Биди храбар!

1. Што ќе разгледаме во овој заклучок?

ПО СЕТО она што го разгледавме во оваа книга, има ли уште нешто да се каже во врска со храброста? Всушност, има. Не е можно да се запише само во една книга сето она што Библијата го кажува за оваа важна особина. Освен личностите за кои се зборуваше во оваа книга, во Библијата се зборува и за многу други верни луѓе кои покажале храброст. Сега ќе дискутираме за некои од нив, а ќе видиме и што ни е потребно за да бидеме навистина храбри.

2. Кои други верни слуги на Јехова покажале храброст?

² Можеш ли да се сетиш и на други личности од Библијата кои покажале храброст? Веројатно ти доаѓаат на ум некои од верните пророци од Хебрејските списи, како што се Исаија, Еремија, Езекиел, Јона или Малахија. Апостол Павле сигурно мислел и на нив кога под водство на светиот дух напишал: „Беа искушувани со исмејувања и камшикувања, па дури и со окови и затвори“. За некои, пак, напишал: „Беа во немаштија, во неволја, беа малтретирани“. А имало и такви кои дури биле погубени (Евр. 11:36, 37). И покрај ова, тие храбро застанале на страната на Јехова Бог.

3-4. Како две жени, кои не се спомнати по име, го заштитиле цар Давид кога бил во опасност?

³ Многу храбри луѓе за кои се зборува во Библијата не се спомнати по име. Тоа е случај и со две жени од времето на цар Давид. Тие му помогнале на Давид кога неговиот злобен син Авесалом се обидел да го симне од престолот, принудувајќи го да побегне од Ерусалим. Давид побарал од Садок, еден храбар првосвештеник, да се врати во градот и да остане таму за да дознае што планира Авесалом да направи следно. Садок требало да му пренесе порака на Давид. Ризикувајќи си го животот, „една слугинка“, која не е спомната по име, им ги пренела информациите од Садок на двајца верни слуги на Давид. Тие тргнале кај Давид, но еден млад човек ги забележал и му кажал на Авесалом. Затоа побегнале и се скриле во еден бунар. Жената на сопственикот на бунарот, која исто така не е спомната по име, зела покривка и ја послала преку отворот на бунарот. А одозгора истурила столчени зрна. Кога луѓето на Авесалом дошле да ги бараат двајцата гласници, таа ги упатила во погрешен правец. Овие две храбри жени направиле сѐ што можеле за да го заштитат царот кој бил избран од Јехова! (2. Сам. 15:23-37; 17:8-22).

⁴ Навистина, тешко би било да ги наброиме сите храбри мажи и жени што се спомнати во Библијата! На некои од нив им го знаеме името, а на други не. Некои биле богати, а други сиромашни. Некои биле поистакнати, а други не толку. Но, една работа им е заедничка — храбро оделе со својот Бог! Нивниот пример може да ни помогне и нам денес.

Колку е важна молитвата

5-7. Што му помогнало на Павле да биде храбар кога се соочил со противење?

⁵ Како може да се угледаме на храбрите мажи и жени спомнати во Библијата? Треба да имаме на ум дека не сите од нив биле храбри по природа и дека немало да успеат да му останат верни на Јехова само со сопствена сила. Им било потребно уште нешто.

⁶ Размисли за апостол Павле. Тој и Сила биле нападнати од една толпа во Филипи. Потоа, градските управители им ја соблекле облеката и повеќепати ги истепале со стапови. На крајот, ги фрлиле во една темна ќелија, а нозете им ги ставиле во клада (Дела 16:12, 19-24). Откако биле ослободени, дали Павле му се препуштил на стравот? Тоа би била нормална човечка реакција. Сепак, Павле знаел дека Јехова има задача за него — да оди во Солун и да проповеда таму. Од каде собрал сила и храброст за тоа?

⁷ Подоцна, Павле напишал: „Откако во Филипи, како што знаете, најпрво пострадавме и бевме малтретирани, собравме смелост со помош на нашиот Бог да ви ја проповедаме Божјата добра вест со голема борба“ (1. Сол. 2:2). Павле знаел дека ќе му биде потребна храброст за да го направи она што Бог го очекува од него. Но, каде можел да најде таква храброст? Дали можеби длабоко во себе? Имал ли некоја внатрешна резерва на храброст? Не, тој собрал храброст „со помош на нашиот Бог“. Понизно го молел Јехова да му ја даде храброста што му била потребна. И, Јехова одговорил на таа молитва.

