Големо мноштво од вистински обожаватели — од каде дошло?

„Ете, големо мноштво . . . од сите племиња и колена, народи и јазици; тие стоеја пред престолот и пред Агнецот“ (ОТКРОВЕНИЕ 7:9).

1. Зошто пророчките визии од Откровението се од голем интерес за нас денес?

КОН крајот на првиот век н. е., апостол Јован видел визии за чудесни настани поврзани со Јеховината намера. Некои од работите што ги видел во визија се исполнуваат токму сега. Други треба да се исполнат во блиска иднина. Сите тие се вртат околу драматичната кулминација на Јеховината величествена намера да го посвети своето име пред сето творештво (Језекиил 38:23; Откровение 4:11; 5:13). Освен тоа, тие ги вклучуваат и изгледите за живот на секого од нас. На кој начин?

2. а) Што видел апостол Јован во четвртата визија? б) Кои прашања во врска со оваа визија ќе ги разгледаме?

² Во четвртата од серијата визии во Откровението, Јован видел како ангелите ги задржуваат ветровите на уништувањето додека „слугите на нашиот Бог“ не бидат запечатени на нивните чела. Потоа видел еден крајно восхитувачки настан — ‚големо мноштво народ, коешто никој не можел да го преброи, од сите племиња и колена, народи и јазици‘, обединети во обожавањето на Јехова и во оддавањето чест на неговиот Син. На Јован му било речено дека овие луѓе се оние кои ќе излезат од големата неволја (Откровение 7:1-17). Кои се тие што се опишани како ‚слуги на нашиот Бог‘? И кој ќе го сочинува ‚големото мноштво‘ преживеани од неволјата? Дали ти ќе се најдеш меѓу нив?

Кои се „слугите на нашиот Бог“?

3. а) Како го илустрирал Исус својот однос со своите следбеници во Јован 10:1-18? б) Што им овозможил Исус на своите овци преку неговата жртвена смрт?

³ Околу четири месеци пред неговата смрт, Исус зборувал за себе како за ‚Добар Пастир‘, а за своите следбеници како за „овци“ за кои ќе го положи својот живот. Тој особено се осврнал на овците што ги нашол во симболичното трло, на кои потоа им посветил посебна грижа (Јован 10:1-18).a Исус со љубов ја предал својата душа во корист на своите овци, и ја дал откупната цена што е потребна за да ги ослободи од грев и смрт.

4. Кои биле првите коишто биле собрани како овци, во согласност со она што Исус им го кажал овде?

⁴ Но, пред да го стори тоа, Исус, како Добар Пастир, лично ги собрал учениците. Јован Крстител, „вратарот“ од Исусовата илустрација, му ги претставил првите од нив. Исус барал луѓе кои би ја искористиле приликата да станат дел од комбинираното „Авраамово семе“ (1. Мојсеева 22:18; Галатјаните 3:16, 29). Во нивните срца тој негувал ценење за Царството на небесата и им ветил дека ќе им подготви место во домот на неговиот небесен Татко (Матеј 13:44-46; Јован 14:2, 3). Тој прикладно рекол: „Од деновите на Јован Крстител па досега, Царството небесно е целта кон која луѓето се тискаат, и оние кои се пробиваат напред го зграпчуваат“ (Матеј 11:12, НС). Оние кои го следеле за да ја постигнат таа цел, се покажале дека се од трлото за коешто зборувал Исус.

5. а) Кои се „слугите на нашиот Бог“ на кои се осврнува Откровение 7:3-8? б) Што покажува дека требало уште многу други да им се придружат на духовните Израелци во обожавањето?

⁵ Во Откровение 7:3-8, и оние кои успешно се пробивале напред кон таа небесна цел, означени се како ‚слуги на нашиот Бог‘. (Види 1. Петрово 2:9, 16.) Дали тие 144.000 што се споменати таму, се само природни Евреи? Дали оние од симболичното трло од Исусовата илустрација се само Евреи? Воопшто не; тие се членови на духовниот Израел Божји, и сите тие се придружници на Христос во духовното Авраамово семе (Галатјаните 3:28, 29; 6:16; Откровение 14:1, 3). Се разбира, на крајот требало да дојде време кога утврдениот број ќе биде пополнет. А што потоа? Како што прорекла Библијата, и други — големо мноштво од нив — требало да им се придружат на овие духовни Израелци во обожавањето на Јехова (Захарија 8:23).

Дали ‚другите овци‘ се пагански христијани?

6. На каков развој на настаните укажува Јован 10:16?

