യഹസ്‌കേൽ
4 “മനുഷ്യപുത്രാ, ഒരു ഇഷ്ടിക എടുത്ത്‌ നിന്റെ മുന്നിൽ വെക്കുക. എന്നിട്ട്‌, അതിൽ യരുശലേംനഗരത്തിന്റെ രൂപം വരഞ്ഞുണ്ടാക്കുക. 2 അതിനെ ഉപരോധിക്കണം.+ അതിന്‌ എതിരെ ഉപരോധമതിൽ പണിയണം.+ ആക്രമിക്കാൻവേണ്ടി, ചെരിഞ്ഞ തിട്ട ഉണ്ടാക്കണം.+ ചുറ്റും പാളയമടിക്കണം. യന്ത്രമുട്ടികളുമായി* അതിനെ വളയണം.+ 3 ഇരുമ്പുകൊണ്ടുള്ള ഒരു അപ്പക്കല്ല്‌ എടുത്ത്‌ നിനക്കും നഗരത്തിനും ഇടയിൽ ഒരു ഇരുമ്പുമതിലായി വെച്ച്‌ നഗരത്തിനു നേരെ നീ മുഖം തിരിക്കുമ്പോൾ അത്‌ ഉപരോധത്തിലാകും. അങ്ങനെ, നീ അതിനെ ഉപരോധിക്കും. ഇത്‌ ഇസ്രായേൽഗൃഹത്തിന്‌ ഒരു അടയാളമായിരിക്കും.+
4 “പിന്നെ, നീ ഇടതുവശം ചെരിഞ്ഞുകിടന്ന്‌ ഇസ്രായേൽഗൃഹത്തിന്റെ കുറ്റം വഹിക്കണം.+ നീ അങ്ങനെ കിടക്കുന്ന ദിവസങ്ങളത്രയും അവരുടെ കുറ്റം വഹിക്കും. 5 അവരുടെ കുറ്റത്തിന്റെ വർഷങ്ങൾക്കനുസരിച്ച്‌ ഞാൻ നിനക്കു 390 ദിവസം നിശ്ചയിക്കും.+ അങ്ങനെ, ഇസ്രായേൽഗൃഹത്തിന്റെ കുറ്റം നീ വഹിക്കും. 6 നീ ആ ദിവസങ്ങൾ തികയ്‌ക്കണം.
“അടുത്തതായി നീ വലതുവശം ചെരിഞ്ഞുകിടന്ന്‌ 40 ദിവസം യഹൂദാഗൃഹത്തിന്റെ കുറ്റം വഹിക്കണം.+ ഒരു വർഷത്തിന്‌ ഒരു ദിവസംവെച്ച്‌ ഞാൻ നിനക്കു തരുന്നു. ഒരു വർഷത്തിന്‌ ഒരു ദിവസം! 7 നീ കൈ തെറുത്തുകയറ്റി യരുശലേമിന്റെ ഉപരോധത്തിനു+ നേരെ മുഖം തിരിക്കുക. അതിന്‌ എതിരെ നീ പ്രവചിക്കണം.
8 “നിന്റെ ഉപരോധദിവസങ്ങൾ പൂർത്തിയാകുന്നതുവരെ നീ ഒരു വശത്തുനിന്ന്‌ മറുവശത്തേക്കു തിരിയാതിരിക്കാൻ ഞാൻ നിന്നെ കയറുകൊണ്ട്‌ വരിഞ്ഞുകെട്ടും.
9 “നീ ഗോതമ്പ്‌, ബാർളി, വലിയ പയർ, പരിപ്പ്‌, തിന, വരക്‌* എന്നിവ ഒരു പാത്രത്തിൽ എടുത്ത്‌ നിനക്കു കഴിക്കാൻ അപ്പം ഉണ്ടാക്കുക. നീ ഒരു വശം ചെരിഞ്ഞുകിടക്കുന്ന ദിവസങ്ങൾ, 390 ദിവസം, അതു കഴിക്കണം.+ 10 ഓരോ ദിവസവും അളന്നുതൂക്കി 20 ശേക്കെൽ* ഭക്ഷണം മാത്രമേ കഴിക്കാവൂ. നിശ്ചിതസമയങ്ങളിൽ മാത്രം അതു കഴിക്കുക.
11 “വെള്ളവും അളന്ന്‌ മാത്രമേ കുടിക്കാവൂ. ആറിലൊന്നു ഹീൻ* വെള്ളം നിശ്ചിതസമയങ്ങളിൽ മാത്രം കുടിക്കുക.
12 “ബാർളിയപ്പം തിന്നുന്നതുപോലെ നീ അതു തിന്നണം. ഉണങ്ങിയ മനുഷ്യമലം കത്തിച്ച്‌ അവർ കാൺകെ വേണം നീ അതു ചുടാൻ.” 13 യഹോവ ഇങ്ങനെയും പറഞ്ഞു: “ഞാൻ ജനതകൾക്കിടയിലേക്കു ചിതറിച്ചുകളയുന്ന ഇസ്രായേല്യർ ഇതേപോലെ അവിടെവെച്ച്‌ അശുദ്ധമായ അപ്പം കഴിക്കും.”+
14 അപ്പോൾ, ഞാൻ പറഞ്ഞു: “പരമാധികാരിയായ യഹോവേ, അരുതേ! എന്റെ ചെറുപ്പംമുതൽ ഇന്നുവരെ ഒരിക്കൽപ്പോലും, താനേ ചത്ത മൃഗത്തിന്റെയോ വന്യമൃഗം കടിച്ചുകീറിയതിന്റെയോ മാംസം കഴിച്ച്‌ ഞാൻ അശുദ്ധനായിട്ടില്ല.+ അശുദ്ധമായ* മാംസം ഞാൻ എന്റെ വായിൽ വെച്ചിട്ടുപോലുമില്ല.”+
15 അപ്പോൾ, ദൈവം എന്നോടു പറഞ്ഞു: “ശരി. മനുഷ്യമലത്തിനു പകരം ചാണകം ഉപയോഗിച്ച്‌ അപ്പം ചുട്ടുകൊള്ളൂ.” 16 ദൈവം എന്നോട്‌ ഇങ്ങനെയും പറഞ്ഞു: “മനുഷ്യപുത്രാ, ഇതാ ഞാൻ യരുശലേമിലെ ഭക്ഷ്യശേഖരം നശിപ്പിക്കുന്നു.*+ അവർക്കു വലിയ ഉത്‌കണ്‌ഠയോടെ, അളന്നുതൂക്കി അപ്പം തിന്നേണ്ടിവരും.+ വെള്ളവും പരിമിതമായതുകൊണ്ട്‌ അവർക്കു ഭയപ്പാടോടെ അളന്നെടുത്ത്‌ കുടിക്കേണ്ടിവരും.+ 17 ഇങ്ങനെ, അപ്പവും വെള്ളവും കിട്ടാതെ അവർ പരിഭ്രമിച്ച്‌ പരസ്‌പരം നോക്കിനിൽക്കും. തങ്ങളുടെ തെറ്റു കാരണം അവർ ക്ഷയിച്ചുപോകും.