Како пример нека ви послужат пророците — Јона
1. Кои убави особини ги имал Јона?
1 На што помислуваш кога ќе се спомне пророкот Јона? Некои можеби го сметаат за кукавица или за бездушен човек. Но, кај него се очигледни понизноста, храброста и самопожртвуваноста. Како може убавите особини на Јона ‚да ни послужат како пример‘? (Јак. 5:10).
2. Како да покажеме понизност како Јона?
2 Понизност: Отпрвин, Јона избегал во спротивен правец од подрачјето на кое требало да оди. Ова не треба да нѐ изненади бидејќи Асирците биле крајно насилни, а Ниневија била позната како „крволочниот град“ (Наум 3:1-3). Сепак, Јехова го исправил Јона, а тој покажал понизност со тоа што ја прифатил задачата кога му била дадена втора шанса (Изр. 24:32; Јона 3:1-3). Иако во почетокот избегал, тој сепак ја извршил Јеховината волја (Мат. 21:28-31). Дали и ние сме решени да ја проповедаме добрата вест, дури и ако сме добиле некаква исправка или имаме подрачје на кое не е лесно да се сведочи?
3. За кои аспекти од службата се потребни храброст и самопожртвуваност?
3 Храброст и самопожртвуваност: Кога Јона сфатил дека неговата лоша одлука им го довела во опасност животот на морнарите, тој бил спремен да го жртвува својот живот (Јона 1:3, 4, 12). Подоцна, додека ја извршувал својата задача во Ниневија, навлегол длабоко во градот, можеби за да најде соодветно место каде што ќе ја објавува осудата од Јехова. Кукавица не би го направил ова, ама еден храбар пророк на Бог, да! (Јона 3:3, 4). А како е со нас? За да можеме смело да сведочиме и покрај противење, потребна ни е храброст од Бог (Дела 4:29, 31). За да даваме од своето време и средства во службата, мораме да бидеме самопожртвувани (Дела 20:24).
4. Зошто да размислуваме за примерот што ни го дале пророците на Јехова?
4 Секојпат кога читаш нешто за некој Јеховин пророк, замисли се себеси во неговите околности. Тоа може многу да ти помогне. Прашај се: ‚Што ќе направев јас да бев на негово место? Како и јас да ги покажувам неговите убави особини?‘ (Евр. 6:11, 12). Во Нашата служба за Царството ќе има статии и за други верни пророци на Јехова од кои можеме многу да учиме.