Можеме ли да ја разбереме библиската книга Откровение?

Грчкиот назив за библиската книга Откровение, Апокалипсис (апокалипса), значи „откривање“ или „објава“. Самиот назив покажува која е целта на оваа книга — да го открие она што е скриено и да ги објави настаните што требало да се случат многу години откако била напишана. Многу пророштва кои се запишани во книгата Откровение допрва треба да се исполнат.

Краток преглед на книгата Откровение

• Вовед (Откровение 1:1-9).

• Исус им пренесува пораки на седум собранија (Откровение 1:10—3:22).

• Виденија за Бог и неговиот небесен престол (Откровение 4:1-11).

• Низа виденија кои се надоврзуваат едно на друго:

  • Седум печати (Откровение 5:1—8:6).

  • Седум труби; последните три најавуваат три маки (Откровение 8:7—14:20).

  • Седум садови; секој од нив содржи по една неволја со која е претставена Божја осуда (Откровение 15:1—16:21).

  • Виденија за уништувањето на Божјите непријатели (Откровение 17:1—20:10).

  • Виденија за благословите од Бог кои се однесуваат на небото и на Земјата (Откровение 20:11—22:5).

• Заклучок (Откровение 22:6-21).

Што ќе ти помогне да ја разбереш книгата Откровение?

1. Имај на ум дека, на оние што му служат на Бог, оваа книга им пренесува позитивна, а не застрашувачка порака. Многу луѓе го поврзуваат зборот „апокалипса“ со некоја голема катастрофа. Но, и на почетокот и на крајот од библиската книга Откровение пишува дека оние што ја читаат, се трудат да ја разберат и го применуваат она што го дознале од неа се среќни (Откровение 1:3; 22:7).

2. Во книгата Откровение се користат многу знаци и симболи кои немаат дословно значење (Откровение 1:1).

3. Повеќето личности, изрази и симболи се спомнати и во некоја друга книга од Библијата:

   • Јехова — „вистинскиот Бог горе на небото“ и Творецот на сѐ што постои (5. Мојсеева 4:39; Псалм 103:19; Откровение 4:11; 15:3).

   • Исус Христос — „Божјето Јагне“ (Јован 1:29; Откровение 5:6; 14:1).

   • Сатана Ѓаволот — непријател на Бог (1. Мојсеева 3:14, 15; Јован 8:44; Откровение 12:9).

   • Големиот Вавилон — непријател на Јехова Бог и на Божјиот народ, како и извор на верски лаги — слично на древниот град Вавилон (Вавел) (1. Мојсеева 11:2-9; Исаија 13:1, 11; Откровение 17:4-6; 18:4, 20).

   • Морето — луѓето кои му се противат на Бог (Исаија 57:20; Откровение 13:1; 21:1).

   • Предмети од светиот шатор кои се користеле во службата за Бог — ковчегот на сојузот, стакленото море (мијалник), приноси од темјан, светилници и жртвеник (2. Мојсеева 25:10, 17, 18; 40:24-32; Откровение 4:5, 6; 5:8; 8:3; 11:19).

   • Диви ѕверови — ги претставуваат човечките влади (Даниел 7:1-8, 17-26; Откровение 13:2, 11; 17:3).

   • Броеви со симболично значење (Откровение 1:20; 8:13; 13:18; 21:16).

4. Виденијата се однесуваат на „денот на Господарот“, кој започнал во 1914 год., кога Божјето Царство било воспоставено на небото и Исус почнал да владее како Цар (Откровение 1:10). Тоа покажува дека најголемиот дел од пророштвата од книгата Откровение ќе се исполнат во денешно време.

5. За да ја разбереме оваа библиска книга, потребна ни е мудрост од Бог и помош од оние што веќе ја разбрале. Всушност, овие работи ни се потребни за да го разбереме кој и да е друг дел од Библијата (Дела 8:26-39; Јаков 1:5).