⁶ Откако го спомнал едното трло во Јован 10:7-15, Исус вклучил и една друга група во општиот развој на настаните, велејќи: „И други овци имам, што не се од ова трло, и нив треба да ги приберам; и ќе го чујат гласот Мој и ќе биде едно стадо и еден пастир“ (Јован 10:16). Кои се тие „други овци“?

7, 8. а) Зошто идејата дека другите овци се пагански христијани се темели на погрешна претпоставка? б) Кои факти во врска со Божјата намера за Земјата треба да влијаат врз нашето разбирање за тоа кои се другите овци?

⁷ Коментаторите на т. н. христијанство главно го прифаќаат гледиштето дека овие други овци се пагански христијани, а оние во трлото на коишто порано се осврнал се еврејски христијани кои биле под Сојузот на законот, и дека обете групи одат на небо. Но, Исус се родил како Евреин и уште од раѓањето бил под Сојузот на законот (Галатјаните 4:4). Понатаму, оние коишто ги сметаат другите овци за пагански христијани кои ќе бидат наградени со небесен живот, испуштаат од вид еден важен аспект на Божјата намера. Кога Јехова ги создал првите луѓе и ги сместил во градината Едем, тој објаснил дека неговата намера била Земјата да биде населена и целата да стане рај, а нејзините човечки чувари засекогаш да се радуваат на животот — под услов да го почитуваат и да го слушаат својот Творец (1. Мојсеева 1:26-28; 2:15-17; Исаија 45:18).

⁸ Кога Адам згрешил, Јеховината намера не се изјаловила. Бог од љубов направил подготовка за Адамовото потомство да ја има можноста да ужива во она што Адам не го ценел. Јехова прорекол дека тој ќе подигне избавител, семе, преку кое ќе бидат благословени сите народи (1. Мојсеева 3:15; 22:18). Тоа ветување не значело дека сите добри луѓе на Земјата ќе бидат земени на небо. Исус ги поучил своите следбеници да молат: „Да дојде царството Твое; да биде волјата Твоја, како на небото, така и на земјата“ (Матеј 6:9, 10). Кратко пред да ја каже илустрацијата запишана во Јован 10:1-16, Исус им рекол на своите ученици дека неговиот Татко се согласил да му го даде небесното Царство само на едно „мало стадо“ (Лука 12:32, 33). Така, кога читаме дека Исус се прикажал себеси како Добар Пастир кој ја предава душата во корист на своите овци, би било погрешно да не го земеме предвид и поголемиот дел од оние коишто Исус ги зема под својата љубезна грижа, односно оние кои станале земски поданици на неговото небесно Царство (Јован 3:16).

9. Што разбрале Истражувачите на Библијата уште во 1884 за идентитетот на другите овци?

⁹ Уште во 1884, Стражарска кула ги идентификувала другите овци како луѓе на кои ќе им биде дадена прилика да живеат на оваа Земја под услови под коишто ќе се исполни Божјата првобитна намера. Тие рани Истражувачи на Библијата сфатиле дека некои од овие други овци ќе бидат луѓе кои живееле и умреле пред Исусовата земска служба. Меѓутоа, имало некои поединости коишто тие не ги разбрале исправно. На пример, мислеле дека собирањето на другите овци ќе се случи дури откако сите помазаници ќе ја добијат својата небесна награда. Па сепак, недвојбено сфатиле дека другите овци не биле само пагански христијани. Приликата да станат други овци им е отворена и на Евреите и на паганите, на луѓето од сите народи и раси. (Спореди Дела 10:34, 35.)

10. Какви мораме да бидеме за да припаѓаме на оние коишто Исус вистински ги смета за свои други овци?

¹⁰ За да одговараат на описот што го дал Исус, другите овци мораат да бидат луѓе кои, без оглед на расното или етничкото потекло, го признаваат Исус Христос како Добар Пастир. Што подразбира тоа? Мораат да покажуваат кроткост и спремност да бидат водени — особини што се карактеристични за овците (Псалм 36:11). Како малото стадо, и тие мораат да ‚го познаваат гласот [на добриот пастир]‘ и да не дозволат да бидат водени од други кои можеби сакаат да влијаат врз нив (Јован 10:4; 2. Јованово 9, 10). Мораат да ја ценат важноста на она што го сторил Исус кога ја предал својата душа во корист на неговите овци и да покажуваат целосна вера во таа подготовка (Дела 4:12). Мораат да го ‚слушаат‘ гласот на Добриот Пастир кога тој ги подбудува да му принесуваат света служа само на Јехова, најнапред да го бараат Царството, да се држат одделени од светот и да покажуваат самопожртвувана љубов еден кон друг (Матеј 4:10; 6:31-33; Јован 15:12, 13, 19). Дали ти одговараш на описот на оние коишто Исус ги смета за свои други овци? Дали би сакал? Каков само скапоцен однос се овозможува за сите оние кои вистински стануваат Исусови други овци!