8. По примерот на Павле, што може да правиме ако ни е потребна храброст?

⁸ И ти можеш да го правиш она што го правел Павле. Не грижи се дали ќе можеш длабоко во себе да најдеш некоја скриена резерва на храброст и сила. Наместо тоа, сесрдно моли го Јехова да ти ја даде храброста што ти е потребна (Дела 4:29).

9. Зошто е мудро да го молиме нашиот небесен Татко да ни даде уште вера?

⁹ Од својот небесен Татко, можеш да бараш и вера — особина која е тесно поврзана со храброста. Верата е еден од плодовите на светиот дух (Гал. 5:22, 23). Освен тоа, таа е дел од духовната воена опрема која му е потребна на секој христијанин (Еф. 6:16). Толку е моќна што за неа Библијата вели дека „го победи светот“ (1. Јов. 5:4). Верата во Јехова е најдобриот темел за храброст. Ако си цврсто уверен дека Јехова ќе ти помага кога ќе имаш потреба од помош, ќе можеш да бидеш храбар во секоја ситуација. Затоа, сите ние имаме добра причина, исто како апостолите, постојано да го молиме Јехова: „Дај ни уште вера!“ (Лука 17:5).

„Бидете храбри“

10-11. Зошто Павле истакнал колку е важна храброста кога им пишувал на христијаните во Ерусалим и околината?

¹⁰ Кога им напишал писмо на христијаните со еврејско потекло кои живееле во Ерусалим и околината, Павле знаел дека им претстојат тешки времиња. Исус прорекол дека градот ќе биде уништен, и тоа време брзо се приближувало (Лука 19:41-44; 21:20-24). На кој начин Павле ги потсетил колку е важно да бидат храбри? Да се потсетиме на неговите зборови кои беа цитирани во воведот на оваа книга. Тој се осврнал на Јеховиното утешно ветување: „Никогаш нема да те оставам и никогаш нема да те напуштам“. Како ќе влијаело тоа ветување врз нив? Павле додал: „Затоа, исполнети со храброст, можеме да речеме: ’Јехова е мојот помошник, нема да се плашам. Што може да ми направи човек?‘“ (Евр. 13:5, 6).

¹¹ Иако Библијата не спомнува никакви детали за уништувањето на Ерусалим во 70 год. од н.е., во едно може да бидеме сигурни: Верните христијани од тој град биле охрабрени од зборовите на Павле и, во вистинскиот момент, го послушале упатството на Исус да „бегаат во планините“ (Лука 21:20, 21).

12. а) Како може да бидеш храбар кога доживуваш тешкотии? б) Како некои покажале извонредна храброст во овие последни денови, и на што си решен ти? (Види ја рамката „Биди храбар како нив“.)

¹² Јехова може и тебе да ти ја даде потребната храброст кога доживуваш тешкотии — и сега и во иднина (Езек. 38:1, 2, 10-12; Мат. 24:21). Никогаш не заборавај дека самиот Јехова ветил дека ќе нѐ штити (Езек. 38:19-23; 2. Сол. 3:3). Тој никогаш нема да ги напушти оние што го сакаат и имаат доверба во него. Она што Јехова му го кажал на Исус Навин важи и за тебе. И ти можеш да бидеш „храбар и многу силен“! (Ис. Нав. 1:7, 9, 18). А не го заборавај ни она што Исус Христос им го кажал на своите следбеници: „Бидете храбри“. Тој ветил дека Јехова ќе ти дава од својот свет дух за да имаш храброст да се соочиш со кој и да е испит на верата (Јован 14:26; 15:26, 27; 16:33). Ти навистина можеш да бидеш исполнет со храброст!

13. Што те поттикнува да покажуваш храброст денес?

¹³ Замисли си го времето кога на целата Земја ќе владее мир и кога сите што се во Јеховиното сеќавање ќе воскреснат! Во тоа време, ќе може да се запознаеме со храбрите мажи и жени за кои се зборуваше во оваа книга, како и со уште многу други кои покажале храброст. Мислиш ли дека некој од нив ќе жали за тоа што одлучил да му служи на Јехова во светот на Сатана, па дури и за тоа што платил за храброста со својот живот? Се разбира дека не. А ти? Додека заедно со нив ќе помагаш Земјата да стане рај, дали ќе жалиш за тоа што храбро и од љубов си му служел на Јехова во последните денови? Во никој случај! Затоа, биди решен да покажуваш храброст до самиот крај. Во сета вечност, ќе бидеш среќен што си го правел тоа!