Лука

3 Во 15-тата година од владеењето на цезарот Тибериј, кога Понтиј Пилат беше управител на Јудеја, Ирод* владетел* на Галилеја, неговиот брат Филип владетел на Итуреја и Трахонитида, и Лисаниј владетел на Авилинија, 2 во деновите на Кајафа и на главниот свештеник Ана, Бог му ја објави својата реч на Јован, синот на Захарија, во пустината.

3 Тој го обиколи целиот крај околу Јордан и им проповедаше на луѓето дека треба да се крстат и така да покажат дека се каат за своите гревови, за да може да им бидат простени, 4 како што стои во книгата на пророкот Исаија: „Силен глас се слуша во пустината: ’Подгответе му го патот на Јехова! Израмнете ги неговите патеки! 5 Секоја долина да се исполни, и секоја планина и секој рид да се израмнат. Кривулестите патишта да станат прави, нерамните патишта да се израмнат. 6 И сите луѓе ќе го видат спасението од Бог‘“.

7 И на мноштвото луѓе кои доаѓаа кај него за да ги крсти им велеше: „Змии отровници! Кој ви рекол дека можете да избегате од Божјиот гнев што доаѓа? 8 Најпрво покажете со своите дела дека сте се покајале. Не ни помислувајте да си речете: ’Авраам ни е татко‘. Зашто, ви велам дека Бог може и од овие камења да му подигне деца на Авраам. 9 Секирата веќе е спремна да ги исече дрвјата до корен. Секое дрво кое не дава добар плод, ќе биде исечено и фрлено во оган“.

10 А луѓето го прашуваа: „Тогаш, што треба да правиме?“ 11 Тој им одговори: „Кој има две облеки, нека му даде една на оној што нема ниту една, и кој има храна, нека му даде на оној што нема“. 12 Дури и даночници дојдоа да се крстат, па го прашаа: „Учителе, што треба да правиме?“ 13 Тој им одговори: „Не барајте луѓето да ви плаќаат повеќе од она што е пропишано“. 14 А и некои војници го прашаа: „А што треба ние да правиме?“ Ним им рече: „Не изнудувајте пари од никого и не обвинувајте лажно никого, туку бидете задоволни со својата плата“.

15 А народот беше во исчекување и сите се прашуваа да не е Јован можеби Христос. 16 Затоа Јован на сите им рече: „Јас ве крштавам со вода, но доаѓа оној што е посилен од мене. Јас не сум достоен ни да му ги одврзам сандалите. Тој ќе ве крсти со свет дух и со оган. 17 Во раката држи лопата за да го исчисти своето гумно и да го собере житото во својот амбар, а плевата ќе ја изгори во оган што не може да се изгасне“.

18 Тој ги охрабри и со многу други зборови и продолжи да им ја објавува добрата вест. 19 А бидејќи Јован го прекоруваше Ирод, владетелот на Галилеја, поради Иродијада, жената на брат му, и поради сите злодела што ги беше направил, 20 Ирод го фрли Јован во затвор и така направи уште едно злодело.

21 Кога се крстија сите, се крсти и Исус. Додека се молеше, небото се отвори 22 и светиот дух слезе на него во телесен облик како гулаб, и од небото се слушна глас: „Ти си мојот сакан Син! Ти си ми по волја!“*