Почит кон власта на Царството

11. а) Што рекол Исус за овците и јарците кога зборувал за знакот на неговата присутност? б) Кои се браќата на коишто се осврнува Исус?

¹¹ По повеќе месеци откако ја дал горната илустрација, Исус повторно бил во Ерусалим. Додека седел на Елеонската Гора, од каде што се гледало подрачјето на храмот, тој им кажал на своите ученици повеќе детали за ‚знакот на неговото доаѓање [присутност, НС] и за свршетокот на светот‘ (Матеј 24:3). Повторно зборувал за собирањето на овците. Меѓу другото, рекол: „Кога ќе дојде Синот Човечки во Својата слава и сите свети ангели со Него, тогаш ќе седне на престолот на славата Своја, и ќе се соберат пред Него сите народи; па ќе ги оддели едни од други, како што овчарот ги одделува овците од козите; и ќе ги постави овците од Својата десна страна, а козите од левата“. Во оваа парабола Исус покажал дека оние на коишто Царот им обрнал внимание, ќе бидат судени на темел на тоа како постапувале со неговите „браќа“ (Матеј 25:31-46). Кои се овие браќа? Тие се духовно родени христијани, па затоа се ‚Божји синови‘. Исус е Божјиот првороден Син. Според тоа, тие се Христови браќа. Тие се „слугите на нашиот Бог“, споменати во Откровение 7:3, односно оние кои се избрани од човештвото за да учествуваат со Христос во неговото небесно Царство (Римјаните 8:14-17).

12. Зошто е од голема важност начинот на којшто луѓето постапуваат со Христовите браќа?

¹² Начинот на кој другите луѓе постапуваат со овие наследници на Царството е од животоважно значење. Дали ти гледаш на нив онака како што гледаат Исус Христос и Јехова? (Матеј 24:45-47; 2. Солунјаните 2:13). Нечиј став спрема овие помазаници го одразува неговиот став спрема самиот Исус Христос и спрема неговиот Татко, Универзалниот Суверен (Матеј 10:40; 25:34-46).

13. До кој обем Истражувачите на Библијата во 1884 ја разбрале параболата за овците и козите?

¹³ Во изданието од август 1884, Стражарска кула исправно укажала на тоа дека „овците“ од оваа парабола се оние кои пред себе го имаат изгледот за совршен живот на Земјата. Исто така било разбрано дека параболата сигурно ќе има своја примена кога Христос ќе владее од својот славен небесен престол. Сепак, во тоа време тие не разбрале јасно кога ќе започне тој со делото на одвојување што е опишано таму, или колку долго тоа ќе трае.

14. Како едно конгресно предавање во 1923 им помогнало на Истражувачите на Библијата да сфатат кога требало да се исполни Исусовата пророчка парабола?

¹⁴ Меѓутоа, во едно конгресно предавање во 1923, тогашниот претседател на Watch Tower Society, Џ. Ф. Ратерфорд, го објаснил времето кога ќе се исполни параболата за овците и јарците. Зошто? Делумно затоа што параболата покажува дека браќата на Царот — барем некои од нив — сѐ уште ќе бидат на Земјата. Меѓу луѓето, само неговите духовно родени следбеници можат навистина да бидат наречени негови браќа (Евреите 2:10-12). Тие нема да бидат на Земјата за време на Милениумот за да им дадат на луѓето прилика да им прават добро онака како што опишал Исус (Откровение 20:6).

15. а) Кои настани им помогнале на Истражувачите на Библијата исправно да ги идентификуваат овците од Исусовата парабола? б) Како докажале овците дека го ценат Царството?

