13. Како може да ни помогне тоа што подобро ќе разбереме на кој начин размислувал Исус?

¹³ Кога ќе сфатиме како размислувал Исус, ќе ни биде полесно да разбереме и некои извештаи од Библијата кои ни биле тешки за разбирање. На пример, да видиме што му рекол Јехова на Мојсеј откако Израелците си направиле златно теле и почнале да му се клањаат. Бог рекол: „Погледнав на тој народ и гледам дека е непокорен народ. Пушти ме сега мојот гнев да се разгори против нив и да ги истребам, а од тебе ќе направам голем народ!“ (2. Мој. 32:9, 10).

14. Како му одговорил Мојсеј на Јехова?

¹⁴ Извештајот продолжува: „Мојсеј настојуваше да го смилостиви лицето на Јехова, својот Бог, велејќи: ‚Јехова, зошто да се разгорува твојот гнев против твојот народ што го изведе од египетската земја со голема сила и со силна рака? Зошто да речат Египќаните: „Ги изведе со зла намера за да ги погуби во планините и да ги истреби од лицето на земјата“? Стивни го својот распламтен гнев и нека ти биде жал за злото што сакаше да му го нанесеш на својот народ! Сети се на Авраам, Исак и Израел, твоите слуги, на кои ти им се заколна во себе и им рече: „Ќе го намножам вашето потомство за да го има како ѕвездите на небото, и целата оваа земја за која зборував ќе му ја дадам на вашето потомство да ја поседува засекогаш!“‘ И Јехова зажали поради тоа што рече дека ќе му нанесе зло на својот народ“ (2. Мој. 32:11-14).a

15, 16. а) Каква можност добил Мојсеј благодарение на она што го кажал Јехова? б) Во која смисла Јехова ‚зажалил‘?

¹⁵ Дали навистина имало потреба Мојсеј да го исправи Јеховиното размислување? Во никој случај! Иако Јехова кажал што би можел да реши да направи, тоа не била негова конечна одлука. Всушност, овде тој го испитал Мојсеј, исто како што подоцна Исус ги испитал Филип и Гркинката. Бог му дал можност на Мојсеј да го покаже својот став.b Јехова го поставил за посредник меѓу Израел и Него, и ја почитувал улогата што му ја дал. Дали Мојсеј ќе дозволел да го совладаат чувства на огорченост и лутина? Дали ќе ја искористел оваа шанса за да му каже на Јехова да ги отфрли Израелците и да направи моќен народ од неговите потомци?