Што вели Библијата

Дали е во ред еден пар да живее заедно пред брак?

ДАЛИ би купил костум или фустан без прво да го пробаш? Веројатно не. Впрочем, ако подоцна увидиш дека не ти одговара, ќе сфатиш дека залудно си ги потрошил и времето и парите.

Многу луѓе размислуваат на сличен начин и во врска со бракот. Тие сметаат дека е подобро мажот и жената да живеат заедно пред законски да стапат во брак. Обично си мислат: ‚Ако не им оди, тогаш двајцата можат едноставно да се разделат без да минуваат низ комплициран и скап развод‘.

Можеби некои од оние што размислуваат вака имале можност да видат како некој нивни пријател или пријателка се малтретирани од брачниот партнер. Или, пак, биле сведоци на траумите низ кои минуваат некои брачни партнери кои повеќе не се сакаат. Поради тоа, можеби сметаат дека е мудро да се живее заедно пред да се стапи во брак за да се избегнат проблеми во иднина.

Што вели Библијата во врска со ова? За да одговориме на ова прашање, најпрво треба да видиме што вели Божјата реч во врска со бракот.

„Едно тело“

Библијата содржи возвишено гледиште за бракот, и ова не нѐ изненадува бидејќи брачната заедница ја основал и ја озаконил лично Јехова Бог (1. Мојсеева 2:21-24). Уште од почетокот, Јехова имал намера со брачната врска мажот и жената да станат „едно тело“ (1. Мојсеева 2:24). Откако го цитирал стихот од Библијата каде што се кажува ова, Исус додал: „Бог што составил, човек да не разделува!“ (Матеј 19:6).

Точно е дека некои што стапуваат во брак подоцна се разведуваат.a Но, кога ќе се случи вакво нешто, причината не е тоа што му фали нешто на бракот како институција. Напротив, причината за разводот е тоа што или едниот или, пак, двајцата сопружници не живееле во склад со брачниот завет.

Размисли за следнава споредба: Да речеме дека еден пар, маж и жена, имаат кола, но не ја одржуваат според упатствата од производителот. Ако колата се расипе поради тоа, кој е виновен? Производителот или сопствениците кои воопшто не ја одржувале?

Истото начело важи и за бракот. Кога мажот и жената работат на својот меѓусебен однос и се решени да ги применуваат библиските совети кога ќе се појават проблеми, постои многу мала веројатност дека ќе се разведат. Кога двајца луѓе стапуваат во брак, тие се обврзуваат еден кон друг, и тоа им помага да се чувствуваат сигурни. Тогаш бракот претставува една врска полна со љубов.

‚Воздржувајте се од блуд‘

Сепак, можеби некој ќе праша: „Но, зошто да не живеат заедно пред да се земат? Зарем нема да покажат почит кон светоста на бракот со тоа што врската ќе ја стават на проба пред да го направат тој сериозен чекор?“

Библијата дава јасен одговор. Павле напишал: ‚Воздржувајте се од блуд‘ (1. Солуњаните 4:3). Изразот „блуд“ се однесува на секаков вид полови односи надвор од бракот. Ова би вклучувало и сексуални односи меѓу двајца кои живеат заедно невенчано, независно од тоа што имаат намера еден ден да се земат. Значи, според Библијата, погрешно е еден пар да живее заедно, дури и ако двајцата планираат подоцна да стапат во брак.

Дали ова библиско гледиште е старомодно? Некои можеби мислат дека е. На крајот на краиштата, во многу земји, ваквото заедничко живеење — сеедно дали тој пар има намера да се венча или не — се смета за нешто најнормално. Но, размисли за последиците. Дали оние што живеат невенчано ја откриле тајната на семејната среќа? Дали се посреќни од паровите што стапуваат во брак? Дали паровите што живееле невенчано поретко се изневеруваат откако ќе стапат во брак? Истражувањата покажуваат дека не е така. Всушност, брачните двојки што живееле невенчано пред да се земат имаат повеќе проблеми во бракот и почесто се разведуваат.

Некои стручњаци можеби тврдат дека резултатите од ваквите истражувања не се точни. „Оние што решаваат да стапат во брак без пред тоа [да живеат заедно] се поинаков тип на луѓе од оние што решаваат прво [да живеат заедно]“, пишува еден психолог. Тој тврди дека проблемот не е главно во тоа дали некој живее заедно невенчано, туку „дали воопшто има ценење за бракот“ како институција.

Дури и ако ова е вистина, сепак, нагласува колку е важно да гледаме на бракот како што гледа Бог. Библијата вели: „Бракот нека биде чесен меѓу сите“ (Евреите 13:4). Кога еден маж и една жена се заветуваат дека ќе бидат и ќе останат едно тело, и потоа покажуваат почит кон брачната заедница, тие формираат една врска што не може лесно да се скине (Проповедник 4:12).

Ако сега се вратиме на примерот што го наведовме во почетокот, навистина е во ред да пробаме еден костум или фустан пред да го купиме. Сепак, оваа споредба не може да се примени на заедничкото живеење пред брак. Но, може да укаже дека треба да си дадеш доволно време за да ја запознаеш личноста која ја гледаш како свој иден брачен другар. Овој многу важен, но честопати занемарен чекор, е една од многуте тајни на среќните семејства.

[Фуснота]

ШТО МИСЛИШ?

◼ Зошто Библијата вели дека половите односи се дозволени само меѓу двајца што се во брак? (Псалм 84:11; 1. Коринќаните 6:18)

◼ Какви особини треба да бараш кај идниот брачен партнер? (Рут 1:16, 17; Изреки 31:10-31)

[Рамка на страница 29]

‚ГРЕШИ ПРОТИВ СОПСТВЕНОТО ТЕЛО‘

Библијата вели: „Кој прави блуд, греши против своето сопствено тело“ (1. Коринќаните 6:18). Во последниве децении, вистинитоста на овие зборови беше потврдена со смртта на милиони лица од СИДА и од други венерични болести. Но, ова не е сѐ. Истражувањата покажуваат дека депресијата и обидите за самоубиство се многу почести меѓу младите кои се сексуално активни. Менувањето на партнерите честопати води до несакана бременост, што во некои случаи завршува и со абортус на нероденото дете. Со оглед на сите овие факти, слободно може да се каже дека библиските морални мерила не се старомодни.