенийым лукмо деч ончыч мом ыштыман?
ЕШАРТЫШЛАН
Пален налза, чынжымак мо тыгай тынеш пурымаш.
Тынеш пураш цельыш шуашлан мом ыштыман?
«Тек Иеговам йӧратымаш тендам тынеш пураш тарата» («Орол башне» март, 2020 ий)
Ик пӧръеҥын историйжым лудын лекса. Эмоций-влак гына огыл тудым тынеш пураш кумылаҥденыт.
«Нуно мыйым библийысе чыным пален налаш таратеныт» («Орол башне» 1 февраль, 2013 ий)
Молан тынеш пураш цельым шындыман да тиде цельыш шуашлан мом ыштыман?
«Мыланем тынеш пураш кӱлеш мо?» («Йодышет-влаклан вашмут», 2-шо том, 37-ше ужаш)
a Айдеме вес религийыште тынеш пурен гын, тудлан угыч тынеш пураш кӱлеш. Вет ту религийыште тудым библийысе чынлан туныктен огытыл. (Апост. пашашт 19:1—5 да 13-шо урокым ончыза.)