Дали пророштвата во врска со Месијата докажуваат дека Исус е Месијата?

Да. Додека бил на Земјата, Исус исполнил голем број пророштва за „Месијанскиот Водач“ кој требало да биде „Спасител на светот“ (Даниел 9:25; 1. Јованово 4:14). Дури и по својата смрт, Исус исполнил некои пророштва за Месијата (Псалм 110:1; Дела 2:34-36).

• Што значи изразот Месија?

• Дали е можно пророштвата за Месијата да се исполниле на повеќе личности?

• Можно ли е Месијата допрва да се појави?

• Колку пророштва во врска со Месијата има во Библијата?

• Некои пророштва за Месијата кои се исполниле на Исус

Зборот „Месија“ кој потекнува од хебрејскиот јазик и зборот „Христос“ кој потекнува од грчкиот јазик значат „Помазаник“. Според тоа, „Исус Христос“ значи „Исус Помазаникот“ или „Исус Месијата“.

Во библиски времиња, кога некој бил поставуван на некоја посебна положба, обично му било излевано масло врз главата (3. Мојсеева 8:12; 1. Самоилова 16:13). Бог го поставил Исус за Месија, и со тоа му дал положба со голем авторитет (Дела 2:36). Меѓутоа, Бог не го помазал Исус со масло, туку со свет дух (Матеј 3:16).

Не. Исто како што еден отпечаток на прст укажува само на еден човек, така и исполнувањето на библиските пророштва укажува дека има само еден Месија или Христос. Сепак, Библијата нѐ предупредува дека „ќе се појават лажни Христоси и лажни пророци и ќе прават големи знаци и чуда за да ги заведат, ако е можно, и избраните“ (Матеј 24:24).

Не. Библијата прорекла дека Месијата ќе биде потомок на израелскиот цар Давид (Псалм 89:3, 4). Но, еврејските родословни записи кои воделе до Давид, денес не постојат. Тие очигледно биле уништени во 70 год. од н.е., кога Римјаните го освоиле Ерусалим.a Оттогаш, за никој не може да се докаже дека потекнува од царската лоза на Давид. Но, со оглед на тоа дека во времето на Исус постоеле родословните записи, дури ни неговите непријатели не можеле да оспорат дека тој е потомок на Давид (Матеј 22:41-46).

Не е можно точно да се прецизира вкупниот број на пророштва за Месијата. Една причина за тоа е различниот начин на кој можат да се бројат пророштвата дури и во извештаи за кои јасно се гледа дека се однесуваат на Месијата. На пример, во Исаија 53:2-7 се спомнуваат неколку детали кои се однесуваат на Месијата. Некои би можеле да гледаат на овој извештај како на едно пророштво, додека други би можеле да го сметаат секој детаљ за одделно пророштво.