¹⁵ Во тоа предавање од 1923, бил направен напор да бидат идентификувани оние кои ќе одговараат на Господовиот опис за овците и јарците, но требало да се разберат и други работи пред да се разјасни полното значење на параболата. Во текот на следните години, Јехова прогресивно го свртувал вниманието на неговите слуги кон овие важни поединости. Во 1927, во нив спаѓало јасното разбирање дека „верниот и разумен роб“ го претставува целото тело од духовно помазани христијани на Земјата; во 1932 била признаена потребата бестрашно да се идентификуваат како оние кои се тесно поврзани со Јеховините помазани слуги, токму онака како што сторил Јонадав со Јуј (Матеј 24:45, НС; 4. Царства 10:15). Во тоа време, на темел на Откровение 22:17, овие лица слични на овци биле особено охрабрени да учествуваат во носењето на пораката за Царството до другите луѓе. Нивното ценење за Месијанското Царство требало да ги поттикне не само да ја прошират човечката љубезност спрема Господовите помазаници туку и да ги предадат своите животи на Јехова преку Христос и тесно да се поврзат со неговите помазаници, така што ревносно ќе учествуваат во делото што го вршат тие. Дали ти го правиш тоа? На оние кои го прават тоа, Царот ќе им рече: „Елате, благословени од Мојот Отец; наследете го царството, приготвено за вас од почетокот на светот“. Пред нив ќе биде величествениот изглед за совршен вечен живот во земското подрачје на Царството (Матеј 25:34, 46).

‚Големото мноштво‘ — Каде оди тоа?

16. а) Какви погрешни сфаќања имале раните Истражувачи на Библијата во врска со идентитетот на големото мноштво, односно големата толпа од Откровение 7:9? б) Кога и на темел на што било исправено нивното гледиште?

¹⁶ Едно време Јеховините слуги верувале дека големото мноштво (или големата толпа) од Откровение 7:9, 10 се разликува од другите овци од Јован 10:16 и од овците од Матеј 25:33. Бидејќи Библијата вели дека тие ‚стојат пред престолот‘, се мислело дека ќе бидат на небото, но не на престоли, владеејќи како сонаследници со Христос, туку на споредно место пред престолот. Тие биле сметани за помалку верни христијани кои не покажувале дух на вистинска самопожртвуваност. Во 1935 тоа гледиште било исправено.b Едно испитување на Откровение 7:9 во светлина на стиховите како што е Матеј 25:31, 32, објаснило дека овде на Земјата луѓето би можеле да бидат „пред престолот“. Исто така било истакнато дека Бог нема две мерила за верност. Сите оние кои ќе го имаат неговото одобрување, мораат да задржат беспрекорност спрема него (Матеј 22:37, 38; Лука 16:10).

17, 18. а) Кој фактор од 1935 наваму придонел за големиот пораст на бројот на оние кои очекуваат вечен живот на Земјата? б) Во кое животоважно дело ревносно учествуваат оние од големото мноштво?

¹⁷ Јеховиниот народ долги години зборувал за Божјите ветувања во врска со Земјата. Поради она што очекувале да се случи во 1920-тите, тие објавувале дека „Милиони кои сега живеат нема никогаш да умрат“. Но, во тоа време немало милиони кои ги прифатиле Божјите подготовки за живот. Кај повеќето кои ја прифатиле вистината, светиот дух ја побудил надежта за небесен живот. Меѓутоа, особено по 1935 се случила една значајна промена. Не се работело за тоа дека Стражарска кула ја игнорирала надежта за вечен живот на Земјата. Со децении Јеховините слуги зборувале за ова и ги барале оние кои одговараат на библискиот опис. Сепак, во свое време, Јехова се погрижил тие самите да се покажат.

¹⁸ Расположливите записи покажуваат дека долги години, повеќето присутни на Спомен-свеченоста земале од симболите. Но, во текот на 25 години по 1935, бројот на присутните на годишниот Спомен на Христовата смрт порасна за повеќе од стопати во однос на бројот на оние кои зеле од симболите. Кои биле овие другите? Потенцијалните членови на големото мноштво. Очигледно дошло Јеховиното време да ги собере и подготви за преживување на големата неволја што претстои. Како што било проречено, тие дошле „од сите племиња и колена, народи и јазици“ (Откровение 7:9). Тие ревносно учествуваат во делото што го претскажал Исус кога рекол: „Ќе биде проповедано ова Евангелие за царството по целиот свет, за сведоштво на сите народи; и тогаш ќе дојде крајот“ (Матеј 24:14).

[Фусноти]

Како ќе одговориш?

◻ Зошто визијата од Откровение, поглавје 7, е од посебен интерес?

◻ Зошто другите овци од Јован 10:16 не се ограничени само на паганските христијани?

◻ Што мора да важи за оние кои одговараат на библискиот опис за другите овци?

◻ Како параболата за овците и козите ја истакнува почитта спрема власта на Царството?

◻ Што покажува кога дошло Јеховиното време да го собере големото мноштво од Откровение 7:9?